Se Talaʻiga i Nuʻu e Tutū i Autafa o le Vaitafe o le Maroni

I le vaomatua o le Amazon i Amerika i Saute, o loo nonofo ai tagata mai i ituaiga eseese, gagana eseese ma atunuu eseese. Iā Iulai 2017, na faimalaga atu ai ni Molimau a Ieova e toʻa 13 e talaʻi i nuu e tutū i autafa o le vaitafe o le Maroni ma nuu ia e tutū i autafa o alāvai, i le itu i sasaʻe o le vaitafe o le Maroni i French Guiana. O le ā lo latou sini? Ina ia maua e tagata o loo nonofo i inā le feʻau o le faamoemoe mai i le Tusi Paia.

Sauniuni mo le Malaga

A o toe tasi le masina alu le malaga, na auai uma le ʻaumalaga i se fono e sauni ai la latou malaga e 12 aso le umi. Na taʻua e Winsley: “Na matou talanoaina le vaipanoa o le a matou talaʻi ai ma lona talafaasolopito. Na matou talanoaina foʻi le auala e matou te sauniuni ai mo le malaga. Na tofu i matou ma fagupaʻu lapopoʻa e lē sao i ai ni vai e tuu ai i totonu a matou moega faalue (hammock) ma a matou taʻinamu. I la matou malaga, e lua ni vaalele na matou puʻeina ma e tele itula na matou faimalaga ai i tamaʻi vaa.”

O ā faalogona o i latou na filifili e ō i lenei malaga? Na talia ma le fiafia e Claude and Lisette, o se ulugalii ua litaea mai i a la galuega lenei valaaulia. Na faapea mai Claude: “Na faatumulia aʻu i le fiafia ae na iai foʻi sina popole. E tele taimi na ou faalogo ai i le mataʻutia o le aave o le vaitafe.” Na taʻu mai foʻi e Lisette ona popolega: “Ailoga e mafai ona ou tautala i le gagana a tagata Initia o Amerika i Saute.”

E faapena foʻi faalogona o Mickaël. Na ia faapea mai: “E lē tele ni mea ou te iloa e faatatau i tagata Wayana. Na fai ni aʻu saʻiliʻiliga i le Initaneti, ma ou iloa ai nai upu e faafeiloaʻi ai na tagata i la latou gagana.”

Na malaga faatasi Shirley ma lana tane o Johann. Na faia e Shirley se lisi o gagana o loo tautatala ai tagata i lenā vaipanoa. Na ia faapea mai: “Na ma kopiina mai vitiō i le jw.org i le tele o na gagana. Na iai foʻi iā i maʻua se tusi o loo tusia ai upu ma faaupuga i le gagana Wayana.”

Taunuu i le Nofoaga e Nonofo ai Tagata Amerindian

I le Aso Lua, aso 4 o Iulai, na puʻe ai e le ʻaumalaga le vaalele mai i Saint-Laurent du Maroni ma malaga atu i Maripasoula, o se tamaʻi taulaga i le ogatotonu o French Guiana.

I le fā aso na sosoo ai, na malaga atu ai le ʻaumalaga i ni tamaʻi vaa afi e taʻua o pirogues e talaʻi agaʻi i le itu i saute i tagata o le nuu e nonofo latalata i le vaitafe. Ua faapea mai Roland o se tasi o le ʻaumalaga: “E matuā fiafia lava tagata Amerindian e talanoa i mataupu faale-Tusi Paia. E tele a latou fesili, ma na mananaʻo nisi e suʻesuʻe le Tusi Paia.”

I se tasi nuu, na feiloaʻi ai Johann ma Shirley i se ulugalii talavou na iai so la tauaiga na pule i lona ola. Na taʻua e Johann: “Na ma faaali i ai le vitiō A Native American Finds His Creator mai i la tatou TV i le Initaneti. Na matuā pāʻia loto o lenei ulugalii i le vitiō. Na la aumaia a la imeli ona na la mananaʻo e faaauau pea a matou fesootaʻiga.”

O Antécume Pata e tū i le itu i saute o le vaitafe o Maroni, o le nuu pito i mamao lenā na asiasi i ai le ʻaumalaga. O i inā na faataga ai e le alii sili o le nuu le ʻaumalaga e tautau o latou moega faalue i se nofoaga faitele. Na faataga foʻi ona latou taeele i le vai na taeele ai tagata o le nuu.

Na sosoo ai ma lo latou faimalaga atu i le nuu o Twenké, ma na latou tau atu ai i tagata o le nuu o loo faavauvau ona ua maliu se tasi e pele iā i latou. Na faapea mai Éric o se tasi na faamaopoopoina lenei malaga: “Na faataga e le ʻmatai tāua’ po o le alii sili o le nuu i matou e ō atu e faamāfanafana i tagata faavauvau o le nuu. Na talisapaia e le alii sili ma lona aiga mau o le Tusi Paia Wayana na matou faitauina i ai. Na matou faaali foʻi i ai vitiō o loo faaāta mai ai folafolaga a le Tusi Paia i le toetū.”

Talaʻi i Grand-Santi ma Apatou

Ona sosoo ai lea ma le puʻeina e le ʻaumalaga o se vaalele e malaga ai mo se ʻafa itula i le itu i mātū o le vaitafe, mai i Maripasoula e agaʻi atu i le tamaʻi taulaga o Grand-Santi. I le Aso Lua ma le Aso Lulu, na talaʻi atu ai le ʻaumalaga i tagata o le aai. I le Aso Tofi, na toe faimalaga ai i le pe ā ma le lima ma le ʻafa itula i le nuu o Apatou i le itu i mātū o le vaitafe o le Maroni.

A o toe tasi le aso toe foʻi le ʻaumalaga, na latou asia ai nuu o tagata Maroons e tutū i le togāvao. O tagata Maroons e tupuga mai i pologa Aferika na auina atu i Suriname, le atunuu lea e sosoo ma French Guiana, i le taimi o pulea Suriname e pulega faakolone. Na valaaulia e le ʻaumalaga tagata uma e auai i se sauniga na faia i se faleʻie telē na faatū mo lea faatasiga. Na faapea mai Claude: “Na matuā faatumulia i matou i le fiafia ona o le toʻatele o tagata na auai, na matou valaaulia i le taeao o le aso lava lenā.” Na faia e Karsten i le gagana Aukan le lauga lautele na faamatuaina “Pe na o le Pau Lenei o le Olaga?” O le taimi muamua lea ua alu ai Karsten i se talaʻiga i le vaomatua. E toʻa 91 tagata mai i nuu eseese na auai i le sauniga.

“Ua Matou Sauni e Toe Alu se Isi Malaga”

Ua oo mai le aso e toe foʻi ai le ʻaumalaga i Saint-Laurent du Maroni. Na matuā faafiafiaina i latou uma, ona o le tali lelei mai o tagata o loo nonofo i lenā vaipanoa, talia le anoanoaʻi o lomiga ma matamata i le tele o vitiō na saunia e Molimau a Ieova.

Na faapea mai Lisette: “E lē mafai e upu ona faamatalaina loʻu fiafia i la matou malaga.” Na ioe i ai Cindy ma faapea mai: “Afai e mafai ona ou toe alu i se malaga faapea, ou te mātua naunau lava ou te alu. Seʻiloga ua e alu i se malaga faapea, ona e malamalama lea i le olioli lea ua matou tofo i ai.”

O lenei malaga na faaosofia ai le naunau o isi e toe foʻi. Ua faapea mai Mickaël: “Ua matou sauni e toe alu se isi malaga.” Ua siitia atu Winsley i Saint-Laurent du Maroni. O Claude ma Lisette ua sili atu ma le taʻi 60 o la tausaga ma ua fai le la faaiʻuga e siitia i Apatou.