Faaleleia o o Tatou Tomai i le Faiva—Faia o Faamaumauga o Ē na Faaalia le Fiafia

Na faapea atu le aposetolo o Paulo iā Timoteo: “Ia uaʻi totoʻa iā te oe lava ma lau aʻoaʻo atu.” (1 Timo. 4:16) O lenā fautuaga ua faailoa mai ai, e tatau ona tatou taumafai malosi e faaleleia o tatou tomai e tusa pe e tatou te fou mai pe ua leva foʻi i le upu moni. Ina ia fesoasoani iā i tatou e faia faapea, o le a iai i La Tatou Faiva o le Malo se faasologa o mataupu fou e faaulutalaina, “Faaleleia o o Tatou Tomai i le Faiva.” E talanoaina i mataupu taʻitasi se tomai tāua, faapea ma nisi o fautuaga i le auala e atiaʻe ai. A o faagasolo le masina, e faalaeiauina tagata uma e galulue i le faaleleia o lea tomai. Pe a uma le masina, e iai se vaega o le Sauniga o le Auaunaga, lea o le a maua ai le avanoa e faamatala ai aogā na tatou maua mai i le faatatauina o lenā tomai. E faalaeiauina i tatou i lenei masina, e galulue i le faia o faamaumauga o i latou na faaalia le fiafia.

Māfuaaga e Tāua Ai: Ina ia faataunuu lo tatou tofiga, e lē lava le tau na o lo tatou ō e talaʻi. E tatau ona tatou toe foʻi e asi ma aʻoaʻoina i latou na faaalia le fiafia, ma faasūsū fatu o le upu moni na totōina. (Mata. 28:19, 20; 1 Kori. 3:6-9) E aofia i lenei mea le toe foʻi e asia le tagata, talatalanoa e faatatau i ona popolega, ma toe sosoo le talanoaga. O lea, pe a tatou maua se tagata fiafia, e tatau ona fai ni faamaumauga e faatatau i lea tagata.