Lomiga mo le Polokalame mo le Sauniga o le Faiva ma le Olaga Faa-Kerisiano
SETEMA 7-13
ʻOA TAUTELE MAI I LE AFIOGA A LE ATUA | ESOTO 23-24
“Aua E te Mulimuli i le Toʻatele”
(Esoto 23:1) “Aua e te faia ni faamatalaga pepelo. Aua e te auau faatasi ma sē e amioleaga e ala i le avea ma se molimau e faufauina mea leaga.
Po ua E Maua Faamatalaga Moni?
7 Pe e te fiafia e lafo ni imeli ma ni feʻau tusitusia i au uō ma ē e te masani ai? Pe afai e te faitau i se tala fou pe faalogo i se mea mataʻina na tupu, atonu e pei oe o se tagata e faasalalauina tala fou, e te manaʻo e muamua ona e faasalalauina lenā tala mataʻina. Peitaʻi, a o leʻi lafoina lenā feʻau tusitusia po o lenā imeli, ia fesili ifo: ʻPo ou te mautinoa e saʻo ma moni faamatalaga o le a ou faasalalauina atu?’ Pe afai e te lē mautinoa, e te ono faasalalauina la ma le lē iloa na faamatalaga sesē i o tatou uso. O lea, aua le lafoina lenā faamatalaga pe afai e te lē mautinoa.
8 E iai le isi lamatiaga o le vave ona lafo o imeli ma feʻau tusitusia. I isi atunuu, e iai ni nai faasāsāaga po o le matuā faasā foʻi o la tatou galuega. E ono faasalalau e tagata tetee i na atunuu ni faamatalaga e faamataʻu ai o tatou uso, pe e lē toe maufaatuatuaina ai e le tasi le isi. Seʻi mātau le mea na tupu i le Soviet Union. Na faasalalau e leoleo nanā e taʻua o le KGB ia faamatalaga sesē e faapea, e iai uso na taʻimua ua lē faamaoni i tagata o Ieova. Na talitonu le toʻatele i na faamatalaga sesē, ma na latou tuua ai le faalapotopotoga a Ieova. Pagā le faanoanoa o lenei tulaga! E ui i lea, e toʻatele na toe foʻi mai iā Ieova, ae e iai lava i latou e leʻi toe foʻi mai ona ua faavaatuʻia lo latou faatuatua. (1 Timo. 1:19) E faapefea ona tatou ʻalofia se iʻuga mataʻutia faapena? Aua neʻi faasalalauina ni lipoti lē lelei po o ni lipoti e leai ni faamaoniga. Aua e te talitonugofie i so o se faamatalaga. Ia faamautinoa ua e maua faamatalaga moni.
(Esoto 23:2) Aua e te mulimuli i le toʻatele ina ia faia mea leaga; aua e te molimau i se finauga ina ia ʻau ma le toʻatele ina ia liliu ai le faamasinogatonu.
it-1 11 ¶3
Arona
Ia mātau, o taimi e tolu na lē taulau ai Arona, e lē o ia na faapogaia le gaoioiga sesē na faia, ae e foliga mai na ia faataga mea na tutupu po o isi ina ia taaʻina ese o ia mai i le faia o le mea tonu. I lana gaoioiga sesē muamua, sa tatau ona ia faatatauina le mataupu silisili lea o loo i lenei faatonuga: “Aua e te mulimuli i le toʻatele ina ia faia mea leaga.” (Eso 23:2) E ui i lea, o loo taʻua lona igoa i Tusitusiga Paia i se auala faaaloalogia, ma a o iai le Alo o le Atua i le lalolagi, na ia amanaʻia le faiva faaositaulaga a Arona.—Sl 115:10, 12; 118:3; 133:1, 2; 135:19; Mat 5:17-19; 8:4.
(Esoto 23:3) A o lē e faatauvaa aua e te faaʻauʻau iā te ia i lana finauga.
it-1 343 ¶5
Tauaso
Sa faaāta mai e le tulaga tauaso ia faamasinoga na faia ma le lē tonu ona o faiga piʻopiʻo. Sa tele poloaʻiga i le Tulafono e faatatau i faiga faaalatua, o meaalofa, po o faiga faaituʻau, ona o na mea e mafai ona faatauasoina ai se faamasino, ma sa ʻalofia ai le faia o ni faaiʻuga faaituʻau. “O foaʻi faapena e faatauasoina ai tane atamamai.” (Eso 23:8) O ʻfoaʻi e faia i se faiga faaalatua, e faatauasoina ai mata o ē e atamamai.’ (Teu 16:19) E tusa po o le ā le amio saʻo ma le faautauta o se faamasino, ae e mafai ona aafia sana faaiʻuga ona o se meaalofa mai i ē o loo aafia i le mataupu, e tusa pe e na te iloa pe e leai foʻi. E lē gata la i meaalofa, ae na iloa mai foʻi i le tulafono a le Atua e mafai ona aafia se faaiʻuga, pe afai e fua i faalogona po o manatu o se faamasino i se mea, auā o loo taʻua i le tulafono: “Aua tou te faia faamasinoga lē tonu. Aua e te faaʻauʻau atu i lē ua faatauvaa, ma aua e te faasili le tagata mauʻoa.” (Le 19:15) O lea, e tusa po o le ā le mea e lagolagoina e le toʻatele ma po o ā faalogona ma manatu o le faamasino i se mataupu, ae sa lē tatau ona ia faia se faaiʻuga faasaga i le tagata mauʻoa, ona o lona tulaga mauʻoa.—Eso 23:2, 3.
Saʻiliʻiliga Loloto mo ʻOa Faaleagaga
(Esoto 23:9) “Aua e te faapuapuagatia se tagata ese e aumau, auā ua outou iloa lagona o le tagata ese, auā na avea foʻi outou ma tagata ese i le atunuu o Aikupito.
Aua Neʻi Galo le Agalelei i Tagata Ese
4 Nai lo o le faatonu o tagata Isaraelu ia faaaloalo i tagata ese, na talosaga atu Ieova ia faaalia le tigā alofa iā i latou. (Faitau le Esoto 23:9.) Sa iloa e tagata Isaraelu “lagona o le tagata ese.” A o leʻi avea i latou ma pologa, sa teena tagata Eperu e tagata Aikupito ona o le faamaualuluga o Aikupito i lo latou atunuu, po o le lē fiafia foʻi i tapuaʻiga ese. (Kene. 43:32; 46:34; Eso. 1:11-14) Sa matuā faigatā le olaga o tagata Isaraelu a o aumau o ni tagata ese. Peitaʻi, na faatalitalia i latou e Ieova ia feutagaʻi ma tagata ese e pei o ni “tagatānuu” iā i latou.—Levi. 19:33, 34.
(Esoto 23:20, 21) “O lenei, ou te auina atu se agelu e muamua atu iā te oe, ina ia tausia oe i le ala ma taʻitaʻiina oe i le mea ua ou saunia. 21 Ia e faaeteete i lau amio ona o ia ma ia usiusitaʻi i lona leo. Aua e te fouvale atu iā te ia, auā na te lē faamagaloina a outou solitulafono; ona o loo iā te ia loʻu igoa.
it-2 393
Mikaele
1. E na o le pau lea o le isi agelu paia o loo taʻua lona igoa i le Tusi Paia e ese mai iā Kaperielu, ma e na o ia foʻi o loo taʻua o le “agelu sili.” (Iuta 9) O le taimi muamua o loo taʻua ai lea igoa o le mataupu e sefulu o le Tanielu, lea e faamatala ai Mikaele “o se tasi o perenise tāua”; na sau o ia e fesoasoani i se agelu e maulalo ifo lea na tetee i ai “le perenise o le malo o Peresia.” Na taʻua Mikaele “o lo outou [tagata o Tanielu] perenise,” “o le perenise sili o lē o loo tulaʻi ona o tagata o lou [Tanielu] nuu.” (Ta 10:13, 20, 21; 12:1) I inei, o loo faasino atu iā Mikaele o le agelu lea na taʻitaʻia tagata Isaraelu a o iai i le toafa. (Eso 23:20, 21, 23; 32:34; 33:2) O se isi faamaoniga e lagolagoina ai lenei manatu o le mea moni e faapea, na “finau Mikaele le agelu sili ma le Tiapolo i le tino o Mose.”—Iuta 9.
Faitau Tusi Paia
(Esoto 23:1-19) “Aua e te faia ni faamatalaga pepelo. Aua e te auau faatasi ma sē e amioleaga e ala i le avea ma se molimau e faufauina mea leaga. 2 Aua e te mulimuli i le toʻatele ina ia faia mea leaga; aua e te molimau i se finauga ina ia ʻau ma le toʻatele ina ia liliu ai le faamasinogatonu. 3 A o lē e faatauvaa aua e te faaʻauʻau iā te ia i lana finauga. 4 “Pe a e tau atu i le povi poʻa po o le asini a lou fili ua sē, ia e toe faafoʻi atu lava iā te ia. 5 Pe a e vaai i le asini a sē e ʻinoʻino iā te oe o loo taoto ona o le mamafa o lana avega, ia aua neʻi e tuua ai pea o ia. Ia e fesoasoani iā te ia e aveese le avega. 6 “Aua e te liliuina le iʻuga o le faamasinoga o le tagata mativa ua iā te oe e tusa ma lana finauga. 7 “Ia e taumamao mai i upu pepelo. Aua foʻi e te fasiotia tagata e lē sala ma ē e amiotonu, auā ou te lē taʻuamiotonuina o lē e amioleaga. 8 “Aua e te talia se foaʻi e faia i faiga faaalatua, auā o foaʻi faapena e faatauasoina ai tane atamamai ma suia ai faaiʻuga a tane amiotonu. 9 “Aua e te faapuapuagatia se tagata ese e aumau, auā ua outou iloa lagona o le tagata ese, auā na avea foʻi outou ma tagata ese i le atunuu o Aikupito. 10 “E ono tausaga e te lūlū ai fatu i lou fanua ma aoina ai ona fua. 11 A o le tausaga lona fitu e te lē galueaʻiina ai lou fanua ae e tuu ai pea, ma e ao ona aai mai ai tagata matitiva ua iā te oe; a o mea ua totoe ai e tuu ma manu o le vao. O le auala lea e te faia ai lou togāvine ma lou togāolive. 12 “E ono aso e fai ai au galuega; ae o le aso lona fitu e te lē galue ai, ina ia mālōlō ai lau povi poʻa ma lau asini ma mālōlō ai le tama tama a lau teine pologa ma le tagata ese e aumau ai. 13 “Ia outou utagia nei mea uma ua ou fai atu ai iā te outou; ia aua neʻi outou taʻutaʻua igoa o isi atua. Aua lava neʻi faalogo i ai mai i lou gutu. 14 “O tausaga taʻitasi, ia e faamanatu tausamiga e tolu iā te aʻu. 15 Ia e tausia le tausamiga o falaoa e lē faafefeteina. E fitu aso e te ʻai ai i falaoa e lē faafefeteina, e pei ona ou poloaʻi atu ai iā te oe, i le taimi faatulagaina i le masina o Apipa, auā o le taimi lea na outou ō ese mai ai i Aikupito. E leai se isi e sau i oʻu luma e leai sana mea. 16 O le tausamiga foʻi o le seleselega o uluaʻi fua ua matutua, o au galuega ia na e lūlūina i le fanua. Ia e faamanatu foʻi le tausamiga o le aoaoina o fua i le faaiʻuga o le tausaga, pe a e aoaoina mai fua o au galuega i le fanua. 17 I tausaga taʻitasi, ia faatolu ona tutū tane uma ua iā te oe i luma o le Alii moni o Ieova. 18 “Aua e te osi faatasi le toto o laʻu taulaga ma se mea ua faafefeteina. E lē tatau ona tuua seʻia oo i le taeao le gaʻo o le tausamiga iā te aʻu. 19 “Ia e avatu i le fale o Ieova lou Atua o uluaʻi fua ua matutua e aupito lelei o lou eleele. “Aua e te sakaina le tamaʻi ʻoti i le suāsusu o lona tinā.
SETEMA 14-20
ʻOA TAUTELE MAI I LE AFIOGA A LE ATUA | ESOTO 25-26
“Le Mea e Sili Ona Tāua o le Faleʻie Paia”
(Esoto 25:9) O mea uma ua ou faaali atu iā te oe, o le ata lea o le faleʻie paia ma le ata o mea uma o le a iai, o le auala lenā ia outou faia ai.
it-1 165
Atolaau o le Feagaiga
Ata ma Lona Fausaga. O le mea muamua lava na faailoa atu e Ieova iā Mose, ina ua faatonuina o ia e fausia le faleʻie paia, o le ata lea o le auala e faia ai le Atolaau, auā o le mea autū lea ma sili ona tāua i le faleʻie paia ma le togālauapi a Isaraelu. O le fua o le tino o le atolaau, e 2.5 kupita le umi, 1.5 kupita le lautele, ma e 1.5 kupita le maualuga (pe ā ma le 111 × 67 × 67 cm; 44 × 26 × 26 in.). Na faia aʻe le tino o le atolaau i le laau o le setima ma na ufitia totonu ma fafo i le auro māoʻi, ma na iai se “teuteu auro e faataamilomilo ai.” O le vaega lona lua o le Atolaau, o lona ufiufi, lea e faia atoa i le auro māoʻi ae e lē na o se laau ua ufitia i le auro. O lona umi ma le lautele e tutusa ma le tino o le atolaau. I luga o le ufiufi, sa iai ni kerupi se lua e fausia i auro e ala i le faaaogāina o le samala, e taʻitasi i le itu o le ufiufi ma e faafesagaʻi le tasi ma le isi. O nei kerupi e ifo i lalo o la ulu, ae fālō i luga o la apaʻau ma faamalumalu ifo i le Atolaau.—Eso 25:10, 11, 17-22; 37:6-9.
(Esoto 25:21) Ia e tuu le ufiufi i luga o le Atolaau, ma ia e tuu i le Atolaau o papamaa ou te avatu iā te oe e fai ma molimau.
it-1 166 ¶2
Atolaau o le Feagaiga
Na avea le Atolaau o se mea paia e teu ai faamanatuga paia po o le molimau, ma o mea autū na teuina ai o papamaa e lua o le molimau, po o le Tulafono e Sefulu. (Eso 25:16) Na teuina ai foʻi le “fagu auro sa iai le manai ma le tootoo o Arona lea na fua,” ae na mulimuli ane toe aveesea nei mea a o leʻi fausia le malumalu o Solomona. (Epe 9:4; Eso 16:32-34; Nu 17:10; 1Tu 8:9; 2No 5:10) A o lata ina maliu Mose, na ia avatu se kopi o le “tusi o le tulafono” i ositaulaga sā Levī ma faatonuina ina ia teu, e lē i totonu o le atolaau, ae i ʻautafa o le atolaau o le feagaiga a Ieova lo latou Atua, ia fai ma molimau faasaga iā te i latou.’—Teu 31:24-26.
(Esoto 25:22) Ou te faaali atu aʻu iā te oe i inā ma ou te tautala atu iā te oe mai i luga o le ufiufi o le atolaau, mai i le va o kerupi e lua o loo i luga o le atolaau o le feagaiga, o mea uma ou te poloaʻi atu ai iā te oe mo le fanauga a Isaraelu.
it-1 166 ¶3
Atolaau o le Feagaiga
Faaatagia ai le faatasi o le Atua ma tagata. O le Atolaau na faaatagia mai ai le faatasi o le Atua ma tagata, i le taimi atoa na faaaogāina ai. Na folafola mai e Ieova e faapea: “Ou te faaali atu aʻu iā te oe i inā ma ou te tautala atu iā te oe mai i luga o le ufiufi o le atolaau, mai i le va o kerupi e lua o loo i luga o le atolaau o le feagaiga.” “Ou te iai i le ao i luga o le ufiufi.” (Eso 25:22; Le 16:2) Na tusi Samuelu e faapea o loo afio Ieova “i luga o kerupi” (1Sa 4:4); o lea na fai kerupi ma “faatusa o le kariota” a Ieova. (1No 28:18) O le mea lea, “o so o se taimi e ulufale atu ai Mose i le faleʻie o le feiloaʻiga e talanoa ma [Ieova], ona ia faalogo lea i le siʻufofoga ua fetalai mai iā te ia mai i luga o le ufiufi ua i luga o le atolaau o le feagaiga, mai i le va o kerupi e lua; ona ia fetalai mai lea iā te ia.” (Nu 7:89) Mulimuli ane, na fesili atu foʻi Iosua ma le ositaulaga sili o Fineaso iā Ieova i luma o le Atolaau. (Ios 7:6-10; Fam 20:27, 28) Peitaʻi, e na o le ositaulaga sili na mafai ona ulu atu i le Mea e Sili Ona Paia ma vaai i le Atolaau e faatasi i le tausaga, e lē ina ia talanoa atu iā Ieova, ae ina ia faataunuuina le sauniga mo le Aso o le Togisala.—Le 16:2, 3, 13, 15, 17; Epe 9:7.
Saʻiliʻiliga Loloto mo ʻOa Faaleagaga
(Esoto 25:20) E ao ona fālō i luga o la apaʻau e lua, ma faamalumalu le ufiufi o le atolaau i o la apaʻau, ma e faafesagaʻi o la mata. Ia faasaga i lalo mata o kerupi i le ufiufi.
it-1 432 ¶1
Kerupi
Na iai ata ma faatusa o kerupi i mea na teuina ai le faleʻie paia lea na iai i le toafa. Na iai i itu e lua o le ufiufi o le Atolaau ni kerupi se lua na fausia i auro e ala i le faaaogāina o le samala. Na faafesagaʻi nei kerupi, ma na ifo o la ulu i le ufiufi e pei o loo tapuaʻi. Na tofu kerupi ma apaʻau taʻilua o loo fālō i luga ma faamalumalu ifo i le ufiufi e pei o loo leoleo ma puipuia se mea. (Eso 25:10-21; 37:7-9) E lē gata i lea, o ʻie i totonu o le faleʻie paia ma le ʻie puipui na vaeluaina ai le Mea Paia ma le Mea e Sili Ona Paia, na suʻiina ai teuteu o ata o kerupi.—Eso 26:1, 31; 36:8, 35.
(Esoto 25:30) E ao foʻi ona e laulauina i luga o le laulau o le falaoa e laulauina i luma, ma ia lē aunoa i oʻu luma.
it-2 936
Falaoa e Laulauina i Luma
O falaoa ia e sefulu lua na tuu i luga o se laulau i le Mea Paia o le faleʻie paia po o le malumalu, ma na suiina i nisi falaoa fou i Sapati taʻitasi. (Eso 35:13; 39:36; 1Tu 7:48; 2No 13:11; Ne 10:32, 33) Pe a faaliliu saʻo le upu Eperu mo le falaoa e laulauina i luma, o le “falaoa o foliga.” O le upu “foliga” e faasino atu i nisi taimi i le iai i “luma” (2Tu 13:23), ma sa iai i luma o fofoga o Ieova le falaoa e laulauina e fai ma taulaga mo ia e lē aunoa. (Eso 25:30) O loo taʻua foʻi le falaoa e laulauina i luma, o le “falaoa ua faaputuina” (2No 2:4), pe e na o le taʻua foʻi o le “falaoa” (Epe 9:2).
Faitau Tusi Paia
(Esoto 25:23-40) “E ao ona e faia se laulau i laau o le setima, e lua kupita lona umi, e kupita lona lautele ma e kupita ma le ʻafa lona maualuga. 24 E ao ona e ufiufi i le auro māoʻi ma faia ni ona teuteu auro e faataamilomilo ai. 25 Ia e faia se laupapa e tusa lona lautele ma le lautele o le alofilima e faataamilo i autafa o le laulau, ma se teuteu auro e soo ai. 26 E ao ona e faia ni mama auro se fā ma tuu mama i tulimanu e fā, o vae ia e fā o le laulau. 27 E ao ona latalata mama i le laupapa e soo ai, e fai ma lagolago i amo e amo ai le laulau. 28 E ao ona e faia amo mai i laau o le setima ma ufiufi ai i le auro, ma e ao ona latou amoina le laulau. 29 “E ao ona e faia ona ipu mafolafola, o ipu, o fagu, ma ipu faaofuofu e latou te faaaogā e liligi ai taulaga o meainu. Ia e faia na mea i le auro māoʻi. 30 E ao foʻi ona e laulauina i luga o le laulau o le falaoa e laulauina i luma, ma ia lē aunoa i oʻu luma. 31 “E ao ona e faia se tuugāmolī i le auro māoʻi. Ia faia le tuugāmolī i le auro e ala i le faaaogāina o le samala. E ao ona iai ona ʻau, o ona lālā, o ona ipu, o ona pona ma fuga, ma e fesootaʻi ona vaega uma. 32 E ono lālā e falala mai i le ʻau, e tolu lālā o le tuugāmolī i le tasi itu a o le isi tolu lālā o le tuugāmolī e oso aʻe mai i le isi itu. 33 E tolu ipu e foliga e pei o ni fua o le sekati o loo i le lālā e tasi, e sosoo pona ma fuga, ma o le isi lālā e iai ipu e tolu e foliga e pei o le fua o le sekati, e sosoo pona ma fuga. O le auala lenei e falala mai ai lālā e ono mai i le tuugāmolī. 34 O le ʻau o le tuugāmolī e iai ipu e fā e foliga e pei o fua o le sekati, e sosoo pona ma fuga. 35 E oso aʻe lālā e lua mai i le pona i lalo ifo o ia lālā, e oso aʻe isi lālā e lua mai i le pona i lalo o ia lālā, e oso mai foʻi isi ona lālā e lua mai i le pona i lalo o ia lālā, auā o ia lālā e ono e oso aʻe mai i le tuugāmolī. 36 O pona ma lālā e falala mai i le ʻau o le tuugāmolī. E faia uma i le auro māoʻi e tasi e ala i le faaaogāina o le samala. 37 E ao ona e faia ni molī se fitu mo le tuugāmolī; e ao foʻi ona tutu molī ma faamalamalama ai mea i ona luma. 38 E faia foʻi i le auro māoʻi ona iofi ma ona salefu. 39 E ao ona faia e ia le tuugāmolī ma mea uma e faaaogā ai i le taleni o le auro māoʻi. 40 Ia faamautinoa ua e faia e tusa ma le ata sa faaali atu iā te oe i le mauga.
SETEMA 21-27
ʻOA TAUTELE MAI I LE AFIOGA A LE ATUA | ESOTO 27-28
“O le ā e Aʻoaʻoina Mai i Ofu o Ositaulaga?”
(Esoto 28:30) Ia e tuu le Urima ma le Tumema i totonu o le ufifatafata mo faamasinoga, ma e ao ona i luga o le fatafata o Arona pe a ulu atu o ia i luma o Ieova; ia lē aunoa ona ave e Arona iʻuga o faamasinoga mo le fanauga a Isaraelu i luga o lona fatafata i luma o Ieova.
it-2 1143
Urima ma le Tumema
Ua faapea mai nisi o faitofā o le Tusi Paia, o le Urima ma le Tumema o ni vili. I le faaliliuga a James Moffatt, o loo taʻua ai le Urima ma le Tumema i le Esoto 28:30, o “vili paia.” E manatu nisi o le Urima ma le Tumema, e faia aʻe i ni mea se tolu, o le isi tasi e tusia ai le “ioe,” o le isi o le “leai,” ma le isi e leai se mea o tusia ai. E seʻiina pe filifilia se tasi o nei mea ina ia maua ai se tali o se fesili. Ae pe afai e seʻiina pe filifilia le mea e lē o tusia ai se mea, o lona uiga la e leai se tali. Ae e manatu foʻi isi e faia aʻe i ni maa mafolafola se lua, e paʻepaʻe le isi itu ae uliuli le isi itu. Pe a togiina i lalo nei maa ae ū mai i luga itu papaʻe e lua, o lona uiga o le “ioe”; pe a ū mai i luga itu uliuli e lua, o lona uiga o le “leai”; ae afai o le uliuli ma le paʻepaʻe, o lona uiga e leai se tali. I se tasi taimi ina ua fesili atu Saulo e ala i se ositaulaga pe e tatau ona faaauau lana osofaʻiga iā Filisitia, e na te leʻi maua se tali. Na manatu o ia ua faia e se tasi o ona tagata se agasala, ma na talosaga atu loa: “Le Atua e, o Isaraelu, inā tali mai ia e ala i le Tumema!” Ona ō ese ai lea o Saulo ma Ionatana mai i isi tagata o le nuu, ma na mulimuli ane faia se vili i lo la va. I lenei tala, o le talosaga “Inā tali mai ia e ala i le Tumema,” e foliga mai e ese mai i le faia o le vili, e ui lava e ono maua ai se manatu e iai se fesootaʻiga o nei mea e lua.—1Sa 14:36-42.
(Esoto 28:36) “E te faia se pale iila i le auro māoʻi ma vane ai e pei o le vaneina o se faamaufaailoga, ʻE paia lava Ieova.’
it-1 849 ¶3
Muāulu
Ositaulaga Sili o Isaraelu. I Isaraelu, na iai i luma o le pulou ʻie o le ositaulaga sili, i luma o lona muāulu, se pale iila auro, “o le faailoga paia o le tuuina atu,” ma na vaneina ai o se faamaufaailoga le faaupuga “E paia lava Ieova.” (Eso 28:36-38; 39:30) I le avea ai ma sui sili o le tapuaʻiga a Ieova i Isaraelu, na tatau i le ositaulaga sili ona tausia lona tulaga paia, ma na avea lenei faaupuga o se faamanatu i tagata Isaraelu uma ina ia tumau ona paia i le auaunaga iā Ieova. Na avea foʻi o se faaataga talafeagai o le Ositaulaga Silisili, o Iesu Keriso, ma le tofiaina o ia e Ieova i lenei faiva faaositaulaga lea e faaauilumaina ai le paia o le Atua.—Epe 7:26.
(Esoto 28:42, 43) Ia faia ni ofuvae i le ʻie lino ina ia ufiufi ai lo latou lē lavalavā. E mai i puimanava e oo i ogāvae ia ofuvae. 43 E ao ona ofu e Arona ma ona atalii nei ofuvae pe a latou ō atu i le faleʻie o le feiloaʻiga, pe latou te faalatalata atu i le fata faitaulaga e auauna ai i le mea paia, ina neʻi nofosala i latou ma feoti ai. O le tulafono lenei mo se taimi umi mo ia ma lana fanau pe a mavae atu o ia.
Ia Āva iā Ieova i le Tuuina Atu o le Mamalu
17 E ao ona tatou uaʻi faapitoa i le auala e faaalia ai le mamalu pe a tapuaʻi atu iā Ieova. O loo faapea mai le Failauga 5:1, “Ia e faaeteete i ou vae pe a e alu i le fale o le Atua.” Sa faatonuina Mose ma Iosua e aveesea o la seevae pe a iai i se nofoaga paia. (Eso. 3:5; Iosua 5:15) E ao ona la faia lenei mea e faaalia ai lo la faaaloalo. Sa tatau ona ofuina e ositaulaga Isaraelu ia ofuvae e fai i ie vavae “e ufiufi ai o latou tino.” (Eso. 28:42, 43) Sa avea ma puipuiga ma ʻalofia ai le iloa atu o latou totoga sā a o auauna i le fata faitaulaga. E ao i tagata taʻitoʻatasi o le aiga o le ositaulaga ona tausisia tapulaa a le Atua i tulaga mamalu.
Saʻiliʻiliga Loloto mo ʻOa Faaleagaga
(Esoto 28:15-21) “E te faia le ufifatafata mo faamasinoga i le galuega a le tagata suʻi teuteu. E te faia ai e pei ona faia o le galuega i le efota. E te faia i le auro, o le filo lanu moana, o le filo fulufulu mamoe ua vali violē, o mea ua vali mūmū sesega ma le ʻie lino ua lelei ona milo ona filo. 16 E ao ona faatafafā pe a faasautualua, e tusa ma le aga lona umī, e aga foʻi lona lautele. 17 E te tuuina i ai ni maa tāua, e fā laina o maa. O le laina muamua e iai maa o le salikea, o le topasi, ma le samaraki. 18 O le laina lona lua e iai maa o le nofeka, o le safaira, ma le ialoma. 19 O le laina lona tolu e iai maa o le lesema, o le sevo ma le aselama. 20 O le laina lona fā e iai maa o le tasesa, o le soama, ma le iasepi. Ia faamau lava i totonu o teuteu auro i le mea e tuu ai maa. 21 O maa e ao ona tusa ma igoa o atalii o Isaraelu, le toʻasefulu lua e tusa ma o latou igoa. E ao ona faia e pei o le vaneina o se faamaufaailoga, e taʻitasi le maa ma lona igoa e tusa ma ituaiga e sefulu lua.
E te Silafia?
O fea na aumai ai maatāua ia na faaaogā e fai ai le ufifatafata a le ositaulaga sili?
Ina ua tuua e le nuu o Isaraelu Aikupito ma ō atu i le toafa, na faatonu ai e Ieova i latou e faia se ufifatafata. (Esoto 28:15-21) Na iai i lenā ufifatafata ia maatāua o le salikea, topasi, samaraki, nofeka, safaira, ialoma, lesema, sevo, aselama, tasesa, soama, ma le iasepi. Pe na mafai moni lava ona maua e le nuu o Isaraelu nei maatāua?
I taimi o le Tusi Paia, na faatāua ma fefaatauaʻi e tagata maatāua. O se faataʻitaʻiga, sa tele maatāua eseese na maua i maina o Aikupito anamua, ma o isi maa e mamao le mea e aumai ai, e pei o le atunuu ua taʻua i aso nei o Iran, faapea ma Afghanistan, ma atonu i Initia foʻi. Sa pulea e le aigātupu nofoaga sa faaaogā e eli ai maina, ma le tele o maatāua sa mafai ona aveesea. Na faamatala e le augātamā o Iopu le auala na faaaogā ai e tagata i na aso ia ana, ina ia eli ai maina ma maua ai ʻoa tāua, e pei ona ia taʻua patino le mauaina o le safaira ma le topasi.—Iopu 28:1-11, 19.
Ua taʻua i le Esoto le ʻfaamativaina e Isaraelu o tagata Aikupito,’ i le aveina o a latou ʻoa tāua. (Esoto 12:35, 36) O lea la, e foliga mai o maatāua na faia ai le ufifatafata a le ositaulaga sili, na aumaia e tagata Isaraelu mai i Aikupito.
(Esoto 28:38) Ia fusi ai i le muaulu o Arona, e ao foʻi ona tali atu Arona i agasala ua faia i mea paia, ia o le a faapaiaina e atalii o Isaraelu, o lona uiga o a latou meaalofa paia uma; e fusi pea i lona muaulu, ina ia latou maua ai le finagalo malie o Ieova.
it-1 1130 ¶2
Paia
Manu ma Fua o Faaeleeleaga. Na avea povi poʻa ulumatua, o mamoe poʻa ulumatua ma ʻoti poʻa ulumatua, o ni mea e paia iā Ieova ma na lē tatau ona fesuiaʻia. Na tatau ona faia taulaga i nei manu ma na avatu se tufaaga i ositaulaga ua faapaiaina. (Nu 18:17-19) Na paia sefuluaʻi ma uluaʻi fua o faaeleeleaga, e pei o taulaga uma ma meaalofa uma na faapaiaina mo le auaunaga i le faleʻie paia. (Eso 28:38) Sa lē tatau ona manatu māmā i mea paia uma a Ieova, pe faaaogāina i se auala e lē faaaloalo. O se faataʻitaʻiga, o le tulafono e faatatau i le sefuluaʻi. Pe afai sa tuu ese e se tamāloa se vaega o fua o ana saito e fai ma sefuluaʻi, ae mulimuli ane ua ia faaaogāina pe faaaogā foʻi e se tasi o lona aiga e aunoa ma le iloa, e fai ai sa latou meaʻai, o lona uiga la ua solia e le tamāloa le tulafono a Ieova e tusa ai o mea paia. I le Tulafono, na tatau i lea tagata ona faia se taulaga o le nofosala, e ala i le totogiina atu o le tau atoa o le mea paia ma faaopoopo i ai ma le 20 pasene, faatasi ai ma se mamoe e matuā lelei mai i le lafu e fai ai se taulaga. O le faia faapea, na matuā faaaloalogia ai e tagata ia mea paia na tatau ona avatu iā Ieova.—Le 5:14-16.
Faitau Tusi Paia
(Esoto 27:1-21) “E te faia le fata faitaulaga i le laau o le setima, e lima kupita le umi, e lima kupita foʻi le lautele. Ia fai faatafafā le fata faitaulaga, ma o lona maualuga e tolu kupita. 2 E te faia seu i ona tulimanu e fā. E lālā mai i tua ona seu, ma ia e ufiufi ai i ʻapamemea. 3 E te faia ni ʻapa e faamamā ese ai le lefulefu ua gaʻoa, o suō, o ipu faaofuofu, o tui, o salefu; ma ia e faia ia mea uma i le ʻapamemea. 4 E te faia se lagolago valavala i le ʻapamemea; ia e faia i le mea valavala ni mama ʻapamemea e fā i ona tulimanu e fā. 5 E te tuuina ai i lalo ifo i le fata faitaulaga, ma ia oo lenei mea valavala i le ogatotonu o le fata faitaulaga. 6 E te faia amo mo le fata faitaulaga, o amo e fai i laau o le setima, ma e te ufiufi ai i le ʻapamemea. 7 E ao foʻi ona e sulu amo i mama, ma e tatau ona iai amo i itu e lua o le fata faitaulaga pe a amoina. 8 E te faia se pusa i laupapa e pu totonu. E pei ona ia faaali atu iā te oe i le mauga, ia faapea lava ona latou faia. 9 “E te faia se lotoā o le faleʻie paia. O le a iai ni ʻie e tautau ua faia i le ʻie lino ua lelei ona milo ona filo, i le itu e faasaga i Nekepi, o le itu lea i saute, ma e selau kupita le umi o le itu e tasi. 10 E ʻapamemea ona poutū e lua sefulu ma lagolago e lua sefulu. E siliva pine o poutū ma sooga. 11 E faapea foʻi le umi o le itu i mātū, o ʻie e tautau e selau kupita le umi, ma e ʻapamemea ona poutū e lua sefulu ma lagolago e lua sefulu, ma e siliva pine o poutū ma sooga. 12 A o le lautele o le lotoā i le itu i sisifo, e lima sefulu kupita le umi o ʻie e tautau ai, faatasi ma poutū e sefulu ma lagolago e sefulu. 13 O le lautele o le lotoā i le itu i sasaʻe i le mea e oso aʻe ai le lā, e lima sefulu kupita. 14 E sefulu lima kupita le umi o mea tautau i le tasi itu o le faitotoʻa, faatasi ma poutū e tolu ma lagolago e tolu. 15 A o le isi itu o le faitotoʻa, e sefulu lima kupita le umi o ʻie e tautau ai, faatasi ma poutū e tolu ma lagolago e tolu. 16 “O le faitotoʻa o le lotoā e iai se ʻie pupuni e lua sefulu kupita le umi, e faia i filo lanu moana, o fulufulu mamoe ua vali lanu violē, o mea ua vali mūmū sesega ma ʻie lino ua lelei ona milo ona filo, o galuega a se tagata lalaga, faatasi ma poutū e fā ma lagolago e fā. 17 O poutū uma e siʻomia ai le lotoā e siliva mea e sosoo ai, e siliva foʻi pine ae e ʻapamemea lagolago. 18 O le umi o le lotoā e selau kupita, o le lautele e lima sefulu kupita, o le maualuga e lima kupita, o ʻie lino ua lelei ona milo ona filo ma lagolago e ʻapamemea. 19 O mea uma e faaaogā mo sauniga i le faleʻie paia, o pine uma o le faleʻie, ma pine o le lotoā e ʻapamemea. 20 “A o oe, ia e faatonu atu i atalii o Isaraelu, ina ia latou aumai iā te oe suāuu lelei mai i olive ua tuʻi mo le tuugāmolī, ina ia mumū ai pea molī. 21 I le faleʻie o le feiloaʻiga, ma i fafo o le ʻie puipui o loo i tafatafa o le Atolaau o le Feagaiga e vaaia e Arona ma ona atalii molī i luma o Ieova, e mai i le afiafipō seʻia oo i le taeao. O le tulafono lenei mo se taimi umi i o latou tupulaga, e faia e atalii o Isaraelu.
SETEMA 28–OKETOPA 4
ʻOA TAUTELE MAI I LE AFIOGA A LE ATUA | ESOTO 29-30
“Se Foaʻi iā Ieova”
(Esoto 30:11, 12) Ua fetalai atili mai Ieova iā Mose e faapea: 12 “Pe a faitau le aofaʻiga o atalii o Isaraelu ina ia iloa lo latou faitau aofaʻi, e ao ona taʻitoʻatasi ona latou avatu se togiola mo lona ola iā Ieova pe a faia le faitauga o i latou, ina ia leai ai se mala e oo iā i latou pe a faia le faitauga o i latou.
it-2 764-765
Lesitala
A o Iai i Sinai. O le faatonuga a Ieova na faia ai le uluaʻi lesitala a o tolauapi Isaraelu i Sinai, i le masina lona lua o le tausaga lona lua talu ona faasaʻoloto i latou mai i Aikupito. Ina ia fesoasoani iā Mose i le faitauina o le aofaʻi o tagata, na tofia ai ni taʻitaʻi mai i ituaiga taʻitasi e faia lenei galuega ma vaavaaia le lesitalaina o tagata mai i lona ituaiga. E lē gata na lesitalaina tane uma e taʻi 20 tausaga ma sili atu, o ē ua agavaa mo le vaegaʻau, ae na faatonuina foʻi i le Tulafono le totogiina e i latou ua lesitalaina o se lafoga e ʻafa sekeli ($1.10) mo le auaunaga i le faleʻie paia. (Eso 30:11-16; Nu 1:1-16, 18, 19) O le aofaʻiga o i latou uma na lesitalaina e 603,550, ae e leʻi aofia ai le ʻau sā Levī, o ē e leʻi iai so latou tofi i le laueleele. E leʻi totogiina e i latou nei se lafoga mo le faleʻie paia ma e leʻi iai foʻi i le vaegaʻau.—Nu 1:44-47; 2:32, 33; 18:20, 24.
(Esoto 30:13-15) O mea nei e avatu e i latou uma o ē ua aofia i ē ua faitauina: o le ʻafa sekeli e tusa ma le fua masani o le mea paia. O le lua sefulu kire e tutusa lea ma le sekeli. O le ʻafa sekeli o le foaʻi lea iā Ieova. 14 E taʻitoʻatasi i latou ma avatu le foaʻi iā Ieova, o ē ua aofia i ē ua lesitalaina e lua sefulu tausaga ma ē e matutua atu. 15 E lē tatau ona tele mea e avatu e tagata mauʻoa, e lē tatau foʻi i tagata matitiva ona avatu mea e itiiti ifo i le ʻafa sekeli, pe a faia le foaʻi iā Ieova e fai ma togisala mo o outou ola.
it-1 502
Foaʻi
O nisi o foaʻi, sa faatonuina i le Tulafono le totogiina. Ina ua faitauina e Mose le aofaʻi o tagata Isaraelu, na tatau i tane uma e taʻi 20 tausaga ma sili atu ona avatu se togiola mo lona ola, “o le ʻafa sekeli [atonu e $1.10] e tusa ma le fua masani o le mea paia.” Na avea lenei mea o se “foaʻi iā Ieova” e fai ma togisala mo o latou ola ma “mo le auaunaga i le faleʻie o le feiloaʻiga.” (Eso 30:11-16) E tusa ai ma le tusitala Iutaia o Josephus, o lē e faamatalaina le talafaasolopito (The Jewish War, VII, 218 [vi, 6]), na mulimuli ane totogiina lenei “lafoga paia” i tausaga taʻitasi.—2No 24:6-10; Mat 17:24.
(Esoto 30:16) E te aumaia foʻi tupe siliva o le togisala mai i atalii o Isaraelu ma avatu mo le auaunaga i le faleʻie o le feiloaʻiga, ina ia fai ma faamanatuga i luma o Ieova mo atalii o Isaraelu, ina ia faia ai le togisala mo o outou ola.”
E te Silafia?
Na faapefea ona faatupeina auaunaga i le malumalu o Ieova i Ierusalema?
Sa faatupeina auaunaga eseese o le malumalu e ala i lafoga, aemaise lava i sefuluaʻi e tatau ona totogi e tusa ai ma le tulafono. Ae sa faaaogā foʻi isi ituaiga o lafoga. O se faataʻitaʻiga, i le taimi sa fausia ai le faleʻie paia, sa faatonuina e Ieova Mose e aoina se ʻafa sekeli o siliva mai tagata Isaraelu uma ua lesitalaina, e avea ma “foaʻi . . . iā Ieova.”—Esoto 30:12-16.
E foliga mai o se tū masani mo Iutaia taʻitoʻatasi, le foaʻi o lenei aofaʻiga o tupe faatulagaina o se lafoga mo le malumalu i tausaga taʻitasi. O le lafoga lenei na faatonu e Iesu Peteru e totogi i le tupe siliva na maua i le gutu o le iʻa.—Mataio 17:24-27.
Saʻiliʻiliga Loloto mo ʻOa Faaleagaga
(Esoto 29:10) “E ao ona e avatu loa le povi poʻa i luma o le faleʻie o le feiloaʻiga, o Arona foʻi ma ona atalii e latou te faaee atu o latou lima i luga o le ulu o le povi poʻa.
it-1 1029 ¶4
Lima
Faaeeina o Lima. E ese mai i le faaaogāina o lima e uu ai ni mea, na faaee foʻi lima i se tasi po o se mea ona o ni fuafuaga eseese. Peitaʻi, o le uiga masani lava o lenei gaoioiga e faaalia ai ua filifilia se tasi po o se mea i se auala patino. Pe a tofia le ʻauositaulaga, e faaee e Arona ma ona atalii o latou lima i luga o le ulu o se povi poʻa ma ni mamoe poʻa se lua, e faaalia ai ua filifilia nei manu e faia ai le taulaga mo le fuafuaga o le avea o i latou ma ositaulaga a Ieova le Atua. (Eso 29:10, 15, 19; Le 8:14, 18, 22) Ina ua faatonuina e le Atua e tofia Iosua e sosoo atu iā Mose, na faaee e Mose ona lima i luga o Iosua, o lē na mulimuli ane faatumulia “i le agaga e atamai ai” ma mafai ai ona ia taʻitaʻia lelei le nuu o Isaraelu. (Teu 34:9) Na faaee foʻi lima i luga o i latou na filifilia e mauaina se faamanuiaga. (Ke 48:14; Mar 10:16) Na paʻi atu pe faaee foʻi aao o Iesu Keriso i nisi sa ia faamālōlōina. (Mat 8:3; Mar 6:5; Lu 13:13) I nisi taimi, na maua ai e nisi le meaalofa o le agaga paia, e ala i le faaee i ai o lima o le ʻauaposetolo.—Ga 8:14-20; 19:6.
(Esoto 30:31-33) “E te fai atu i atalii o Isaraelu e faapea, ʻE fai pea lenei uu ma uu paia e faauuina ai iā te aʻu i o outou tupulaga o loo mulimuli mai. 32 Aua le uuina ai le tino o se tagata, ma aua tou te faaaogā lenei fua e faia ai se isi uu. O se mea e paia lenei uu. E ao ona avea pea o se mea e paia iā te outou. 33 O so o se tasi na te faia se uu manogi faapea ma uu ai se tagata ese e tatau ona fasiotia o ia.’”
it-1 114 ¶1
Faauuina
I le Tulafono na tuuina atu e Ieova iā Mose, na ia faailoa atu ai le auala e faia ai le uu paia e faauuina ai. O se tuufaatasiga o mea manogi e sili ona lelei—o le muro, kinamoni suamalie, kani suamalie, kesia, ma le uu olive. (Eso 30:22-25) Sa avea o se agasala matuiā le faia e so o se tasi o lenei uu paia, ma faaaogā mo so o se fuafuaga e leʻi faatonuina e Ieova. (Eso 30:31-33) Na faaāta mai e lenei mea, le tāua ma le paia o le tofia o se tasi i se faaeaga ua uma ona faamaonia e ala i le faauuina i le uu paia.
Faitau Tusi Paia
(Esoto 29:31-46) “E te ave le mamoe poʻa o le tofiga, ma ia e saka lona aano i le mea paia. 32 E ʻai e Arona ma ona atalii le aano o le mamoe poʻa, ma le falaoa ua i totonu o le ato i le faitotoʻa o le faleʻie o le feiloaʻiga. 33 E ao ona latou aai i mea ua uma ona faia ai le togisala, ina ia tuu atu iā i latou le pule, ma faapaiaina ai i latou. E lē tatau ona ʻai ai se tagata ese auā o mea paia ia mea. 34 Pe afai e oo i le taeao o totoe ni aano o le taulaga o le tofiga ma ni falaoa, ona e susunuina lea i le afi o mea ua totoe. E lē tatau ona ʻaina na mea auā e paia. 35 “Ia e faia lenei mea iā Arona ma ona atalii e tusa ma mea uma ua ou poloaʻi atu ai iā te oe. E fitu aso e te faia ai le tuuina atu o le pule iā i latou. 36 E te faia taulaga mo agasala i aso taʻitasi i le povi poʻa e avea ma togisala, e te faamamā foʻi le fata faitaulaga mai i le agasala, e ala i lou faia o se togisala mo le fata faitaulaga, ia e faauu i ai ma faapaiaina. 37 O aso e fitu e te faia ai le togisala mo le fata faitaulaga, ia e faapaiaina ina ia avea ma fata faitaulaga e sili ona paia. O se tasi e paʻi atu i le fata faitaulaga, e tatau ona paia o ia. 38 “O mea nei e te fai taulaga ai i le fata faitaulaga: e lua mamoe poʻa e taʻitasi tausaga, e taʻilua i le aso e lē aunoa. 39 E te fai taulaga i le mamoe poʻa e tasi i le taeao, ae e te fai taulaga i le isi mamoe poʻa i le afiafipō. 40 E tasi vaesefulu o le efa o le falaoamata lelei ua liligi i ai le tasi vaefā o le sinu o le uu olive ua tuʻia, e tasi vaefā o le sinu o le uaina mo le taulaga o meainu, e faia faatasi ma le uluaʻi mamoe poʻa. 41 E te faia le taulaga i le mamoe poʻa lona lua i le afiafipō. E te faia e tusa ma le taulaga i meaʻai i le taeao, ma e tusa foʻi ma le taulaga o meainu, e te faia e fai ma mea manogi e faamalieina ai, o le taulaga iā Ieova ua faia i le afi. 42 O se taulaga mū faifai pea i o outou tupulaga o loo mulimuli mai, i le faitotoʻa o le faleʻie o le feiloaʻiga i luma o Ieova, ou te feiloaʻi ai ma outou ma tautala atu ai iā te oe i inā. 43 “Ou te faafeiloaʻi atu i atalii o Isaraelu i inā, ma e faapaiaina lea mea i loʻu mamalu. 44 Ou te faapaiaina le faleʻie o le feiloaʻiga ma le fata faitaulaga; ou te faapaiaina foʻi Arona ma ona atalii e avea ma ositaulaga iā te aʻu. 45 Ou te nofo faatasi ma tagata Isaraelu, e fai aʻu ma o latou Atua. 46 E latou te iloa ai o aʻu o Ieova lo latou Atua, o lē na aumaia i latou mai i le atunuu o Aikupito, ina ia ou nofo faatasi ai ma i latou. O aʻu o Ieova o lo latou Atua.