Pe ua E Sauni e Molimau Atu i le Aʻoga?
1. O ā avanoa o le a outou maua i le amataga o a outou aʻoaʻoga?
1 Pe o lou tausaga amata lenei pe ua leva foʻi talu ona e aʻoga, o le a feagai outou talavou Kerisiano ma omiga. Peitaʻi, o le a outou maua foʻi ni avanoa fou e ‘molimau ai i le upu moni.’ (Ioa. 18:37) Po ua outou lava tapena ma sauni e avatu se molimau?
2. E faapefea ona outou sauniuni mo le aʻoga?
2 Ina ia fesoasoani iā te outou ia taulau manuia i vala uma o le olaga, ua tele se toleniga ua outou maua mai iā Ieova, mai i ō outou mātua, atoa ai ma le pologa faamaoni ma le faautauta. (Faata. 1:8; 6:20; 23:23-25; Efe. 6:1-4; 2 Timo. 3:16, 17) E lē taumate ua outou iloa i le taimi nei ia faafitauli e tou te ono fesagaʻia i le aʻoga. Faaaogā le toleniga ua outou maua i mea e manaʻomia e le Atua atoa ai ma lo outou malamalamaga i le siʻomaga o le a outou fesagaʻia, e tou te sauniuni ai e avatu se molimau. (Faata. 22:3) Ia iloilo totoʻa faatonuga ma fautuaga aogā mai le Tusi Paia o loo maua i tusi e lua Ua Fesili Mai Talavou ma isi mataupu e faatatau i le tulaga lea o loo lomia i le Ala Mai!
3. O ā auala e mafai ona e avatu ai se molimau?
3 O le oganuu lenei e patino lava iā te outou le fanau, e tele avanoa e mafai ona outou molimau atu ai. Pe a mātauina e isi le lelei o le auala e fai ai ou lavalava ma teuga, o lau amio ma le tautala, o lou faaaloalo i faiaʻoga ma isi tamaiti aʻoga, e oo foʻi i le lelei o ou togi, ma le foliga atu iā i latou o loo mautū le faatulagaina o outou olaga, e ono fesili ai nisi, “Aiseā ua ese ai lava oe?” (Mala. 3:18; Ioa. 15:19) E ono tulaʻi mai se avanoa e te avatu ai se molimau ma faamalamalama ou talitonuga. (1 Timo. 2:9, 10) A o faagasolo le tausaga, e te ono fesagaʻia faafitauli e pei o sauniga e faaalia ai le lotonuu ma aso mālōlō. Pe a fesiligia pe aiseā ua e lē auai ai i nei mea, pe o le a na ona e tali atu ea, “E faasā e le matou lotu; O aʻu o se tasi o Molimau a Ieova,” pe o le a e faaaogā le avanoa e avatu ai se molimau e faatatau i lou Tamā alofa, o Ieova? A lelei sauniuniga i lalo o le taʻitaʻiga a Ieova o le a e sauni ai e avatu se molimau lelei i faiaʻoga, o tamaiti o lau vasega, ma isi.—1 Pete. 3:15.
4. Aiseā e mafai ai ona outou mautinoa e mafai ona outou taulau a o auai i aʻoga?
4 E ui lava e te ono faatalatū ma lē mautonu i le alu atu i le aʻoga, ia outou iloa o loo lagolagoina outou e le toʻatele o i latou o loo mananaʻo ia taulau lo outou auai i aʻoga. E lē gata i lea, e matou te olioli faatasi ma outou i le avanoa o loo outou molimau atu ai i isi i le oganuu e patino lava iā te outou. O le mea lea, ia lototetele ma sauni mo le aʻoga!