Ua Faaalia le Mamalu o le Atua i Mea Ofoofogia na Ia Faia
E toʻatele e fiafia e matamata i mea o le foafoaga. Ae e toʻaitiiti i latou e iloaina o nei mea o loo faaalia ai manatu ma faalogona o Lē e Sili na faia i tatou. (Roma 1:20) I aso anamua, na aʻoaʻoina ai Tavita e uiga iā Ieova e ala i Lana Afioga faagaeeina. Ae na ia “vaai” foʻi ma vavalalata atu iā te Ia e ala i ana foafoaga. (Sala. 8:3, 4) O le ata vitiō ua faaulutalaina The Wonders of Creation Reveal Godʻs Glory, ua fesoasoani iā i tatou, a tatou fanau ma a tatou tagata aʻoga o le Tusi Paia, ina ia vaavaai totoʻa i nisi o foafoaga a Ieova, iloa uiga o Lē e Sili na faia i tatou, ma atili ai ona tatou mafuta vavalalata atu iā te Ia. Pe a māeʻa ona matamata le vitiō, vaai pe mafai ona e taliina fesili o loo mulimuli mai.
(1) E faapefea i le telē ma le maopoopo o le vateatea aoao ona faaloloto ai lo tatou talisapaia o Ieova? (Isa. 40:26) (2) Pe a tatou vāai totoʻa i le vai, o le ā e tatou te aʻoaʻoina e faatatau i Lē na foafoaina lenei mea? (Faaa. 14:7) (3) E faapefea i le telē o le paneta o le lalolagi ma le mamao mai i le paneta o le lā ona faaalia ai le atamai o Ieova? (4) O le ā le fuafuaga o le masina? (Sala. 89:37) (5) Na faapefea ona foafoaina e Ieova tagata ina ia olioli i le olaga? (6) O le ā le DNA? (Sala. 139:16) (7) Ua faapefea ona ese tagata mai i foafoaga uma a Ieova i le lalolagi? (Kene. 1:26) (8) O le ā o loo e tulimataʻia i le lalolagi fou?
Isi Vala: (9) O fea e maua mai ai lanu? (10) E faapefea ona malosi atu le vai i lo o le kalave ina ia mafai ona oo atu i tumutumu o laau? (11) O le ā le vaega a le vai e faia i o tatou tino? (12) Taʻu mai ni faataʻitaʻiga e iloa ai o loo iai le autasi i meafaiola. (13) E faapefea ona iloa e meafaiola ona fai ni paaga? (14) O le ā le “golden angle,” ma e faapefea ona faaalia i le foafoaga?
“Ia Vaavaai Lelei” i Galuega a Ieova: Na faalaeiauina i tatou e Iesu ina “ia vaavaai lelei i manufelelei o le lagi,” ma “ia aʻoaʻo se lesona mai lili o le vao.” (Mata. 6:26, 28) O le faia faapea e faamalosia ai lo tatou faatuatua, faamausalī ai lo tatou mautinoa i Lē na Foafoaina mea, ma atiaʻe ai lo tatou talisapaia o lona atamai, le malosi e laveaʻi ai ona tagata ma lona alofa. Nai lo le faalavelavea fua i galuega a le lalolagi, ia fai se taumafaiga e faaavanoa se taimi e vaavaai ai i le ofoofogia o foafoaga a Ieova, ma mafaufau i mea ua taʻu mai ai e uiga i lo tatou Atua.—Sala. 19:1.