Faafalepuipui Ona o lo Latou Faatuatua—Korea i Saute

E iai se faaiʻuga iloga i le talafaasolopito o Korea i Saute na faia iā Oketopa 26, 2020. O ē uma e lē auai i vaegaʻau ona e feteenaʻi ma o latou lotofuatiaifo, e latou te maua le avanoa e faatino ai isi auaunaga mo le lautele e ese mai i le vaegaʻau. Peitaʻi, e manatu faalapotopotoga mo aiā tatau a tagata o lenā faatulagaga a le malo, o se faiga e lē tonu ma mamafa ona e lē gata e umi ae o se faasalaga mamafa foʻi. E 36 masina le umi e faatino ai isi auaunaga mo le lautele, lea ua faaluaina le umi e auai ai i le vaegaʻau, ma e feteenaʻi ma tulafono faavaomalo. E tusa ai ma na tulafono, o le auaunaga mo le lautele e lē tatau ona umi atu i le taimi e auai ai i le vaegaʻau, seʻi vaganā e iai ni māfuaaga talafeagai. Ua filifili nisi tane Molimau a Ieova i Korea i Saute e teena isi auaunaga mo le lautele e ese mai i le vaegaʻau. O lea, na tuuina atu ai e nisi ni tagi i le faamasinoga. Iā Me 30, 2024, na teena ai na tagi e le Faamasinoga Maualuga o Mataupu Faavae a Korea i Saute. Peitaʻi, na taʻua e le faamasinoga e mamafa tele le faasalaga mo ē e faatinoina isi auaunaga mo le lautele. Na faapea mai: “O na auaunaga mo le lautele, e pei o se isi faasalaga ua lē amanaʻia ai le saʻolotoga o ē e lē auai i vaegaʻau, ona e feteenaʻi ma o latou lotofuatiaifo.”

O Woo-jin Byeon, o se tane faaipoipo e 29 ona tausaga, ma e lē auai i vaegaʻau ona e feteenaʻi ma lona lotofuatiaifo. O le tagata muamua lea i Korea i Saute ua faafalepuipui, ona e na te teena le faatinoina o isi auaunaga mo le lautele e ese mai i le vaegaʻau. Na filifili o ia e teena ma le faaaloalo na auaunaga mo le lautele. Na ia faailoa mai lona manaʻoga e faatino isi auaunaga mo le lautele i le taimi e amata ai, pe afai e lē mamafa. Peitaʻi, iā Iulai 24, 2024, na tuuina atu ai e le faamasinoga le faasalaga e faafalepuipui ai o ia mo le tasi le tausaga ma masina e ono.

E oo mai i le asō, e toʻa 14 tane Molimau a Ieova ua latou teena le faatinoina o isi auaunaga mo le lautele e ese mai i le vaegaʻau, lea e aofia ai Woo-jin Byeon, ma e toʻa 11 isi tane o loo faagasolo o latou faamasinoga. E faalagolago i le iʻuga o a latou faamasinoga, ae e ono faasalaina ma faafalepuipui foʻi i latou o ni tagata solitulafono. Peitaʻi, o le toʻatele o i latou e lē auai i vaegaʻau ona e feteenaʻi ma o latou lotofuatiaifo, ua latou filifili e faatino isi auaunaga mo le lautele, e ui i le mamafa o na auaunaga.

Mea na Tutupu

1. Iulai 24, 2024

   Na tuuina atu iā Woo-jin Byeon le faasalaga e faafalepuipui ai mo le 18 masina, ona o le teena o isi auaunaga mo le lautele e ese mai i le vaegaʻau.

2. Novema 10, 2022

   Ina ua maua le tusi e poloaʻia ai o ia e auai i le vaegaʻau, na auina atu e Woo-jin Byeon se tusi i le Military Manpower Administration e faailoa atu ai lona teena o le auai i le vaegaʻau ma isi auaunaga mo le lautele, ona o lona lotofuatiaifo.

3. Oketopa 26, 2020

   Ua faatulaga e le malo o Korea i Saute isi auaunaga mo le lautele, mo ē e lē auai i vaegaʻau ona e feteenaʻi ma o latou lotofuatiaifo.

4. Novema 1, 2018

   Ua faia e le Faamasinoga Sili a Korea i Saute le faaiʻuga e lē o se solitulafono le lē auai i vaegaʻau, ona e feteenaʻi ma le lotofuatiaifo o se tagata.

5. Iuni 28, 2018

   Ua faailoa mai e le Faamasinoga Maualuga o Mataupu Faavae a Korea i Saute, le leai o se faavae o se vaega o le Tulafono mo Vaegaʻau, ona o le lē saunia o isi auaunaga mo le lautele mo ē e lē auai i vaegaʻau, ona e feteenaʻi ma o latou lotofuatiaifo.

6. Oketopa 18, 2016

   Na tuuina atu e le Faamasinoga Apili a Gwangju le faaiʻuga mo le taimi muamua, e lē molia ni tane se toʻatolu na teena le auai i le vaegaʻau ona o o latou lotofuatiaifo, ina ua apili o latou faamasinoga.

7. Aokuso 30, 2011

   Ua toe lagolagoina e le Faamasinoga Maualuga o Mataupu Faavae le tulafono e faasala ai ē e teena le auai i le vaegaʻau ona o o latou lotofuatiaifo.

8. Aokuso 26, 2004

   Ua talia aloaʻia e le Faamasinoga Maualuga o Mataupu Faavae le tulafono e faasala ai ē e teena le auai i le vaegaʻau ona o o latou lotofuatiaifo.

9. 1975

   Ua poloaʻia faamalosi e le malo tane agavaa uma ina ia auai i le vaegaʻau.

10. 1973

    Ua amata ona faileagaina e le malo Molimau a Ieova o loo faafalepuipui, ma faaauau ai seʻia oo i le ogatotonu o le 1991-1999.

11. 1953

    Ua faafalepuipui e le malo le Molimau a Ieova muamua e lē auai i vaegaʻau, ona e feteenaʻi ma lona lotofuatiaifo.