Auala e Lima Ina ia Maua ai se Suʻesuʻega Faale-Tusi Paia
1. Pe afai o se luʻi le mauaina o se suʻesuʻega faale-Tusi Paia i la tatou oganuu, o le ā e tatau ona tatou faia, ma aiseā?
1 Po o se luʻi iā te oe le mauaina o se tasi e te lua suʻesuʻeina le Tusi Paia? Ia taumafai pea. E faamanuia mai Ieova i ē e lē o faavaivai i le faia o lona finagalo. (Kala. 6:9) Ua taʻua i lalo fautuaga e lima e fesoasoani iā te oe.
2. E faapefea ona tatou faaaogā le taulimaga tuusaʻo e amata ai se suʻesuʻega?
2 Taulimaga Tuusaʻo: Ua iloa e le toʻatele e tatou te ofoina Le Olomatamata ma le Ala Mai!, ae atonu e latou te lē o iloa e tatou te ofoina atu foʻi suʻesuʻega faale-Tusi Paia. Aiseā la e lē taumafai ai e faaaogā le taulimaga tuusaʻo i le talaʻiga mai lea fale i lea fale? Ia fesili atu i tagata fiafia o loo e asiasi i ai pe fiafia e fai se suʻesuʻega faale-Tusi Paia. Afai e lē mananaʻo ai, e mafai lava ona faaauau ona e tuu i ai lomiga ma atiaʻe lo latou fiafia. Ua tele tausaga o asiasi se uso i se ulugalii faaipoipo sa fai ma ana alāmekasini. Ina ua uma ona tuu i ai mekasini fou, ua liliu o le a alu, ae ia toe manatuaina loa ma fesili atu: “E te lua fiafia e fai sa oulua suʻesuʻega faale-Tusi Paia?” Sa faateʻia o ia ina ua la tali mai ua lelei. Ua papatiso nei i laʻua.
3. Pe e tatau ona tatou manatu o tagata fiafia uma o loo auai i sauniga, o loo suʻesuʻeina le Tusi Paia ma se tasi? Faamatala.
3 Fesili i Tagata Fiafia o Auai i Sauniga: Aua neʻi e manatu o tagata fiafia uma o loo auai i sauniga, o loo suʻesuʻeina le Tusi Paia. Ua taʻua e se uso: “E sili atu i le ʻafa o aʻu suʻesuʻega, na amata e ala i le talanoa atu i ē na auai i le sauniga.” Na filifili se tuafafine e talanoa atu i se fafine e matamuli, ae ua papatiso lana fanau teine ma e iai i le faapotopotoga. Ua tusa ma le 15 tausaga o auai le fafine i sauniga, ma e sau i le Maota mo Sauniga pe a amata le sauniga, ae o le taimi lava e tuua ai alu ese loa. Sa malie le fafine e fai sana suʻesuʻega ma na iʻu ina sau i le upu moni. Na tusi le tuafafine: “Ou te faanoanoa ona e 15 tausaga o oʻu faatalitali e fai atu iā te ia pe fia fai sana suʻesuʻega!”
4. E faapefea ona tatou maua se suʻesuʻega e ala i tagata e faasino atu e isi iā te oe?
4 Tagata e Faasino Atu e Isi iā te Oe: E taumafai se tasi o tuafafine e ō faatasi ma isi i a latou suʻesuʻega faale-Tusi Paia. Pe afai e malie i ai le faiaʻoga, e fesili atu le tuafafine i le tagata suʻesuʻe, pe e iai nisi e na te iloaina e ono fiafia e fai ni a latou suʻesuʻega. Pe a ofo atu i se isi na e asiasi i ai le tusi Aʻoaʻoga a le Tusi Paia, ia fesili atu: “Pe e te iloaina se tasi e fiafia e maua sana kopi o lenei tusi?” Ona o le tulaga o mea, e iai taimi e lē mafai ai e tagata talaʻi ma paeonia, ona faia se suʻesuʻega ma se tagata fiafia e feiloaʻi i ai i le oganuu. O lea ia faailoa atu i isi tagata talaʻi ma paeonia, o loo e avanoa e faia se suʻesuʻega faale-Tusi Paia.
5. Aiseā e tatou te fesili atu ai i paaga lē talitonu a sui o le faapotopotoga, pe e fia fai ni a latou suʻesuʻega?
5 Paaga Lē Talitonu: Pe e iai ni tagata talaʻi i lau faapotopotoga e lē talitonu a latou paaga? O nisi tagata lē talitonu e mumusu e talanoa ma a latou paaga Kerisiano i le Tusi Paia, peitaʻi e latou te taliaina pe a ofo atu se isi e ese mai i lona aiga ina ia latou suʻesuʻeina le Tusi Paia. E masani lava, e sili ona lelei pe a talanoa muamua atu i le paaga talitonu, ina ia iloa po o le ā le auala sili e talanoa atu ai i lana paaga lē talitonu.
6. Aiseā e tāua ai ona tatalo pe a taumafai ia maua se suʻesuʻega?
6 Tatalo: Aua neʻi manatu māmā i le mamana o tatalo. (Iako. 5:16) Ua folafola mai e Ieova e faafofoga mai i a tatou talosaga pe afai e ōgatusa ma lona finagalo. (1 Ioa. 5:14) O se tasi o uso e pisi tele lana faasologa, sa tatalo mo se suʻesuʻega faale-Tusi Paia. Sa taumānatu lana avā pe e maua sona taimi e tausia ai manaʻoga o se suʻesuʻega, aemaise pe afai e tele faafitauli o le suʻesuʻega. O lea sa ia faailoa atu ai nei mea uma iā Ieova ina ua tatalo ia maua se suʻesuʻega a lana tane. I le lua vaiaso mulimuli ane ai, sa tali mai a la tatalo ina ua tuu atu e se paeonia i le uso, se tamāloa na tau ai ma e manaʻo e fai sana suʻesuʻega. Na tusi le avā: “O so o se tasi e manatu e faigatā ona ia faia se suʻesuʻega faale-Tusi Paia, ou te faapea atu: Ia taʻua patino i au tatalo, ma ia aua neʻi muta le tatalo atu pea mo se suʻesuʻega. Ua sili atu lo ma fiafia nai lo o le mea na ou mafaufau i ai.” Pe afai e finafinau, o le a e maua foʻi se suʻesuʻega faale-Tusi Paia, ma tofo i le olioli ona o le fesoasoani atu i se tasi ia ui i “le auala e tau atu i le ola.”—Mata. 7:13, 14.