“Meaʻai i le Taimi Tatau”

1. Na faapefea ona aogā iā te oe faapea ma isi, le aso faapitoa o fonotaga?

¹ Pe a uma se aso faapitoa o fonotaga, e masani ona tatou faapea, “O le mea tonu lava lea na tatou manaʻomia!” Na taʻua e se ovasia matagaluega ina ua uma ona faalogologo i le polokalame talu ai nei, na faaalia e nisi o lana matagaluega le fia faateleina o lo latou sao i le talaʻiga. Na fai mai se isi ovasia femalagaaʻi: “Na aogā le fono e matou te mafaufau lelei ai i le taimi ua tatou iai nei, ma toe iloilo mea o fai i le olaga.” Ae o le tala a se isi ovasia matagaluega, “E toʻatele le ʻautalaʻi na faapea mai, o se faamanatu lelei lea, e faamautinoa ai o loo uaʻi lelei atu i le talaʻiga, o le mea lea e sili ona tāua.” Na faapefea ona aogā iā te oe le aso faapitoa o fonotaga?

2. O ā nisi o lauga o le fonotaga i le tausaga faaleauaunaga o loo sosoo mai?

² E faapena foʻi ona tatou manaʻomia le polokalame o le fonotaga o le tausaga faaleauaunaga o loo sosoo mai. O le matua: “Sulufaʻi iā Ieova,” e faavae i le Salamo 118:8, 9. O nisi nei o lauga o le a talanoaina: “O Ieova o le ʻOlo Malosi i Taimi o Puapuaga,” “Fesoasoani i Isi ia Sulufaʻi Atu i Lalo o Apaʻau o Ieova,” “Faataʻitaʻi iā Ieova i le Saunia o le Sulufaʻiga,” “Talavou, ia Fai Ieova ma Ou Faatuatuaga!” ma, “Ua Saunia e Ieova lo Tatou Parataiso Faaleagaga e Sulufaʻi i Ai.”

3. E faapefea ona tatou maua atoatoa aogā mai i le auai i le fono?

³ Auala e Maua ai Aogā: Pe a faasilasila mai le aso o le fonotaga, ia fai se fuafuaga maʻoti e auai, ma valaaulia uma au suʻesuʻega. E tatau ona taofimau mea e tatou te faalogologo i ai ina ia ‘⁠fua mai ma tumau ai.’ (Luka 8:15) O lea, ia faalogologo lelei i le polokalame, ma fai faamaumauga pupuu o manatu tāua ma faatonuga e te manaʻo e faaaogā i lou olaga ma lau faiva. Pe a uma le fonotaga, ia faaavanoa se taimi e talanoa ai le aiga atoa i le polokalame, ma auala e tou te faaaogā ai manatu o le fono.

4. Aiseā e tatou te aloalo fiafia atu ai i la tatou aso faapitoa o fonotaga?

⁴ E pei o se taumafa susua ma paleni le aso faapitoa o fonotaga, ona ua saunia ma le alofa ma fuafua lelei. Tau ina ia faamanuia e Ieova a outou taumafaiga e auai, ma maua ai aogā mai i nei “meaʻai i le taimi tatau,” e fafaga ai faaleagaga faifeʻau Kerisiano.—Mata. 24:45.