Ia Saʻilia Ē ua Tatau i Ai

1. E faapefea ona tatou faaalia le talisapaia o le faaeaga e auauna ai i le faiva?

¹ I le taimi o le faiva a Iesu, e anoanoaʻi taumafaiga sa ia faia ina ia oo atu le tala lelei e faamāfanafanaina ai i ē loto maulalo. (Isa. 61:1, 2) I le avea ai ma sāvali, ma sui o Keriso, ua iā i tatou i aso nei se faaeaga tautele, o le faaaʻoaʻo lea iā te ia i la tatou saʻiliga maeʻaeʻa ma le lē faalogologo tigā o ē ua tatau i ai la tatou galuega, o loo i a tatou oganuu.—Mata. 10:11; 2 Kori. 5:20.

2. Na faapefea ona iloa le fetuutuunaʻi o Paulo, ma o ā iʻuga na maua ai?

² Ia Fetuutuunaʻi: Sa fai ma masani a le aposetolo o Paulo le alu muamua i le sunako e talaʻi ai i tagata Iutaia, ma ē na liliu i le faa-Iutaia. (Galu. 14:1) I Filipi, na la ō atu ma Sila e suʻe tagata i le mea sa ‘⁠la manatu o se nofoaga e fai ai tatalo.’ O iinā na la molimau atu ai i ni fafine, ma o se tasi o i latou e igoa iā Litia, na vave ona ia talia le upu moni.—Galu. 16:12-15.

3. O ā ni avanoa o le auaunaga tatou te ono olioli ai, e ese mai la tatou talaʻiga mai i lea fale i lea fale?

³ E ese mai i lou talaʻi mai i lea fale i lea fale, pe e mafai ona e talaʻi atu i tagata i nofoaga o fetaulaʻiga o femalagaaʻiga, i paka, ofisa e suʻe i ai galuega a tagata, o tulimanu po o ogāala e uia e tagata i le tele o taimi, o nofoaga o pisinisi, ma nofoaga autū o fefaatauaʻiga i lou vaipanoa? E ono mafai ona e molimau atu i tagata e nonofo i nofoaga e loka faitotoʻa o alatatala e agaʻi atu i ai, ma fale e faapitoa tagata e ō i ai, e ala i le tusi o ni tusi po o le telefoni. O le taumafai e mataitū ma fetuunaʻi i tulaga eseese e tulaʻi mai i le tou oganuu, o le a mafai ai ona “tele pea mea e fai i le galuega a le Alii.”—1 Kori. 15:58.

4. O ā isi avanoa tatou te maua pe a lē lava le oganuu a la tatou faapotopotoga?

⁴ E toʻatele le ʻautalaʻi ua maua avanoa e faalautele ai la latou faiva e ala i le sui o se faapotopotoga e auai ai, a lē i lo latou lava vaipanoa po o se isi vaipanoa ese. O isi ua aʻo se gagana fou ina ia molimau atu ai i tagata e malaga mai i isi atunuu.

5. O le ā le vaaiga e ao ona iā i tatou e faatatau i le taimi lea ua tatou ola ai nei, ma o le ā e ao ona tatou maumauaʻi e fai?

⁵ E ao iā i tatou uma lava ona manatua o “le fanua o le lalolagi lea.” (Mata. 9:37; 13:38) Pe a manatu atu i le lalata tele mai o le iʻuga o lenei faiga o mea amioleaga, e ao i tagata taʻitoʻatasi ona iloilo totoʻa lona lava tulaga, taleni, o avanoa, ma avanoa e ono mafai ona faalautele ai lana faiva. Ua faamautinoa mai e Ieova afai tatou te faamuamua manaʻoga o le Malo, o le a ia faamanuia a tatou taumafaiga e faalautele la tatou faiva.—Mata. 6:33.