Suiga Matagofie mo Le Olomatamata!
1 I le amataga o lenei tausaga, na maua ai e faapotopotoga se faasilasilaga fiafia: E amata atu iā Ianuari 2008, o le a lua ni vaega mo le lomiga o Le Olomatamata, o le isi mo tagata lautele a o le isi mo le ʻauuso Kerisiano! Atonu ua e tomānatu: ‘O le ā le eseesega o nei lomiga? O ā itu e lelei ai lenei suiga? Po o le a iai ni vala fou i nei lomiga?’
2 Auala e Eseese Ai: O lomiga mo aso muamua uma o masina o le a faaulutalaina o Lomiga mo le Lautele. O mataupu uma i lenei lomiga e aogā mo le atiina aʻe o le fiafia o tagata lautele. Ae o lomiga mo aso 15 uma o masina o le a faaulutalaina o Lomiga mo Suʻesuʻega ma e lē ofoina i le faiva i le fanua. O le a maua i lenā lomiga mataupu mo suʻesuʻega e manaʻomia i le masina ma isi foʻi mataupu e aogā patino mo Kerisiano tuuina atu iā Ieova. O Le Olomatamata o Lomiga mo le Lautele e lē gata e aogā mo auauna a Ieova, ae sili foʻi ona aogā mo i latou e fiafia e talia le Tusi Paia ae lē o ni Molimau a Ieova. Ae o le Ala Mai!, o le a taulaʻi pea mo le lautele, e aofia ai i latou e lē talitonu atoatoa i le Tusi Paia faapea ma i latou e lē fiafia i talitonuga faa-Kerisiano.
3 O Itu e Lelei Ai: I le Lomiga mo Suʻesuʻega, e lē toe manaʻomia ona toe faamatalaina upu i se auala e faamalamalama ai i latou e lē o ni Molimau a Ieova e pei o le upu “paeonia.” O loo iai foʻi i lenei lomiga mataupu tāua ua saunia aemaise lava mo Molimau a Ieova ma tagata aʻoga o ē ua faia ni taumafaiga e agaʻigaʻi i luma faaleagaga. Ae faapefea le Lomiga mo le Lautele? Talu ai o mataupu faapea ma le auala e tusia ai o le a taulaʻi atu i tagata lautele, o le a faaosofia la i latou e lē o ni Molimau e fia faitauina le lomiga atoa. O le mea moni, o le faitauina o nei lomiga o le a aogā iā i tatou uma o auauna a Ieova. Ae e talu ai o lea o le a tatou ofoina na o le tasi Le Olomatamata faatasi ai ma le Ala Mai! i le faiva i le fanua i masina taʻitasi, ua tatou maua ai se avanoa mo lenā masina atoa e sauniuni ai ni taulimaga uigā.
4 O Suiga Fou: O loo fuafuaina ni nai suiga matagofie mo Le Olomatamata o Lomiga mo le Lautele. O se tasi o suiga, o le a talanoaina ai aʻoaʻoga faavae faale-Tusi Paia i se auala e faigofie ai ona malamalama. O le isi suiga o le a taʻu mai ai le auala e fesoasoani ai le Tusi Paia i aiga. Ma o le a iai foʻi le fuafuaga mo suʻesuʻega faale-Tusi Paia e aogā mo le fanau. O le a iai i lomiga taʻitasi se mataupu e faamatilatila ai ni vaega patino o le Tusi Paia, lea e aʻoaʻoina ai i tatou e faatatau iā Ieova.
5 Tatou te tatalo ia faamanuia e Ieova lenei faatulagaga fou mo Le Olomatamata. Tau ina ia avea lenā lomiga, faatasi ai ma le Ala Mai!, o se fesoasoani i le faaooina atu o le tala lelei i nisi tagata se toʻatele ua tatau i ai.—Mata. 10:11.