E Mafai Ona Aogā le Molimau Atu i Telefoni
1. Aiseā e ono manatu ai i le molimau atu e ala i le telefoni o se vaega tāua o la tatou faiva?
1 Aiseā tatou te ono manatu ai e faaaogā le molimau atu e ala i telefoni i la tatou faiva? Auā o se tasi lea auala e fesoasoani ai i isi ia maua le poto saʻo, lea e maua ai le faaolataga. (2 Pete. 3:9) E ui lava o le vala autū o le faalauiloaina o le tala lelei o le Malo o le Atua o le talaʻi mai lea fale i lea fale, ae e tatou te loto malilie e faaaogā isi faiga ina ia oo atu ai i tagata e lē mafai ona maua i aiga.—Mata. 24:14; Luka 10:1-7; Faaa. 14:6.
2. O le ā le auala e faamaopoopo ai le molimau atu e ala i le telefoni?
2 Le Auala e Faamaopoopo Ai: E pei lava ona iai le faatulagaga mo le galuega mai lea fale i lea fale, ua faatulaga foʻi mo le ʻautalaʻi le molimau atu i oganuu e ala i le telefoni. E mafai ona e faia na o oe lava, pe faatasi foʻi ma se vaega toʻaitiiti pe toʻalua pe toʻatolu. E ao ona faaaogā se fale po o se potu e leai se pisa po o ni mea e faalavelave mai. E toʻatele e manatu e sili ona lelei le nofo i se laulau ma ia iai uma mea e masani ona faaaogā pe a talaʻi mai lea fale i lea fale.
3. O ā mea e ao ona tatou manatua pe a molimau atu e ala i le telefoni?
3 Le Auala e Molimau Atu ai e Ala i Telefoni: Pe a molimau atu e ala i le telefoni, ia faatalanoa la tatou taulimaga. O nisi o ē faatoʻā amata e ono faitau atu se taulimaga agaʻi i le tagata o le aiga ae i se uiga e pei lava o loo talanoa atu. O loo maua faatomuaga e mafai ona faaaogā i le tusi Reasoning, La Tatou Faiva o le Malo, ma le sāvali Pe E te Fia Iloa le Upu Moni? Afai e saunia sau lava taulimaga, ia faatulaga se mataupu e te manaʻo e talanoa i ai, ia fuafua se fesili e fai atu i le tagata o le aiga e faatatau i le mataupu ua e saunia, ma ia sauni e faaaogā ni nai mau e saunia ai ni tali i fesili. O le tulaga masani lava, e te ofo atu lomiga o loo ofo i le taimi lea mai lea fale i lea fale. Ia manatua fautuaga nei: Ia toʻa ma ia aua le vave le tautala. Ia faaaloalo ma onosai, ma ia faaleuō, auā e mafai lava ona mātau mai na uiga i luga i le telefoni. Ia faalogo a o fai mai se manatu o le tagata o le aiga, ona faamālō lea ma taʻu atu i ai lou talisapaia o ona manatu. Ia faaeteete aua le taʻua le fuafuaga mo foaʻi tauofo, ina neʻi manatu le tagata o loo fai se tatou suʻegātupe i luga o le telefoni.
4. O le ā e mafai ona tatou fai i a tatou oganuu e ala i le molimau atu i telefoni?
4 E te ono talanoa i le telefoni i se tagata e maʻi pe e iai ni manaʻoga faapitoa, po o se tasi foʻi e lē faigofie ona maua i le talaʻiga mai i lea fale i lea fale ona o galuega. E iai foʻi isi o loo nonofo i vaipanoa e lē so o se isi e alu i ai e aunoa ma se faatagaga ma e iai leoleo faitotoʻa. Ina ia fai la ni taumafaiga ina ia faataunuuina atoatoa la tatou faiva ma ia māeʻaeʻa, e lelei ona mafaufau e faaaogā le faiga aogā o le molimau atu e ala i le telefoni.