Ua Saunia a Tatou Mekasini ia Aogā i so o se Tagata
1. E faapefea ona faataʻitaʻi le pologa faamaoni ma le faautauta i le aposetolo o Paulo?
1 E pei ona fetuutuunaʻi le aposetolo o Paulo i le auala na ia taulimaina ai le tala lelei ina ia maua “tagata o ituaiga uma,” ua faaaogā e le pologa faamaoni ma le faautauta a tatou lomiga, ina ia oo atu i tagata e eseese talaaga ma talitonuga. (1 Kori. 9:22, 23) Ina ia faaaogā tatau a tatou lomiga o Le Olomatamata ma le Ala Mai! e ao ona tatou manatunatu iā i latou o le a faitauina nei mekasini.
2. O ai na fuafua ina ia aogā i ai le Ala Mai!?
2 Ala Mai!: O le fuafuaga o lenei mekasini, ina ia oo atu i ituaiga uma o tagata e pei o lea na talanoa atu ai le aposetolo o Paulo i le faapea mai, “tagata Atenai e.” (Galu. 17:22) O na tagata e leai ni talaaga faa-Kerisiano, ma e itiiti lava lo latou malamalama i Tusitusiga Paia. E faapena foʻi le ʻaufaitau lea na fuafua i ai le Ala Mai!, e itiiti pe leai foʻi so latou malamalama i le Tusi Paia. Atonu latou te lē iloa se mea e uiga i aʻoaʻoga faa-Kerisiano, atonu foʻi latou te lē talitonuina lotu, pe e lē iloa o loo i le Tusi Paia mea e aogā. O le manatu autū o loo i le Ala Mai! o le faatalitonu lea o le ʻaufaitau o loo soifua le Atua moni. O le isi sini o lenei mekasini, ina ia faamalosia le faatuatua i le Tusi Paia, ma ia fesoasoani i le ʻaufaitau ina ia malamalama o Molimau a Ieova e ese mai i isi lotu.
3. O ā ituaiga o tagata faitau o loo fuafua i ai lomiga eseese o Le Olomatamata?
3 Le Olomatamata: O loo fuafuaina le lomiga o Le Olomatamata mo le lautele, mo le ʻaufaitau e i ai se faaaloalo mo le Atua ma le Tusi Paia. O loo iai so latou iloa o le Tusi Paia, ae e lē saʻo lo latou malamalama i aʻoaʻoga moni. E tutusa i latou ma le aofia na faasino atu i ai Paulo, “o ē matataʻu i le Atua.” (Galu. 13:14-16) O le lomiga o Le Olomatamata mo suʻesuʻega, ua lomia faapitoa mo Molimau a Ieova. Na manatu Paulo o i latou na faitauina ana tusi e masani i Tusitusiga Paia, ma e i ai le poto saʻo o le upu moni. (1 Kori. 1:1, 2) O mataupu o loo lomia i lomiga mo suʻesuʻega, e mo i latou e auai i a tatou sauniga, ma ua masani i faaupuga ma manatu o Molimau a Ieova.
4. Aiseā e tatau ai ona tatou faamasani i lomiga taʻitasi o mekasini tatou te faaaogā i le fanua?
4 E ui e masani ona tatou ofo faatasi mekasini e lua, ae e tatou te faamatilatila se mataupu i le mekasini e tasi i la tatou taulimaga. O lea, ia fai ma ou sini le faamasani i lomiga taʻitasi. Ona e iloa lea o mataupu e aogā mo i latou tou te feiloaʻi.