Ia Maua le Lototele e Faia ai Toe Asiga

¹ Pe e te fiafia e faia toe asiga? E toatele le ʻau talaʻi e faapena. Atonu sa e lē mautonu i le taimi muamua, ae maise lava pe a toe asiasi atu i ē ona fale na itiiti lava se fiafia na faaalia i le uluai taimi na faatoʻā feiloai ai ma i latou. Ae peitai, a o e ‘maua le lototele e ala i lo tatou Atua e talaʻi atu le tala lelei’ e ala i le faia o toe asiga, atonu o le a e maofa ai e iloa e maeu le faigofie ma le tauia o lenei galuega. (1 Tesa. 2:2) E faapefea?

² O le mea moni, e iai se eseesega tāua i le faia o se toe asiga ma le uluai asiasiga. O le toe asiga, ua faia ona o lea ua iai se masaniga, ae lē o se tagata ese, ma e masani lava ona faigofie atu ona talanoa ma se tagata ua masani, nai lo o se tagata ese. Ona o taui faamalieloto e masani ona maua mai le auai i lenei galuega, atonu la e mafai ona iu toe asiga i le maua ai o ni suesuega faale-Tusi Paia uigā i aiga.

³ A o tatou galulue mai lea fale i lea fale, e tatou te asiasi atu ai pea lava pea i tagata lē fiafia i le taimi muamua na tatou asiasi atu ai ia i latou. Aisea, la e tatou te asiasi atu ai pea? Ua tatou iloa e iai taimi e suia ai tulaga o tagata, ma o se tagata la na foliga mai e lei āno mai pe sa tetee foi i la tatou uluai asiasiga, atonu o le a fiafia i le isi taimi tatou te asiasi atu ai. I le manatua o lena mea, e tatou te sauniuni lelei ai ma tatalo mo le faamanuiaga a Ieova ina ia avea se upu tatou te fai atu ai i lea taimi ma mea e talilelei mai ai.

⁴ I la tatou galuega mai lea fale i lea fale, tatou te talaʻi atu ai ma le loto naunau i tagata o ē sa lei faaalia lava sina fiafia mai i le taimi muamua, pe lē sili atu ai ea la ona tatou naunau e toe asia i latou o ē na faaalia sina naunau i le feau o le Malo?—Galu. 10:34, 35.

⁵ O le toatele o i tatou ua iai i le upu moni i aso nei ona sa toe asia ma le onosai i tatou e se tagata talaʻi. Ana faapea o oe o se tasi o i latou nei, e mafai ona e fesili ifo ia te oe lava: ‘⁠O le ā se uiga na ou muai faaalia i lena tagata talaʻi? Pe na ou talia loa le feau o le Malo ina ua ou muai faalogo i ai? Pe sa foliga ou te lei āno i ai?’ E tatau ona tatou fiafia ona sa manatu le tagata talaʻi lea na asiasi mai e faapea, e tatau lava ona toe asia i tatou, na ‘maua le lototele e ala i le Atua,’ toe asiasi mai, ma oo ai ina aʻoaʻoina i tatou i le upu moni. Ae faapefea tagata na faaalia sina fiafia i le taimi muamua ae mulimuli ane ua foliga mai ua latou alofia i tatou? E tāua tele se uiga mautinoa e pei ona faaalia i se mea lenei na tupu.

⁶ A o auai ni tagata talaʻi se toalua i le galuega molimau atu i le alatele i se tasi taeaopo lava, na la feiloai ai i se tamaitai talavou o tosotoso se tamaitiiti i se taavale pepe. Na talia e le tamaitai se mekasini ma valaaulia tuafāfine ina ia ō atu i lona fale i le Aso Sa na sosoo ai. Na la taunuu i le taimi na atofaina, ae na taʻu atu i ai e lē ona le fale e leai sona avanoa e talanoa ai. Ae peitai na ia folafola atu o le a maua lona avanoa i le vaiaso o i luma. Sa tau masalosalo tuafāfine pe faamata o le a ia tausisia lana folafolaga, ae ina ua la toe foi atu, sa faatali mai le tamaitai ia i laʻua. Na amata ai se suesuega, ma sa uigaese le agaigai i luma o le tamaitai. E lei umi lava se taimi ae amata loa ona auai e lē aunoa o ia i sauniga ma faia se sao i le auaunaga i le fanua. Ua papatiso nei o ia.

⁷ Faataatia se Faavae Lelei i le Uluai Asiasiga: O se faavae lelei mo se toe asiga taulau manuia, e masani lava ona faataatia i le uluai asiasiga. Ia faalogologo lelei i faamatalaga a lē ona le fale. Po o le ā o taʻu atu ai ia te oe? Po o se tagata e fiafia i le lotu? Pe manatu mamafa o ia i mataupu e uiga i tagata lautele? Pe fiafia o ia i le faasaienisi? talafaasolopito? le siosiomaga? I le faaiuga o le asiasiga, e mafai ona e lāgā se fesili e faatupu manatu ma fai i ai o le a lua talanoaina le tali a le Tusi Paia i le fesili pe a e toe foi atu.

⁸ Mo se faaaoaoga, afai e talia e lē ona le fale le folafolaga a le Tusi Paia e uiga i se lalolagi parataiso, ona talafeagai ai lea ona faia atili se talanoaga e uiga i le mataupu. Ae e te lei tuua le fale, e mafai ona e fesili atu: “E mafai faapefea ona tatou mautinoa o le a faataunuuina e le Atua lenei folafolaga?” Ona e faaopoopo atu lea e faapea: “Atonu e mafai ona ou afe mai pe a iai tagata uma o lo outou aiga i le fale, ma o le a mafai ai ona ou faailoa atu ia te oe le tali a le Tusi Paia i lenei fesili.”

⁹Afai e leai se mataupu patino e fiafia i ai lē ona le fale, e mafai ona e lāgā se tasi o fesili o loo faatomua mai i taulimaga na o loo i le itulau i tua o La Tatou Faiva o le Malo ma faaaogā fesili na e faavae ai se isi au talanoaga.

¹⁰ Ia Tausi Lelei ni Faamaumauga Tusitusia Saʻo: E tatau ona saʻo ma maeʻaeʻa au faamaumauga o le galuega mai lea fale i lea fale. Tusi i lalo le suafa ma le tuatusi o lē ona le fale i le taimi lava e te tuua ai le fale. Aua le tau matematea le numera o le fale po o le igoa o le auala—ia siaki le faamatalaga e faamautinoa ai po o saʻo. Tusi se faamatalaga e faatatau i le tagata. Faamau i lalo le mataupu na talanoa i ai, mau na e faitauina, so o se lomiga na e tuua, ma le fesili o le a taliina pe a e toe foi atu. Ia tusia foi le aso ma le taimi o le uluai asiasiga ma le aso ma le taimi na e fai atu o le a e toe foi atu ai. Ia, o lea ua maeʻa lau faamaumauga, aua neʻi leiloa! Teu i se nofoaga malu ina ia mafai ona e toe tapa atu i ai i se taimi mulimuli ane. Ia mafaufau pea i le tagata ma le auala o le a e taulimaina ai le toe asiga i le isi au asiasiga.

¹¹ Ia Iloa po o ā Ou Sini: O le mea muamua, o lou māfana ma faaleuo, fai le mea aupito sili e te mafaia e faatoafilemu ai lē ona le fale. Ia faailoa lou naunau atu ia te ia o se tagata, e aunoa ma le suesuevale. Ona sosoo ai lea ma lou faamanatu atu o le fesili lea na e faatū atu i lau uluai asiasiga. Faalogo lelei i ona manatu, ma ia faaalia le talisapaia moni mo ona manatu faaalia. Ona faailoa lea i ai o le pogai e aogā ai manatu o le Tusi Paia. Afai e mafai, ona tataʻi lea i se manatu o loo fesootai atu ma le tusi, Le Poto e Taʻitaʻia ai i le Ola e Faavavau. Ia manatua lelei, o lou sini autū i le faia o toe asiga o le amataina lea o se suesuega faale-Tusi Paia.

¹² O le auala tuusaʻo i le tusi o Le Poto, ua faagaeeina ai le toatele o i tatou e ‘maua le lototele’ i suesuega faale-Tusi Paia e faalaeiauina ai tagata aʻoga e auai i sauniga ma auaufaatasi ma le faalapotopotoga a Ieova. I aso ua mavae, sa tatou faatali seia umi se taimi o suesue ma tagata ona valaaulia lea o i latou e auaufaatasi ma i tatou. I le taimi nei, e toatele tagata aʻoga ua auai i sauniga i le taimi lava e amata ai ona suesue, ma o le iuga ua matuā vave lava lo latou agaigai i luma.

¹³ Na molimau atu lē fuafuaina se ulugalii i se tagata latou te faigaluega faatasi. Ina ua ia faaalia le naunau i le upu moni, na la valaaulia o ia e faia se suesuega faale-Tusi Paia i le tusi o Le Poto. I le taimi lava e tasi, na la taʻu atu ai ia te ia e tatau ona ia auai i sauniga, o iina o le a taliina ai le tele o ana fesili. Sa lē gata ina talia ma le loto malie e le tamaloa la laʻua valaaulia e suesue le Tusi Paia, ae sa faalua foi ona ia suesue i le vaiaso ma amata ona auai e lē aunoa i sauniga i le Maota o le Malo.

¹⁴ Faaaogā le Polosiua O le ā e Manaomia e le Atua Mai ia i Tatou?: I le Tauaofiaga Itumalo o “Avefeau o le Filemu Mai le Atua,” na tatou maua ai le polosiua O le ā e Manaomia e le Atua Mai ia i Tatou? E aogā tele lenei polosiua e amataina ai suesuega faale-Tusi Paia ma tagata e matatau i le Atua e tusa lava po o le ā lo latou tulaga tau aʻoaʻoga. O loo iai i le polosiua se faasologa o lesona ua faavaeina lelei mo suesuega, o loo aofia ai aʻoaʻoga faavae o le Tusi Paia. O le lomiga, o le a avea o se mea faigaluega matuā aogā e tufa atu ai le poto e uiga i le Atua. O loo faamatala ai ma le matuā manino ma le faigofie le upu moni, o le a mafai ai e i tatou uma lava ona faaaogā e aʻoaʻo ai isi i mea o manaomia e le Atua. O le a faapena foi ona maua e tagata talaʻi uma le faaeaga o le faia o se suesuega faale-Tusi Paia i lenei polosiua.

¹⁵ O nisi o tagata o ē o loo iai le lagona e faapea e leai so latou taimi e suesue ai le tusi o Le Poto, atonu o le a mananao e faia ni lesona pupuu i le suesueina o le polosiua o le Manaomia. O le a matuā faafiafiaina i latou i mea o le a latou aʻoaʻoina! I le na o le lua po o le tolu ni itulau, o le a latou maua ai tali i fesili ua leva ona mafaufau loloto i ai tagata mo le tele o senituri: O ai le Atua? O ai le Tiapolo? O le ā le fuafuaga a le Atua mo le lalolagi? O le ā le Malo o le Atua? E mafai faapefea ona e maua le lotu moni? E ui lava e faigofie faaupuga o loo faamatala mai ai le upu moni i le polosiua, ae o le feau o loo iai e matuā malosi lava. O loo aofia ai manatu autū na o le a autaluina e toeaina ma sui mo le papatisoga, ma e mafai ona avea e pei o se mea faigaluega muamua e faavae ai se suesuega e sili atu ona maeʻaeʻa i le tusi o Le Poto.

¹⁶ I le ofoina o se suesuega i se toe asiga, e mafai ona e faapea atu: “Sa e iloa e faapea, i le faaavanoaina na o ni nai minute, o le a mafai ai ona e maua le tali i se fesili tāua mai le Tusi Paia?” Ona fai atu lea o se fesili o fesili na e i le amataga o se tasi o lesona i le polosiua. Mo se faaaoaoga, afai o loo e asiasi atu i se tagata e matua atu, e mafai ona e faapea atu: “Ua tatou iloa, i aso ua mavae sa faamālōlō e Iesu tagata. Ae o le ā o le a faia e Iesu i le lumanai i ē o mamaʻi? i ē ua matutua? i ē ua maliliu?” O loo maua tali i nei fesili i le lesona e 5. Atonu o le a faaoso ai le fiafia o se tagata e naunau i le lotu i le fesili lenei: “Pe faafofogaina e le Atua tatalo uma?” O loo taliina lena fesili i le lesona e 7. O le a fia iloa e tagata o le aiga: “O le ā e manaomia e le Atua mai i mātua ma fanau?” O le a latou iloa a o latou suesueina le lesona e 8. O isi fesili nei: “Pe e mafai ona faaleagaina e ē ua maliliu ē o ola?” o loo faamatala mai i le lesona e 11; “Aisea ua tele ai lotu o faapea mai o lotu Kerisiano?” o loo talanoaina i le lesona e 13; ma “O le ā e tatau ona e faia ina ia avea ai oe ma uo a le Atua?” o loo talanoaina i le lesona e 16.

¹⁷ Fesoasoani ia i Latou e Tāutala i se Isi Gagana: Ae faapefea ē e ona fale e tāutala i se isi gagana? Afai e mafai, e tatau ona aʻoaʻoina i latou i le gagana e sili atu ona latou iloa lelei. (1 Kori. 14:9) Atonu e mafai e le ovasia o le aai (po o le ovasia matagaluega i oganuu pito i tua) ona saunia ni faamatalaga e faatatau i faapotopotoga ma ni vaega e tāutala i isi gagana e ese mai i lea vaipanoa. O le a mafai ai e le failautusi ona tuuina atu le Foreign Language Follow-Up Slips (S-70a) na ia maua mai i tagata o le faapotopotoga, i le faapotopotoga talafeagai po o se vaega e tāutala i se isi gagana e ese mai. Afai e leai ni faapotopotoga po o ni vaega e latalata ane ma e leai ni tagata talaʻi o la outou faapotopotoga e mafai ona tāutala i le gagana a lē ona le fale, ona taumafai lea o le tagata talaʻi e faia le suesuega ma lē ona le fale i le polosiua, Manaomia i gagana e lua.

¹⁸ Na amata ona suesue se uso e tautala i le gagana Peretania ma se tamaloa e tautala i le gagana Vietiname ma lana avā e tautala i le gagana Taialani. Sa faaaogā i le suesuega lomiga ma Tusi Paia faa-Peretania, faa-Vietiname, ma le faa-Taialani. E ui i se tulaga faigata na tulai mai ona o gagana i le taimi muamua, ae ua tusi mai le tagata talaʻi e faapea: “Sa vave lava ona tutupu faaleagaga le ulugalii. Ua la iloa e manaomia ona amata ona la auai i sauniga ma le la fanau e toalua, ma ua latou faitauina faatasi le Tusi Paia i po uma o se aiga. Ua faia foi e le la tama teine e ono tausaga sana ia lava suesuega faale-Tusi Paia.”

¹⁹ Pe a suesue ma tagata e ese la latou gagana, ia tautala faagesegese, faaleo manino upu, ma faaaogā upu ma fuaiupu faigofie. Ae peitai, ia manatua, e tatau ona faaalia le āva ma le faaaloalo i tagata o ē tāutala i se gagana ese. E lē tatau ona faia i latou e pei o ni tamaiti laiti.

²⁰ Ia faaaogā lelei ata matagofie i le polosiua o le Manaomia. Afai e “manaomia ni upu se tele e faamatala ai se ata,” o le a tele lava mea i le polosiua o le a faamatala atu e ata i lē ona le fale. Valaaulia o ia e faitau le mau i lana lava Tusi Paia. Afai e mafai ona faia le suesuega i le taimi e mafai ona avanoa ai se tagata o le aiga e iloa tautala faa-Peretania e fai ma faamatala upu, e lē taumatea o le a sili ona aogā o lena faiga.—Tagai i La Tatou Faiva o le Malo, Oketopa 1990, itulau 7-8; Mati 1984, itulau 8.

²¹ Faia Toe Asiga e Aunoa ma le Faatuai: O le ā le umi e tatau ona e faatali ai mo le faia o le toe asiga? O nisi tagata talaʻi e toe foi atu pe a mavae se aso se tasi po o se lua o le uluai asiasiga. O isi e toe foi atu i se taimi mulimuli ane o le aso lava lena! Po ua vave tele lena taimi? E masani lava ona foliga mai e lē amanaia e ē ona fale. E masani lava, o le tagata talaʻi lea o loo faia le asiga e manaomia ona ati ae se uiga e sili atu ona mautinoa faatasi ma sina lototele. Seʻi manatu i ni mea nei na tutupu.

²² I se tasi aso, sa galue ai se tagata talaʻi e 13 tausaga le matua mai lea fale i lea fale, ma na ia iloa atu ai ni fafine se toalua o savavali faatasi ane. I le manatuaina o le faalaeiauga ina ia talaʻi atu i tagata i so o se mea tatou te maua i ai i latou, na ia faalatalata atu ai i fafine i le auala. Sa la faaalia le naunau i le feau o le Malo, ma sa talia e fafine taitoatasi se tusi o Le Poto. Na fesili le uso talavou mo o la tuatusi, na toe foi atu o ia ina ua mavae aso e lua mulimuli ane, ma amata ai ni suesuega faale-Tusi Paia ma i laʻua.

²³ Na faia e se tasi tuafafine se fuafuaga e toe asiasi atu i le vaiaso na sosoo ai. Ae i le tasi pe lua aso ina ua mavae le uluai asiasiga, na ia afe atu ai e ave le mekasini a lē ona le fale e uiga i le mataupu lea na la talanoaina talu ai. Sa ia fai atu i lē ona le fale: “Sa ou vaai i lenei mataupu ma ou manatu ai atonu o le a e fiafia e faitau i ai. E lē mafai ona ou nofo umi e talanoa atu i le taimi nei, ae o le a ou toe foi mai i le aoauli o le Aso Lulu e pei ona fuafuaina. O talafeagai pea lena taimi ma oe?”

²⁴ Pe a faaalia e se tagata le naunau i le upu moni, e tatou te mautinoa o le a fetaiai o ia ma ituaiga o teteega eseese. O lo tatou vave asiasi atu pe a mavae le uluai asiasiga, o le a faamalosiau ai o ia e tumau ai i so o se omiga o le a feagai ma ia mai tauaiga, uo mamae, ma isi tagata.

²⁵ Ati ae le Naunau o i Latou e Maua i Nofoaga Faitele: O le toatele o i tatou e fiafia e talaʻi atu i ala tetele, i mea e paka ai taavale, i luga o auala o femalagaaiga mo le lautele, i nofoaga mo faatauga, i malae, ma isi lava nofoaga faapena. E lē gata i le tufaina atu o lomiga, ae manaomia ona tatou ati ae le naunau o tagata. I lena tulaga, e tatau ai ona faia se taumafaiga ina ia iloa le suafa o le tagata, le tuatusi, ma pe afai e mafai, o numera o telefoni a tagata fiafia uma tatou te feiloai atu i ai. Atonu e lē faigata ona maua o lenei faamatalaga e pei ona e manatu ai. A o faaiuiu le talanoaga, aumai i fafo lau api o faamaumauga ma fesili i ai: “Faamata e iai se auala e mafai ai ona ta faaauauina lenei talanoaga i se isi taimi?” pe faapea atu foi: “Ou te manao ina ia e faitauina se mataupu ou te mautinoa o le a faafiafiaina ai oe. E mafai ona ou aumaia i lou fale pe avatu i lou ofisa?” Sa na ona fesili atu se tasi uso: “O le ā le numera e mafai ona ou maua ai oe?” Na ia faamatala mai e faapea, i totonu o le tolu masina, sa fiafia ai i latou uma e avatu numera o a latou telefoni ia te ia seʻi vaganā ai tagata e toatolu.

²⁶ Faaaogā le Telefoni e Saili ma Ati ae ai le Naunau: E faaaogā e se tuafafine paeonia le telefoni e talanoa atu ai i tagata o loo nonofo i fale maualuluga e malu puipuia. O le auala foi lena e faia ai ana toe asiga. I le uluai asiasiga, na ia faapea atu: “Ou te iloa e te lē silafia aʻu. O lea ou te faia se taumafaiga faapitoa e faafesootai atu tagata i lou vaipanoa e tufa atu i ai se manatu mai le Tusi Paia. Pe afai e iai sina ou taimi puupuu, ou te manao e faitau atu ia te oe le folafolaga lea o loo maua i le . . . ” Ina ua uma ona faitau le mau, ona ia faapea atu lea: “Pe e lē o se mea matagofie ea pe a mafai ona tatou vaai i le oo mai o lena taimi? Ua ou fiafia lava e faitau atu lenei mau ia te oe. Afai e te fiafia foi i ai, ou te manao la e toe telefoni atu ma talanoa atili i se isi mau.”

²⁷ I le telefoni atu, e na te faamanatu atu ai i lē ona le fale e uiga i le la talanoaga talu ai ma faapea atu, e na te manao e faitau atu mai i le Tusi Paia po o le a faapeī le tulaga o le a iai pe a lē toe iai se amioleaga. Ona la faia lea ma lē ona le fale se talanoaga puupuu faale-Tusi Paia. I le tele o talanoaga i le telefoni, e toʻa 35 tagata na valaaulia o ia e alu atu i o latou fale, ma e fitu suesuega faale-Tusi Paia i aiga ua amataina! Pe faigata ea mo oe i nisi taimi ona faia toe asiga i tagata fiafia i le vaitaimi o timuga mamafa ona o le faigata ona uia o auala pe ona o maʻi? Afai o lena le tulaga, aisea e lē faafesootaia ai i latou e ala i telefoni?

²⁸ Toe Asia Ē Loto Fiafia na Maua i Nofoaga o Pisinisi: E tele naua mea e aofia ai i le galulue mai lea faleoloa i lea faleoloa nai lo o le tau ina ofo atu mekasini. E toatele faatauoloa e naunau moni lava i le upu moni, ma e tatau ona ati ae lena naunau. I nisi tulaga, atonu e mafai ona faia se talanoaga faale-Tusi Paia po o se suesuega foi i le fale faigaluega. I nisi tulaga, atonu e mafai ona oulua feiloai ma le tagata loto fiafia i le taimi e mālōlō ai mo se taumafataga i le aoauli po o se isi lava taimi talafeagai.

²⁹ Sa asiasi atu se ovasia femalagaai i se tagata e ana se tamai faleoloa e faatau ai meaai ma ia ofoina atu i ai e faataitai le auala e faia ai se suesuega faale-Tusi Paia. Ina ua fesiligia po o le ā le umi o le faataitaiga, na faapea atu le ovasia femalagaai e na o le 15 minute e alu ai. Ona faatautau ai lea e le faatauoloa se faailoilo i le faitotoa e faapea: “E Toe Tatala pe a Mavae le 20 Minute,” sa avane ni nofoa se lua, ma talanoaina loa e le toalua lenei uluai palakalafa e lima o le tusi o Le Poto. Sa matuā fiafia lenei tagata loto naunau moni i mea na ia aʻoaʻoina, o lea na ia auai atu ai i le Lauga Lautele ma le Suesuega o Le Olomatamata i lena Aso Sa ma malie ai e faaauau le suesuega i le vaiaso na sosoo ai.

³⁰ I le ofoina atu o se suesuega i se nofoaga o pisinisi, e mafai ona e faapea atu: “O la matou polokalame o suesuega faale-Tusi Paia e na o le 15 lava minute e faataitai ai. Pe afai e talafeagai, ou te fiafia e faaali atu ia te oe le auala e faia ai.” Ona e pipii mau lea i le taimi faatapulaaina. Pe afai e lē mafai ona faia se talanoaga umi i le nofoaga o le pisinisi, atonu e sili atu ona lelei le asia o le faatauoloa pe a iai i lona aiga.

³¹ Toe Asiasi Pea i ai e Tusa Lava pe Lei Tuua ai se Lomiga: I so o se taimi e faaalia ai le fiafia, e tatau ona toe asia, e tusa lava pe na tuua ai se lomiga pe leai. O le mea moni, afai e manino mai e lē o fiafia moni lē ona le fale i le feau o le Malo, e sili atu la ona lelei pe a uaʻi atu au taumafaiga i se isi tagata.

³² I le galuega mai lea fale i lea fale, na feiloai ai se tuafafine i se tamaitai o lē sa matuā faaleuo ae na ia matuā teena le ofo o mekasini. Ua tusi mai le tagata talaʻi: “E tele ni aso sa ou mafaufau ai pea i lea tamaitai ma na ou filifili ai loa ou te toe fia talanoa lava ia te ia.” Na iu lava ina tatalo le tuafafine, na ia maua le lototele, ma toe tuʻituʻi atu loa i le fale o le tamaitai. Na matuā fiafia tele o ia ina ua valaaulia e lē ona le fale ina ia alu atu i totonu. Sa amataina se suesuega faale-Tusi Paia, ma na toe faia foi i le aso na sosoo ai. Mulimuli ane, na sau ai lē ona le fale i le upu moni.

³³ Ia Fuafua Mamao e Faataunuuina le Tele o Mea e Sili Atu e Mafaia: Ua fautuaina le faaaluina o se taimi i vaiaso taitasi i le faia o toe asiga. E tele mea e mafai ona faataunuu pe a fuafua lelei. Ia fuafua e faia toe asiga i le oganuu lava lea o le a outou galulue ai mai lea fale i lea fale. Pe afai e galulue mai i se taavale, e tatau ona faatoalaiti le vaega ina ia maua ai e tagata taitoatasi se avanoa atoatoa e faia ai toe asiga. E tatau ona muai iloa e le avetaavale po o fea le vaipanoa o le a faia ai toe asiga ina ia alofia ai le soona fealuai solo o le taavale.

³⁴ Ua faapea mai i latou o ē ua taulau manuia i le faia o toe asiga ma i le amataina o suesuega faale-Tusi Paia i aiga, e manaomia tele ona faaalia atu se naunau totino moni i tagata ma ia mafaufau pea ia i latou e tusa lava pe ua uma ona toe asiasi atu i ai. E manaomia foi ona iai se mataupu faaoso naunau faale-Tusi Paia e talanoaina ma faataatia ai se faavae mo le toe asiga a o lei alu ese mai le uluai asiasiga. E lē gata i lea, e tāua ona toe foi vave atu e tuliloa le naunau fiafia. E ao ona manatua pea le sini autū o le amataina o se suesuega faale-Tusi Paia.

³⁵ O le uiga e matuā tāua mo le taulau manuia i le faia o toe asiga o le lototele lea. E faapefea ona mauaina? Ua tali mai le aposetolo o Paulo i lona faapea mai, ia tatou ‘maua le lototele’ e folafola atu le tala lelei i isi ‘e ala i lo tatou Atua.’ Pe a e manao e faaleleia atili lenei vala, ia tatalo atu ia Ieova mo se fesoasoani. Ma i le ogatasi ma au tatalo, ia toe asia tagata uma lava na faaalia le naunau. E mautinoa o le a faamanuia e Ieova au taumafaiga!

[Pusa i le itulau 3]

Le Auala e Taulau Manuia ai i le Faia o Toe Asiga

■ Faaali le naunau totino moni i tagata.

■ Filifili se mataupu faaoso naunau mai le Tusi Paia e talanoa i ai.

■ Faataatia se faavae mo toe asiga uma ina ia taulau manuia.

■ Ia mafaufau pea i le tagata pe a e tuua o ia.

■ Toe foi e asi pe a mavae se aso e tasi pe lua ina ia tuliloa le naunau fiafia.

■ Ia manatua pea lou sini autū o le amataina o se suesuega faale-Tusi Paia.

■ Tatalo mo se fesoasoani ina ia maua le lototele mo lenei galuega.