LE AUALA E TAOFIA AI LE FEITAGAʻI

2 | Aua le Tauimasui

Aʻoaʻoga a le Tusi Paia:

“Aua le taui atu le leaga i le leaga i se tasi. . . . Aua tou te tauimasui, . . . auā ua tusia: ʻ“O aʻu e faia le tauimasui; ou te taui atu lava,” ua fetalai mai ai Ieova.’”—ROMA 12:17-19.

Le Uiga:

E ui e tatou te lagona le ita pe a fai mai e se tasi se mea leaga iā i tatou, ae e lē finagalo le Atua e tatou te toe taui atu le leaga i lenā tagata. Nai lo o lea, e finagalo o ia e tatou te faatalitali iā te ia, auā ua toeitiiti ona ia faasaʻoina lea o faiga lē tonu uma.—Salamo 37:7, 10.

Mea e Mafai Ona E Faia:

Pe a tauimasui atu se tasi, o le a faaauau ai pea ona tupu le feitagaʻi. O lea, pe a faia e se tasi se mea leaga iā te oe, aua le tauimasui. Ia taumafai e pulea ou faalogona ma tali atu i se auala filemu. I nisi tulaga, atonu e lelei ona faagalo le mea na tupu. (Faataoto 19:11) Peitaʻi, e te ono filifili e lipoti le mataupu pe afai e te iloa e iai se iʻuga lelei. Mo se faataʻitaʻiga, pe afai ua e aafia i se solitulafono e faia e se tasi, e te ono filifili la e lipoti le mataupu i leoleo.

O le tauimasui e te toe afāina ai

E faapefea pe a foliga mai e leai se auala filemu e foʻia ai le faafitauli? Po ua uma foʻi au taumafaiga e foʻia le faafitauli i se auala filemu? Aua le tauimasui, auā e faateteleina ai le faafitauli. Nai lo o lea, ia fesoasoani e taofia le feitagaʻi. E mafai ona e maufaatuatuaina le auala a le Atua e foʻia ai le faafitauli. “Ia faalagolago atu iā te ia ona gaoioi lea o ia.”—Salamo 37:3-5.

Se Mea Moni na Tupu—ADRIÁN

Na Manumalo Mai i Faalogona o le Tauimasui

A o talavou Adrián, na avea o ia ma sē e faamisa i nofoaga faitele, ma manaʻo e taui atu i so o se tasi e faia se mea leaga iā te ia. Na ia faapea mai: “Na ou aafia foʻi i taugāfana, ma e tele taimi na lavatoto ai loʻu tino ma tuua ai aʻu i le auala faapea ua ou oti.”

Na amata ona suʻesuʻeina e Adrián le Tusi Paia ina ua 16 ona tausaga. Na ia faapea atili mai: “A o agaʻigaʻi i luma laʻu suʻesuʻega faale-Tusi Paia, na ou iloa ai e manaʻomia ona suia oʻu uiga.” Na tatau ona ia aveesea faalogona ita ma taofia faiga sauā. Na matuā aogā iā te ia le mea na ia aʻoaʻoina mai i le Roma 12:17-19 e faatatau i le aua le tauimasui. Na ia fai mai: “Na ou talitonu ai o le a taulima e Ieova le lē faamasinotonu i lana auala i lana taimi talafeagai. Na faasolosolo mālie ona suia loʻu olaga sauā.”

I se tasi afiafi, na osofaʻia ai Adrián e se kegi na masani ona latou vevesi. Na eʻē mai le taʻitaʻi, “Se fusu!” Na taʻutino mai Adrián: “Na ou lagona le fia tauimasui atu.” Nai lo lea, na ia faia se tatalo puupuu iā Ieova ma alu ese loa.

Na ia toe fai mai: “I le aso na sosoo ai, na ma fetaui ai ma le taʻitaʻi o le kegi. Na amata ona oso aʻe loʻu ita ma manaʻo e tauimasui atu, ae na ou talosaga lē leoa iā Ieova e fesoasoani mai e pulea loʻu ita. Na faateʻia aʻu ina ua faalatalata mai le talavou ma faapea mai: ʻFaamagalo mai aʻu i le mea na tupu anapō, o le mea moni ua ou fia pei lava o oe, ua ou manaʻo e suʻesuʻe le Tusi Paia.’ Na ou matuā fiafia ona na mafai ona ou pulea loʻu ita. Ou te faafetai ona o le mea na tupu, na amata ai loa ona ia suʻesuʻeina le Tusi Paia.”