Fautuaga mo le Ofoina o le Polosiua Po o Silasila Alofa mai ea le Atua ia i Tatou?

Pe a uma ona taʻua se mea na tupu e faanoanoa ai na taʻua i tala fou, ona e faapea atu lea:

“Pe na e tau mānatu ea pe aiseā ua lē taofia ai e le Atua puapuaga e oo i tagata pe afai e manatu moni mai lava iā i tatou? [Faatali mo se tali.] Ua aumai i lenei polosiua se tali e faamalieina ai i lenā fesili ma faaalia ai le mea o le a faia e le Atua i le lumanaʻi lata mai. [Faaali le ata i le itulau 27, ma faitau le Salamo 145:16 mai le palakalafa e 22.] O le a faapefea ona aveese e le Atua puapuaga uma ua oo i tagata? Ou te manaʻo ta te iloiloina lenā fesili i le isi aʻu asiasiga o loo sosoo mai.” Ofo le polosiua, ma faatulaga le toe asiga.

I le toe asiga, e te ono faapea atu:

“I le taimi mulimuli na ou asiasi mai ai, na ta faitauina ai le mau lenei. [Faitau po o le sii atu o le Salamo 145:16.] Sa ou lāgā ai le fesili: Po o le a faapefea ona aveesea e le Atua puapuaga uma ua oo i tagata?” Fai atu i ai e aumai lana polosiua. Ona suʻe lea i le itulau e 27-28, ona talanoaina lea o le palakalafa e 23-25. Ofo se suʻesuʻega faale-Tusi Paia, po o le faatulaga e iloiloina le palakalafa e 26-27 i le isi au asiasiga o sosoo mai.

E ono faapea atu se tagata talaʻi talavou:

“E toʻatele tagata talavou pei o aʻu o loo popole, po o le ā le tulaga o le a iai le lalolagi i le 10 po o le 15 tausaga i le lumanaʻi. O le ā sou manatu i le olaga o le a iai i lenā taimi? [Faatali mo se tali.] O faafitauli o loo tatou vaaia i aso nei ua faaalia ai e faapea, ua tatou ola i aso e gata ai. [Faitau 2 Timoteo 3:1-3.] O loo aumaia i lenei polosiua tali mo fesili o loo mulimuli mai. [Faitau fesili o loo i le faavaa ma ofo le polosiua.] Pe a ou toe foʻi mai, pe a lava sou taimi, ou te manaʻo ta te talanoa i se manatu faafiafia loto i le iʻuga o maʻi ma le tulaga matua.” Faatulaga e toe foʻi atu.

Pe a e toe foʻi, e te ono faapea atu:

“O la ta talanoaga mulimuli, sa ou taʻua ai faapea ou te manaʻo ta te talanoa i se manatu e faatatau i le iʻuga o maʻi ma le tulaga matua. Ma o loo maua i inei le manatu lenā.” Fai atu e aumai lana polosiua. Ona faitau lea ma talanoaina le palakalafa e 6-7 i le itulau 23-24. Faatulaga e talanoaina le palakalafa e 8-9 i le isi au asiasiga e sosoo ai.

Pe a galulue ma se tamaitiiti, e faailoa atu e le tagata matua i laʻua e ala i le faapea atu:

“Pe a tusa ma lou finagalo, e ma te mananaʻo e faitau atu le mau lenei. [Faitau e le tamaitiiti le Salamo 37:29 ma fai atu sina manatu puupuu.] O loo talanoaina i le polosiua lenei le auala o le a faataunuu ai e le Atua lana fuafuaga mo tagata faapea ma le lalolagi. [Faaali ata i le itulau 24-27.] Pe a ma toe ō mai, ona ma faasino atu lea o le folafolaga mataʻina o loo i le Tusi Paia e faatatau i le toe tū.” Ofo le polosiua, ma fuafua e toe foʻi atu.

I le toe asiga, e ono faapea atu le tagata matua:

“I laʻu asiasiga talu ai, na ta faitauina ai le Salamo 37:29, ma sa ou taʻua faapea ou te manaʻo e faaali atu le mea o loo fai mai ai le Tusi Paia e faatatau i se toe tū. Seʻi mātau mai le mea o loo taʻua i inei.” Fai atu i ai e aumai lana polosiua. Ona talanoaina lea o le palakalafa 12-14 i le itulau 24-25. Ofo se suʻesuʻega faale-Tusi Paia, po o le faatulaga e talanoaina le palakalafa e 15-16 i le isi au asiasiga e sosoo ai.