Fesoasoani i Isi ia Iloa le Alo o le Atua, o Iesu Keriso
1 O Tesema, o le masina lea e matuā manatunatu ai le toatele o le au fia Kerisiano ia Iesu, na i lo o se isi lava taimi o le tausaga. Ua avea ai la o se masina lelei e faatomua ai le tusi o Laʻu Tusi o Tala o Le Tusi Paia po o le Greatest Man Who Ever Lived. Talu ai le aogā o lenei lomiga, e ao ai la ona tatou faamautinoa lelei pe naunau moni lē ona le fale e fia iloa atili le Alo o le Atua, ae tatou te leʻi ofoina atu i ai le tusi. E mafai faapefea ona tatou faia lena mea?
2 Taumafai e tatai i se talanoaga faale-Tusi Paia e faauai atu ai manatu ia Iesu.
Pe a uma ona faafeiloai atu i lē ona le fale, e te ono faapea atu:
◼ “O loo matou fesiligia o matou tuaoi i le asō, po o ā ni o latou taofi a o latou faitau atu i a latou Tusi Paia e uiga i le ola e faavavau. [Faataga mo se tali.] E tāua lenei tulaga auā pe tusa ma le 40 taimi o loo taʻua ai i le Tusi Paia lena faamoemoe. O le ā e ono uiga i ai lena olaga mo i tatou? Seʻi mātau le manatu o loo taʻua i le Faaaliga 21:4. [Faitau.] Pe na e mātau mai le mea ua folafolaina mai? [Faatali mo se tali.] E mafai faapefea ona tatou maua le ola e faavavau?” Faitau le Ioane 17:3, ma faamatilatila le manaoga ina ia goto i le loto le poto i le Atua ma lona Alo, o Iesu Keriso. Afai e atagia mai se naunau o lē ona le fale, ona faaali atu lea ia te ia le tusi o Tala o Le Tusi Paia e faaaogā ai le tala e 115, po o le Greatest Man, ina ia atili tupu aʻe ai lona naunau.
3 Afai e itiiti se uluai naunau ua faaalia e lē ona le fale, ona ofo lea i ai o lomiga fou o Le Olomatamata ma le Awake! po o le sāvali Po o le a Faasaoina ea Lenei Lalolagi? Tatai manatu i se manatu patino e tasi pe lua i le lomiga o loo ofoina. Taʻu i ai lou toe foi atu i se taimi avanoa e faaauau le lua talanoaga i le mataupu.
4 Afai e foliga mai e tele ni mea o fai a lē ona le fale, atonu la e atamai pe a faapuupuu le taulimaga o loo taʻua i luga. E ono iloa foi e le au talaʻi fou le faigofie ona faaaogā o le taulimaga o loo sosoo mai.
Pe a uma ona faailoa atu i tatou, e mafai ona tatou faapea atu:
◼ “O loo matou fesiligia o matou tuaoi i le asō i ni o latou taofi pe a latou faitau atu i a latou Tusi Paia e uiga i le mauaina o le ola e faavavau. Mo se faataitaiga, seʻi mātau le fetalaiga a Iesu i le Ioane 17:3. [Faitau.] O le pogai lena ua lomia ai lenei tusi, ina ia fesoasoani i tagata ia latou iloa atili Iesu Keriso ma ana aʻoaʻoga.” Susue le tusi o Tala o Le Tusi Paia i le ata matagofie lena o loo i le tala e 115 ma fai i ai se manatu. Suʻe i le tala e 116, ona faitau lea ma talanoa i palakalafa e tolu ma le fa. Afai ua naunau lē ona le fale, ona ofo atu lea i ai o le lomiga.
5 Afai e te tuuina le tusi, ia faataatia se faavae mo se suesuega faale-Tusi Paia, e ala i le ofo atu i ai e toe faaauau le talanoaga e faauma ai vaega o totoe o le tala e 116 i lena lava taimi, po o le taimi o le toe asiga i ni nai aso mulimuli ane. Aua le taʻuina atu i lē ona le fale se umi patino o le taimi e tatau ona faaaluina i le asiasiga o sosoo ai, ae tau lava ina taʻu i ai faapea, i le na o ni nai minute lava, ae o le a tele nisi faamatalaga lelei e mafai ona ia aʻoaʻoina e uiga ia Iesu Keriso mai le Afioga a le Atua, le Tusi Paia.
6 Seʻi o tatou faaaogāina uma nei aso malōlō faalelalolagi, e tatai atu ai manatu i le upu moni e uiga i le Alo o le Atua, o Iesu Keriso, e fesoasoani ai i isi e ulu atu i le ola e faavavau.—Mata. 7:14.