Taulau Manuia i le Molimau Atu i le Telefoni
1 I le avea o ni Molimau a Ieova, o lo tatou sini e lē na ona auai i le talaʻiina o le tala lelei, ae ia faapea foʻi ona oo atu i tagata uma e mafai ona oo atu i ai ma le feʻau o le Malo. (Galu. 10:42; 20:24) A o avea pea le galuega i lea fale i lea fale ma auala autū e oo atu ai i tagata, ua tatou iloa ai e faapea e oo lava i lenei faiga faasolosolo, e lē o mafai ai lava ona tatou feiloaʻi i tagata uma. O lea, ina ia ‘matuā faaiuina la tatou faiva,’ ua tatou faaaogāina ai isi auala—e aofia ai le molimau atu i le telefoni—i le saʻilia o tagata e pei o ni mamoe.—2 Timo. 4:5.
2 I le tele o nofoaga e nonofo ai tagata i fale e matuā malupuipuia, i fale e nonofo ai ni aiga se toʻatele, po o nofoaga e taloka faitotoʻa o alatatala ma matuā faigatā ai lava ona afea e la tatou galuega masani i lea fale i lea fale ina ia oo atu ai i tagata. E oo lava i oganuu e mafai ona tatou galulue ai mai lea fale i lea fale, e toʻatele lava tagata e lē maua atu i aiga. Ae peitaʻi, e toʻatele lava tagata talaʻi o loo sili atu ona taulau i le mafai ona oo atu i na fale e ala i le telefoni. I se taeao o le galuega i lea fale i lea fale, na maua ai e se ulugalii ni aiga se iva sa lē iai ni tagata i fale. Ina ua la toe foʻi atu i le Maota o le Malo, na la autiloina igoa o nei aiga i le faasologa o igoa i le tusi telefoni masani o loo lisi ai numera o telefoni e faasolo i tuatusi. Sa la vili atu i nei numera ma maua ai tagata e toʻavalu i aiga!
3 Pe e te faalotolotolua e faaaofia le molimau atu i le telefoni i lau faiva? Ua taʻutino mai e se tasi uso e faapea: “Ou te lē manaʻo e telefoni mai se tagata ia te aʻu i le fale e faatau mai se mea, o lea sa ou matuā musu ai lava e faia lenei ituaiga o molimau atu.” Ae peitaʻi, ina ua uma ona faia ni telefoni se lua, na faapea mai o ia: “Ua ou fiafia lava i ai! Ou te leʻi mafaufau lava e mafai ona tupu lena mea, ae ua ou fiafia lava i ai! E toʻafilemu tagata i le telefoni, ma e mafai ona e maua mea uma e te manaʻomia. E matuā aogā tele lenei mea!” Sa faapena foʻi se tasi tuafafine: “Sa ou matuā lē fiafia lava e molimau atu i le telefoni. O le mea moni, ou te leʻi manaʻo e fai. Ae sa ou faataʻitaʻia ma na ou iloa ai le aogā tele. E ala i le molimau atu i le telefoni, ua ou maua ai ni toe asiga e 37 ma ni suʻesuʻega e sili atu na i lo o le mea e mafai ona ou faia!” Afai e te naunau e faataʻitaʻi le molimau atu i le telefoni, e mafai foʻi ona e taulau.
4 Faamaopoopoina mo le Molimau Atu i le Telefoni: O le galuega molimau atu a le faapotopotoga e i le vaavaaiga a le ovasia o le auaunaga. E faalagolago lava i le manaʻoga e tulaʻi mai, e mafai e le ʻautoeaina ona filifili e tofia se isi toeaina po o se auauna o le faiva e agavaa e galulue soosoo tauʻau ma ia i le faamaopoopoina o le molimau atu i le telefoni. E tatau foʻi ona aofia ai le uso o loo vaaia oganuu, talu ai o ia o le a tofia oganuu ma tausia se faamaumauga saʻo. E faapena foʻi ona naunau le ovasia o le matagaluega i le agaʻigaʻi i luma o le polokalame.
5 Afai e iai ni vaipanoa i lau oganuu e lē o mafai ona galueaʻiina i le molimau atu mai lea fale i lea fale, e tatau ona saunia ni oganuu e faaaogā ai telefoni. O le uso lea ua tofia, e na te faia ma le faaeteete se lisi o tuatusi ia e manaʻomia ona avea ma oganuu e mafai ona molimau atu ai e ala i telefoni, ia e tatau ona matuā faalaitiiti lava ina ia mafai ai ona galueaʻiina e lē aunoa. O faafanua uma o loo iai na oganuu, e tatau ona faailogaina, e faailoa ai vaega patino ua fuafuaina mo le molimau atu e ala i telefoni.
6 O fea e mafai ona e maua mai ai numera o telefoni? Atonu e mafai ona e maua se tusi telefoni o loo iai le lisi o numera o telefoni i se faletusi o le atunuu. Afai o se nofoaga e matuā malupuipuia ma e iai sana ia lava lisi o numera o telefoni, atonu la e mafai ona e maua mai ai numera o telefoni iinā. A lē o lena, atonu e mafai ona fai se kopi o igoa o tagata e ona na fale mai le tusi taʻiala i le potu faatalitali ma suʻe i le tusi telefoni masani.
7 E tatau i toeaina ona faaalia le matuā naunau i lenei galuega, e ala i le fuafuaina mo i latou e iai le poto masani i le molimau atu i telefoni ina ia toleniina isi, atonu e ala i le polokalame o le Fesoasoani Paeonia i Isi. I nisi taimi, e mafai ona faaaogā le vaega mo manaʻoga o le faapotopotoga i le Sauniga o le Auaunaga ina ia faateleina ai le taulau manuia o lenei vala o le molimau atu.
8 Pe a faia asiasiga faaleoleo mamoe a toeaina ia i latou o faataotolia i o latou lava aiga po o i latou e lē atoatoa le malosi, e mafai ona latou mataalia i le faalaeiauina o i latou nei ina ia faia se sao i le molimau atu i telefoni. Atonu e mafai ona fai e se toeaina ni nai molimau atu i le telefoni a o mātauina e le tagata talaʻi. E le taumatea o le a fiafia loa lea tagata talaʻi e faia foʻi sana ia molimau atu i le telefoni. O le toʻatele o tagata na amata ona molimau atu i lenei auala, sa mafai ona latou faaaluina ni nai minute i aso taʻitasi i lenei galuega, ma sa latou matuā fiafia ai lava.
9 Fautuaga Ina ia Taulau Manuia: Ina ua aauina atu e Iesu ona soo e talaʻi, sa ia “aauina atu o i latou e taʻitoʻalua.” (Luka 10:1) Aiseā? Sa ia silafia e faapea, o le galulue faatasi o le a mafai ai ona latou aʻoaʻo mai ai ma faalaeiau e le tasi le isi. E faapena foʻi i le molimau atu i telefoni. O le galulue taʻitoʻalua, e mafai ai e le tasi ona aʻoaʻo mai i le isi, talatalanoa i mea na iʻu i ai la oulua molimau atu ma ofo atu fautuaga mo le isi talanoaga e sosoo ai. E oo lava i le taimi e faia ai se telefoni, e mafai ona fesoasoani le tasi i le isi i le mauaina mai o faamatalaga talafeagai.
10 Ina ia faaauilumaina mafaufauga manino ma le uaʻi totoʻa i ai, nofo i se mea e mafai ona tuu ai i ou luma meafaigaluega mo lau molimau atu—Tusi Paia, tusi Reasoning, tamaʻitusi o le Amata ma Faaauau ai Talanoaga, polosiua o le Manaomia, mekasini, ma isi mea faapena. Tusi ni taulimaga ma tuu i le mea e mafai ona e vaavaai ai i ai. Ia nofosauni e tusia ma teu lelei ia faamaumauga saʻo ma ia māeʻaeʻa, e aofia ai le aso ma le itula o le aso ina ia mafai ai ona e iloa po o le ā le taimi o le a toe talanoa ai i lea tagata fiafia na maua.
11 E masani lava ona faaeteete tagata pe a latou faalogoina se leo e lē masani ai i le telefoni. O lea, ia māfana, faaleuō ma ia faautauta. E na o lou leo lava lea e faalogo mai i ai le tagata e ona le fale, e na te iloa ai le ituaiga o tagata e iai oe ma lou faamaoni. Ia toʻafilemu ma tautala mai i lou loto. Tautala faagesegese ma ia manino ma i se leo e mafai ona lagona mai. Tuu se avanoa i lē ona le fale e tautala mai ai. Ia faaaogā lou igoa atoa ma ia fai i ai o oe e te nofo i le nuu. E tatou te lē mananaʻo e manatu tagata faapea o i tatou o ni tagata faatau tusi ma isi mea. Na i lo o lou fai atu o loo e telefoni atu i tagata uma o loo nonofo i lena fale, ia uaʻi totino atu lau telefoni i lena tagata.
12 Taulimaga i le Telefoni: O le tele o upu tomua i le itulau e 2-7 o le tamaʻitusi Amata ma Faaauau ai Talanoaga e mafai ona faafetaui atu ma le molimau atu i telefoni. E mafai ona e faapea atu: “Ua ou vili atu ia te oe i le telefoni ona e lē mafai ona ou alu atu e feiloaʻi ma oe. O le māfuaaga o loʻu telefoni atu ona o loo ou fia iloa po o le ā sou manatu i se fesili e matuā tāua lava.” Ona fai atu loa lea o le fesili.
13 O le uluaʻi taulimaga i lalo o le ulutala “Soligatulafono/Malupuipuia” e mafai ona faaaogā faapenei: “Talofa. O loʻu igoa o _____. Ou te nofo iinei. Ou te fia faamautinoa atu ia te oe ou te lē o fia faatauina atu se mea po o le fia suʻesuʻe vale. Ua ou vili atu ona o loʻu manatu mamafa e uiga i le mataupu e faatatau i le puipuiga totino. E anoanoaʻi soligatulafono o loo siʻomia ai i tatou, ma ua aafia ai o tatou ola. Pe e te manatu ea o le a oo mai le taimi e savavali ai tagata i le alatele i le pō ma se faalogona saogalemu? [Faatali mo se tali.] Seʻi ou faitauina atu le mea ua folafola mai e le Atua e na te faia.”
14 O le faaaogāina o le faafeiloaʻiga tuusaʻo e ofo atu ai suʻesuʻega faale-Tusi Paia i le telefoni na maua ai ni iʻuga lelei. E mafai ona faataʻitaʻi le suʻesuʻega mo ni nai minute. Ia ofo i ai e mafai ona e asiasi atu ia te ia i lona aiga e faaauau ai le suʻesuʻega, pe afai e faalotolotolua le tagata, ona fai lea i ai e mafai la ona faaauau le suʻesuʻega i le telefoni i se isi aso.
15 Pe a e faaumaina le talanoaga, ia mafaufau i se tala e fai atu o le a mafai ai ona e toe asia le tagata i lona fale pe lafoina atu ai foʻi se lomiga i le meli. Afai e tau faalētonu le tagata i le faailoa mai ia te oe o lona tuatusi, fai i ai e mafai ona e toe vili atu. E ono tele ni nai telefoni e fai a o leʻi maua e le tagata le lagona saogalemu e valaaulia ai oe i lona fale.
16 Ia E Tausolomua: Na amata le auaunaga i le taeao a se tuafafine e 15 tausaga i se telefoni. Sa ia telefoni atu i se fafine o lē na lotomalie e talia le tusi o le Poto. Ina ua avatu e le tuafafine le tusi i le fale, sa fia iloa e le fafine pe na faapefea ona iloa e lenei talavou le numera o lana telefoni, talu ai e lē o tusia lana numera i le tusi telefoni. Na vili sesē e le tuafafine le numera! Sa talia e le fafine le suʻesuʻega ma ua avea nei ma tagata talaʻi e leʻi papatisoina.
17 Na maua e se tuafafine se oganuu e molimau atu ai i le telefoni ae sa ia leʻi faia i le tolu vaiaso ona o le fefe. O le ā na faalaeiauina ai o ia e amata loa? Sa ia manatua le mataupu i le Ala Mai! o Aperila 8, 1997, na faaulutalaina e faapea “Pe a Ou Vaivai, Ona Ou Malosi ai Lea.” Sa faatatau i se Molimau o lē e talaʻi e ala i le telefoni e ui i tulaga lē atoatoa o le tino. Na faapea mai le tuafafine: “Sa ou tatalo ia Ieova ma talosaga atu mo le malosi. Na ou talosaga atu ia te ia ina ia faailoa mai ia te aʻu upu tatau e fai atu ai laʻu taulimaga.” O le ā na iʻu i ai le uluaʻi aso o lana molimau atu i le telefoni? Na ia faamatala mai e faapea: “Na tali mai Ieova i laʻu tatalo. Na faalogo mai tagata ia te aʻu, ma sa ou fuafua ai loa mo le faia o se toe asiga.” Mulimuli ane, na iʻu lana molimau atu i le telefoni i le faia o se suʻesuʻega faale-Tusi Paia. Ua ia faaiʻu mai e faapea: “Na toe aʻoaʻo ai foʻi aʻu e Ieova ina ia ou faalagolago atu ia te ia ae lē o aʻu lava.”—Faata. 3:5.
18 O le faailoa atu o le upu moni e ala i le telefoni ua avea o se auala taulau manuia i le talaʻiina o le tala lelei. Ia sauniuni lelei, ma ia faia ma le lotoatoa se sao. Aua neʻi lotovaivai pe a lē tali lelei mai i ni nai uluaʻi taumafaiga. Tatalo mo le taʻitaʻiga a Ieova, ma faatusatusa au faamaumauga ma faamaumauga a isi o ē o loo talaʻi i lenei auala e faafiafiaina ai. I le faanaunau ina ia aua neʻi misia se tasi i la tatou oganuu, seʻi o tatou faia atoatoa la tatou faiva i se uiga faanatinati.—Roma 10:13, 14.