Pusa Fesili

◼ O le ā e tatau ona aʻoaʻo ai fanau ina ia matutua ai faaleagaga?

E taumafai malosi mātua Kerisiano e tausia aʻe a latou fanau i “aʻoaʻiga ma apoapoaʻiga a Ieova.” (Efe. 6:4; fpl.) O se faataʻitaʻiga, ua iloa e mātua le aogā o le iloiloina o le mau faatasi ma a latou fanau i taeao taʻitasi. I taimi o le tapuaʻiga a le aiga po o se isi foʻi taimi, e mafai e le aiga ona matamata ma talanoa faatasi i se vitiō, talanoa i se mataupu o loo i le tusi Ua Fesili mai Talavou po o mataupu o loo i le Ala Mai!, faatino se tala mai i le Tusi Paia, pe e faataʻitaʻi le auala e tali atu ai fanau e tusa ma o latou talitonuga. Peitaʻi, ina ia avea fanau ma “tagata matutua” faaleagaga, e tatau ona aʻoaʻoina i latou i mataupu loloto o le Tusi Paia.​—Epe. 6:1.

Sei manatu i le auala e tatou te aʻoaʻoina ai i latou e tatou te feiloaʻi i le galuega talaʻi. I le uluaʻi asiasiga po o le taimi e tatou te toe foʻi ai e asia le tagata, e tatou te taumafai lava e amata se suʻesuʻega faale-Tusi Paia e faaaogā ai le tusi O ā Aʻoaʻoga Moni a le Tusi Paia? Pe a māeʻa lenā ona sosoo lea ma le tusi ʻIa Faatumau iā te Outou i le Alofa o le Atua.’ Aiseā? O le tusi Aʻoaʻoga Moni e aʻoaʻoina ai tagata i aʻoaʻoga faavae o le Tusi Paia. Peitaʻi, o le tusi ʻAlofa o le Atua’ e aʻoaʻo ai i latou i le auala e faatatau ai mataupu silisili o le Tusi Paia i o latou olaga. O le iloiloina la o nei tusi e lua, e fesoasoani ai i tagata e fou mai ina ia “mauaa” iā Keriso ma “ia mausalī i le faatuatua.” (Kolo. 2:6, 7) O lea, e mafai ona faaaogā foʻi nei lomiga e aʻoaʻo ai a tatou fanau. E manaʻomia ona aʻoaʻoina i latou i le taulaga togiola, le Malo, ma le tulaga o ē ua maliliu. E tatau ona latou iloa pe aiseā ua faataga ai e le Atua mafatiaga, ma pe faapefea ona mātaulia aso e gata ai o lenei faiga o mea. E lē gata i lea, e tatau ona latou talitonu o loo iai i Molimau a Ieova le upu moni, malamalama i taʻiala mai i le Tusi Paia, ma aʻoaʻoina “e iloa le mea saʻo ma le mea sesē.” (Epe. 5:14) E tatau foʻi i mātua ona fuafua e tusa ma le matua o le tamaitiiti ma mea ua malamalama i ai. Peitaʻi, e toʻatele lava fanau lāiti e lelei o latou mafaufau, ma e mafai ona latou aʻoaʻoina mataupu loloto o le Tusi Paia tusa lava pe lāiti.—Luka 2:42, 46, 47.