“O Soligatulafono ma le Manaʻo Tele i Tupe na oo ai iā te Aʻu le Tele o Tigā”

OLAGA SA IAI

Na ou ola aʻe i se aiga matitiva i Tiranë, le laumua o Alapania. O loʻu tamā o se tagata faamaoni, na galue mamafa mo le tausiaina o i matou. Ae na foliga mai e lē lava tupe e tausia ai i matou. A o oʻu laʻitiiti, na ou iloa le leaga o le ola aʻe i se olaga mativa, o le tele lava o taimi e leai ni oʻu seevae ma e lē lava a matou meaʻai.

Na amata ona ou gaoi, a o oʻu laʻitiiti lava. Na ou manatu o le auala lea e fesoasoani ai i le tausiaina o le matou aiga, ae na iʻu ina maua aʻu e leoleo. I le 1988 ina ua 14 oʻu tausaga, na ave ai aʻu e loʻu tamā i se aʻoga e aʻoaʻo ai tomai eseese mo tamaiti solitulafono. E lua tausaga na ou iai i ina, ma ou aʻoaʻoina ai le uelo. Ina ua ou tuua le aʻoga, na ou manaʻo ia ola i se olaga faamaoni, peitaʻi e leʻi maua saʻu galuega. E toʻatele tagata na leai ni galuega i Alapania ona o faafitauli i faiga faapolotiki. Na ou lagona le lotovaivai, ma amata ai ona ou toe faifaimea faatasi ma aʻu uō, ma iʻu ai ina matou toe gāoi. Na iʻu ina puʻea i matou e leoleo ma faasala ai mo le tolu tausaga i le falepuipui.

Na faaauau pea ona ou faia soligatulafono, ina ua tatala aʻu mai i le falepuipui. Na paʻū maulalo le tamaoaiga i Alapania, ma na matuā vevesi ai le atunuu atoa. I na taimi faigatā, na ou maua le tele o tupe i faiga faasolitulafono. Ina ua puʻea isi aʻu uō gāoi e toʻalua, na ou sola ese mai le atunuu ina ia ʻalofia ai le faafalepuipuiina mo se taimi umi. O le taimi lenā, na ou faaipoipo ai iā Julinda, ma maua ai le ma tama tama.

Na matou malaga atu i Egelani. Na ou manaʻo e amata se olaga fou ma laʻu avā ma le ma tama, ae na faigatā ona suia aʻu masaniga tuai. E leʻi umi ae ou toe auai foʻi i soligatulafono. I lenā taimi na ou faatauina atu ai fualaau faasāina, ma na tele aʻu tupe na maua mai ai.

O ā faalogona o Julinda i loʻu faatauina atu o fualaau faasāina? Na faapea mai Julinda: “Na ou moomoo ina ia ou saʻoloto mai i le mativa, a o oʻu ola aʻe i Alapania. Na ou lotomalie e faia so o se mea ina ia maua ai se olaga e sili ona lelei. Na ou manatu o le tele o tupe e faaleleia ai o matou olaga. O lea na ou matuā lagolagoina ai pepelo, gaoi, ma le faatauina e Artan o fualaau faasāina ina ia maua ai tupe.”

I le 2002 na suia o matou olaga ina ua faafuaseʻi ona lē toe maua ni a matou tupe lea na matou manatu e maua ai le taulau manuia i le olaga. Na puʻea aʻu e leoleo a o ou aveina ni fualaau faasāina se tele ma na toe faafalepuipuiina ai foʻi aʻu.

SUIA E LE TUSI PAIA LOʻU OLAGA

Na amata ona iai se aafiaga o le Tusi Paia i loʻu olaga ae ou te leʻi iloaina. Na feiloaʻi Julinda i ni Molimau a Ieova i le amataga o le 2000, ma amata ai ona ia suʻesuʻeina le Tusi Paia. Ou te leʻi fiafia e talanoa e faatatau i le Tusi Paia ona e lē maua ai soʻu fiafia. Ae na matuā fiafia Julinda i le Tusi Paia. Na ia faapea mai: “Ou te sau mai i se aiga lotu, ma ou te fiafia e talanoa e faatatau i le Tusi Paia. E masani ona ou fia iloa po o ā aʻoaʻoga a le Tusi Paia, ma na matuā ou fiafia e suʻesuʻe le Tusi Paia ma Molimau a Ieova. Na ou matuā ioe i le saʻo o le tele o aʻoaʻoga a le Tusi Paia. O mea na ou aʻoaʻoina na fesoasoani iā te aʻu e faia ai ni suiga i loʻu olaga. Peitaʻi, e itiiti pe e leʻi iai foʻi ni suiga o oʻu uiga e faatatau i tupe, seʻia oo ina puʻea Artan e leoleo. O i ina, na suia atoatoa ai oʻu manatu, ma na ou iloa ai le moni o le aʻoaʻoga a le Tusi Paia e faatatau i tupe. Na ma faia mea uma ina ia maua ai le tele o tupe, ae e ma te leʻi maua ai le fiafia. O lea, na ou malamalama ai e tatau ona ou mulimuli atoatoa i tapulaa a le Atua.”

I le 2004 na faasaʻoloto ai aʻu mai i le falepuipui, ma e leʻi umi ae ou taumafai loa e toe foʻi i le faatauina o fualaau faasāina. Peitaʻi, na suia manatu o Julinda, ma na ia fai mai se tala na faateʻia ai aʻu: “Ou te lē toe manaʻo i au tupe. Ae ou te manaʻo e ma te faatasi ma loʻu toʻalua ma le tamā o laʻu fanau.” Na matuā faateʻia aʻu, ae na saʻo o ia. E tele tausaga o oʻu tuua le matou aiga. Na ou mafaufau foʻi i le tele o tigā na ou tofo i ai, ona o le taumafai e maua tupe i se auala lē faamaoni. Na ou filifili ai loa e suia oʻu ala ma lē toe faifaimea faatasi ma aʻu uō.

O le auala sili na aafia ai loʻu olaga, ina ua matou auai faatasi ma laʻu avā ma le ma fanau tama e toʻalua i se sauniga a Molimau a Ieova. Na ou matuā maofa i le māfana ma le faaleuō o tagata na iai. O le iʻuga, na amata ai loa ona ou suʻesuʻeina le Tusi Paia.

Na ou aʻoaʻoina mai i le Tusi Paia “o le manaʻo tele i tupe o le pogai lea o mea leaga eseese uma, ma o le manaʻo tele i ai . . . ua tuia ai i latou e i latou lava i le tele o tigā.” (1 Timoteo 6:9, 10) Na ou iloa lelei le moni o lenā manatu. Na ou matuā salamō mai i aafiaga o le olaga na ou ola ai muamua, ma tigā na oo ai iā te aʻu ma loʻu aiga. (Kalatia 6:7) Na amata ona suia oʻu uiga ina ua ou aʻoaʻoina le alofa o Ieova ma lona Alo o Iesu Keriso iā i matou. Na ou manatu foʻi mo le lelei o isi nai lo o aʻu, e aofia ai le faateleina o le taimi mo loʻu aiga.

AOGĀ IĀ TE AʻU

Ua ou maua aogā i le mulimuli i le fautuaga a le Tusi Paia: “Ia aunoa o outou olaga ma le manaʻo tele i tupe, a ia outou lotomalilie i mea ua iai iā te outou.” (Eperu 13:5) Ua ou maua nei le filemu o le mafaufau ma se lotofuatiaifo mamā, ma ua ou maua ai le fiafia ou te leʻi tofo muamua ai. Ua faamalosia le ma faaipoipoga ma ua māfana le faiā a lo matou aiga.

Na ou manatu o le tele o tupe e maua ai le fiafia moni. O lea, ua ou iloa lelei le māfuaaga na oo ai le tele o tigā iā te aʻu ona o soligatulafono ma le manaʻo tele i tupe. E lē tele ni a matou tupe, ae ua ou iloa ua matou maua se mea e sili ona tāua i o matou olaga, o se faiā ma Ieova le Atua. O le tapuaʻi iā te ia o se aiga autasi, e maua ai le fiafia moni.