Le Auala e Amata ai Suʻesuʻega Faale-Tusi Paia ma Tagata na Tuu ai Mekasini
1. O le ā lo tatou sini mo mekasini na tuu i tagata?
1 E tele ina tatou faatāua i le talaʻiga i aso Toonaʻi le Olomatamata ma le Ala Mai! Peitaʻi, ua na o le laasaga muamua lea i lo tatou sini o le aʻoaʻoina o ē loto faamaoni i le upu moni. O le a faasino mai e fautuaga o loo i lalo, le auala e ofo ai le tusi o Aʻoaʻoga Moni a le Tusi Paia i se toe asiga ma amata ai se suʻesuʻega faale-Tusi Paia. E mafai ona fetuutuunaʻi e tusa ma la outou oganuu ma faaaogā au lava upu. E mafai ona e faaaogā se isi taulimaga ua e faaaogāina ma e taulau ai.
2. E faapefea ona faaaogā faatomuaga i itulau amata o le tusi o Aʻoaʻoga Moni a le Tusi Paia e amata ai se suʻesuʻega faale-Tusi Paia?
2 Faaaogā Faatomuaga o Loo i Itulau Amata: Pe a e toe asia le tagata, e mafai ona faapea atu: “O loo taulaʻi manatu o le mekasini na ou tuua, i le Tusi Paia. Mātau le māfuaaga e tāua ai le faitau o le Tusi Paia.” Faitau le Isaia 48:17, 18; Ioane 17:3; po o se isi mau talafeagai. A uma loa ona e faamatalaina i le tagata le tusi o Aʻoaʻoga Moni a le Tusi Paia, ma ua e tuu atu se tusi a lē ona le fale, ona e faapea atu loa lea:
◼ “O loo i le Tusi Paia le faamoemoe pupula mo le lumanaʻi.” Ona faaali lea i lē ona le fale le itulau e 4-5 ma fesili i ai, “O lē fea o nei folafolaga e te manaʻo e faataunuu?” Faasino le tagata i le mataupu o le a talanoa ai le folafolaga faale-Tusi Paia ua ia filifilia, ma talanoa puupuu se palakalafa e tasi pe lua pe a manaʻo ai.
◼ Pe e te fai atu foʻi, “E tali e le Tusi Paia fesili e sili ona tāua i le olaga.” Faauaʻi atu i le itulau e 6, ma fesili i ai, pe na iai se taimi na ia tomānatu ai i fesili o loo i le pito i lalo o le itulau. Suʻe i le mataupu o loo iai le tali, ma talanoa puupuu se palakalafa e tasi pe lua.
◼ Pe e te faasino atu i mataupu ma itulau o loo iai, ma fesili po o lē fea le mataupu e fiafia i ai. Suʻe i le mataupu lenā ma faataʻitaʻi puupuu le faiga o se suʻesuʻega faale-Tusi Paia.
3. E faapefea ona amata se suʻesuʻega faale-Tusi Paia i se tasi na tuua ai se mekasini e faatatau i le (a) tulaga ua matuā leaga o le lalolagi? (e) aiga? (i) maufaatuatuaina o le Tusi Paia?
3 Faatū se Fesili i le Uluaʻi Asiasiga: O le isi foʻi faiga o le faataatia lea o se faavae mo le toe asiga i le uluaʻi asiasiga. Pe a talia e lē ona le fale ia mekasini, faatū se fesili, ma fai i le tagata o le a e taliina le fesili i le isi au asiasiga. Taumafai e fai ni fuafuaga mautinoa mo se toe asiga, ma faamautinoa e te tausisi i na fuafuaga. (Mata. 5:37) Pe a e toe foʻi atu, toe faamanatu i lē ona le fale le fesili, ona talanoaina puupuu lea o tali mai le tusi o Aʻoaʻoga Moni a le Tusi Paia. Tuu i ai sana tusi e mulimuli mai ai i le talanoaga. O nisi nei o faataʻitaʻiga:
◼ Afai e faatatau le mekasini lea ua e tuua i tulaga ua matuā leaga o le lalolagi, e te ono faapea atu, “I le isi taimi o le a ta talanoa i le tali a le Tusi Paia i le fesili lenei, O ā suiga o le a faia e le Atua mo le lalolagi?” Faaaogā le itulau 4-5 pe a e toe foʻi. Pe e te faatū foʻi le fesili, “Po o le finagalo o le Atua e tutupu ai mala?” I le toe asiga, tataʻi lē ona le fale i le mataupu 1 palakalafa 7-8.
◼ Afai o le mekasini lea ua e tuua e faatatau i le aiga, faatū le fesili lenei a o leʻi tuua le fale, “E faapefea ona saosaolaumea tagata taʻitoʻatasi ina ia maua se aiga fiafia?” I le toe asiga ia talanoaina le mataupu 14 palakalafa 4.
◼ Afai o le mekasini lea ua e tuua e faatatau i le maufaatuatuaina o le Tusi Paia, ia faatū le fesili lenei mo le isi lua talanoaga, “Pe saʻo faamatalaga faasaienisi o loo i le Tusi Paia?” I le toe asiga, ia talanoa le mataupu 2 palakalafa 8.
4. O le ā le tatou mea e fai pe a lē talia e lē ona le fale le tusi o Aʻoaʻoga Moni a le Tusi Paia?
4 I le faaiʻuga o talanoaga taʻitasi, faatū se fesili e taliina i le isi asiasiga. E sologa lelei loa le suʻesuʻega, faagasolo loa mataupu o le tusi mai le amataga seʻia oo i le faaiʻuga. E faapefea pe a lē talia e lē ona le fale le tusi o Aʻoaʻoga Moni a le Tusi Paia? E mafai lava ona faaauau ona e ave i ai mekasini ma faia se talanoaga faale-Tusi Paia. A o e ati aʻe lona fiafia, atonu o le a ia talia ai se suʻesuʻega faale-Tusi Paia.
5. Aiseā tatou te taumafai ai e fai nisi taumafaiga na i lo le tau ina tuu mekasini i tagata?
5 E mafai ona faaosofia e Le Olomatamata ma le Ala Mai! le naunau o le tagata e suʻesuʻe po o ā aʻoaʻoga moni a le Tusi Paia. O lea la, ia fai se taumafaiga faapitoa e amata suʻesuʻega faale-Tusi Paia ma i latou e taliaina mekasini. I le faia faapea, o le a tatou gauaʻi ai i le faatonuga a Iesu e ‘fai soo ma aʻoaʻo atu iā te i latou.’—Mata. 28:19, 20.