Ia Mataalia e Amata Suʻesuʻega Faale-Tusi Paia

1. E faapefea ona faataunuu le faatonuga a Iesu o loo i le Mataio 28:19, 20?

¹ Na faatonuina i tatou e Iesu ia ʻfai tagata ma soo, ma aʻoaʻo i latou.’ (Mata. 28:19, 20) O lea la, ia tatou mataalia i taimi uma e amata ni suʻesuʻega faale-Tusi Paia, ae e lē na o se aso faapitoa i le faaiʻuga o le vaiaso e ofo ai. E aogā la fautuaga nei.

2. O ai e tatou te ofo atu i ai se suʻesuʻega faale-Tusi Paia?

² Ofo Suʻesuʻega: Pe a tatou toʻaʻaga e ofo suʻesuʻega faale-Tusi Paia, o le tele foʻi lenā o avanoa e maua ai se suʻesuʻega. (Fai. 11:6) Po ua e faataʻitaʻia le ofo saʻo o se suʻesuʻega? Na taumafai se faapotopotoga i Amerika e faia faapea, mo le masina atoa. Maʻeu lo latou fiafia ina ua amata ni suʻesuʻega fou e 42! Aua e te manatu ua iloa e tagata fiafia o loo e asiasi i ai, e te fiafia e fai ni a latou lesona faale-Tusi Paia. I le isi taimi e te toe asiasi atu ai, e lelei pe a ofo i ai se suʻesuʻega. E lē afāina pe a lē taliaina i lea taimi. Ae faaauau pea ona e faatupu lo latou fiafia. Pe na e fesili i ou tuaoi, tauaiga, ē e tou te faigaluega faatasi ma aʻoaʻoga faatasi, pe fia fai se suʻesuʻega faale-Tusi Paia? Ia fesili atu foʻi i au suʻesuʻega, pe e iai ni a latou uō ma aiga e fia suʻesuʻe i le Tusi Paia.

3. O le ā se lomiga aogā e amata ai suʻesuʻega faale-Tusi Paia, ma o le ā le taimi e faaaogā ai?

³ Se Lomiga Aogā: O le sāvali Pe E te Fia Iloa le Upu Moni? o se lomiga aogā mo le amataina o suʻesuʻega. E mafai ona e tuu atu i tagata o aiga e tusa pe talia pe e lē talia isi lomiga. Ia faaaogā foʻi pe a galulue i oganuu pisinisi, i alatetele, pe lafo atu ni tusi, ma faia toe asiga. E mafai foʻi ona tuu i fale e lē maua i ai ni tagata. E lelei ona ave ni sāvali pe a e malaga, pe fai sau faatau, pe faigaluega. O loo faamatala puupuu ai i tua le fuafuaga mo suʻesuʻega faale-Tusi Paia, i le tusi Aʻoaʻoga Moni.

4. E faapefea ona tatou faaaogā le sāvali Iloa le Upu Moni, e amata ai se suʻesuʻega?

⁴ Pe a uma ona tuu atu le sāvali i le tagata, ona faasino lea i ai o fesili i le pito i luma ma fai i ai, “O fea o fesili nei e te fia malamalama i ai?” Ona iloilo faatasi lea o le tali mai le sāvali, ma faitau pe faamatala la tatou fuafuaga mo le faia o suʻesuʻega, o loo i le pito i tua. Ona faasino lea i ai o le itulau o le tusi Aʻoaʻoga Moni o loo faamalamalama atili ai le mataupu, ofo i ai le tusi, ma fuafua e toe foʻi atu e faaauau le talanoaga.

5. Aiseā e tatou te mataalia ai i avanoa e ofo atu ai suʻesuʻega?

⁵ O loo iai pea i a tatou oganuu ē o loo fia malamalama i aʻoaʻoga moni a le Tusi Paia. O le mataalia i le ofoina atu o suʻesuʻega, e tele ai avanoa mananaia e fesoasoani ai i isi ia maua le ala i le ola.—Mata. 7:13, 14.