‘Ia Faatumau iā te Outou i le Alofa o le Atua’
1. O le ā le fuafuaga na lomia ai le tusi ‘Ia Faatumau iā te Outou i le Alofa o le Atua’?
1 O loo tatou matuā naunau atu i le suʻesuʻeina o le tusi fou, ‘Ia Faatumau iā te Outou i le Alofa o le Atua’ i le Suʻesuʻega Faale-Tusi Paia a le Faapotopotoga lea e amata i le vaiaso o Fepuari 1! O le tusi mai le Vaega Pule lea sa avatu iā i latou uma e alolofa iā Ieova, na faaiʻu mai i upu nei: “Matou te faamoemoe o le a fesoasoani lenei tusi iā te oe, ina ia faaauau ai ona e faatatauina le upu moni i lou olaga, ma faapea ona e tumau ai ‘i le alofa o le Atua . . . lea e iʻu ai i le ola e faavavau.’—Iuta 21.”
2. O ā vala o le soifuaga o le a fesoasoani mai ai lenei tusi fou iā i tatou?
2 O Mea e Tepa Taulaʻi i Ai: E faapefea ona faatatauina mataupu silisili o le Tusi Paia i tulaga e pei o faatasitasiga, o faafiafiaga, o le faaaloalo i le pule, o masaniga a le tagata lava ia, o faaipoipoga, o le tautala, ma aganuu? E ao ona toleni o tatou lotofuatiaifo e tusa ai ma tapulaa maualuluga amiotonu e pei ona faailoa mai i le Afioga a le Atua. (Sala. 19:7, 8) A o faateleina lo tatou malamalamaga i le auala e manatu ai Ieova i mea, o le a uunaʻia ai i tatou e usitai iā te Ia ona e tatou te mananaʻo e faafiafia lona finagalo.—Faata. 27:11; 1 Ioa. 5:3.
3. Aiseā e ao ai ona fai le mea sili tatou te mafai ina ia fai ai sa tatou vaega i lesona i vaiaso taʻitasi?
3 Ia Maumauaʻi e Fai Sou Sao: A o fai au sauniuniga, ia fai ma ou sini le avatu o viiga i le Atua i le faapotopotoga o ona tagata. (Epe. 13:15) O le a suʻesuʻeina faatasi e le faapotopotoga uma lenei tusi fou. Ona o le a pupuu vaega o le tusi e suʻesuʻe, o le a maua ai e i tatou uma le avanoa e sauniuni lelei ai, ma faasoa atu ai ma le mautinoa mea ua tatou aʻoaʻoina. O a tatou tali e saunia lelei ma faapuupuu, e faatupu ai le alofa ma galuega lelei i isi ma saosaolaumea i se talanoaga ola ma uigā o le mataupu. (Epe. 10:24) E lē gata i lea, tatou te maua foʻi le fiafia pe a tatou faamatala i isi lo tatou faatuatua.
4. Aiseā e tatau ai ona tatou usitaia poloaʻiga a Ieova?
4 I le pō mulimuli o lona soifuaga o se tagata i le lalolagi, sa faafesootaʻia ai e Iesu le usitaia o poloaʻiga a Ieova ma le tumau i le alofa o le Atua. (Ioa. 15:10) E ala la i le fesoasoani mai a le tusi lenei ‘Alofa o le Atua,’ o le a sili atu ai ona tatou matuā filifili e faatatau mataupu silisili o le Tusi Paia i o tatou olaga i aso taʻitasi, ma ‘tatou tumau ai i le alofa o le Atua.’—Iuta 21.