Polokalame Fou o le Aso Faapitoa o Fonotaga
Na matuā finafinau uluaʻi Kerisiano e faailoa atu le tala lelei i le tele e mafai ai ona o le faamalosi a le agaga paia. (Galu. 1:8; Kolo. 1:23) O le polokalame o le aso faapitoa o fonotaga mo le tausaga faaleauaunaga e 2007, Ia Tinoū e Taʻutino Atu le Upu, o le a faalaeiauina ai i tatou e faaaʻoaʻo i a latou faaaʻoaʻoga sili ona lelei.—Galu. 18:5.
Na taʻua e le tupu o Tavita e tusa ai o le afioga a le Atua: “E faamaoni poloaʻiga a Ieova, e faapotoina ai lē ua faigofie.” (Sala. 19:7) O le a fesoasoani le polokalame ua saunia lelei mo le aso faapitoa o fonotaga i le 2007, e faamatilatila ai le tāua o le Tusi Paia “e faatonu ai.” O le a faalaeiau ai foʻi i tatou e faaaogā le Afioga a le Atua e talaʻi ma aʻoaʻo atu ai i se uiga faanatinati. (2 Timo. 3:16, 17) O le a faaalia i le polokalame fou pe faapefea ona tatou ʻalofia faigatā, ma maua aogā i le faatatauina o taʻiala o le Tusi Paia i aso uma. O le a fesoasoani foʻi iā i tatou e faaaogā le Afioga a le Atua e fesoasoani ai i talavou ma ē fou ina ia agaʻigaʻi i luma faaleagaga.
Ia faamautinoa ua e iai i le taimi e amata ai le polokalame, ma ia uaʻi lelei. Ia fai ni faamaumauga o manatu e te fia faatatauina. Ia talisapaia faatonuga ma faamanatuga ua maua, ma ia manatunatu loloto i lou faatatauina o mea ua e aʻoaʻoina.
O le polokalame o le aso faapitoa o fonotaga, o le a tatou talisapaia atili ai le Afioga a le Atua, ma faamanatu mai ai le faamalolosi pea i le talaʻia ma le maelega o le tala lelei o le Malo. O le a faaalia ai foʻi pe faapefea ona tatou fesoasoani i isi e faia faapea. Ia maumauaʻi e aua neʻi misia so o se taʻitaʻiga faaleagaga ma faatonuga a Ieova ua saunia mai i lenei auala!—Isa. 30:20e, 21.