Tala o Mea na Tutupu Mai i le Tusi Tausaga 2011
AMERIKA
Itulau 55, palakalafa 1-2
E LEʻI TUʻITUʻI MAI
O Miriama, e nofo i Polivia, na tatalo i le Atua i le vaiaso atoa. E faapea upu o lana tatalo: “Faamolemole fesoasoani mai iā te aʻu ia ou iloa oe, ae ou te lē manaʻo e ala mai le fesoasoani i Molimau a Ieova. Ou te lē manaʻo e latou te tuʻituʻi mai i loʻu faitotoʻa.”
I le faaiʻuga o le vaiaso lenā na tatagi ai le telefoni. O le paeonia faapito o Candy, o lē na ofo e alu atu e avatu a tatou mekasini iā Miriama i le pe toe tasi le itula. Sa malie i ai Miriama. E leʻi atoa le itula ae taunuu Candy i le faitotoʻa. Na faafuaseʻi ona tatala mai e Miriama le faitotoʻa ma fai atu iā Candy e sau i totonu ma nofo i lalo. Ona amata lea ona fesavaliaʻi Miriama ma lūlū lona ulu, e foliga ua lē fiafia. Na fesili atu Candy pe e iai se mea ua tupu. Sa tali mai Miriama: “O aʻu ua ou matuā teʻi lava! Ua sili atu i le vaiaso o oʻu tatalo i le Atua mo ni taʻiala ma le puipuiga, ae na matuā manino i aʻu tatalo ou te lē manaʻo e ala mai se fesoasoani i Molimau a Ieova, lea e tuʻituʻi soo mai i loʻu faitotoʻa! Ae teʻi ua e telefoni mai nai lo o le tuʻituʻi! Talu mai le taimi na e telefoni mai ai, sa ou tatalo i le Atua e aua e te sau e asiasi mai iā te aʻu. A o lea ua e sau! Ua ou matuā ofo lava! E mautinoa lava e manaʻo le Atua iā te outou o Molimau a Ieova, e fesoasoani mai iā te aʻu.” Na amata loa lava i le taimi lenā le suʻesuʻega.
PAPUA NIU KINI
Itulau 138, palakalafa 3-4
A o paeonia Don ma Shirley Fielder i Hula, na la amata ai se suʻesuʻega faale-Tusi Paia ma Alogi ma Renagi Pala. Na tusi Don e faapea: “O Alogi o se tagata gaoi ma e tauaʻimisa soo lava ma isi. Na maua o ia i se faamaʻi o le teropika lea na matagā ai le paʻu o lona tino, ma e iai se papala i se vaega o lona gutu. O i laʻua uma ma lana avā e lamuina le niu e taʻua o le betel nut ma na mūmū totototo ai va o o la nifo ua uli. E leai ma se isi e manatu o le a tosina mai Alogi i le upu moni. Peitaʻi, na amata ona fiafia i laʻua uma i le upu moni ma auai i a tatou sauniga, ma sa nonofo fifilemu i le pito i tua.
Na faapea atili mai Don: “Na ma vaaia se suiga mataʻina o Alogi i le vaitaimi o le ono masina. Na lē toe gaoi, tauaʻimisa, ma finau ma isi, ma na faamamā faaletino i laʻua uma ma Renagi ma amata ona auai i sauniga. Na amata foʻi ona fai so la sao i le tufaina atu o le tala lelei i isi. O le mea moni, o i laʻua faatasi ai ma se vaega toʻaitiiti, o tagata talaʻi muamua ia i le vaipanoa o Hula.”