Faafalepuipui Ona o lo Latou Faatuatua—Eritrea

Mo le tele o tausaga, na puʻea ma faafalepuipui ai e le malo o Eritrea Molimau a Ieova ona o a latou gaoioiga faalelotu, po o nisi foʻi māfuaaga e lē o faailoa mai. E aofia ai fafine ma ē ua loa le soifua iā i latou na. E ala i se tulafono a le peresitene na pasia iā Oketopa 25, 1994, na faalēaogāina ai e le peresitene o Eritrea o Afwerki le avea o Molimau a Ieova ma tagatānuu o lenā malo. O le māfuaaga ona e latou te leʻi auai i le palota a le atunuu atoa e faatatau i le tutoʻatasi, ma na latou teena foʻi le auai i vaegaʻau ona e lē taliaina e o latou lotofuatiaifo. Muamua atu a o leʻi faamalosia le auai i le vaegaʻau, na talia e le faigāmalo a Eritrea galuega e fai mo tagata lautele e suitulaga i galuega mo le vaegaʻau. E toʻatele Molimau a Ieova na faia na galuega i lalo o isi faigāmalo na muamua atu. Na tuuina mai e na faigāmalo ni tusi pasi e taʻua “Certificates of Completed National Service,” ma e masani ona latou viiviia ē na auai i na galuega. Peitaʻi ona o le tulafono a le peresitene, na latou faamalosia ai, faafalepuipui, sauāina ma faafefe Molimau a Ieova ina ia faafitia lo latou faatuatua.

I le taimi nei, e toʻa 65 Molimau a Ieova o loo faafalepuipuiina (38 alii ae 27 tamaʻitaʻi). Iā Setema 2024, na faateleina ai lenei fuainumera ina ua ō atu faamalosi leoleo i le fale o se aiga a o potopoto ma le filemu ni tagata e fai la latou tapuaʻiga, ma puʻea ai tagata e toʻa 24. Mulimuli ane, na toe faasaʻoloto ni tamaiti se toʻalua. I ni nai aso na sosoo ai, na puʻea ai se tuafafine Molimau e 85 tausaga o lona soifua. E toʻa 23 Molimau na auina atu i le falepuipui o Mai Serwa. Iā Tesema 7, 2024, na tatalaina ai le tuafafine o Saron Ghebru ina ua iva masina o lona maʻitaga, ma ia Ianuari 15, 2025, na faasaʻoloto ai Mizan Gebreyesus e 82 tausaga o lona soifua.

Iā Novema 1, 2024, na toe osofaʻia ai Molimau a Ieova e leoleo, ma puʻea ai ni talavou se toʻafā e i le vā o le 16 i le 18 tausaga le matutua. Na suʻesuʻeina i latou ma ave ai lava i le falepuipui i Mai Serwa. Iā Novema 22, na ave ai e leoleo le tama teine a Almaz Gebrehiwot mai i le aʻoga, ma avatu i le ofisa o leoleo. Ina ua taunuu atu i inā Almaz, na faasaʻoloto e leoleo lana tama teine ae taofia ai o ia. O loo taofia pea Almaz i le Ofisa o Leoleo lona lima i Asmara.

Ae o se tala fiafia, e toʻalua tuafāfine na faasaʻoloto talu ai nei. O le tuafafine o Mikal Taddesse lea na faasaʻoloto mai i le falepuipui i Mai Serwa iā Fepuari 25, 2025, ma Berekti Gebretatyos mai i le falepuipui i Adi Abeto iā Mati 12, 2025.

Na Maliliu Isi Molimau Ona o Faasalaga Mamafa i le Falepuipui

Na fesagaʻia e Molimau a Ieova sauāga ogaoga i le falepuipui i Mai Serwa ma isi falepuipui. E toʻatele pagota e taufaaofiofi i se tamaʻi sela, ma e tatau ona momoe faatafa ona e lē ofi pe a taooto lelei i lalo. E lē lelei fale lē taʻua, ma e na o le faalua i le aso ona faataga i latou e faaaogāina a o vaavaaia e leoleo. E utiuti meaʻai ma vai, ma e lē lelei togafitiga faafomaʻi latou te mauaina.

O na sauāga ogaoga na iʻu ina maliliu ai ni Molimau se toʻafā a o faafalepuipui i Eritrea, ma e toʻatolu ni Molimau matutua na maliliu ina ua faasaʻoloto mai, ona o faasalaga mamafa a o iai i le falepuipui.

I le 2011 ma le 2012, e toʻalua ni Molimau na maliliu ona o faiga leaga i le nofoaga o faasalaga i Meitir. Iā Iulai 2011, na maliu ai Misghina Gebretinsae i le 62 o ona tausaga ona o le matuā vevela o le nofoaga na faasala ai, e taʻua o “nofoaga i lalo o le palapala” (underground). Iā Aokuso 16, 2012, na maliu ai Yohannes Haile i le 68 o ona tausaga a o toetoe fā tausaga o iai i le falepuipui.
O Kahsai Mekonnen, Goitom Gebrekristos, ma Tsehaye Tesfamariam o isi Molimau matutua na maliliu ina ua faasaʻoloto, ona o tulaga leaga na latou fesagaʻia a o faafalepuipui i Meitir.
I le 2018, e toʻalua ni Molimau na maliliu, ina ua ave i le falepuipui o Mai Serwa. Na maliu Habtemichael Tesfamariam iā Ianuari 3 i le 76 o ona tausaga, ma na maliu foʻi Habtemichael Mekonnen iā Mati 6 i le 77 o ona tausaga. I le 2008, na faafalepuipui ai nei tane e le faigāmalo a Eritrea e aunoa ma ni moliaga.

Lē Māiloa le Umi e Faafalepuipui Ai

O le toʻatele o alii o loo faafalepuipui e lē iloa po o le ā le umi o a latou faasalaga. E leai se faamoemoe e faasaʻoloto i latou seʻi vaganā ai ua maliliu po ua lata foʻi ina maliliu. Talu ai e leai ni faiga faaletulafono aloaʻia po o ni fesoasoani e mafai ona maua e Molimau a Ieova, o lona uiga la e faafalepuipuiina i latou mo le olaga atoa.

Talaaga o Sē na Faafalepuipui Ona o Lona Lotofuatiaifo

Wintana Shewaseged

Na fanau Wintana Shewaseged i Eritrea i le 1989, ma na papatiso iā Aokuso 5, 2007. O lona faamaoni i ona talitonuga na iʻu ai i le faafalepuipuiina o ia iā Aperila 27, 2014, ina ua puʻea o ia a o faia se sauniga. Talu mai lenā taimi, o loo iai pea i le falepuipui, ma o loo ia onosaia tulaga faigatā ona o ona talitonuga.

Na tausia aʻe Wintana e se matua nofo toʻatasi. Na maliu lona tamā, ma na tuua e lona tinā le atunuu ona o sauāga e māfua mai i ona talitonuga. A o leʻi faafalepuipuiina Wintana, na faigaluega o ia i le fale suʻisuʻi a lo latou aiga. Na ia aʻoaʻoina foʻi mataupu tau tupe. E iloa o ia o se tagata e sogasogā ma limafoaʻi, ma e masani ona ia faia mea taulima eseese ma meaalofa mo isi, e aofia ai ma le valiina o ata.

E lē gata i lea, o ia foʻi o se tagata e malosi lona faatuatua. E ui i luʻi o loo ia fesagaʻia, ae e tumau pea lona faamoemoe ma le malosi faaleagaga. Na avea lona naunau i le Tusi Paia ma taulaʻiga o lona olaga, ma ia maua ai le malosi e tumau ai a o faafalepuipui. O se tasi o mau o loo fesoasoani patino iā te ia, o le 2 Korinito 4:7-9 lea e faapea mai: “Peitaʻi, ua iā i matou lenei ʻoa i ipu omea, ina ia matou maua le mana lea e sili atu i le malosi o tagata, o le mana lea e mai i le Atua, ae e lē mai iā i matou lava. Ua matuā omia i matou i puapuaga, ae e lē taofiofia ai; ua fememeaʻi i matou, ae e lē matuā fememeaʻi ai; ua sauāina i matou, ae e lē tuulafoaʻiina ai; ua lafotūina i matou, ae e lē faaumatia ai.”

Lē Amanaʻia Fautuaga Mai Faalapotopotoga Taualoa e Puipuia Aiā Tatau a Tagata

O loo faaauau pea ona lē amanaʻia e le malo Eritrea tapulaa faavaomalo e faatatau i aiā tatau a tagata. Ua faitioina e faalapotopotoga taualoa e puipuia aiā tatau a tagata le solia e le malo o Eritrea o aiā tatau a Molimau a Ieova i lenā atunuu, ma ua fautuaina le faaleleia o lea tulaga.

I le 2016, na faia ai le faaiʻuga a le Komisi Suʻesuʻe mo Aiā Tatau a Tagata Eritrea, ua faia e le malo o Eritrea se “solitulafono faasaga i tagata” ona ua latou sauāina Molimau a Ieova ma isi, ona “o a latou lotu ma ituaiga tagata e iai i latou.”
I le 2017, na faaalia ai e se Komiti i le Atu Aferika e taʻua o le African Committee of Experts on the Rights and Welfare of the Child (ACERWC), lo latou popole ona e lē o maua e “tamaiti Molimau a Ieova” le puipuiga faaletulafono o a latou aiā tatau ma ua faileagaina i latou, e ui i le iai o na puipuiga. Na fautuaina e le ACERWC le malo o Eritrea ina ia latou “amanaʻia ma puipuia atoatoa le saʻolotoga o se tamaitiiti e Faaali ai Ona Manatu, usitaʻi ai i lona Lotofuatiaifo ma faatāua lana Lotu, e aunoa ma le faailoga tagata.”
I le 2018 na fautuaina ai e le Komisi mo Aiā Tatau a Tagata Aferika le malo o Eritrea, ina “ia vave ona fai ni gaoioiga e foʻia ai le lē amanaʻia o aiā tatau a i latou uma o loo faafalepuipui e aofia ai . . . tagata Molimau a Ieova,” ma na latou fautuaina foʻi le faia o se suʻesuʻega i le maliliu ai o ni Molimau a Ieova na faafalepuipui. Na faamatilatila foʻi e lenei Komisi le tatau i le malo o Eritrea, ona faamautinoa e tumau pea ona avea Molimau a Ieova ma “tagatānuu o lenā atunuu auā o lo latou aiā tatau lenā.”
Iā Me 2019, na fautuaina ai e le Komiti mo Aiā Tatau a Malo Aufaatasi (CCPR) le malo o Eritrea ina ia faamautinoa e saʻoloto tagata e filifili a latou lotu ma mea e talitonu i ai. Ia faamautinoa foʻi ua “faasaʻoloto tagata uma na puʻea pe faafalepuipui e aofia ai ma Molimau a Ieova, ona o le faaaogāina o le saʻolotoga e filifili ai a latou lotu.” Na talosaga atu foʻi le CCPR i le malo o Eritrea, “ina ia faamautinoa le amanaʻia faaletulafono o i latou e teena galuega faavaegaʻau ona e lē taliaina e o latou lotofuatiaifo, ma ia saunia ni galuega mo tagata lautele e fai e na tagata.”
I se lipoti na faia i le Faalapotopotoga mo Aiā Tatau a Malo Aufaatasi iā Me 7, 2024, na taʻua ai e le tagata suʻesuʻe faapitoa tutoʻatasi e galue mo Malo Aufaatasi i Eritrea: “O loo feagai Molimau a Ieova ma sauāga ogaoga e aofia ai faasalaga lē tonu ma le teena o a latou talosaga mo sitiseni. O lea, ua lē mafai ai ona latou maua faamanuiaga mo tagatānuu.” Ua faalaeiauina i le lipoti le malo o Eritrea ina ia “vave ona faasaʻoloto i latou uma ua faasalaina ma le lē tonu,” ma “faamuta le puʻea o i latou ma faasalaina e aunoa ma ni māfuaaga faaletulafono.”

Mea na Tutupu

Iuni 17, 2025

E toʻa 65 Molimau a Ieova na faafalepuipui.
Novema 22, 2024

Na puʻea ai Almaz Gebrehiwot ona o le lē auai i se vaega faaupufai a le atunuu.
Novema 1, 2024

E toʻafā ni Molimau talavou na puʻea ma auina atu i le falepuipui o Mai Serwa.
Setema 27, 2024

E toʻa 23 ni Molimau na puʻea ma auina atu i le falepuipui o Mai Serwa, ma e toʻalua na faasaʻoloto mulimuli ane.
Fepuari 1, 2021

E toʻatolu Molimau a Ieova na faasaʻoloto mai i le falepuipui.
Ianuari 29, 2021

E toʻatasi se Molimau na faasaʻoloto mai i le falepuipui.
Tesema 4, 2020

E toʻa 28 Molimau a Ieova na faasaʻoloto mai i le falepuipui.
Mati 6, 2018

Na maliu ai Habtemichael Mekonnen i le 77 o ona tausaga, ina ua auina atu i le falepuipui o Mai Serwa.
Ianuari 3, 2018

Na maliu ai Habtemichael Tesfamariam i le 76 o ona tausaga, ina ua auina atu i le falepuipui o Mai Serwa.
Iulai 2017

Na auina uma atu Molimau na lokaina i le falepuipui i Meitir i le falepuipui o Serwa lea e tū i fafo atu o Asmara.
Iulai 25, 2014

O le toʻatele o i latou na puʻea iā Aperila 14 ua toe faasaʻoloto, ae o le toʻa 20 o i latou na puʻea iā Aperila 27 ua faafalepuipuiina.
Aperila 27, 2014

E toʻa 31 Molimau na puʻea a o faia le sauniga.
Aperila 14, 2014

E silia ma le 90 Molimau na puʻea a o faia le Faamanatuga o le maliu o Keriso.
Aokuso 16, 2012

Na maliu ai Yohannes Haile i le 68 o ona tausaga, a o faafalepuipui i lalo o tulaga e sili ona leaga.
Iulai 2011

Na maliu ai Misghina Gebretinsae i le 62 o ona tausaga, a o faafalepuipui i lalo o tulaga e sili ona leaga.
Iuni 28, 2009

Na osofaʻi ai e leoleo se fale o se Molimau a o fai se sauniga faalelotu ma na latou puʻea uma ai le toʻa 23 o Molimau a Ieova na auai, e 2 i le 80 tausaga le matutua.
Aperila 28, 2009

Na ave ai e leoleo Molimau a Ieova uma na falepuipui i Meitir i se isi falepuipui, ae tuu ai na o le Molimau e toʻatasi.
Iulai 8, 2008

Na osofaʻia e leoleo fale o aiga ma fale faigaluega ina ia puʻea le toʻa 24 o Molimau a Ieova, ma o le toʻatele o i latou e faalagolago i ai le tausiga o o latou aiga.
Me 2002

Na tapunia uma ai e le malo lotu e lē o i lalo o le vaavaaiga a lotu e fā ua faamaonia e le malo.
Oketopa 25, 1994

E ala i se tulafono a le peresitene na aveesea ai le avea o Molimau a Ieova ma tagatānuu o Eritrea ma a latou aiā tatau.
Setema 17, 1994

Na faafalepuipui ai Paulos Eyassu, Isaac Mogos, ma Negede Teklemariam, e aunoa ma ni moliaga po o le faia o se faamasinoga.
I le vaitaimi o le 1950-1959

Na faavaeina ai Molimau a Ieova i Eritrea mo le taimi muamua.