Sauniga a Faapotopotoga e Faaaogā ai le Initaneti

Ua faatulaga e le tele o malo o le lalolagi auala ia tausia ai le mamao o le va o tagata, ma taofia le toe faaauauina o ni faatasiga faitele. E maumauaʻi Molimau a Ieova e usitaʻia nei taʻiala, ae i le taimi e tasi o loo faaauau pea ona faia ma le saogalemu a latou tapuaʻiga. Ina ia faia faapea, ua faaaogā ai e faapotopotoga polokalame mo fesootaʻiga i le initaneti e pei o le Zoom, e faatino ai a latou sauniga.

Ina ia faaauau pea ona faia a tatou sauniga, na faamaonia ai e le Vaega Pule le faaaogāina o foaʻi tauofo e faatau mai ai laisene mo le faaaogāina o le Zoom e faapotopotoga. E mautinoa o se fesoasoani tele lenei mo nisi o faapotopotoga e lē gafatia le totogiina o le $15-$20 pe sili atu foʻi e faaaogāina ai lenā laisene. O nei faapotopotoga sa tele ina latou faaaogā polokalame i le initaneti e leai se totogi e na o ni nai tagata e mafai ona auai, ma e lē mautinoa foʻi lona saogalemu. O faapotopotoga uma o loo faaaogāina nei laisene a le faalapotopotoga mo le faaaogāina o le Zoom, ua latou maua aogā i le faigofie ma le saogalemu o fesootaʻiga, aemaise o le toʻatele o tagata e mafai ona auai. E oo mai i le taimi nei, e sili atu ma le 65,000 faapotopotoga i le sili atu ma le 170 atunuu o loo latou faaaogāina nei laisene.

I Indonesia, na suia e le faapotopotoga a Kairagi, Manado, i Sulawesi i Mātū le polokalame e leai se totogi lea na latou faaaogāina, i le Zoom lea e faatupeina e le faalapotopotoga. Ua faamatala mai e le Uso o Hadi Santoso e faapea: “E oo lava i uso ma tuafāfine e lē iloa faaaogā masini faaonapōnei, ua latou olioli nei i sauniga, aemaise ua lē toe popole e tau login i le tele o taimi mo se sauniga se tasi.”

Na taʻua e Lester Jijón, Jr, o se toeaina mai le faapotopotoga a Guayacanes Oeste i Guayaquil, Ekutoa e faapea: “Ona o le faigatā o le tulaga tau tamaoaiga o uso ma tuafāfine, e lē faigofie la mo nisi faapotopotoga ona totogi se laisene e faaaogā ai le Zoom, ina ia mafai ai ona auai le faapotopotoga atoa i le sauniga. Ae i le taimi nei, ua faigofie ona matou valaaulia isi i le sauniga, e aunoa ma le popole i ova atu le numera o tagata e tatau ona auai ina ua faaaogā le laisene mai i le faalapotopotoga.”

Na tusi mai Johnson Mwanza, o se toeaina mai le faapotopotoga a Ngwerere i Mātū, i Lusaka, Zambia e faapea: “Ua lē uma le fai mai o uso ma tuafāfine, ʻo le faatulagaga a le faalapotopotoga mo le faaaogāina o le Zoom, e lē gata ua atili ai ona matou vavalalata i o matou uso ma tuafāfine, ae ua matou lagona ai foʻi le alofa ma le tausiga a Ieova.”

O nei laisene a le faalapotopotoga o loo faatupeina mai tupe na fuafua e faaaogā mo galuega laveaʻi. O nei foaʻi o loo lagolagoina e meaalofa tauofo mo le galuega i le lalolagi aoao. O le tele o nei meaalofa tauofo o loo faia e ala i le donate.jw.org. Faafetai tele mo a outou meaalofa o loo outou foaʻi ma le agalelei, ua mafai ai ona lagolagosua i isi galuega laveaʻi o loo faia mo o tatou uso i le lalolagi aoao..—2 Korinito 8:14.