“Ua Ou Asiasi Mai Talu ai . . . ”

Pe a faafeiloaʻi i tatou e le tagata e ona le fale, e latou te ono taumānatu po o ai i tatou ma aiseā ua tatou asiasi atu ai. O le ā se faatomuaga lelei e tatou te fai atu ina ia faatoʻafilemu ai o latou mafaufau? Pe a uma ona faafeiloaʻi e nisi o le ʻautalaʻi le tagata e ona le fale, e masani ona latou faaaogā le upu “talu ai” e faamatala atu ai le māfuaaga ua asia ai i latou. E ono faapea atu le tagata talaʻi: “Ua matou asiasi mai talu ai o loo popole le toʻatele o tagata i soligatulafono. O le ā sou manatu . . . ” Pe faapea atu foʻi: “Ua ou asiasi mai talu ai o loo oʻu faia ni talanoaga faale-Tusi Paia e aunoa ma se totogi.” Atonu e fiafia le tagata e ona le fale e faalogo mai i le feʻau o loo e avatu, pe afai e faatomua atu au upu i le māfuaaga ua e asiasi atu ai.