Le Tusi Mai i le Vaega Pule

Uso ma Tuafāfine Peleina:

“E matou te faafetai e lē aunoa i le Atua pe a matou taʻua outou uma i a matou tatalo, ma i le silafaga a lo tatou Atua le Tamā, ua matou manatua ai pea a outou galuega o le faatuatua, o lo outou tautigā ma le alofa, ma lo outou tumau ona o le faamoemoe i lo tatou Alii o Iesu Keriso.” (1 Tesa. 1:2, 3) O upu nei e faaleo atu ai o matou lagona mo outou! E matou te faafetaia Ieova mo outou ma a outou galuega lelei na faataunuuina. Aiseā?

I le tausaga ua mavae, sa outou pisi ai i le faia o “galuega o le faatuatua” ma le “tautigā ma le alofa,” e fesootaʻi atu i galuega o le Malo. O le toʻatele o outou sa saʻili ni auala e faalautele atu ai la outou faiva. O nisi sa siitiia atu i vaipanoa po o atunuu o loo matuā manaʻomia ai ni tagata talaʻi o le Malo. O isi sa faalautele atu la latou faiva e ala i le auai i talaʻiga i nofoaga faitele. E toʻatele na uunaʻia e paeonia lagolago i le vaitaimi o le Faamanatuga, i le masina o le asiasiga a le ovasia o le matagaluega, po o le taimi foʻi o le tauiviga faapitoa iā Aokuso 2014. E ui ina eseese o outou tulaga, ae ua matou iloa o loo outou auauna ma le lotoatoa iā Ieova, ma e faamālō atu ai. (Kolo. 3:23, 24) Ua talafeagai ona matou faafetaia Ieova ona o a outou “galuega o le faatuatua!”

E matou te matuā talisapaia foʻi lo outou “tautigā ma le alofa” i le fausiaina o nofoaga eseese i le lalolagi aoao mo fuafuaga faatiokarate. A o faatuputupulaʻia pea le aofaʻi o tagata o Ieova, ua matuā manaʻomia vave ai ni nofoaga faapena. (Isa. 60:22) Seʻi vaai faalemafaufau i ai, o le tumutumuga o tagata talaʻi i le tausaga ua mavae e 8,201,545, a o se fua faatatau o a tatou suʻesuʻega faale-Tusi Paia, e 9,499,933 i masina taʻitasi. O lea, ona o le faatelega ua iai, ua manaʻomia ai ona toe faatetelē pe faafou le tele o ofisa o lālā. Ua tatou manaʻomia foʻi nisi Maota mo Sauniga! E lē gata i lea, ua manaʻomia ni ofisa faaliliu i le tele o vaipanoa o le lalolagi, ina ia mafai e le ʻaufaaliliu ona nonofo ma galulue i le vaipanoa tonu o loo tautatala ai tagata i a latou gagana.

O lea, ia fesili ifo le tagata iā te ia lava, ʻO le ā se mea ou te faia ina ia lagolagoina ai nei galuega?’ O nisi o i tatou e mafai ona tauofo e fesoasoani i galuega o faugāfale. E tusa pe e iai pe e leai ni o tatou tomai i faugāfale, ae ua iā i tatou uma le faaeaga e faaaogā a tatou ʻoa e fesoasoani ai i nei galuega tāua. (Faata. 3:9, 10) A o fausiaina le faleʻie paia, na matuā uunaʻia loto o tagata Isaraelu e foaʻi atu, ma na manaʻomia ona avatu se faasilasilaga e taofi ai le toe aumaia o ni foaʻi mo le galuega. (Eso. 36:5-7) E mautinoa le pāʻia o o tatou loto ma uunaʻia ai i tatou i ia faaaʻoaʻoga. O lo outou “tautigā ma le alofa” i nei vala tāua o le auaunaga paia, o se tasi lea o māfuaaga e matou te faafetaia ai Ieova!

E iai māfuaaga patino e tatou te olioli ai pe a vaai atu i le tutūmausalī o o tatou uso. O se faaaʻoaʻoga, seʻi manatu i o tatou uso pele i Korea i Saute. Talu mai le 1950, e eseese le umi na faafalepuipui ai uso talavou i lenā atunuu ona o lo latou solitū o ni Kerisiano. E toʻatele o tatou uso ua onosaia nei faiga e aunoa ma le faagutugutulua. E matuā faamalosia lo tatou faatuatua i a latou faaaʻoaʻoga o le tutumau!

I Eritrea, e toʻatolu o tatou uso na faafalepuipui mo le silia i le 20 tausaga. O isi sa faafalepuipui mo ni taimi pupuu, e aofia ai o tatou tuafāfine ma a latou fanau. E tele taumafaiga ua faia ina ia faasaʻoloto ai i latou, peitaʻi e lē o taulau. E ui i lea, e lē o faagutugutulua lava nai o tatou uso, ae o loo faaauau pea ona latou faamaoni e ui i tulaga e matuā faigatā. E lē o galo nei uso ma tuafāfine faamaoni i a matou tatalo.—Roma 1:8, 9.

E mautinoa o le toʻatele o outou e lē o faafalepuipuiina ona o lo outou faatuatua. E ui i lea, o le toʻatele o outou o loo onosaia le tino matua, maʻi faaumiumi, teteega mai i paaga po o tauaiga lē talitonu, ma isi faafitauli e na o oe lava e iloa. E ui i na tulaga, ae o loo faaauau pea ona outou auauna ma le faamaoni iā Ieova! (Iako. 1:12) E faamālō atu ai iā te outou. O lo outou faamaoni ma le tutūmausalī, o le isi māfuaaga lea e matou te faafetaia ai Ieova.

Ioe, o a outou galuega o le faatuatua, lo outou tautigā ma le alofa, ma lo outou tutumau, o nisi nei o māfuaaga mataʻina e matou te ʻfaafetai atu ai iā Ieova, auā e lelei o ia.’ (Sala. 106:1) E matou te alolofa tele iā te outou uma, ma e matou te tatalo ia faamalosia, tausia, ma faamanuia e Ieova outou, ina ia mafai ona outou auauna e faavavau iā te ia.

O o outou uso,

Vaega Pule o Molimau a Ieova