Le Auala e Faaalia ai le Alofa i o Tatou Uso a Tagata

Talu ai na tatou tupuga mai i le uluaʻi tamāloa o Atamu, o i tatou uma lava o le aiga e tasi. E ui lava e faatalitalia e sui o le aiga le alofa ma le faaaloalo o le tasi i le isi, ae ua faigatā ona maua lenā alofa i aso nei. E lē o le tulaga lenā na finagalo i ai lo tatou Atua alofa.

LE MANATU O LE AFIOGA A LE ATUA E FAATATAU I LE ALOFA

“Ia e alofa atu i lou uso a tagata e pei o oe lava.”​—LEVITIKO 19:18.

“Ia alolofa atu pea i o outou fili.”​—MATAIO 5:44.

LE UIGA O LE ALOFA I O TATOU USO A TAGATA

Mātau le auala o loo faamatala ai e le Atua le alofa i lana Afioga i le 1 Korinito 13:4-7:

“E faapalepale ma e agalelei le alofa.”

Mātau: O ā ni ou faalogona pe a onosaʻi ma agalelei isi iā te oe ona o sau mea sesē?

“E lē lotoleaga le alofa.”

Mātau: O ā ni ou faalogona pe a soona masalosalo pe lotoleaga se tasi iā te oe?

O le alofa “e lē saʻili mo lona lava lelei.”

Mātau: O ā ni ou faalogona pe a lotomalilie isi e faaaloalogia ou manatu ma e lē maumaututū i o latou manatu?

O le alofa “e lē faitauina mea leaga e fai atu iā te ia.”

Mātau: E nofosauni le Atua e faamagalo tagata agasala ua faaalia le salamō. “E lē vaavaai masei pea o ia i taimi uma, e lē faavavau foʻi ona toʻasā o ia.” (Salamo 103:9) E tatou te talisapaia pe a faamagalo i tatou e se tasi na tatou faatigā i ai. E tatau foʻi la ona tatou nofosauni e faamagalo atu i isi pe a latou faatigā mai.​—Salamo 86:5.

O le alofa “e lē fiafia i le amiolētonu.”

Mātau: Pe a tutupu ni tulaga faigatā iā i tatou, e tatou te lē mananaʻo e olioli isi i o tatou mafatiaga. E tatou te lē olioli foʻi pe a mafatia isi i faigatā e tusa pe na latou agaleaga mai iā i tatou.

Ina ia olioli i faamanuiaga a le Atua, e tatau ona tatou alolofa i isi e tusa lava po o le ā lo latou matutua, ituaiga po o tapuaʻiga. O se tasi o auala aogā e faia ai faapea, o le fesoasoani i ē o manaʻomia le fesoasoani.