O Se Tusi Mai le Vaega Pule

Mo Uso ma Tuafāfine Pele:

Maʻeu se fiafiaga o le tusi atu iā te outou! Matou te faamālō atu mo lo outou alofa ma le faataulagaina o le tagata lava ia o loo faaauau pea ona outou faaalia. O le a outou tagaʻi i itulau o lenei Yearbook i le tele o mea lelei na faataunuuina a o faagasolo le tausaga faaleauaunaga ua faatoʻa mavae atu. Ua lipotia mai foʻi lo tatou faaaluina o le sili atu i le piliona itula i le galuega talaʻi ma le aʻoaʻo atu, ua faamalosiauina ai tagata ina ia tosina vavalalata atu iā Ieova. Pe e lē o se faaeaga ea le avea ma ni ē e faigaluega faatasi ma lo tatou Atua faamamaluina ma le Tamā faalelagi?—1 Kori. 3:9.

A o tatou tepa taulaʻi atu i le galuega o i luma, matou te mautinoa o le a outou faaauau ona faataʻitaʻi i le maʻelegā ma le faatuatua o auauna a le Atua, e pei ona faamatalaina i le Tusi Paia. Mo se faaaʻoaʻoga, na matuā naunau le aposetolo o Paulo ina ia faia le mea sili na te mafaia e faaauilumaina ai le feʻau o le Malo. Ma le mautinoa, i le tausaga mulimuli a o iai o ia i Efeso na ia tusia ai lana uluaʻi tusi i le faapotopotoga Kerisiano i Korinito. I le fesootaʻi atu i ana fuafuaga ua fia faatinoina sa ia tusi atu ai e faapea: “Ae ou te nofo pea i Efeso seʻia oo i le Penetekoso. Auā ua faaavanoa mo aʻu le faitotoʻa lautele ma le matuā aogā, e toʻatele foʻi o ē faatuʻiese.”—1 Kori. 16:8, 9.

Sa fuafua Paulo e malaga i Maketonia ma Korinito. Peitaʻi, na manatu o ia o le avanoa lelei lenei e faia ai ni galuega aogā e ala i lona nofo ai pea mo sina taimi i Efeso. Sa fetuutuunaʻi Paulo; na ia iloaina o se tulaga talafeagai lea e faaaogā e faaauilumaina ai le feʻau o le Malo i le oganuu tonu o loo iai, ma o lea sa ia toe faia ai loa se fesuiaʻiga i lana faasologa. Ua faaavanoa mo ia se faitotoʻa lautele e faia ai ni gaoioiga, ma o lea e leʻi faatalatū ai Paulo e faaaogā lenā avanoa.

O le faia faapea, e manaʻomia ai ni galuega se tele—o le talaʻia lea o le tala lelei faatasi ma le ati aʻe o le faapotopotoga i Efeso. Mo toeaina i le faapotopotoga i lenā aai, na faapea mulimuli ane Paulo: “Ma loʻu leʻi natia se mea aogā, ina neʻi lē faailoa atu ma aʻoaʻo atu iā te outou i luma o le nuu, atoa foʻi ma lea fale ma lea fale. Ua ou molitino iā Iutaia atoa ma Eleni le salamō i le Atua, ma le faatuatua i lo tatou Alii o Iesu Keriso.”—Galu. 20:20, 21.

I se tulaga tutusa, o le toʻatele o outou uso ma tuafāfine pele ua faaaogāina avanoa ua outou maua. I le tausaga faaleauaunaga ua mavae, i sona fua faatatau, e toʻa 798,938 na faia ni faatulagaga ina ia mafai ai ona auai i nisi vala o le auaunaga faapaeonia. O nisi o outou ua malaga atu i nofoaga mamao ina ia auauna ai o ni misionare. Ua outou faasalalauina ai ma le maʻelegā le tala lelei ma faatutūina aʻe ni faapotopotoga. O nisi o outou ua aʻoaʻoina se isi gagana ina ia mafai ai ona fesoasoani iā i latou e malaga mai isi atunuu e ese le gagana e tautatala ai o loo nonofo latalata i o outou vaipanoa. Ae o loo iai pea isi ua toe faatulaga o latou tulaga ina ia galulue i oganuu e leʻi tofia i ai nisi po o le auauna i oganuu o loo tele ai le manaʻoga. O nisi ua latou iloa o loo telē se avanoa ua tatalaina mo i latou i aʻoga, galuega, po o isi tulaga lea e mafai ona avatu ai se molimau uigā, e pei o le talanoa atu i le telefoni. O faamatalaga e uiga i mea e tutupu i o tatou uso i le lalolagi ua faamaonia ai faapea, o tagata o le Atua, o ē laiti ma ē matutua, o loo naunau e saʻili avanoa e faaoo atu ai le poto o le upu moni i tagata i so o se nofoaga.

Ia mautinoa, o loo silasila ma talisapaia loloto e Ieova a outou taumafaiga. Ua faapea mai le Tusi Paia: “Auā e lē amiolētonu le Atua, na te lē faagalogaloina la outou galuega ma le alofa ua outou faaali mai ai i lona suafa.” (Epe. 6:10) Ia faaauau ona mataala mo avanoa uma e mafai ona e faaauilumaina ai le tapuaʻiga mamā. O nisi o outou atonu e mafai ona faateleina la outou faiva. E mafai e i tatou uma ona tauivi ina ia matuā uigā la tatou faiva.

E lē mafai ona faataunuuina la tatou galuega talaʻi e aunoa ma ni teteega. Ia manatua, ina ua uma ona tautala Paulo e uiga i le faitotoʻa lautele o gaoioiga ua faaavanoaina mo ia, sa ia tusi atu loa e faapea: “E toʻatele foʻi o ē faatuʻiese.” Iā Paulo, o i latou na e aofia ai tagata Siū ma tagata o Nuu Ese, o nisi sa latou osofaʻia tuusaʻo o ia, a o isi na latou faia ni taupulepulega faalilolilo faasaga iā te ia.—Galu. 19:24-28; 20:18, 19.

O loo tatou fesagaʻi ma tulaga faapena i aso nei. A o tatou latalata atu i le faaumatiaga o lenei faiga amio leaga o mea, e tatou te faatalitalia le faatuputupulaʻia o teteega. Ua matuā “lotoa tele” Satani ma o loo ia taulaʻi faapitoa atu lava i auauna a le Atua. (Faaa. 12:12) Aua lava neʻi galo o Satani o le “alii o lenei lalolagi.” Na taʻu atu e Iesu i ona soo: “Afai a ni tagata o le lalolagi outou, po ua alofa mai le lalolagi i ona tagata; a e lē ni o le lalolagi outou, a ua ou filifilia outou nai le lalolagi, o le mea lea e ʻinoʻino ai le lalolagi iā te outou.”—Ioa. 14:30; 15:19.

E tatou te maumauaʻi ina ia aua lava neʻi o tatou faatagaina so o se tasi e faavaivaia lo tatou faatuatua i le Atua po o le faifailemū i la tatou galuega talaʻi. Ua tatou iloa o le a iai pea lava i latou o le a faaauau ona osofaʻia i tatou ma faufau leaga faasaga iā i tatou. Ae peitaʻi tatou te agaʻi pea i luma i le talaʻia o le tala lelei o le Malo, ma le mautinoa o le a nutipalaina e Iesu Satani ma ana ʻau i le taimi atofaina a Ieova. E leʻi mafai e i latou na tetee ona taofia le aposetolo o Paulo; ma e lē mafai foʻi ona latou taofia auauna a Ieova i aso nei. E tusa lava po o le a le lotoa o Satani ma le ʻinoʻino mai o le lalolagi, ae o loo galue pea ma le malosi le agaga o Ieova i ona tagata. Maʻeu se olioli i le iloaina ua oo atu nei le aofaʻi o i latou o loo faalauiloa le tala lelei i se tumutumuga fou e 6,304,645!

O la matou tatalo ia outou faaauau pea ona faaaogā avanoa uma ina ia faaauilumaina atili ai pea le feʻau o le Malo matagofie o Ieova. Ia mautinoa lo matou manatu mamafa iā te outou uma taʻitoʻatasi a o tatou “auauna ma le loto gatasi” i le auaunaga a le Atua Silisili Ese, o Ieova.—Sefa. 3:9.

O o outou uso,

Vaega Pule o Molimau a Ieova