Aʻoaʻo Mai i Tagata Talaʻi e Tele lo Latou Poto Masani

E matuā pele iā i tatou tagata talaʻi i le faapotopotoga e tele lo latou poto masani. O nisi ua tele tausaga o auauna ma le faamaoni iā Ieova, a o isi atonu e leʻi leva tele ona auauna iā Ieova. Ua mātauina e nei tagata talaʻi le auala o loo faatonutonu ai e Iesu le faapotopotoga Kerisiano i nei aso e gata ai, e ala i le faalautele atu o le galuega talaʻi ma le faia o isi ma soo. (Mata. 28:19, 20) E ala i le auai i lenei faiva, ua latou maua ai “le mana lea e sili atu i le malosi o tagata,” pe a fesagaʻi ma faigatā ma luʻi. (2 Kori. 4:7) E tele mea e aʻoaʻoina mai i tagata talaʻi ua tele le poto masani. E latou te fiafia foʻi e aʻoaʻo atu i isi mea ua latou aʻoaʻoina. (Sala. 71:18) O lea, ia tatou faaalu se taimi e aʻoaʻo mai ai iā i latou. E faapefea?

I le Talaʻiga: E manaʻomia e tagata talaʻi fou pe itiiti foʻi le tomai, se toleniga ina ia taulau ai i le talaʻiga. O se tasi o auala sili e faia ai faapea, o le mātau lea o le auala e talaʻi ai tagata talaʻi taʻumatuaina. (Tagaʻi i Le Olomatamata o Fepuari 15, 2015, i le mataupu “Tumau Lou Maelega i le Faiva,” i le palakalafa lona tolu i lalo o le tamaʻi ulutala “Fesoasoani i Tagata Talaʻi Fou.”) O ā aogā ua e maua ona o le galulue ma tagata talaʻi taʻumatuaina i le faiva?

Pe e mafai ona e valaaulia se tagata talaʻi agavaa e te lua galulue faatasi i le talaʻiga? Pe afai e maʻi le tagata talaʻi, atonu o nisi taimi e mafai ona ave sau suʻesuʻega faale-Tusi Paia e fai i lona fale. Pe a uma le suʻesuʻega, fesili i le tagata talaʻi po o ā ni mea na ia mātauina e mafai ona fesoasoani mai ai iā te oe.

Faaalu Lou Taimi Faatasi ma i Latou: Ia faamasani i tagata talaʻi e tele le poto masani, e ala i le faaalu o se taimi ma i latou. Ia valaaulia i latou ma faatalanoa i la outou tapuaʻiga a le aiga. Pe afai e maʻi le tagata talaʻi, atonu e mafai ona fai se fuafuaga e fai la outou tapuaʻiga a le aiga i lona fale. Fesili i ai pe na faapefea ona ia maua le upu moni. O ā ni faamanuiaga ua ia tofo i ai? O le ā se faatelega ua ia mātauina i le faapotopotoga? O le ā se mea ua ia olioli ai a o auauna iā Ieova?

Ia malamalama ma paleni i mea e te faatalitalia. I le pei o i tatou uma, e eseese uma meaalofa i le faiva a tagata talaʻi ua leva. (Roma 12:6-8) O nisi ua loa le soifua, ma e ono itiiti ai lo latou taimi e faatasitasi ai ma i tatou. Peitaʻi, e tele ni mea e mafai ona tatou aʻoaʻoina mai iā i latou, ona o mea ua latou tofo i ai i le auauna ma le faamaoni iā Ieova.