Po o se Agasala le Ulaula?

Tali a le Tusi Paia

E lē o taʻua i le Tusi Paia le ulaulaa po o isi auala e faaaogā ai le tapaa. Peitaʻi, o loo iai mataupu silisili e iloa ai, e lē fiafia le finagalo o le Atua i masaniga e lē mamā ma faaleagaina ai le soifua mālōlōina. O le māfuaaga lenā e vaai ai i le ulaula, o se agasala.

Faaaloalo i le ola. “O le Atua . . . ua ia foaʻi mai lava i tagata uma le ola, ma le mānava.” (Galuega 17:24, 25) Talu ai o le ola o se meaalofa mai i le Atua, e lē tatau la ona tatou faia so o se mea e ono faamutaina ai le ola, e pei o le ulaula. O le ulaula, o se tasi lea o māfuaaga autū o le maliliu o tagata i le lalolagi, e ui na mafai ona ʻalofia.
Alofa i tuaoi. “Ia e alofa atu i lou tuaoi e pei o oe lava iā te oe.” (Mataio 22:39) O le ulaula a o iai faatasi ma isi, o se gaoioiga lē alofa. O i latou e faaauau ona mānavaina le asu o le tapaa, e telē foʻi le avanoa e aafia ai i faamaʻi ia e maua ai tagata ulaula.
E tatau ona paia. “Ia tuuina atu o outou tino o le taulaga ola, e paia, ma e mālie i le Atua.” (Roma 12:1) “Seʻi o tatou faamamā ai iā i tatou mai i mea uma e faaleagaina ai le tino ma le agaga, a ia faaatoatoaina le faapaiaina i le mataʻu i le Atua.” (2 Korinito 7:1) O le ulaula, e lē ōgatusa ma e feteenaʻi ma le uiga o le upu paia, o le mamā ma le lē ponā, auā o lea ua filifili ma le loto i ai le tagata ulaula, e na te tagofia vailaau ia e faaleagaina ai le tino.

Po o taʻua i le Tusi Paia se manatu e faatatau i le faaaogāina o le mariuana ma isi fualaau faasāina?

E lē o taʻua i le Tusi Paia le mariuana ma isi fualaau faasāina. Ae o loo iai mataupu silisili e iloa ai e lē tatau ona faaaogāina nei fualaau faasāina. O nisi nei o mataupu silisili e faaopoopo atu i mataupu silisili na taʻua muamua:

E tatau ona pulea le auala e tatou te mafaufau ai. “Ia e alofa atu iā Ieova lou Atua . . . ma lou mafaufau atoa.” (Mataio 22:37, 38) “Ia faaauau ona outou matuā mafaufau lelei.” (1 Peteru 1:13) O le tagata e na te faaaogāina fualaau faasāina, e lē mafai ona ia puleaina atoatoa lona mafaufau, ma e toʻatele ua pulea e na mea. E uaʻi atu o latou mafaufau i le saʻilia ma le faaaogāina o fualaau faasāina, nai lo o mea e atiaʻe ai.—Filipi 4:8.
Usiusitaʻi i tulafono a le atunuu. Ia “usiusitaʻi i malo ma pule.” (Tito 3:1) I le tele o atunuu, e faasāina ai i le tulafono le faaaogāina o nisi o fualaau faasāina. Pe a tatou mananaʻo la e faafiafia le Atua, e tatau ona tatou usiusitaʻi i faipule silisili.—Roma 13:1.

Tapaa ma Lou Soifua Mālōlōina

Ua faailoa mai e le Faalapotopotoga o Soifua Mālōlōina a le Lalolagi (WHO), e pe tusa ma le ono miliona tagata e maliliu i tausaga taʻitasi ona o faamaʻi e māfua mai i le tapaa, e aofia ai ma le silia i le 600,000 o tagata e lē ulaula, ae ua aafia i le mānavaina o le asu mai i tapaa. Seʻi mātau le aafiaga o le tapaa i le soifua mālōlōina o tagata ulaula, ma isi e mānavaina le asu o tapaa.

Kanesa. O loo iai i le tapaa le sili atu ma le 50 vailaau e aafia ai i le kanesa (carcinogenic chemicals.) Ua taʻua i le Encyclopædia Britannica o le ulaina o le tapaa e “talitonu o le māfuaaga lea o le 90 pasene o maʻi kanesa o le māmā.” O le ulaina o le tapaa e mafai ona faapogaia ai le kanesa i isi totoga e pei o le gutu, alāʻea, tagāʻai, faaʻī, māmā, ma le tagāmimi (seʻi tulou).

Faalētonu le mānava. O le ulaina o le tapaa e telē ai le avanoa e maua ai i maʻi e aafia ai le mānava e pei o le niumonia ma le fulū. O tamaiti e tele ina latou mānavaina le asu mai i tapaa a tagata ulaula, e faigofie lava ona aafia i le maʻi sela, tale faaumiumi, ma le faaitiitia o le telē o le māmā ma lē gaoioi lelei.

Maʻi fatu. O tagata ulaula e telē le avanoa e maua ai i le pē o le tino po o le aafia i le maʻi fatu. O le kaponi monookesaita (carbon monoxide) lea e maua i le tapaa, e faigofie ona pasi mai e māmā agaʻi i alātoto, ma suia ai le okesene. Talu ai o le a laʻitiiti le okesene i le toto, o le a tele foʻi la le galuega e manaʻomia ona fai e le fatu ina ia faaoo atu le okesene i le tino.

Aafiaga i tinā maʻitaga. O fafine e ulaula a o maʻitaga e telē le avanoa e fanau lē au ai a latou pepe, e lē maua le mamafa masani o pepe faatoʻā fananau, po o isi maʻi e pei o le faalētonu o le laugutu o se pepe. E ono lē lelei foʻi le mānava a na pepe, pe maliliu faafuaseʻi.

a O le ulaula i inei e faasino atu i le ulaina o le sikareti, sikā, po o se paipa. Peitaʻi, o mataupu silisili o le a talanoaina, e faatatau atu foʻi i le lamuina po o le mimitiina i le isu o le tapaa, sikareti e alu i le uila lea e iai le vailaau o le nikotini (nicotine), ma isi mea faapena.