O E Ofoina Atu ea ni Suesuega Faale-Tusi Paia?
1 E manaia faamanuiaga ua maua e le toatele o loo amataina suesuega faale-Tusi Paia e ala i le faaaogāina o le faafeiloaiga tuusaʻo i le ofoina atu i tagata o le avanoa e suesue ai le Tusi Paia. Ina ua ofo atu se suesuega faale-Tusi Paia, sa vave lava ona talia e se tamaloa o lē na musu e talia ni lomiga i nisi o taimi. O lana tali e faapea: “Sa ou manao lava e suesue le Tusi Paia.” Na amata ai loa le suesuega faale-Tusi Paia, ma sa vave ona agaʻigaʻi i luma le aiga atoa.
2 E ao i tagata uma ona naunau e amataina ni suesuega faale-Tusi Paia. Afai e ao ona agaʻigaʻi i luma tagata taitoatasi i le avea ma soʻo o Keriso, e tatau la ona aʻoaʻoina i latou. (Mata. 28:19, 20) Ina ia aʻoaʻoina, e manaomia ai ona faia se suesuega faale-Tusi Paia ma i latou. E masani lava ona amataina ni suesuega i le na ona ofo atu i ai e faataʻitaʻi pe mafai faapefea e lē ona le fale ona aʻoaʻoina atili e uiga i le Tusi Paia ma folafolaga a le Atua. Sa mafai e se uso ona amataina ni suesuega se lima i le sāvali o le Olaga i se Lalolagi Fou Filemu. Talu ai sa lē mafai ona ia faia le tele o na suesuega faale-Tusi Paia i se auala faifai pea, na amata ai loa ona ia tuuina atu o suesuega faale-Tusi Paia i isi tagata talaʻi.
3 Afai e faigofie ona tatou amataina ni suesuega, e mafai la ona tatou ō faatasi ma isi tagata talaʻi ma fesoasoani ia i latou ina ia maua foi ni a latou suesuega. Pe e mafai foi ona tatou tuu atu i isi o le faapotopotoga nisi o suesuega tatou te amataina. Afai e te manao e faafoe se suesuega faale-Tusi Paia, aiseā e lē taumafai ai e ofo atu se suesuega faale-Tusi Paia i ē tou te feiloai i le faiva i lea fale ma lea fale? I se tasi o mea, na toe asiasi atu ai se tagata talaʻi i se tamaitai talavou o lē sa lē tele se naunau na ia faaalia. E ui i lea, sa ofo atu i ai e le tagata talaʻi se suesuega faale-Tusi Paia, ma na ia taliaina. Ua uma nei ona papatisoina o ia, ma ua auai foi i sauniga lona uso ma le tane a lona uso.—Kala. 6:6.
4 E lē o tagata uma tatou te amataina ai se suesuega, o le a faaauau pea ona suesue. E lē o i latou uma foi e suesue o le a ō mai i le upu moni. Peitai o le a ō mai lava nisi. O le tele o suesuega tatou te amataina, o le tele foi lena e foliga mai e mafai ona tatou fesoasoani atu i isi ina ia avea ma ē e vivii atu ia Ieova.