Lomiga mo le Polokalame mo le Sauniga o le Faiva ma le Olaga Faa-Kerisiano
NOVEMA 6-12
ʻOA TAUTELE MAI I LE AFIOGA A LE ATUA | AMOSA 1-9
“Saʻili iā Ieova, ma Ola Ai”
(Amosa 5:4) “Auā o le fetalaiga lenei a Ieova i le aiga o Isaraelu, ʻSaʻili mai ia iā te aʻu ma ola ai.
(Amosa 5:6) Le aiga e o Iosefa, inā saʻili ia iā Ieova ma ola ai, neʻi gaoioi o ia e pei o se afi ma faatafunaina ai, neʻi aunoa foʻi Peteli ma se isi e na te tineia ai.
Ia Saʻili iā Ieova o Lē e Suʻesuʻe i Loto
20 E lē taumatea na faigatā ona tumau ma le faamaoni se tasi na ola i na aso i Isaraelu iā Ieova. E lē faigofie le tetee atu i mea ua fiafia i ai le toʻatele o tagata, e pei ona malamalama i ai Kerisiano i aso nei, o ē talavou ma matutua. Ae peitaʻi, o le alofa mo le Atua ma le faanaunau e faafiafia o Ia, na gaoioi ai isi tagata Isaraelu e faatino le tapuaʻiga moni. Na faasalafa atu ma le māfana e Ieova le valaaulia iā i latou e pei ona tusia i le Amosa 5:4: “Ia outou saʻili mai iā te aʻu, tou te ola ai.” I aso nei, ua faapena ona faaalia e le Atua le alofa mutimutivale iā i latou e salamō ma saʻili iā te Ia e ala i le iloa lelei o lana Afioga ma faia lona finagalo. E lē faigofie ona saʻilia lenei auala peitaʻi o le faia faapea e maua ai le ola e faavavau.—Ioane 17:3.
(Amosa 5:14, 15) “ʻIa saʻili i le lelei ae e lē o le leaga, ina ia outou ola ai pea; ma ina ia faatasi ai Ieova le Atua o ʻau ma outou, e pei ona outou fai mai ai. 15 Ia ʻinoʻino i le leaga ae naunau i le lelei, ma ia outou faatumau le faamasinotonu i le faitotoʻa o le aai. Atonu o le a alofa mai ai Ieova le Atua o ʻau i ē o totoe o Iosefa.’
jd 90-91 ¶16-17
Auauna iā Ieova e Tusa ai ma Ana Tapulaa Maualuluga
16 Na faia e le uluaʻi tagata o Atamu se filifiliga lē atamai, ina ua ia filifili po o ai e sili ona lelei ana tapulaa e tusa ai o le mea e lelei ma le mea e leaga. Po o le a tatou filifili ma le atamai? Ua apoapoaʻi mai Amosa ina ia tatou manatu mamafa i lenei tulaga, ma ua ia faalaeiau mai e faapea: “Ia ʻinoʻino i le leaga ae naunau i le lelei.” (Amosa 5:15) E tusa ai o lenei mau, ua faapea mai William Rainey Harper, o se polofesa i vaega o gagana e aofia ai le faa-Arama ma le Eperu: “O le tapulaa e tusa ai o le mea e lelei ma le mea e leaga, lea sa i le mafaufau [o Amosa], e ōgatusa lelei ma le finagalo o Yahweh.” O se manatu tāua lea e aʻoaʻoina mai i perofeta e toʻa 12. Pe e tatou te lotomalilie e talia tapulaa a Ieova e tusa ai o le mea e lelei ma le mea e leaga? Ua faailoa mai i le Tusi Paia na tapulaa maualuluga, ma ua faamatalaina mai e Kerisiano taʻumatuaina ma lava le poto masani, lea o loo faia aʻe ai le “pologa faamaoni ma le faautauta.”—Mataio 24:45-47.
17 O le ʻinoʻino i le leaga e fesoasoani e tatou te teena ai mea e lē fiafia ai le Atua. O se faaaʻoaʻoga, atonu e iloa e se tamāloa lamatiaga o ata matagā i le Initaneti ma e taumafai e aua neʻi matamata i ai. Ae o ā faalogona o lona “tagata i totonu” e tusa ai o mataupu e faatatau i upega tafaʻilagi o loo iai ata matagā tau feusuaʻiga? (Efeso 3:16) O le faatatau o le apoapoaʻiga o loo i le Amosa 5:15, o le a faigofie ai ona ia ʻinoʻino i le leaga, ma iʻu ai ina manumalo i lana tauiviga faaleagaga.
Saʻiliʻiliga Loloto mo ʻOa Faaleagaga
(Amosa 2:12) “ʻAe na outou avatu pea uaina i tagata Naseri ina ia feinu ai, ma na outou tuu atu le poloaʻiga i le ʻauperofeta e faapea: “E sa ona outou faia ni valoaga.”
Manatu Tāua Mai Tusi o Ioelu ma Amosa
2:12. E lē tatau ona tatou faalotovaivai i paeonia o loo galulue mamafa, ovasia femalagaaʻi, misionare, po o sui o le aiga Peteli, i le uunaʻia o i latou e tuu le auaunaga faataimi atoa ae ola i se olaga lea e manatu tagata, o se olaga masani. I le isi itu, e ao ona tatou faalaeiau i latou e faaauau i la latou galuega lelei o loo fai.
(Amosa 8:1, 2) O le mea lenei ua faailoa mai e le Alii Pule Silisili Ese o Ieova iā te aʻu, faauta! ua iai se ato o fualaau ʻaina o le tau māfanafana. 2 Ona ia fetalai mai lea: “Amosa, o le ā le mea ua e vaai i ai?” Ua ou tali atu: “O se ato o fualaau ʻaina o le tau māfanafana.” Ua toe fetalai mai Ieova iā te aʻu: “Ua oo mai le iʻuga o loʻu nuu o Isaraelu. Ou te lē toe faapalepale iā i latou.
Manatu Tāua Mai Tusi o Ioelu ma Amosa
8:1, 2—O le ā le uiga o “ato fua otatā”? Sa uiga atu i le lata ane o le aso o Ieova. E tau fualaau otatā agaʻi atu i le iʻuga o le vaitau o le seleselega, o lona uiga, i le taufaasiʻusiʻuga o le tausaga tau faatoʻaga. Ina ua faavaai e Ieova Amosa i le “ato fua otatā,” o lona uiga ua lata le iʻuga o Isaraelu. O lea la, na taʻu atu e le Atua iā Amosa: “Ua oo mai le iuga i loʻu nuu o Isaraelu, ou te lē toe sopoʻia lava.”
Faitau Tusi Paia
(Amosa 4:1-13) “Povi fafine o Vasana e, ia outou faalogo mai i lenei upu, o ē o loo i mauga o Samaria, o ē o loo taufaasesē i tagata faatauvaa, o ē ua tuʻimomomoina i latou o ē e matitiva, o ē foʻi ua fai atu i a latou tane, ʻIa aumai iā i matou se mea e matou te feinu ai!’ 2 Ua tautō le Alii Pule Silisili Ese o Ieova i lona paia, ʻ“Faauta! O le a oo mai iā te outou aso, o le a ia sisiina aʻe ai outou i luga i mātau a lē e fasi manu ma o outou tua i mātau iʻa. 3 O le a outou ō atu i vaega malepe o le pā, e taʻitasi ma alu saʻo i ona luma; o le a lafoina outou i fafo i Hamono,” ua fetalai mai ai Ieova.’ 4 “ʻIa outou ō mai i Peteli ma solitulafono ai. Ia faatele solitulafono i Kilikala; ia aumai a outou taulaga i le taeao; ma ia aumai a outou sefuluaʻi i le aso lona tolu. 5 Le fanauga a Isaraelu e, ia faamū se taulaga faafetai mai i mea ua faafefeteina, ia faasilasila atu ma talaʻi atu ia taulaga tauofo, auā o le mea lea ua outou fiafia tele i ai,’ ua fetalai mai ai le Alii Pule Silisili Ese o Ieova. 6 “ʻO aʻu foʻi, na ou avatu iā te outou nifo mamā i o outou aai uma, ma le oge i meaʻai i mea uma tou te nonofo ai; ae e tou te leʻi foʻi mai lava iā te aʻu,’ ua fetalai mai ai Ieova. 7 “ʻA o aʻu, na ou taofia le totō ifo o timuga iā te outou a o toe tolu masina oo i le seleselega; ma na ou faatotō ifo le timu i le tasi aai, ae ou te leʻi faatotō ifo le timu i le isi aai. E oo le timu i le tasi fanua ae ou te leʻi faatotō ifo le timu i le isi fanua ma mago ai. 8 Ona ō atu lea ma le vaivai o aai e lua pe tolu i le aai e tasi ina ia feinu ai, ae e leʻi malilie i latou; ae e tou te leʻi foʻi mai lava iā te aʻu,’ ua fetalai mai ai Ieova. 9 “ʻNa ou taia outou i le matagi vevela ma le polopologā. Na faateleina a outou togālaau ma a outou togāvine, ae na faatamaʻia e katepila a outou laau o le mati ma a outou laau o le olive; ae e tou te leʻi foʻi mai lava iā te aʻu,’ ua fetalai mai ai Ieova. 10 “ʻNa ou auina atu iā te outou se mala e pei ona iai i Aikupito. Na ou fasiotia ou tauleleʻa i le pelu, ma aveeseina a outou solofanua. Na ou faaoo aʻe i o outou isu le elo o le mea na iai o outou faleʻie; ae e tou te leʻi foʻi mai lava iā te aʻu,’ ua fetalai mai ai Ieova. 11 “ʻNa ou faatafunaina outou e pei ona faatafunaina e le Atua o Sotoma ma Komoro. Na pei outou o le ogālaau ua seʻi ese mai i le afi; ae e tou te leʻi foʻi mai lava iā te aʻu,’ ua fetalai mai ai Ieova. 12 “Isaraelu e, o le mea lenei ou te faia iā te oe. Talu ai o le a ou faia lenei mea iā te oe, Isaraelu e, inā sauni ia e fetaiaʻi ma lou Atua. 13 Faauta! o Lē na faia mauga ma Lē na foafoaina le matagi, ma o Lē foʻi e na te taʻu atu i tagata ona manatu, o Lē na te liua le vaveao i le pōuliuli, o Lē foʻi e savali i mea aupito maualuluga o le lalolagi, o Ieova le Atua o ʻau, o lona igoa lea.”
NOVEMA 13-19
ʻOA TAUTELE MAI I LE AFIOGA A LE ATUA | OPETAIA 1–IONA 4
“Aʻoaʻo se Lesona Mai i Au Mea Sesē”
(Iona 3:1-3) Ona oo mai lea o le afioga a Ieova iā Iona, o le faalua lea, e faapea: 2 “Inā tulaʻi ia ma alu atu i Nineva le aai telē, ma folafola atu i ai le folafolaga ua ou fai atu ai iā te oe.” 3 Ona tulaʻi lea o Iona ma alu atu i Nineva e tusa ma le fetalaiga a Ieova. E matuā telē le aai o Nineva i le silafaga a le Atua, o le mamao pe a savali e tolu aso.
Lesona na Ia Aʻoaʻo Mai i Ana Mea Sesē
22 Ae faapefea Iona? Po ua aʻoaʻoina o ia e faaalia le lotofaafetai iā Ieova e ala i le usitaʻi? O le mea lenā na ia faia. Ina ua mavae le tolu o aso ma le tolu o pō, ona aumaia lea e le iʻa Iona i le matafaga ma “luai . . . i le laueleele mātūtū.” (Iona 2:10) Seʻi manatu i le mea na tupu, ina ua mavae nei mea uma, e leʻi tau manaʻomia ona aau Iona i le matafaga! Ae moni, e tatau ona iloa e Iona le matafaga lea ua luai iai o ia. E leʻi umi ae tofotofoina loa le malosi o lona lotofaafetai. O loo taʻua i le Iona 3:1, 2: “Ona oo mai lea o le afioga a Ieova iā Iona, o le faalua lea, e faapea: ʻInā tulaʻi ia ma alu atu i Nineva le aai telē, ma folafola atu i ai le folafolaga ua ou fai atu ai iā te oe.’” O le ā sa faia e Iona?
23 E leʻi toe faatalatū Iona. Fai mai le tala: “Ona tulaʻi lea o Iona ma alu atu i Nineva e tusa ma le fetalaiga a Ieova.” (Iona 3:3) Ioe, sa usiusitaʻi o ia. Na ia aʻoaʻoina se lesona mai i ana mea sesē. E manaʻomia foʻi ona tatou faaaʻoaʻo i le faatuatua o Iona. E tatou te agasala uma lava ma faia mea sesē. (Roma 3:23) Ae po o le a tatou faavaivai ai, pe e tatou te aʻoaʻo mai a tatou mea sesē ma liliu ese mai ai, ae auauna iā Ieova ma le loto usiusitaʻi?
Saʻiliʻiliga Loloto mo ʻOa Faaleagaga
(Opetaia 10) Talu ai faiga sauā i lou uso o Iakopo, o le a ufitia oe i le mā ma o le a faaumatia foʻi oe e faavavau.
Manatu Tāua Mai i Tusi o Opetaia, Iona, ma Mika
10—Na faapefea ona ʻfaaumatia e faavavau’ Etoma? E pei ona valoia mai, o le nuu o Etoma lea sa iai sona faigāmalo ma ona tagatānuu, na oo ina mou atu ua lē toe iai. Na faatoʻilalo e le tupu Papelonia o Naponita le nuu o Etoma, pe tusa o le ogatotonu o le senituri lona ono T.L.M. E oo ane i le senituri lona fā T.L.M., ua nofoia laufanua o Etoma e tagata na tupuga mai iā Nepaiota, ae ua nonofo tagata Etoma i le vaega i saute o Iutaia, le ogāeleele o Nekepi lea na mulimuli ane taʻua o Itumaia. Ina ua faaumatia e ʻautau a Roma le aai o Ierusalema i le 70 T.A., na mou ese atu ai foʻi ma tagata Etoma.
(Opetaia 12) “Ae ua lē tatau ona e vaavaai atu ma le lotofiafia i le aso leaga o lou uso, o le aso o lona puapuaga; ua lē tatau foʻi ona e olioli ona o atalii o Iuta i le aso o lo latou faaumatiaga; ua lē tatau ona e tautala faamaualuga i le aso o lo latou puapuaga.
jd 112 ¶4-5
Feagai ma Isi i le Auala e Fiafia ai le Atua
4 E iai se lesona e tatou te aʻoaʻoina mai i le taʻusalaina e le Atua o Etoma, o se nuu e lata i Isaraelu: “Ae ua lē tatau ona e vaavaai atu ma le lotofiafia i le aso leaga o lou uso, o le aso o lona puapuaga; ua lē tatau foʻi ona e olioli ona o atalii o Iuta i le aso o lo latou faaumatiaga.” (Opetaia 12) Sa pei tagata Turo o ni “uso” o tagata Isaraelu ona o a latou faiga tau fefaatauaʻiga. Peitaʻi, o tagata Etoma o ni “uso” moni lava o tagata Isaraelu, auā na tupuga mai Etoma iā Esau le uso masaga o Iakopo. E oo lava iā Ieova na ia taʻua tagata Etoma o “uso” o tagata Isaraelu. (Teuteronome 2:1-4) O lea, o se gaoioiga lē lelei na faia e tagata Etoma ina ua latou olioli i le faapuapuagatia e Papelonia o tagata Iuta.—Esekielu 25:12-14.
5 E manino mai, e leʻi fiafia le Atua i le auala na feutagaʻi ai tagata Etoma ma o latou uso Iutaia. O lea, ia fesili ifo, ʻO le ā le silasila a le Atua i le auala o loo oʻu feagai ai ma oʻu uso?’ O se tasi o vala e ao ona manatu mamafa ai, o le auala tatou te manatu ma feagai ai ma se uso pe a lē sologa lelei le tulaga o mea i lo tatou va. O se faataʻitaʻiga, seʻi faapea ua faatigā se Kerisiano iā te oe po o se tasi o ou tauaiga. Pe afai ua ʻfaia e se tasi se mea e te tigā ai,’ po o le a e teuloto lou ita, lē taumafai e faaleleia le lua va, ma lē faagalo le mea na tupu? (Kolose 3:13; Iosua 22:9-30; Mataio 5:23, 24) O le faia faapea, e ono aafia ai au gaoioiga e faia i lenā uso; atonu e te gaoioi i se auala e lē faaleuō, ʻalofia o ia, pe faia ni tala lē lelei e uiga iā te ia. Ae faapefea pe afai ua mulimuli ane faia e lenā uso se mea sesē, ma ua manaʻomia ona aʻoaʻia o ia e toeaina o le faapotopotoga? (Kalatia 6:1) Po o le a e faaalia uiga e pei o tagata Etoma ma olioli i faigatā o loo feagai ma lou uso? O le ā le auala e finagalo le Atua e te gaoioi ai?
Faitau Tusi Paia
(Iona 3:1-10) Ona oo mai lea o le afioga a Ieova iā Iona, o le faalua lea, e faapea: 2 “Inā tulaʻi ia ma alu atu i Nineva le aai telē, ma folafola atu i ai le folafolaga ua ou fai atu ai iā te oe.” 3 Ona tulaʻi lea o Iona ma alu atu i Nineva e tusa ma le fetalaiga a Ieova. E matuā telē le aai o Nineva i le silafaga a le Atua, o le mamao pe a savali e tolu aso. 4 Mulimuli ane, ona ulu atu ai lea o Iona i le aai, o le savaliga o le aso e tasi, ma ua ia folafola atu pea e faapea: “E toe fā sefulu aso ona faaumatia lea o Nineva.” 5 Ona faatuatua lea o tagata o Nineva i le Atua, ma ua latou talaʻi atu le anapogi ma oofu i ʻie talatala, o i latou uma, o ē e mauʻoa ma matitiva, ma ē e matutua ma lāiti. 6 Ina ua oo atu le tala i le tupu o Nineva, ona ia tulaʻi lea mai i lona nofoālii ma aveese ona ofu tautupu, ae ofu i le ʻie talatala ma nofo i le lefulefu. 7 E lē gata i lea, ua ia faatonuina ia talaʻi atu i Nineva e tusa ai ma le poloaʻiga a le tupu ma ona alii sili e faapea: “Aua lava neʻi ʻaina se mea e se tagata po o se manu lata, po o lafu povi po o lafu mamoe. Aua lava neʻi ʻai i se meaʻai. Aua foʻi neʻi o latou inuina se vai. 8 Ia latou ufiufi iā i latou i le ʻie talatala, o tagata atoa ma manu lalata; ia latou alalaga faatauanau atu i le Atua, ia taʻitoʻatasi ma liliuese mai i lona ala leaga, atoa ma faiga sauā na faia e o latou lima. 9 O ai sē e na te iloa pe e toe liliu mai le Atua moni ma sui lana filifiliga, ma toe liliu mai i lona toʻasā tele ina ia lē faaumatia ai i tatou?” 10 Ua silafia e le Atua moni a latou galuega ina ua liliuese i latou mai i o latou ala leaga; ona suia lea o le filifiliga a le Atua moni e tusa ma le malaia na ia fetalai ai e faaoo iā i latou; ma e leʻi faaooina i ai le malaia.
NOVEMA 20-26
ʻOA TAUTELE MAI I LE AFIOGA A LE ATUA | MIKA 1-7
“O le ā e Manaʻomia e Ieova Mai iā i Tatou?”
(Mika 6:6, 7) O le ā se mea ou te alu atu ma aʻu i luma o Ieova? O le ā se mea ou te ifo ma aʻu i le Atua i lugā? Po ou te alu atu ea iā te ia ma ni taulaga mū, o povi poʻa e taʻitasi tausaga? 7 Pe e fiafia ea Ieova i mamoe poʻa e faitau afe, ma le faitau sefulu afe o tafega o suāuu? Po ou te avatu ea loʻu atalii ulumatua mo laʻu fouvalega, o le fanau a loʻu manava mo laʻu agasala?
E Faapefea Ona Tatou Feutagaʻi ma Isi?
20 I le silafaga a le Atua, o la tatou faiā ma o tatou uso o se vaega tāua o le tapuaʻiga moni. E matuā leai se tāua iā Ieova o taulaga sa faia i manu, pe afai sa lē lelei ona feutagaʻi i latou na osia nei taulaga ma o latou uso a tagata. (Mika 6:6-8) O lea, na uunaʻia e Iesu ona soo “ia vave ona . . . faalelei.” (Mata. 5:25) E tai faapea foʻi le manatu na tusi mai ai Paulo: “Pe a outou ita, aua le agasala ai, aua neʻi goto le lā o tumau pea lo outou ita. Aua foʻi neʻi tuua e outou se mea e mautū ai le Tiapolo.” (Efe. 4:26, 27) Afai e tatou te ita ona o se māfuaaga saʻo, e ao ona vave ona tatou gaoioi e foʻia se mataupu, ina ia aua ai neʻi tumau lo tatou ita ma maua mai ai le avanoa o le Tiapolo iā i tatou.—Luka 17:3, 4.
(Mika 6:8) Le tagata e, ua ia fetalai mai iā te oe le mea lelei. O le ā foʻi se mea ua finagalo ai Ieova mai iā te oe, pe e lē o le faia o le mea ua tonu, ia fiafia i le agalelei, ma ia savavali ma lou Atua ma le faamaulalo?
ʻO le ā se Mea ua Finagalo ai Ieova Mai iā te Oe?’
“Faia o le mea ua tonu.” E tusa ai ma se tasi o lomifefiloi, o le upu “tonu” i le faa-Eperu, e uiga atu i le “saʻo ma le faamaoni o le auala e feagai ai ma isi.” E finagalo le Atua ia feutagaʻi ma isi i se auala saʻo ma faamaoni e tusa ai ma ana faatulagaga. E faaalia le tonu e ala i le lē faailoga tagata, ma le faamaoni i isi. (Levitiko 19:15; Isaia 1:17; Eperu 13:18) Pe a tatou faia mea tonu i isi, atonu o le a latou faaalia mai foʻi na uiga iā i tatou.—Mataio 7:12.
“Fiafia i le agalelei.” E lē finagalo le Atua e tau ina faaalia atu le agalelei, ae e tatau ona fiafia i ai. O le upu Eperu mo le “agalelei” (cheʹsedh), e uiga atu foʻi i le “alofa faamaoni.” Na taʻua e se faitofā o le Tusi Paia, o le upu cheʹsedh e taaofaʻi uma ai uiga ia o le alofa, alofa mutimutivale, ma le agalelei, ae e lē na o se tasi o na uiga. E manaʻomia ona faaalia ma le lotomalie le alofa faamaoni, ma e tatou te maua faamanuiaga i le fesoasoani atu i isi. O le iʻuga, e tatou te maua le fiafia ona o le foaʻi atu.—Galuega 20:35.
“Savavali ma lou Atua ma le faamaulalo.” I le Tusi Paia, o le fuaitau “ia savavali,” e uiga atu i le “mulimulituʻi i ni gaoioiga patino.” E tatou te savavali ma le Atua e ala i le mulimulituʻi i tapulaa ua ia aumaia i le Tusi Paia. E manaʻomia le “faamaulalo” ina ia ausia ai lenā tulaga. E faapefea? O le faamaulalo i luma o le Atua, o le a tatou amanaʻia ai o tatou tulaga agasala ma le mea e gata ai lo tatou mafai. O lea la, o le ʻsavavali ma le faamaulalo,’ e uiga atu i le iloa lelei o mea e manaʻomia e Ieova mai iā i tatou, ma mea e mafai ona tatou ofoina atu.
O le mea e fiafia ai, ona e lē faatalitalia mai e Ieova ni mea e tatou te lē mafaia. E faafiafiaina o ia i mea sili ua tatou faia e auauna atu ai iā te ia. (Kolose 3:23) E na te silafia lelei le mea e gata ai lo tatou malosi. (Salamo 103:14) O le a tatou savavali ma ia ma le fiafia, pe a tatou lotomaulalo e iloa le mea e gata mai ai lo tatou malosi. Aiseā e le aʻoaʻo ai pe faapefea ona e savali faatasi ma le Atua? O le faia faapea, e te maua ai faamanuiaga mai iā te ia.—Faataoto 10:22.
Saʻiliʻiliga Loloto mo ʻOa Faaleagaga
(Mika 2:12) “ʻOu te faapotopotoina lava Iakopo, o outou uma lava; ou te faapotopotoina faatasi foʻi o ē e totoe o Isaraelu. Ou te autasia i latou e pei o se lafu i le lotoā, e pei foʻi o se lafu i totonu o le laufanua e aai ai manu; o le a iai le pisapisaō o tagata i inā.’
Manatu Tāua Mai i Tusi o Opetaia, Iona, ma Mika
2:12—O anafea na faataunuu ai le valoaga e faatatau i le ʻaofaʻiina o ē totoe o Isaraelu’? O lona uluaʻi faataunuuga na tupu i le 537 T.L.M. ina ua toe foʻi se vaega totoe o tagata Iutaia i lo latou nuu mai le faaaunuua i Papelonia. I aso nei, ua faataunuuina ai le valoaga i “le Isaraelu a le Atua.” (Kalatia 6:16) Talu mai le 1919, ua aoaoina ai Kerisiano faauuina e “pei o le lafu mamoe i Posara.” O le faatasi atu i ai o le “motu o tagata e toʻatele” o “isi mamoe,” aemaise lava talu mai le 1935, ua oo ai ina latou “soona ualōlō ona o le vao o tagata.” (Faaaliga 7:9; Ioane 10:16) Ua latou aufaatasi ai ina ia maelega i le tapuaʻiga moni.
(Mika 7:7) A o aʻu, ou te vaai atu pea iā Ieova. Ou te faatalitali ma le onosaʻi i le Atua o loʻu faaolataga. E faafofoga mai loʻu Atua iā te aʻu.
O le ā se Mea e Finagalo ai Ieova Mai iā i Tatou?
20 O le mauaina o faamanuiaga a le Atua e uunaʻia ai i tatou e faataʻitaʻi i le agaga sa faaalia e Mika. Ua ia faapea mai: “Ou te faamoemoe i le Atua o loʻu olataga.” (Mika 7:7) E faapefea ona fesootaʻi nei upu i lo tatou savavali ma le lotomaulalo ma le Atua? O le faatalitali i le faamoemoe po o le onosai pea, e fesoasoani lea iā i tatou ina ia ʻalofia ai lagona lē fiafia ona e leʻi oo mai le aso o Ieova. (Faataoto 13:12) O le mea moni, o loo tatou moomoo uma lava ia oo mai ia le iʻuga o lenei lalolagi amioleaga. Peitaʻi, i vaiaso taʻitasi uma e faitau afe tagata ua faatoʻā amata ona latou savavali faatasi ma le Atua. O le iloaina o lenā mea e aumaia ai se māfuaaga e sili ona lelei ina ia tatou faatalitali ai i le faamoemoe. Na taʻua e se tamāloa ua leva ona avea ma Molimau e fesootaʻi atu i lenei mea e faapea: “I le toe tepa i tua i le sili atu ma le 55 tausaga o auai i le galuega talaʻi, ua ou talitonu ai ou te leʻi oge i se mea ona o le faatalitali iā Ieova. I le tuufaafeagai, ua ou lē oo ai i le tele o mafatiaga tigā.” Pe sa tupu se mea faapena iā te oe?
Faitau Tusi Paia
(Mika 4:1-10) O aso e gata ai, e oo ina faatumauina ai le mauga o le fale o Ieova i luga o tumutumu o atumauga, e faamaualugaina foʻi e sili i aʻega; ma e gasolo ane i ai tagata. 2 E ō mai lava nuu e tele ma faapea ane: “Ō mai ia outou, ma tatou ō aʻe i le mauga o Ieova, i le fale o le Atua o Iakopo; e na te aʻoaʻo mai iā i tatou i ona ala, ma tatou savavali ai i ona ala.” Auā e alu atu le tulafono mai i Siona, ma le afioga a Ieova mai i Ierusalema. 3 E faamasino foʻi o ia i nuu e tele, ma faasaʻo mataupu lē tonu e faatatau i nuu malolosi e mamao. E latou te tuʻi a latou pelu e fai ma suōtosina, ma a latou tao e fai ma pelu e teu ai laau. E latou te lē toe sii le pelu, o le tasi atunuu i le isi atunuu, pe e latou te toe aʻoaʻo foʻi i taua. 4 Ae e taʻitoʻatasi ma nofo i lalo o lona vine ma lalo o lona mati, e leai foʻi se tasi e faamataʻu iā i latou; auā ua faapea ona tulei mai ai le fofoga o Ieova o ʻau. 5 Auā e taʻitasi nuu uma ma savavali i le igoa o lona atua; a o i tatou, e tatou te savavali i le suafa o Ieova lo tatou Atua i aso uma lava, e oo i le faavavau. 6 “I lenā aso,” ua fetalai mai ai Ieova, “ou te faapotopoto ai le nuu ua setusetu; ma ou te faapotopotoina foʻi le nuu ua faataapeapeina, e oo lava i le nuu na ou faamanuʻalia. 7 Ou te faatotoe nisi mai i le nuu sa setusetu, ma faia le nuu ua ave i se mea mamao o se nuu malosi; o le a pule Ieova o se tupu iā i latou i le Mauga o Siona, e amata atu nei seʻia oo i le faavavau. 8 “A o oe, le ʻolo e o le lafu, le mea maupuʻepuʻe o le tama fafine a Siona, e oo mai lava iā te oe, ioe, e toe oo mai lava iā te oe le uluaʻi pulega, o le malo o le tama fafine a Ierusalema. 9 “O lenei, aiseā ua e alaga leotele ai pea? Pe e lē o iā te oe ea se tupu, po ua faaumatia ea foʻi lau faufautua? Po o le mea ea lea ua tigā ai oe e pei o se fafine o le a fanau? 10 Le tama fafine e, a Siona, inā tigā ia ma faatigā e pei o se fafine o le a fanau, auā o le a e alu atu nei mai i le taulaga ma e nofo i le fanua. O le a e alu atu lava i Papelonia. O i inā o le a laveaʻiina ai oe. O i inā foʻi o le a toe faatau mai ai oe e Ieova mai i lima o ou fili.
NOVEMA 27–TESEMA 3
ʻOA TAUTELE MAI I LE AFIOGA A LE ATUA | NAUMA 1–SAPAKUKA 3
“Ia Faaauau Ona Maelega ma Mataala Faaleagaga”
(Sapakuka 2:1-4) Ou te tū pea i le mea ou te leoleo ai, ma ou te tū foʻi i le pā puipui; ou te vaavaai pea ina ia iloa ai po o le ā lana fetalaiga o le a ia fetalai mai ai e ala mai iā te aʻu, ma po o le ā foʻi saʻu tali atu i le aʻoaʻiga o aʻu. 2 Ona fetalai mai lea o Ieova iā te aʻu e faapea: “Ia tusi i lalo le faaaliga, ia tusi manino i luga o papamaa, ina ia sologa lelei ai le faitau a lē ua faitauina. 3 Auā ua tuu le faaaliga mo ona aso atofaina, ma o loo faanatinati atu pea seʻia oo i le iʻuga, ma e lē tala pepelo lava. E ui lava e tuai mai, ae ia faatalitali pea i ai; auā e oo mai lava. E lē faatuai mai. 4 “Faauta! O le tagata ua faafefeteina; e amiolētonu o ia i lona loto. A o lē e amiotonu, e ola pea o ia i lona faatuatua.
Manatu Tāua Mai i Tusi o Nauma, Sapakuka, ma Sefanaia
2:1. I le pei o Sapakuka, e tatau ona tatou faaauau pea ona mataala ma malolosi faaleagaga. O se mea tatau foʻi le fetuunaʻi o tatou manatu ina ia ōgatusa ma le aʻoaʻiga po o se faasaʻoga e tatou te maua.
2:3; 3:16. A o tatou faatalitali ma le faatuatua i le oo mai o le aso o Ieova, seʻi o tatou faaauau pea ona faanatinati i le auaunaga.
2:4. Ina ia faasaoina i le aso o le faamasinoga a Ieova, e manaʻomia ona tatou tumau i le faamaoni.—Eperu 10:36-38.
Saʻiliʻiliga Loloto mo ʻOa Faaleagaga
(Nauma 1:8) E na te faaumatia lona aai i le tafega o loo ui ane, ma e tuliloaina ona fili e le pōuliuli.
(Nauma 2:6) O le a matala faitotoʻa o vaitafe ma e solofa i lalo le maota.
Manatu Tāua Mai i Tusi o Nauma, Sapakuka, ma Sefanaia
2:6—O ā “puipui o vaitafe” na tatalaina? O nei puipui e faasino atu i le tatalaina muamua o pa o Nineva e le vaitafe o Tikarise. I le 632 T.L.M. ina ua aufaatasi Papelonia ma Metai e tau faasaga iā Nineva, e leʻi mataʻu le aai. Na faapea mai i latou o loo nonofo i le aai e maualuga ona pa ma malupuipuia, e lē mafai la ona ulu atu se tasi i totonu. Ae na solo i lalo ina ua timuga tetele ma faapogaia ai le vaitafe o Tikarise e tafe malosi atu. Na taʻua e se tusitala o le talafaasolopito o lē suafa iā Taitolo, o lenei mea “na lofitūina vaega uma o le aai ma faatamaʻia ai ona pa.” E pei ona valoia, na tatala puipui ma na vave ona faatamaʻia Nineva e pei ona faatafunaina e se afi le tagutugutu saito ua mago.—Nauma 1:8-10.
(Sapakuka 3:17-19) E ui ina lē fuga mai le mati ma lē fua mai le vine; e iʻuvale foʻi fua o le laau o le olive, e lē tupu mai ni mea e ʻai mai i fanua malifa; e faaumatia le lafu mamoe mai i le lotoā, ma e leai ni lafu i le pā; 18 A o aʻu ou te olioli iā Ieova; ou te fiafia i le Atua o loʻu faaolataga. 19 O Ieova o le Alii Pule Silisili Ese o loʻu malosi ia; e na te faia oʻu vae e pei o vae o le manu o le ʻaila, o ia foʻi ou te savali ai i aʻu mea maualuluga.
Manatu Tāua Mai i Tusi o Nauma, Sapakuka, ma Sefanaia
3:17-19. E ui ina faavaivaia i tatou ona o faigatā a o leʻi oo mai Amaketo ma a o faagasolo lenā taimi, ua tatou mautinoa o le a saunia e Ieova le “malosi” manaʻomia a o tatou auauna pea iā te ia ma le olioli.
Faitau Tusi Paia
(Sapakuka 2:15–3:6) “ʻOi talofa i lē na te avatu i ana uō se mea e feinu ai, ua avatu faatasi ma lou lilivau ma lou ita, ina ia faaonanā ai i latou, ma iloa atu ai o latou totogasā. 16 O le a tumu oe i le mā ae e lē o le mamalu. O oe foʻi ia e inu ma ia aliali mai ai lou lē peritomeina. O le a oo mai foʻi iā te oe le ipu o le aao taumatau o Ieova, ma o le a faalumaina ai lou mamalu; 17 auā e ufitia oe i le sauā na faia i Lepanona atoa ma le faatamaʻiaga o manu o le fanua na matuā fefefe ai manu, ona o le sasaaina o le toto o tagata ma le sauā na faia i le lalolagi, o le aai ma i latou uma o loo nonofo ai. 18 O le ā le aogā o se tupua ua tā, ina ua tāina e lē na faia, o se tupua uʻamea ma le aʻoaʻo i mea pepelo, ina ua faatuatua lē na faia le mea i le mea na faia, ma ua ia faia o atua lē aogā e lē tautatala? 19 “ʻOi talofa i lē ua faapea atu i le fasilaau: “Inā ala mai ia!” pe fai atu i se maa e lē tautala: “Ala ia i luga! O le aʻoaʻo lea”! Faauta! Ua ufitia i le auro ma le siliva, ma ua leai se mānava iā te ia. 20 A o Ieova o loo i lona malumalu paia. Ia fifilemu le lalolagi uma i ona luma!’”
3 O le tatalo a le perofeta o Sapakuka, na lagi o se pese faanoanoa: 2 Ieova e, ua ou faalogo i le faamatalaga e uiga iā te oe. Ieova e, ua ou fefe ona o au galuega. Ia e toe faaolaolaina au galuega i ia tausaga! Ia e faailoa mai i ia tausaga. Tau ina ia e manatua e faaalia le alofa mutimutivale pe a e toʻasā. 3 Na afio mai le Atua mai i Timanu, na afio mai foʻi Lē e Paia mai i le Mauga o Parana. Selā. Sa ufitia le lagi i lona mamalu; ma sa tumu foʻi le lalolagi i lona viiga. 4 A o lona pupula sa pei o le lā. Sa ō atu mai i ona aao o ave e lua ma sa lilofia ai i inā lona mana. 5 Sa muamua atu pea i ona luma le faamaʻi, ae e alu atu i luma o ona vae le fiva maualuga. 6 Sa tū o ia e lē minoi, ina ia lūlūina e ia le laueleele. Na silasila mai o ia, ma o ia foʻi sa tuli oso ai atunuu ona o le fefefe. Sa matuā nutililiia mauga o le vavau; sa ifo mai foʻi aʻega e tumau pea. O ona ala e mai anamuā lava.