Ia Talaʻi le Tala Lelei ma le Naunautai
1 “Ou te naunau tele i le fia feiloai ma outou . . . Ou te naunau ai, ia ou folafola le tala lelei ia te outou foi.” O le faamatalaga lea a le aposetolo o Paulo i le amataga o lana tusi i uso i Roma. Aisea na naunau ai Paulo e asiasi atu ia i latou? Na ia faapea mai: “Ina ia ou maua sina fua ia te outou . . . Auā ou te le mā i le tala lelei ia Keriso; auā o le mana lava lea o le Atua e ola ai.”—Roma 1:11-16.
2 Na faaatagia mai e Paulo lenei lava naunautaiga i lana talanoa atu i toeaiina o Efeso. Na ia faamanatu atu ia i latou: ‘Talu le aso na ou faatoa sau ai i Asia . . . , na ou lei taofia . . . loʻu aʻoaʻo atu ia te outou i luma o le nuu, atoa foi ma lea fale ma lea fale, ua ou molitino ia Iutaia atoa ma Eleni.’ (Galu. 20:18-21) I ana oganuu tofia uma lava, sa faanaunau ai Paulo e faasalalau atu i ai le tala lelei o le faaolataga ma maua mai ai ni fua o le Malo. Maeu se agaga sili ona lelei e faataʻitaʻi i ai!
3 E tatou te ono fesiligia i tatou lava: ‘Po o oʻu faaalia ea lena naunautaiga lava e tasi i le faalauiloaina atu o le tala lelei i loʻu vaipanoa? Na i lo le vaai i le galuega talaʻi ua na o se tiutefai, po o oʻu naunau ea e tufa atu le tala lelei i le toatele o tagata e mafai ai? Po ua ou iloiloina ea faatasi ma le tatalo oʻu tulaga totino? Po ua ou sailiilia ea tulaga o loo mafai ona fai ai le talaʻiga i la matou oganuu, e pei o le talaʻi mai lea fale i lea fale, i luga o alatetele, i itumalo o pisinisi, e ala i le telefoni, ma le molimau atu lē fuafuaina?’
4 Fai ma le Naunautai se Sao ia Aperila: O le masina o Aperila o se taimi lelei e faamalosia atili ai lo tatou sao totino i le galuega talaʻi. O le faaitiitia o itula manaomia e ao ona mafai ai e nisi tagata ona paeonia lagolago ai. Atonu o le a faataga oe e ou tulaga ia auauna o se paeonia lagolago ia Aperila ma Me. Pe atonu foi o le a mafai ona avea ai oe o se paeonia sauatoa, pe a fua atu i le fetuunaiga ua iai o itula manaomia. Afai o oe o se tagata talaʻi o le faapotopotoga, pe mafai ona e faaalu nisi taimi e sili atu na i lo le mea e masani ai i le auaunaga i lea masina ma le masina e sosoo ai, i le avatua o le lagolagosua ia i latou e mafai ona paeonia? O le a fai lea ma mea e faafiafiaina ai le finagalo o Ieova!
5 E tatau i tagata talaʻi o le Malo i le pei o Paulo, ona faaauau i le faaalia o se naunautaiga e ala i le aapa atu i isi faaeaga i le galuega talaʻi. O le faia o mea uma tatou te mafaia i le faiva o le a aumaia ai ia i tatou le olioli moni. Sa ia Paulo lea olioli i lana auaunaga paia. E lelei ona tatou faataʻitaʻi atu i lana faaaoaoga pito sili ona lelei.—Roma 11:13; 1 Kori. 4:16.