Se Tusi Mai i le Vaega Pule

A o tatou ola ai i tausaga amata o lona 21 o senituri, ua fiafia ai e tusi atu iā te outou “le au uso” i le lalolagi aoao, ma e avatu ai le faamālō ona o la outou galuega mamafa. (1 Pete. 2:17) I le toeitiiti lava 2,000 tausaga ua mavae, na fesili ai Iesu: “A sau le Atalii o le tagata, pe maua ea e ia le faatuatua i le lalolagi?” (Luka 18:8, LF) O la outou galuega maelega i le tausaga faaleauaunaga ua mavae, ua taliina ai le fesili a Iesu i se ioe leo tele! Sa tauemua ma amusia nisi o outou ona o lo outou faatuatua. I le tele o nofoaga, na outou tutumau i le feagai ai ma taua, o mala, faamaʻi, po o le matelāina. (Luka 21:10, 11) Ona o lo outou maelega mo galuega amiotonu, ua mafai ai pea e Iesu ona “maua le faatuatua i le lalolagi.” E mautinoa lava le olioli o le lagi ona o lenā mea!

Ua tatou iloa e lē o se mea faigofie ona tumau. Manatu i tofotofoga o o tatou uso i se tasi o atunuu o Asia i sisifo. E toetoe lava o aso uma, ua avea o se mea e masani ai le faia o sauāga i Molimau a Ieova i na atunuu. Talu ai nei, na faataape ai e leoleo se fonotaga toʻafilemu e tusa ma le 700 tagata. O le polokaina o auala na taofia ai le isi toʻa 1,300 mai le auai. Na osofaʻi malosi atu i le nofoaga na fai ai le fonotaga se ʻaufaatupu vevesi e fai a latou mata pulepule, o nisi o i latou o leoleo, ma fasileagaina le toʻatele o sui usufono, ma susunu le fale lea na fausia e faia ai le fonotaga. I nisi taimi, na fasi faamoʻamoʻa ai e tagata mapolotu valea ia uso i pouvai na tuʻituʻi i ai fao.

O na faiga sauā o se mea faamanititino, ae e lē faateʻia ai. Na faagaeeina le aposetolo o Paulo e tusia e faapea: “O i latou uma foi o e loto ina nonofo ma le amio Atua ia Keriso Iesu, e sauaina i latou.” (2 Timo. 3:12) I le uluaʻi senituri, na onosaia ai e Kerisiano ia upu faifai ma sauāga i le tino, ma na oo lava ina fasiotia ai nisi. (Galu. 5:40; 12:2; 16:22-24; 19:9) E faapena foʻi i lona 20 o senituri, ma e mautinoa lava o le a faapena foʻi ona faaauau i lenei senituri lona 21. Ae e ui i lea, ua taʻu mai pea e Ieova iā i tatou e faapea: “O auupega uma e faia e tau ma oe e le manuia ia.” (Isa. 54:17) Maʻeu sea faamautinoaga ofoofogia! Ioe, e matuā pele i tatou iā Ieova, o lea e ala i lana perofeta o Sakaria na ia fetalai ai e faapea: “O lē pai atu ia te outou, ua pāia e ia le tamatamai mata o [loʻu mata].” (Saka. 2:8.) E leai se avanoa e manumalo aʻiaʻi ai i se taimi mulimuli ia fili o tagata tapuaʻi o Ieova. O le a tupu manumalo le tapuaʻiga mamā!

Mo se faaaʻoaʻoga, i le atunuu na taʻua i le amataga, ua iai i Molimau a Ieova ni tumutumuga fou se lua i le aofaʻiga o le ʻautalaʻi i le tausaga faaleauaunaga e 2001. Ioe, o loo finafinau pea o tatou uso i inā e ui i tulaga faigatā, e pei lava ona latou faia i so o se nofoaga. I le tausaga faaleauaunaga ua mavae i le lalolagi aoao, e 5,066 na papatisoina i vaiaso taʻitasi e faailogaina ai lo latou tuuina atu iā Ieova. O lea, ua maumauaʻi ai i latou nei o ē fou faatasi ma i tatou uma ina ia ‘tumau ma le mautinoa atoatoa i le finagalo uma o le Atua.’—Kolo. 4:12.

Manatu foʻi i mea na tutupu talu ai nei i Eleni. E ui i teteega malolosi mo le tele o tausaga mai i le Lotu Orthodox i Eleni, ae ua faailoa mai nei e le malo ia Molimau a Ieova e avea o se “lotu aloaʻia.” Ua faapea atili mai le faamaumauga tusitusia na tuuina mai ai lenei faailoaga, o le fale Peteli i Eleni ua avea nei o “se nofoaga paia ma ua faapaiaina, ua tuuina atu mo le tapuaʻiga i le Atua.” E matou te fiafia foʻi e faailoa atu e faapea, i le tausaga faaleauaunaga ua mavae, na faailoa mai ai e faamasinoga ni faaiʻuga lelei faafaamasinoga e aloaʻia ai la tatou tapuaʻiga i Iapani, Iunaite Setete, Siamani, Bulgaria, Kanata, Romania ma Rusia. Maʻeu lo tatou faafetai iā Ieova ona o le faaavanoaina pea o le faitotoʻa mo galuega i na atunuu!

A o tatou iloiloina le auala ua lagolagoina ai e Ieova ona tagata i nei aso e gata ai, ua tatou iloa ai o ia o se Uō aupito sili ona lelei ua mafai ona tatou maua. E tatou te matuā fiafia i la tatou faiā ma ia, i lo tatou iloa e alofa o ia iā i tatou, na te aʻoaʻo, ma faasaʻo i tatou. Ioe, o le a faaauau pea ona tatou fesagaʻi ma tofotofoga o lo tatou faatuatua. Ae o le faatuatua lē maluelue iā Ieova o le a mafai ai ona tatou faaauau pea. Na tusia e Iakopo e faapea: “Oʻu uso e, ia outou manatu, o le mea e fiafia tele ai pe a maua outou i tofotofoga eseese; ina ua outou iloa o le tofotofoina o lo outou faatuatua e tupu ai le onosai.” (Iako. 1:2, 3) E lē gata i lea, o lo tatou tumau e faaalia ai lo tatou alofa mo Ieova, ma e tatou te maua ai le olioli tele i lenei mea! Uso pele e, ia outou mautinoa o le a fesoasoani Ieova iā i tatou taʻitoʻatasi. Afai e tatou te tumau faamaoni, e aunoa la ma se faalētonu, o le a ia fesoasoani iā i tatou e ulu atu i le lalolagi fou. E finagalo o ia ina ia tatou taulau manuia.

O lea, matou te faalaeiauina ai outou uso ma tuafāfine, talavou ma e matutua, ina ia tatou manatua pea faamanuiaga ofoofogia o loo iai i le lumanaʻi. Tau ina ia pei o tatou uiga o le aposetolo o Paulo, o lē na tusi mai e faapea: “Auā o loʻu manatu e le tatau ona faatusaina le tiga i nei ona po ma le manuia atali e faaalia mai ia te i tatou.” (Roma 8:18) Ia faalagolago atu iā Ieova pe a fesagaʻi ma so o se mafatiaga. Ia tumau, ma ia aua le faavaivai. O le a lē taitai, lē taitai lava ona e faanoanoa ona o lea mea. Ua faamautinoaina i tatou e le Afioga a le Atua e faapea: “O le ua amiotonu e ola ia i lona faatuatua.”—Sapa. 2:4.

O o outou uso,

Vaega Pule o Molimau a Ieova