Po ua Sauni a Outou Fanau?
1. Aiseā e manaʻomia ai e tamaiti aʻoga ona sauniuni?
1 Ua lata mai le amataga o le isi tausaga faaleaʻoaʻoga. E lē taumatea o le a feagai a outou fanau ma luʻi, ma faafitauli fou. O le a iai foʻi ni avanoa fou e latou te ʻmolimau atu ai i le upu moni.’ (Ioa. 18:37) Po ua latou sauni?
2. Ina ia sauniunia i latou, o le ā e tatau ona iloa e a outou fanau?
2 Po ua malamalama lelei a outou fanau e uiga i le auai i sauniga faaleatunuu ma aso mālōlō faapaupau, ma aiseā e sesē ai ona faia sa latou vaega? Po ua sauniunia i latou mo omiga o le a latou fesagaʻia, ona o le tuliloaina o aʻoaʻoga maualuluga, tuugātala, ma le faaaogāina o le ʻava malosi po o fualaau faasāina? Pe na ona fai atu e faasā e la matou tapuaʻiga, pe latou te iloa ona faamatala atu o latou talitonuga?—1 Pete. 3:15.
3. E faapefea ona faaaogā e mātua le Tapuaʻiga afiafi a le Aiga e sauniunia ai a latou fanau?
3 Faaaogā le Tapuaʻiga Afiafi a le Aiga: E moni atonu, sa outou talanoaina ni faafitauli na tulaʻi mai i le aʻoga, a o faagasolo le tausaga faaleaʻoaʻoga. O lo outou faia o ni taumafaiga faapitoa e talanoaina ai ni faafitauli tau i le aʻoga a o leʻi amataina, o le a avatu ai i lau fanau le mautinoa. Aiseā e lē faaaogā ai se tasi pe sili atu foʻi o afiafi o le Tapuaʻiga a le Aiga, e talanoa ai nei mataupu? Atonu e te fesili i lau fanau, po o ā mea e sili ona latou popole ai a o sauni e toe foʻi i aʻoga. E mafai ona autaluina mea na outou talanoa ai i tausaga ua mavae, auā ua faasolo ina matutua tamaiti ma ua faateleina lo latou malamalama. (Sala. 119:95) E mafai ona fai ni a outou faataʻitaʻiga ma faapea o oe o le faiaʻoga, faufautua o le aʻoga, po o se tamaitiiti aʻoga. Aʻoaʻo lau fanau e tali mai i le Tusi Paia ma faaaogā meafaigaluega, e pei o le tusi Reasoning ma le Young People Ask. O se tasi o mātua, na ia saunia lana fanau e ala i le faataʻitaʻi, pe faapefea ona latou talanoa i faiaʻoga fou i le amataga o le tausaga faaleaʻoaʻoga, ma faamatala iai o i latou o Molimau a Ieova.—Tagaʻi i le Olomatamata, o Tesema 15, 2010, itulau e 3-5.
4. O le ā o le a faia e mātua atamamai?
4 Ua matuā faateteleina luʻi o loo fesagaʻi ma talavou Kerisiano i nei aso o le iʻuga “e sili ona faigatā.” (2 Timo. 3:1) O mātua atamamai, e taumafai e saunia a latou fanau e foʻia faafitauli a o leʻi tutupu mai. (Faata. 22:3) A o leʻi amataina le tausaga faaleaʻoaʻoga, ia fai mea uma tou te mafai e fesoasoani ai i a outou fanau ia nofosauni.