Talaʻi ma le Mautinoa i Oganuu Pisinisi
1. Aiseā e lē tatau ai ona tatou lotovaivai pe a lagona le palaai e talaʻi i oganuu pisinisi?
1 Pe e te lagona le palaai e talaʻi i oganuu pisinisi? Pe afai o lea, aua le lotovaivai ai, auā e oo lava iā Paulo o lē sa avea ma faifeʻau lototele ma lē fefe, sa tatau ona maua le “lototele” ina ia mafai ai ona talaʻi atu. (1 Tesa. 2:2) O loo taʻua i lalo nisi o popolega masani faatasi ai ma fautuaga aogā i le auala e manumalo ai i na popolega.
2. Aiseā e lē tatau ai ona tatou popole i le faalavelave atu i tagata faigaluega?
2 Po o le a Lē Fiafia Tagata Faigaluega pe a Faalavelave Atu iā i Latou? O le tele o tagata faigaluega i pisinisi e galulue mo tagata i le lautele, ma e latou te faatalitalia nisi po o ni mea e faalavelave atu. E masani lava o le a latou faaaloalo mai, ona atonu e latou te manatu iā te oe o sē o loo manaʻomia la latou auaunaga. E ala i le faaalia o uiga mamalu ma māfana ma faaleuō, o le a latou feutagaʻi mai ai iā te oe i se auala faaaloalo.
3. E faapefea ona tatou ʻalofia le faalavelave atu i isi tagata?
3 Pe e Tatau Ona Fai Atu Laʻu Taulimaga i Luma o Tagata e Toʻatele? Pe a talafeagai, ia filifili se taimi e lē o pisi tele ai faleoloa, e pei o le taimi faatoʻā tatala ai. Faatali seʻi oo i le taimi e avanoa ai le pule po o le failautusi a o leʻi e fai atu se tala. Ia faapuupuu lau taulimaga.
4. O le ā e tatou te ono fai atu pe a talaʻi i pisinisi?
4 O le ā Laʻu Tala e Tatau Ona Fai Atu? Ia talanoa atu i le tagata o loo vaaia le galuega pe afai e toʻatele tagata faigaluega. E te ono fai atu: “E faigatā ona maua tagata faipisinisi i o latou fale, o le ala lea ua matou asiasi mai ai iā te oe i lou fale faigaluega. Ou te iloa o loo e feagai ma galuega, o lea, o le a faapuupuu atu laʻu taulimaga.” Ina ia ʻalofia le manatu e faapea o i tatou o ni tagata o loo faatau atu ni oloa, e sili la ona aua neʻi taʻua le faatulagaga o foaʻi tauofo, seʻi vaganā ua fesiligia le auala e faatupeina ai la tatou galuega. E faalagolago i le ituaiga o pisinisi, e te ono fesili atu i le pule mo se faatagaga e talanoa puupuu atu ai i tagata faigaluega. Ia toe fai atu lau taulimaga na fai muamua. Afai e pisi le tagata faigaluega, ia faapuupuu lau taulimaga ma tuu atu iā te ia se sāvali. Pe afai e lē talafeagai ona talanoa atu i tagata faigaluega, atonu o le a faatagaina oe e tuu ni lomiga i le potu mālōlō po o le potuʻai o le fale faigaluega.
5. O ā māfuaaga e tatou te talaʻi atu ai ma le mautinoa i oganuu pisinisi?
5 Na talaʻi atu ma le mautinoa Iesu ma Paulo i tagata i o latou fale faigaluega, ma e mafai foʻi ona e faia faapea. (Mata. 4:18-21; 9:9; Galu. 17:17) Ia ōle atu iā Ieova e fesoasoani mai iā te oe ia maua le toʻafilemu ma le lototele. (Galu. 4:29) O le tele o oganuu pisinisi e iai tagata e seāseā maua atu i o latou fale, o lea, aiseā e lē faataʻitaʻi ai lenei ituaiga o molimau e fuatele mai?