Faafalepuipui Ona o lo Latou Faatuatua—Ukraine
Ua toetoe 30 tausaga o iai le tulafono a Ukraine e maua ai e Molimau a Ieova le aiā tatau e faia ai auaunaga mo le lautele e ese mai i le vaegaʻau, ona o o latou lotofuatiaifo. O le iʻuga, ua mafai ai ona latou faatinoina auaunaga eseese mo le lautele, ma faatumauina ai se lotofuatiaifo lelei.
Peitaʻi, ina ua amata le taua i Ukraine iā Fepuari 24, 2022, e manino mai ai e leai se faatulagaga e faataga ai i latou e faia auaunaga eseese mo le lautele, ona o le lē auai i le vaegaʻau. O le iʻuga, na molia le toʻatele o i latou e lē auai i le vaegaʻau. O le faia faapea, ua lē amanaʻia ai e le malo o latou talitonuga lea e māfua ai ona latou solitū, ma lē faatāua ai a latou aiā tatau. O na faiga ua soli ai aiā tatau a tagata ma le Tulafono a Ukraine e faapea: “Pe a feteenaʻi talitonuga faalotu o se tagatānuu ma le auai i le vaegaʻau, e mafai ona ia faatinoina auaunaga mo le lautele e ese mai i le vaegaʻau.”
Na amata mai iā Iuni 17, 2025, e toʻafā tane Molimau a Ieova ua faafalepuipuiina ona o le teena o le auai i vaegaʻau ona o o latou lotofuatiaifo, ma e 36 masina la latou faasalaga. E toʻatolu foʻi isi Molimau a Ieova o loo iai i nofoaga o faasalaga e faatalitali ai o latou faamasinoga.
O le Tali Mai a Isi Atunuu
Ua faailoa mai e tagata suʻesuʻe faapitoa e toʻatolu e galulue mo Malo Aufaatasi, o latou manatu e tusa ai ma le leai o ni auaunaga mo le lautele i Ukraine e ese mai i le vaegaʻau. Na latou feiloaʻi ma le malo o Ukraine iā Novema 8, 2023, ma faapea atu ai: “Ua faapopoleina i matou ona o le molia o tagata e teena le auai i vaegaʻau ona o o latou lotofuatiaifo, e aofia ai i latou e lagolagoina aiā tatau a na tagata.”
Mea na Tutupu
Iuni 17, 2025
E toʻafitu Molimau a Ieova na faafalepuipuiina.
Fepuari 24, 2022
Ua faavae se tulafono e tuuina atu ai le pule i le vaegaʻau, ma faamalosia ai tagata e auai i le vaegaʻau.
Iuni 23, 2015
Ua lagolagoina e le Faamasinoga Maualuga a Ukraine le aiā tatau a Vitaliy Shalaiko e teena ai le auai i vaegaʻau ona o lona lotofuatiaifo.
Tesema 1991
Ua faavaeina se Tulafono e Faatino ai Auaunaga mo le Lautele e Ese Mai i le Vaegaʻau.
Fepuari 28, 1991
Ua lesitalaina faaletulafono Molimau a Ieova i Ukraine.