Uso ma Tuafāfine Matutua—E Tautele Outou i le Faapotopotoga

Atonu ua lē mafai ona e faia le tele o mea sa masani ona e faia a o e talavou. E ui lava ua tele tausaga o e auauna ma le faamaoni iā Ieova, ae atonu e te lagona le lotovaivai pe a faatusatusa mea sa mafai ona e faia i le taimi ua teʻa ma le taimi lenei. Afai o ou faalogona na, o le ā e fesoasoani iā te oe ina ia faatumauina pea lou olioli?

O LE Ā E FAATALITALIA E IEOVA MAI IĀ TE OE?

Ia fesili ifo: ʻO le ā o loo faatalitalia e Ieova mai iā te aʻu?’ Ia mātau le faalaeiauga o loo i le Teuteronome 6:5: “Ia e alofa atu iā Ieova lou Atua ma lou lotoatoa, ma lou ola atoa, ma lou malosi atoa.”

Pe a fua i lenei fuaiupu, e faatalitalia e Ieova oe e faia le mea sili e mafai ona e faia e tusa ai ma lou tulaga. O le a fesoasoani lenā iā te oe e ʻalofia ai le faatusatusa o oe i isi, po o le faatusatusa o mea sa mafai ona e faia i le taimi ua teʻa ma le taimi lenei.

Ia mātau le manatu lenei: A o e talavou, sa e faia le mea sili mo Ieova e tusa ai ma lou malosi i lenā taimi. O loo e faia foʻi le mea sili e te mafaia e tusa ai ma lou tulaga i le taimi lenei, e ui lava ua lē o toe tutusa lou malosi. O le manatuaina o lenā mea, e fesoasoani e te iloa ai e leai lava se eseesega o le taimi a o e talavou ma le taimi lenei, auā o loo faaauau ona e avatu iā Ieova le mea sili e te mafaia, e tusa ai ma lou tulaga.

E MAFAI ONA E FAAFOUINA ISI

O se isi vala e ao ona manatua, nai lo o le manatu ua faatapulaa mea e mafai ona e faia ona o lou tulaga matua, ia vaai i ai o se avanoa e fesoasoani ai i isi. I le avea o oe o se Kerisiano ua loa le soifua, e iai mea ua mafai ona e faia i le taimi lenei, ae e leʻi mafai ona e faia a o e talavou. O se faaaʻoaʻoga, e mafai ona e faia le mea lenei:

Faasoa atu i isi mea na tutupu i lou olaga. Ia manatunatu i mau o loo mulimuli mai:

Tupu o Tavita: “Sa ou talavou a o lenei ua ou toeaina, ae ou te leʻi iloa lava se tagata amiotonu ua tuulafoaʻiina, po o ana fanau o ʻaisi mo ni meaʻai.”—Sala. 37:25.

Iosua: “Faauta! O le a ou oti, ae ua outou iloa lelei ma o outou lotoatoa, ma o outou ola atoa, e leʻi iʻuvale se upu e tasi o folafolaga lelei uma na fetalai mai ai Ieova lo outou Atua iā te outou. Ua faataunuuina uma iā te outou. E leʻi iʻuvale se tasi o na upu.”—Iosua 23:14.

Atonu sa e fai atu i nisi ni faamatalaga faalaeiau faapena i le taimi a o e talavou. Peitaʻi, e leʻi tau ina faia e Tavita ma Iosua na faaupuga. Na la talitonu atoatoa i le moni o na manatu, ona sa la tofo i le fesoasoani ma le tausiga a Ieova mo le tele o tausaga.

Pe afai ua loa tausaga o e auauna iā Ieova, e mafai foʻi ona e faasoa atu i isi mea na tutupu na e tofo ai i le fesoasoani a Ieova iā te oe faapea ma isi. Pe na iai se taimi patino na e vaaia ai le faamanuia a Ieova i ona tagata i se auala faapitoa? O se mea lelei le faasoa atu i isi o na mea na tutupu, auā e mautinoa o le a faafouina ai i latou. O le mea moni, o le a mafai ona avea oe ma puna o faalaeiauga i isi, pe afai e te faasoa atu mea na e tofo ai i lau auaunaga iā Ieova.—Roma 1:​11, 12.

O se isi auala e mafai ona e faalaeiau ai i isi, o le auai lea i sauniga i le Maota mo Sauniga i le tele e mafai ai. O le faia faapea, e lē gata o le a e maua ai aogā ae faapena foʻi uso ma tuafāfine. Ua faapea mai Connie lea na taʻua muamua: “O le auai i sauniga, e fesoasoani iā te aʻu e ʻalofia ai le lotovaivai. O le mea moni, ou te lagona le alofa o uso ma tuafāfine i taimi uma lava ou te iai i le Maota mo Sauniga. Ou te saunia ni tamaʻi meaalofa mo isi, e faaalia ai loʻu lotofaafetai mo i latou, ma ou te taumafai foʻi e faifaimea faatasi ma uso ma tuafāfine i galuega faaleagaga.”

E TAUTELE IĀ IEOVA LAU AUAUNAGA FAAMAONI

E tele faaaʻoaʻoga i le Tusi Paia o i latou na alofagia e Ieova, e ui lava ua latou lē toe gafatia mea sa masani ona latou faia i le taimi na talavou ai. O se faaaʻoaʻoga, o le toeaina matua o Simeona, o se tagata Isaraelu na soifua i le taimi na fanau ai Iesu. O taimi uma lava e asiasi ai Simeona i le malumalu, atonu na ia vaaia ai tane talavou o loo faatinoina le tele o galuega tāua. Sa ono manatu Simeona ua itiiti lona tāua i le silafaga a Ieova. Peitaʻi, e lē o le auala lenā na silasila ai Ieova iā te ia. Nai lo o lea, na silasila Ieova iā Simeona o se “tagata amiotonu ma mataʻu” iā te ia. Na ia avatu iā Simeona le faaeaga e vaai ai i le pepe o Iesu, ma faaaogā o ia e faia se valoaga e faatatau i le avea o Iesu ma Mesia. (Luka 2:​25-35) Ioe, e leʻi taulaʻi Ieova i le tulaga matua o Simeona, ae na ia taulaʻi i le malosi o lona faatuatua ma o sē ua i ona “luga le agaga paia.”

Ia e mautinoa, e tautele iā Ieova lau auaunaga faamaoni, e ui lava ua faatapulaa mea e mafai ona e faia. E talileleia e Ieova au taumafaiga e “tusa ma mea ua iā te [oe], ae e lē tusa ma mea e lē o iā te [oe].”—2 Kori. 8:12.

O lea la, ia taulaʻi atu i mea e mafai ona e faia. O se faataʻitaʻiga, o ā ni vala o le faiva e mafai ona e auai ai, e tusa lava pe mo na o sina taimi puupuu? Atonu e mafai ona e faalaeiauina ou uso ma tuafāfine e ala i le vili atu pe lafo i ai se card. E mautinoa e matuā talisapaia e uso ma tuafāfine au gaoioiga lāiti e faaalia ai lou alofa, aemaise pe afai e latou te iloa o oe o se tasi ua loa tausaga o auauna iā Ieova.

E ui lava ua faatapulaa mea e mafai ona faia e uso ma tuafāfine matutua, ae o loo tele pea mea e mafai ona latou faia i le auaunaga. Ia mātau se mea na tupu i Aferika i Sasaʻe, o loo taʻua i le pusa “Na Faasaoina Lona Ola.”

Ia manatua, e mafai ona faalaeiauina isi i lau auaunaga faamaoni mo le tele o tausaga. Ua avea oe ma faaaʻoaʻoga lelei o le faatuatua ma le tumau, ma ʻe amiotonu le Atua e na te lē faagalogalo ai au galuega, ma le alofa ua e faaali mai i lona suafa, auā ua e auauna i le ʻaupaia, ma o loo e auauna pea i ai.’—Epe. 6:10.

IA FAAAUAU PEA ONA FESOASOANI I ISI

Ua faamaonia mai i suʻesuʻega, o le toʻatele o tagata matutua o ē e fesoasoani i isi, e lelei o latou soifua mālōlōina ma mafaufau, ma e umi foʻi o latou soifua.

O le mea mautinoa, o le faia o mea lelei mo isi e lē taofia ai āuga o le soifua matua. E na o le Malo o le Atua e mafai ona aveesea le tino agasala, lea e māfua ai le soifua matua ma le oti.—Roma 5:12.

Peitaʻi, o le a faamalosia lo outou faamoemoe ma maua pea le soifua mālōlōina lelei, pe afai e faaauau ona outou auauna ma le faamaoni iā Ieova, lea e aofia ai le fesoasoani i isi ina ia iloa o ia. Uso ma tuafāfine matutua, e mautinoa e matuā tautele iā Ieova la outou auaunaga, ma e talisapaia e le faapotopotoga a outou faaaʻoaʻoga o le faatuatua.