Faafalepuipui Ona o lo Latou Faatuatua—Crimea

Ua sosolo atu i Crimea teteega ogaoga a le pulega a Rusia e faasaga i Molimau a Ieova. E lē gata ua faasā e le malo o Rusia le lesitalaina faaletulafono o Molimau a Ieova, ae ua matuā aliali i lumāmea lo latou faanaunauga e tafiesea la latou tapuaʻiga filemu. Talu mai le faasāsāaga iā Aperila 2017, ua tele osofaʻiga ua faia e le pulega a Rusia i faatasiga a Molimau a Ieova i Rusia, ma iʻu ai i le puʻea ma le faafalepuipuiina o le toʻatele o Molimau a Ieova. Ua faaaogā foʻi na faiga sauā e faasaga i Molimau a Ieova i Crimea.

O le osofaʻiga tele muamua i Crimea na tupu iā Novema 15, 2018 i Dzhankoy, ina ua osofaʻia e le pe ā ma le 200 leoleo ma fitafita faapitoa ni fale se valu o aiga na faapotopoto ai ni vaega toʻaitiiti o Molimau, ina ia faitau ma iloiloina le Tusi Paia. E tusa ma le toʻa 35 leoleo faaauupegaina na ufiufi o latou foliga na ō atu faamalosi i le fale o Sergey Filatov lea na potopoto ai ni Molimau se toʻaono. Na faamataʻuina Molimau i lenā osofaʻiga sauā. Na taofia e leoleo se tamā matua e 78 ona tausaga agaʻi i le puipui o le fale, faafaō faamalosi o ia i le eleele, saisai ona lima, ma matuā sasa iā te ia ma iʻu ai ina ave faatopetope o ia i le falemaʻi. Na matuā faamataʻuina isi tamā matutua se toʻalua, ma faapea ona ave faatopetope ai i le falemaʻi ona ua matuā maualuga o la toto. O le mea e faanoanoa ai, ona na fafano le pepe a se tasi o tinā talavou lea na osofaʻia foʻi lona fale.

Ina ua uma le osofaʻiga, na molia ai faasolitulafono Sergey i lalo o le Vaega 282.2(1) o le Tulafono mo Solitulafono a Rusia i le faamaopoopoina o galuega a se “faalapotopotoga faatupu faalavelave.” Iā Mati 5, 2020, na faasala ai e le Faamasinoga Faaitumalo i Crimea ia Sergey mo le ono tausaga i se falepuipui. Ina ua uma ona lau lona faasalaga, na ave saʻo loa o ia i le falepuipui.

I tausaga mulimuli ane talu mai le osofaʻiga i Dzhankoy i le 2018, o loo faaauau pea ona osofaʻia e fitafita faapitoa fale o Molimau a Ieova o loo latou masalomia i gaoioiga faatupu faalavelave. O le osofaʻiga lata mai nei lava na faia iā Aokuso 7, 2024, lea na osofaʻia ai e leoleo na faaauupegaina o ē na fai a latou mask, fale o ni Molimau a Ieova se toʻalima, e aofia ai le fale o Tamara Brattseva lea e 68 ona tausaga i le nuu o Razdolnoye. Na molia foʻi Tamara i le faamaopoopoina o gaoioiga a se faalapotopotoga faatupu faalavelave, ma o loo faagasolo lona faamasinoga. Iā Oketopa 2024, na tuuina atu ai ni faasalaga i ni tane Molimau a Ieova se toʻalua o Yuriy Gerashchenko ma Sergey Parfenovich, e taʻi ono tausaga i le falepuipui. E ui e leʻi faamalosia i laʻua e le faamasinoga e ō i le falepuipui e tuli ai le la faasalaga, ae na finau le lōia a le malo mo se faasalaga mamafa, lea na talia e le faamasinoga. Na saisai o la lima i le potu faamasino ma avatu saʻo loa i le falepuipui.

O le iʻuga o nei osofaʻiga ma faamasinoga na faia mulimuli ane, ua faafalepuipui ai tane Molimau a Ieova e toʻa 14 mo le umi e oo atu i le ono ma le ʻafa tausaga. Na molia uma i latou i le faaauilumaina o galuega a se faalapotopotoga faatupu faalavelave.

Talaaga o Sē na Faafalepuipui Ona o Lona Lotofuatiaifo

Yuriy Gerashchenko

Na fanau Yuriy Gerashchenko i le 1979 i le aai o Lutsk (Ukraine) ma na tausia aʻe e se tinā nofo toʻatasi. Ina ua fā ona tausaga, na siitia atu lo latou aiga i Crimea. A o laʻitiiti Yuriy, na fiafia i taaloga o le soka, hockey, ma taaloga tāfiti. Na galue o ia o se faieletise seʻia oo i le taimi na faafalepuipui ai.

Talu ai na ola aʻe Yuriy e aunoa ma se tamā, na matuā pāʻia lona loto ina ua ia aʻoaʻoina mai i lana suʻesuʻega, o Ieova o lona Tamā ma o Lē e puipuia o ia. E lē gata i lea, o le vaai i le faataunuuga o valoaga o le Tusi Paia, na faatalitonuina ai o ia, o le Tusi Paia o se taʻiala maufaatuatuaina. Na papatiso o ia ma avea ma Molimau a Ieova i le tausaga 2000.

I le 2002, na faaipoipo atu ai o ia iā Irina, o se tasi foʻi o Molimau a Ieova. E la te fiafia e matamata i mea o le natura ma asiasi i nofoaga fou i le penisula o Crimea.

E tele tulaga faigatā ua fesagaʻia e Yuriy ma lana avā, ona o ona moliaga faasolitulafono ma lona faafalepuipuiina. Ae e ui i na tulaga, o loo la taumafai pea e faatumau se vaaiga saʻo. E lē talitonu uō, tuaoi, ma i latou e faigaluega faatasi ma Yuriy i le faafalepuipui o ia ona o ni gaoioiga faalotu, auā o ia o se tagata amio lelei, agalelei, ma e tausia le filemu. O le a faasaʻolotoina o ia iā Tesema 2029.

Mea na Tutupu

Iuni 17, 2025

O loo faafalepuipui Molimau a Ieova e toʻa 14 mai i Crimea.
Oketopa 3, 2024

Na tuuina atu iā Yuriy Gerashchenko ma Sergey Parfenovich ni faasalaga e taʻi ono tausaga i le falepuipui.
Aokuso 7, 2024

Na osofaʻia e ni leoleo ni fale se lima o Molimau a Ieova i Alushta, Razdolnoye, ma Senokosnoye. Na suʻesuʻeina foʻi e leoleo ia Tamara Brattseva.
Aokuso 5, 2021

Na osofaʻia ni fale se valu o Molimau a Ieova ma puʻea ai Aleksandr Dubovenko ma Aleksandr Litvinyuk.
Oketopa 1, 2020

Na osofaʻia ni fale se iva i Sevastopol. Na puʻeina Igor Shmidt ma tuu i se nofoaga o faasalaga e faatalitali ai lona faamasinoga.
Iuni 4, 2019

Na osofaʻia ai e leoleo faapitoa fale o Molimau a Ieova e toʻa 10 i Sevastopol. Na molia ai Viktor Stashevskiy i le faia o gaoioiga faatupu faalavelave.
Mati 20, 2019

Na osofaʻia e fitafita faapitoa fale e valu o aiga i Alupka ma Yalta. Ua tuʻifesili Artem Gerasimov ma molia mulimuli ane i le faamaopoopoina o galuega faatupu faalavelave.
Novema 15, 2018

Na osofaʻia fale e valu o aiga e le silia i le 200 leoleo ma fitafita faapitoa i Dzhankoy, e aofia ai le fale o Sergey Filatov.