Tala o Mea na Tutupu Mai i le Tusi Tausaga 2010

Vaega 1

Itulau e 110 palakalafa 1-3:

Naunau Ē ua Matutua ia Tele se Sao

E faaaloalogia e Uganda tagata matutua, ma e toʻatele i latou ua tali lelei mai i le tala lelei ma faaaogā o latou soifua ua matutua e auauna ai iā Ieova. O se faaaʻoaʻoga, o le alii sa faiaʻoga muamua o Paulo Mukasa, na ia maua le upu moni i le 89 o ona tausaga. Sa naunau e fia malamalama i le Malo o le Atua, ona na ola mai o ia i vaitaimi o taua e lua a le lalolagi, o se pulega faakolone, o se pulega faatautalatasi, ma isi faigāmalo lē lelei. Oka lona fiafia ina ua iloa, o le a ‘laveaʻi e le Tupu faa-Mesia o Iesu Keriso le tagata mativa ma lē ua mafatia mai i le pule sauā ma faiga sauā.’—Sala. 72:12, 14.

I le lua tausaga mulimuli ane ai, ina ua agavaa Paulo e papatiso, sa taumānatu le ʻauuso, ‘Po o se mea tatau le faatofu atoa i le vai, o se tagata faapea ua afu le soifua?’ Ae sa lē tatau ona popole fua. Auā a o tu tū ma le popole se talavou papatiso e faatali le faatofuina o ia, ae ea aʻe loa i luga mai le vai Paulo e 91 ona tausaga, ua uma ona faatofu, ma o loo ʻataʻata fiafia mai. E lē tele se mea na mafaia e Paulo i le talaʻiga, ae sa maelega e faailoa atu le tala lelei o le Malo i tagata uma e asiasi atu iā te ia, seʻia oo lava ina ua maliu i ni nai tausaga mulimuli ane.

Sa feagai se tuafafine e igoa iā Lovinca Nakayima, ma tulaga faigatā o le soifua matua ma le faalētonu o le malosi. Sa faataʻotolia i se gasegase ma fulafula ai ona vae, ua lē mafai ai ona fealuaʻi seʻi vaganā ua fesoasoani i ai se isi. Ae ina ua faalaeiauina le faapotopotoga e taumafai e paeonia mo se masina i le vaitaimi o le Faamanatuga, na manaʻo Lovinca e fai sana taumafaiga. Na lagolagoina lana paeonia e lana faapotopotoga i le avatu o a latou suʻesuʻega e fai i lona fale. Na faasino foʻi e misionare iā te ia le fai o tusi i tagata o lona nuu, ma e pule lava ia i le taimi e fai ai. A oo i Aso Toonaʻi, e momoli e se toeaina Lovinca i se nofoaga e tumutumu ai le lautele i Kamapala, ma e saofaʻi o ia i le aso atoa i se pa maulalo, ma talatalanoa i le aso atoa ma tagata e ui ane i le ala. Ina ua uma le masina, na lagona e Lovinca le fiafia ma le faamalieina, ma fai mai lana tala, “O lea ua ou iloa nei ou te mafaia, ma ou te fiafia foʻi e fai!” E leʻi gata ai i le masina lenā lana paeonia, ae e sosoo masina e 11 o mafai ona faaauau lana paeonia talu ai le lagolagosua ma le alolofa o le faapotopotoga!

Vaega 2

Itulau e 163-164:

Ua Ou Faia se Galuega Tāua i Loʻu Nuu

ARDIAN TUTRA

TAUSAGA FANAU 1969

TAUSAGA PAPATISO 1992

TALAAGA Na ia maua le upu moni i Italia, mulimuli ane ona toe taliu lea i Alapania. O ia o se sui o le Komiti o le Lālā i Alapania.

◼ O LE 1991, i le 21 o oʻu tausaga na ou tuua ai Alapania, faatasi ma le faitau afe o isi tagata sulufaʻi. Sa matou ave faamalosia se vaa e alu i Italia. Na ou fiafia e tuua Alapania ona ua mativa lava le atunuu, ma sa ou faapea ifo, o lea ua taunuu mea na ou moomoo i ai.

E lua aso na matou iai i Brindisi i Italia ae ou sola ese loa mai i le mea na mau ai le ʻausulufaʻi, ou te alu e suʻe galuega. Na tuu mai e se tamāloa iā te aʻu se tamaʻi feʻau faale-Tusi Paia i se pepa i le faa-Alapania, ma valaaulia aʻu i se sauniga i lenā aoauli. Na ou faapea ifo: ‘Atonu e maua ai saʻu mea aogā. O ai na iloa pe teʻi ua maua ai ma saʻu galuega!’

Ou te leʻi faatalitalia se faafeiloaʻiga māfana e pei ona faaalia mai iā te aʻu i le sauniga. Ina ua uma le sauniga, na ō mai uma tagata faafeiloaʻi aʻu, ma sa faaalia mai le māfana ma le alolofa. Na valaaulia aʻu e se aiga Molimau e matou te faiʻaiga. E ese le agalelei ma faaaloalo mai e ui ina veʻuveʻua oʻu foliga ma o aʻu o se tagata sulufaʻi mai Alapania!

I le sauniga na sosoo ai, na ofo mai Vito Mastrorosa na te faia laʻu suʻesuʻega. Na ou talia, ma na vave lava ona ou iloa, o lea ua ou maua le upu moni. Na ou papatiso i Italia iā Aokuso 1992.

Na maua oʻu pepa nofo mau, ma ua lelei foʻi laʻu galuega ma maua ai tupe e lafo i lo matou aiga i Alapania. Ae sa ou faapea ifo, ‘O le la ua maua le saʻolotoga e fai ai le galuega i Alapania ma e manaʻomia ai lava le fesoasoani. Pe faamata e tatau ona ou toe foʻi e auauna ai i inā? Ae faamata o le ā se tala a lo matou aiga? O loo latou manaʻomia le tupe lea ou te lafoina atu. Ae po o ā foʻi ni tala a tagata a fai?’

Na vili mai le ofisa o le lālā i Tiranë, pe faamata e mafai ona ou alu atu e aʻoaʻo le gagana Alapania i paeonia faapito mai Italia, e ō e galulue i Alapania iā Novema. Na avea la latou faaaʻoaʻoga ma mea na ou mafaufau loloto ai. O lea o le a latou ō atu i le nuu na ou alu ese mai ai. E latou te lē iloa le gagana ae ua fiafia lava e ō. O laʻu gagana ma laʻu aganuu le faa-Alapania, o lea, o ā aʻu mea ia e fai i Italia?

Sa faia loa laʻu faaiʻuga ma matou malaga atu faatasi ma paeonia faapito i le vaa i Alapania. Sa ou galue ai loa i le Peteli, a o toʻalaiti i lenā vaitaimi. Sa ou faia aʻoga i le taeao, ae ou faaliliu i le aoauli. I le taimi muamua, sa leʻi fiafia loʻu aiga. Ae ina ua latou malamalama i le māfuaaga o loʻu toe foʻi atu, ona oo foʻi lea ina latou fiafia i le tala lelei. E leʻi umi ae papatiso oʻu mātua ma oʻu tuafāfine e toʻalua ma le isi oʻu uso.

Pe na ou salamō ona ua tuu laʻu galuega i Italia ma tupe na ou maua ai? E leai! O lea ua ou faia se galuega sili ona tāua i Alapania. O le galuega moni lenei e tatau ona fai ma maua ai le fiafia e lē mavae, o le tuuina atu lea o mea uma ua iā te aʻu e auauna ai iā Ieova!

Itulau e 238-239:

Auauna ma le Olioli i Mea o Loo Tele ai le Manaʻoga

O se luʻi tele le siitia atu i se atunuu o loo tele ai le manaʻoga mo ni tagata talaʻi o le Malo. O le taumafai e nofo ma galue ai i se atunuu ese mo se taimi umi, e manaʻomia ai ni taumafaiga malosi ma se agaga faataulagaina. E toʻatele o tatou uso ma tuafāfine ua latou faafetaiaʻia nei luʻi ma le lototele ma le olioli.

O se faataʻitaʻiga, i le tausaga e 1989 na malaga atu ai mai le Iunaite Setete Arthur ma Roberta Conzalez ma le la tama tama o Dalton e tolu tausaga le matua i Belize e auauna ai. Na taʻua e Roberta e faapea, “O le luʻi e sili ona faigatā o le tuua lea o se olaga sologa lelei, o se galuega e lelei le totogi, ae sifi atu i se atunuu o le toʻatele o tagata e leai ni galuega.”

Na faapea mai Arthur, “e ao ona e faatuatua malosi iā Ieova. O le faitauina o le Tusi Paia e faatatau iā Aperaamo, sa ou matuā maofa lava i lona mafai ona tuua o lona fale, aiga ma mea uma. Peitaʻi sa tausia pea o ia e Ieova. O le isi luʻi sa feagai ma matou, o le tau faamasani lea i le gagana Belize Creole. Ae sa matou faalagolago pea iā Ieova, ma na ia tausia i matou.”

I le 1991, na malaga mai ai Frank ma Alice Cardoza mai Kalifonia e galulue o ni paeonia i Belize. Na faapea mai Frank, “o le faitauina o le tusi o Galuega na uunaʻia ai aʻu e fia avea ma misionare. Peitaʻi ona e toʻafā le ma fanau, e lē mafai la ona maʻua agavaa mo le Aʻoga i Kiliata. Ae ina ua uma aʻoga a loʻu afafine laʻitiiti, ua manatu ai o se avanoa lelei lea e sifi atu ai i se isi atunuu. Ina ua ma faitau i le Olomatamata e faatatau i Belize, na fai ai la ma faaiʻuga e sifi atu i inā.”

Sa faapea mai Alice, “na ou malie ma te ō atu mo le na o le tolu tausaga, ae ua atoa nei le 18 tausaga o ma iai pea i inei, ma o loo oʻu matuā fiafia lava i laʻu auaunaga.” Na toe faaopoopo mai Frank, “matou te alolofa tele i tagata ma fiafia foʻi e galulue, lea e faigofie ai ona matou atiaʻe se faiā māfana ma i latou o ē alolofa iā Ieova. O le amataina o le tele o suʻesuʻega faale-Tusi Paia nai lo o le mea e ma te mafaia, ma vaai atu i lo latou tali mai i le upu moni, ua avea lea o se taimi sili i o ma olaga. E leai se mea e ofoina mai e lenei lalolagi e mafai ona tutusa ma lenei faaeaga.”

Na sifi mai Carl ma Martha Simons mai Texas i Belize i le 1988. Na faapea mai Martha, “e toʻalua la ma fanau, e sefulu tausaga o le isi ae valu le isi. I Belize, sa matou galulue faatasi ma le faapotopotoga i le aso atoa i nuu maotua. Sa matou galulue foʻi i le fausiaina o le Maota Fono, ma i taimi o fonotaga e faatumulia pea lo matou fale i uso ma tuafāfine e matou te nonofo faatasi. O se fiafiaga iā i maʻua le tausia aʻe o le ma fanau i inei, auā e latou te auaumea faatasi i le tele o taimi ma paeonia faapito ma misionare. E moni na iai taimi e oo mai ai lagona o le toe fia oso i le vaalele e toe foʻi—taimi e leai ai se eletise, leai se vai, leai ni fesootaʻiga i telefoni. Ae po o ā lava toʻatugā ma faigatā, e lē mafai ona matou faafitia ai lenei tofiga tāua. Ua faatamaoaigaina o matou olaga ona o le auauna i oganuu o loo tele ai le manaʻoga.”