Lo Tatou Paneta Maaleale—O le ā Sona Lumanai?

I LE lua selau tausaga ua mavae, na taʻua ai e se tagata faipolotiki o Amerika o Patrick Henry e faapea: “Ou te lē iloa se isi auala e faamasinoina ai le lumanai nai lo le toe tepa i tua i mea ua uma ona tutupu.” I le taimi ua teʻa, ua faaleagaina ai e le tagata le siosiomaga. Pe o le a sui ea se isi ana gaoioiga i le lumanai? E oo mai lava i le taimi nei, e leai se suiga tele.

E ui lava e ono ave le faamālō i le agaʻi i luma o nisi o taumafaiga ua uma ona iai, ae ua na o ni taumafaiga e faataʻetaʻealuga ona fai, o loo talanoaina āuga ua oo i ai nai lo mea e mafua mai ai. Afai ua pala le fale, o le vali uma o laupapa e lē lava lena e taofia ai le fale mai le paʻū. Seʻi vaganā ua fai i ai se galuega tele o le toe faafou ona lē paʻū lea. E faapena foi ona manaomia ona toe suia ma faafou le auala o loo faaaogā ai e le tagata lenei paneta. E lē lava le faatemutemu ona taulimaina o mea ua faaleagaina.

I le iloiloina o iuga ua oo i ai le puleaina o le siosiomaga a le Iunaite Setete i le 20 tausaga ua mavae, fai mai le faaiuga a se tasi tagata e iai sona poto faapitoa i le siosiomaga, “e lē mafai ona pulea atoatoa le faaleagaina ua fai i le siosiomaga, peitai e ao ona taofia a o lei tupu.” O le mea moni, e sili ona lelei le taofia o le polusione nai lo le fofoina o ona aafiaga leaga. Ae ina ia ausia lena sini, e leai se isi mea e sili ona manaomia nai lo se suiga faavae i le sosaiete a tagata ma lana vaaiga i pisinisi tetele. Na taʻutino mai e le tusi Caring for the Earth e faapea, o le tausia o le lalolagi e aofia ai “manatu, tamaoaiga ma faiga o mea faatagata e ese mai i le tele o loo iai i aso nei.” O ā nisi o nei manatu e manaomia ona suia ina ia mafai ai ona faasaoina le paneta?

O Mafuaaga Loloto o le Faafitauli

Manatu faapito. O le faamuamua o manaoga o le paneta, nai lo manaoga o tagata o ē o loo faaaogaina ma le manatu faapito le paneta, o le laasaga talafeagai muamua lava lena agaʻi i le puipuia o le siosiomaga. Peitai ane, e toaitiiti o loo loto malilie e lafoaia le ituaiga soifuaga sololelei o iai nei, e ui lava e ono faaleagaina ai le paneta mo tupulaga i le lumanai. Ina ua taumafai le malo o Holani—o se tasi o atunuu pito i faapolusioneina i Europa i Sisifo—e faaitiitia le femalagaai i taavale e avea o se vaega o taumafaiga ina ia faaitiitia le polusione, na matuā tele le tetee mai ma faaleaogā i lea fuafuaga. E ui lava o auala i Holani e aupito tumu i taavale feoai i le lalolagi, e mananao lava avetaavale e femalagaai i a latou taavale.

O manaoga manatu faapito o le tagata lava ia ua aafia ai ē e faia faaiuga atoa ma tagata lautele. E faatalatū le au faipolotiki mai le faatinoina o tulafono tau siosiomaga e ono afaina ai a latou palota, ma e faitioina malosi foi e ē ona falegaosimea so o se fuafuaga faatū e ono faaitiitia ai tupe mamā o maua mai ma le sologa manuia tau tamaoaiga.

Matapeapea. Pe a faia se filifiliga i le va o le tupe faasili ma le faasao ma puipuia lelei o se mea, e masani lava e sili ona malosi le tupe. Ua taumafai falefaigaluega tetele e faaitiitia le puleaina o le polusione po o le matuā alofia lava o faatulagaga mai le malo. Ua faataʻitaʻia mai lenei faafitauli i le faaleagaina lea ua fai i le afuafu o le osone. E lata mai nei lava ia Mati 1988, na taʻua ai e le taʻitaʻifono o se kamupanī telē gaosi vailaau e faapea: “I le taimi nei, o faamaoniga faasaienitisi e lē o aliali mai ai se manaoga talafeagai e matuā faaitiitia ai le gaosia o le CFC.”

Ae, o le kamupanī lava lea e tasi, na latou fautuaina le matuā aveeseina atoatoa o le kolofolokaraponi (chlorofluorocarbons [CFCs]). Pe ua toe sui ea o latou manatu? Na faamatala e le pule lagolago o le United Nations Environment Programme (UNEP) o Mostafa Tolba: “E lē o le mafuaaga ona faapea ua faaleagaina le siosiomaga pe leai foi.” Ae “o le mafuaaga [autū] lava po o ai o le a tele se [tamaoaiga tau tupe] na te mauaina ai.” O lea ua iloa nei e saienitisi o le faaleagaina o le afuafu o le osone, o se tasi o faatamaʻiaga aupito sili lea ona leaga o le siosiomaga ua faia e tagata i le talafaasolopito.

Leai se malamalama. E itiiti lava mea ua tatou iloa nai lo mea tatou te lē iloa. Na faamatala e le pule o le Missouri Botanical Garden o Peter H. Raven: “O loo itiiti pea ni mea ua tatou iloa e uiga i le anoanoai o ola o loo i le vaomatua o le teropika. O le mea e mataina, ua tatou iloa le tele—le matuā tele—o mea i luga i le masina.” O le mea lava foi e tasi e faatatau i le atimosifia. O le ā le tele o karaponi taiokesaita (carbon dioxide) tatou te faaauau pea ona faaalu atu i le vanimonimo e aunoa ma le aafia ai o le tau i le lalolagi? E lē iloa e se tasi. Ae e pei ona fai mai le mekasini o le Time, “o se lē migao le aafia o le natura i ni faataʻitaʻiga ma ni suesuega e lē gata e lē iloa le taunuuga ae o mea e tutupu mai ai e matuā fefe lava e mafaufau i ai.”

E tusa ai o le faatusatusaga a le UNEP, ona o le faaleagaina o le osone, e oo atu i le iuga o lenei faitau sefulu o tausaga, o le a iu ina tulai mai ai le faitau afe o kanesa fou i le paʻu i tausaga taitasi. O aafiaga i faiga faiva ma faatoaga e lē o iloa lava, ae e faatalitalia o le a matuā telē.

Leai se tofa mamao. E ese mai i isi faatamaʻiaga, o faafitauli tau siosiomaga e faifai mālie le oo mai. Ua faapogaia e lenei mea le faatuatuanai ai o ni taumafaiga e fai ni gaoioiga mautu a o lei oo ina faaleagaina e lē toe mafai ona foia. Na faatusa e le tusi Saving the Planet ia lo tatou tulaga i le taimi lenei i le tulaga na iai le pasese a le vaa lea na goto o le Titanic i le 1912: “E toaitiiti o loo iloa le telē o le faafitauli o mea e ono tupu mai ai se mala.” E talitonu ia tusitala na pau lava le auala e faasaoina ai le paneta, pe afai e uaʻi atu taʻitaʻi faapolotiki ma le aufaipisinisi i mea moni, ma manatunatu i mea e faasaoina ai le ola mo se taimi umi, nai lo le manatu i aogā e puupuu le taimi e faaaogā ai.

Manatu ifo mo ia lava. I le Fonotaga a Taʻitaʻi o Malo o le Lalolagi Tau i le Siosiomaga ma Atinaʻe na faia i Rio i le 1992, na taʻua ai e le palemia mai Sepania o Felipe González e faapea “o le faafitauli e aofia ai le lalolagi atoa, ma o le vaifofo e ao foi ona aofia ai le lalolagi atoa.” Ua moni ma faamaoni lea taofi, peitai o le mauaina o ni vaifofo e taliaina e le lalolagi atoa ua o se gaoioiga e vaivai ai le agaga. Na taʻutino e le sui usufono mai le Iunaite Setete sa iai i le fono lena: “E lē mafai ona toe suia le auala o loo soifua ma ola ai tagata Amerika.” Ae i le isi itu o le tagata Initia e suesueina le siosiomaga e suafa ia Maneka Gandhi, na faitio mai e faapea, “e tusa e ʻai e le tamaitiiti e toatasi o atunuu i Sisifo ia meaʻai e fafaga ai le 125 i atunuu i Sasaʻe.” Fai mai a ia, “toetoe lava o faaleagaina uma o le siosiomaga o loo tupu i Sasaʻe, e māfua i mea o loo faaaogā i Sisifo.” E so o se taumafaiga lava e faaleleia le siosiomaga ua lē taulau ona o uiga o le manatu ifo lava o atunuu ia i mea e lelei ai ia lava.

E ui lava i nei faafitauli autū uma, o loo iai mafuaaga e tepa ai i le lumanai ma le mautinoa. O se tasi o nei mea o le maufaatuatuaina lea o le mafai e le paneta lava ia ona toe faaleleia mea o iai.

Le Toe Faaleleia o le Lalolagi

E pei lava o le tino o le tagata, o loo i le lalolagi le malosi e ofo ai e toe faaleleia ai ia lava. O se faataʻitaʻiga mataina o lenei mea na tupu i le senituri ua teʻa. I le 1883 na pa ai se maugamu i le motu o Krakatau (Krakatoa) i Initonesia, e matautia le mea na tupu, e toeitiiti 3,000 maila (5,000 kilomita) le mamao o le mea na lagona mai ai. E toeitiiti atoa le lima kupita maila (21 kupita kilomita) le telē o mea na lelea atu i le vanimonimo, ma o le lua vaetolu o le motu na goto ifo i le sami. I le iva masina mulimuli ane, na pau le faailoga e iloa ai o loo iai se ola o toe maua ai sa na o se apogaleveleve lamoimoī lava. I aso nei ua ufitia atoa le motu i le anoano o vao o le teropika, lea o loo aai ai le faitau selau o ituaiga eseese o manu, o mamele, o gata, ma iniseti. E aunoa ma se masalosalo o lenei toe faaleleia ua mafai ona o le puipuiga lea e olioli ai le motu i le avea o se vaega o le Ujung Kulon National Park.

E mafai foi ona toe faaleleia le faaleagaina lea ua faia e tagata i le eleele. Pe a lava le taimi e tuu atu i ai, o le a toe . . . faaleleia e le laueleele ia lava. O le fesili la, Pe o le a tuu atu ea e le tagata le taimi o loo manaomia e le laueleele e mālōlō ai? Atonu e leai. Peitai o loo iai Lē o loo maumauai e tuu atu i lo tatou lalolagi e toe faalelei e ia ia lava—o ia lea o Lē na foafoaina le lalolagi.

“Ia Fiafia Lava le Laueleele”

E lei finagalo lava le Atua ina ia faaleagaina e tagata le laueleele. Na ia taʻu atu ia Atamu ina ia “galue ai ma leoleo” le faatoaga i Etena. (Kenese 2:15) O le mamafa i le finagalo o Ieova o le puipuia o le siosiomaga sa iloa mai lea i le tele o tulafono na ia avatu i tagata Isaraelu. Mo se faataʻitaʻiga, na taʻu atu ia i latou a oo i le lona fitu o tausaga uma lava ona aua lea le totoina se mea i le fanua—o le tausaga lea faa-Sapati. (Esoto 23:10, 11) Ina ua faaauau ona lē amanaia e tagata Isaraelu lenei mea atoa ma isi tulafono, na iu ina faataga e Ieova tagata Papelonia e aveesea tagata mai le laueleele lea na tuufua ai e lē ʻainā mo le 70 tausaga seia “oo ina faaatoatoaina e le laueleele ona sapati.” (2 Nofoaiga a Tupu 36:21) Ona o lenei mea na tupu i le talafaasolopito, e lē o se mea la e ofo ai i le faapea mai o le Tusi Paia ‘o le a faafanoina e le Atua i latou o e na fano ai le lalolagi’ ina ia toe faaleleia ai le lalolagi mai le faaleagaina o le siosiomaga na faia e le tagata.—Faaaliga 11:18.

Peitai, o lena gaoioiga, ua na o se uluai laasaga. O le faasaoina o le paneta, e pei ona faamatalaina ai ma le saʻo e le paiolotisi o Barry Commoner, “e faalagolago tutusa lava i le taofia o le faasagatau i le natura ma le faaumaina o le fetauai o i tatou lava.” Ina ia ausia lena sini, e ao ona “aʻoaʻoina . . . e Ieova” tagata o le lalolagi ina ia fetausiai ma ia tausi lelei lo latou aiga faalelalolagi. O le iuga, o le a “tele” lo latou manuia.—Isaia 54:13.

Ua faamautinoa mai e le Atua ia i tatou, o le a toe faaleleia le ekositema o le laueleele. Nai lo le faatuputupulaia i se tulaga e lē mafoia, o le a “fua mai le toafa e pei o le aute.” (Isaia 35:1) I le tulaga o le lē lava o mea taumafa, “e taumafa o saito i le nuu i tumutumu o mauga.” (Salamo 72:16) Nai lo le mamate ona o le polusione, o le a “pāti lima vaitafe” o le laueleele.—Salamo 98:8.

O afea o le a mafai ai ona fai lena ituaiga o faafouina? Pe a “fai Ieova ma tupu.” (Salamo 96:10) O le pulega a le Atua o le a mautinoa le faamanuiaina ai o meafaiola uma lava i le lalolagi. Fai mai le faisalamo: “Ia olioli foi le lalolagi; Ia taalili mai le sami ma mea ua tumu ai. Ia fiafia lava le laueleele ma mea uma o i ai, ona alalaga fiafia ai lea o laau uma o i le vao matua.”—Salamo 96:11, 12.

O se lalolagi e faamanuia e Lē na Foafoaina ma pulea i le amiotonu e iai sona lumanai matagofie. O loo faamatala mai e le Tusi Paia le iuga o le a oo i ai. “O le alofa ma le faamaoni ua la fetaiai; o le amiotonu ma le filemu ua la feasogi. E tupu ae le faamaoni ai le lalolagi; e vaavaai ifo foi le amiotonu mai le lagi. E foaiina mai e Ieova lava le manuia; e fua mai foi e lo tatou laueleele ona lava fua.” (Salamo 85:10-12) Pe a amataina lena aso, o le a lē toe iai e faavavau ni tulaga matautia i lo tatou lalolagi.

[Ata i le itulau 13]

E pei lava o le tino o le tagata, o loo iai i le lalolagi se malosi e ofo ai e toe faalelei ai ia lava