Sa Leai se Fuafuaga Mautū i Loʻu Olaga ae ua Maua
SEʻI manatu i loʻu teʻi ma loʻu atuatuvale i se tasi taeao po ina ua faafuasei ona fafagu aʻu e ni tamaloloa lapopoa malolosi se toalua o loo suʻeni solo le potu moe. Sa tū loʻu tinā ma vaavaai ane ma le popole tele ma le atuatuvale, e mautinoa lava ua faateʻia o ia. O tamaloloa, o ni leoleo nanā.
Sa vave lava ona ou iloa le mea lea na la sailia. E ui lava sa ou faatagā foliga lototele ma faamalosi atu i fafo, ae i totonu, sa ou lagona le fefe. Sa ou iloa, ua maua e leoleo la matou kegi o tamaiti gaoi i New Jersey, i le Iunaite Setete o Amerika. Sa faatonuina aʻu ma le leo paū e leoleo ina ia fai ni oʻu ofu, ma ave faanatinati atu loa aʻu i le ofisa o leoleo mo le suesueina.
Na faapefea ona ou oo i lenei tulaga leaga? Na amata lava i le taimi a o oʻu laitiiti. A o sefulu ma ona tupu oʻu tausaga, ae ua avea aʻu o se tamaitiiti loto maaa ma solitulafono. I vaitaimi o le 1960, e toatele talavou sa manatu e faapea o se “mea lelei” le avea ma tagata fouvale e aunoa ma se mafuaaga, sa ou ioe i ai ma le loto atoa. O lea, ina ua 16 oʻu tausaga, sa ou tafaofao solo ai i le laulau piliati a se tuaoi, ina ua tuli ese aʻu mai le aʻoga maualuga. O iina na amata ai ona ou auai i se kegi a ni talavou sa latou faia le talepe fale. Ina ua uma ona ou auai ma i latou i le faia o nai gaoiga laiti, sa amata ona avea o se mea ou te fiafia i ai, ma ou faapea ifo e ese foi le manaia o sia faiga.
O lea na amataina ai ma le lē taofiofia se gaoioiga o le talepe ma ulufale faamalosi i fale mo le iva masina. I le avea o se kegi, matou te taulai faapitoa atu ai lava i ofisa o tagata maualuluga, o iina e masani ona teu ai le anoanoai o tupe. O le tele ā o talepe fale matou te faia e aunoa ma le mauaina o i matou, o le faateteleina foi lena o lo matou lotoa. Na iu lava ina matou filifili e gaoia se lālā o le fale tupe tele.
O le uluai taimi lea na amata ai ona iai ni mea sese. E ui sa faigofie ona matou sao i totonu o le fale tupe, ae na alu lena po o feitai i totonu o le fale tupe ona sa na o pusa e teu ai tupe a le au tala tupe na mafai ona matou sao i ai. O se tasi o faafitauli sili ona matuia, ona ua avea lo matou talepeina o le fale tupe ma mafuaaga na aafia ai le Matagaluega a Leoleo Nanā (FBI) i le mataupu. O le suesueina e le FBI o lo matou tulaga, sa lei umi ai lava ae puʻea i matou uma.
O Iʻuga Faanoanoa o le Mea Sese ua Faia
E 78 talepe fale na molia totino ai aʻu ma sa mafatia ai i le maasiasi ina ua tolaulauina auiliili mai ma le leotele i luma o le faamasinoga aʻu solitulafono taitasi. Na faaopoopo lenei mea i faasalalauga uma a nusipepa a le atunuu e uiga i a matou solitulafono, na matuā faalumaina ai oʻu mātua. Ae peitai, o le faalumaina ma le maasiasi na ou faapogaia ia i laʻua, ou te lei popole tele i ai i lena taimi. Sa faasalaina aʻu mo se taimi lē tumau i se nofoaga e faasalaina ai tamaiti talavou, o lona uiga sa ono mafai ona taofia ai aʻu iina seia oo ina atoa le 21 o oʻu tausaga. Ae peitai, ona o taumafaiga a se loia poto, na iu ai ina tuuina atu aʻu i se aʻoga faapitoa e toe faaleleia ai olaga.
E ui lava sa mafai ona ou alofia se faasalaga i le falepuipui, ae o le tuutuuga, sa tatau ona aveesea aʻu mai le nuu ma ē uma na matou auaufaatasi muamua. O le mea lea, na tusia ai loa loʻu igoa i se aʻoga faapitoa i Newark, e gafa tonu ma faafitauli o tamaiti e pei o aʻu. E faaopoopo i lena mea, sa manaomia ona faia ni aʻu lesona faalevaiaso e se tagata suesue tau i le mafaufau ina ia maua ai se fesoasoani sili ona tomai. O nei tulaga uma na totogia e oʻu mātua—ma sa matuā tele ni tupe na la faaaluina ai.
Taumafaiga Ina ia Toe Faaleleia
E mautinoa lava, ona ua salalau tala e uiga i lo matou faamasinoga, na aliai mai ai se mataupu a le faatonu i le nusipepa a lo matou nuu e faapea, “O le Taofia o le Aoaiga.” Sa faitioina e lenei mataupu e faapea, e foliga mai e vāivāi le aoaiga na tuuina atu i lenei kegi. O le uluai taimi lea ua pāʻia ai loʻu loto fuatia ifo e faamatalaga a lenei faatonu. O lea sa ou ʻotieseina ai lena faamatalaga mai le nusipepa ma ou taʻutino ifo ia te au lava e faapea, i se aso, ma i se auala, o le a ou faaleleia ai mea uma na māfua ai ona mafatia, ma faalumaina ai oʻu mātua faapea ma le tele o a la tupe faaalu.
Sa ou mafaufau e faapea, o se tasi o auala e faamaonia ai i oʻu mātua ua mafai ona suia aʻu, o le mafai lea ona faauuina o aʻu mai le aʻoga maualuga i le vasega lea sa ou iai muamua. Sa amata loa ona ou matuā suesue i se tulaga sa lei faapea ona ou faia ai muamua i loʻu olaga. O le iuga, i le faaiuga o le tausaga faaleaʻoaʻoga, a o iai le ofisa o le nofo vaavaaia lea e vaaia aʻu, na ou toe tu ai i luma o le faamasino lea na faasalaina aʻu, o ona foliga sauā na suia i foliga ʻataʻata a o ia mātauina sa ou ausia togi o le B+ i kuata taitasi. O lea, ua tatalaina nei le avanoa mo aʻu ou te toe foi ai i le aʻoga maualuga lea na ou iai muamua, ma na faauuina ai aʻu i le tausaga na sosoo ai.
Faaauau Pea Ona Lē Mautū Loʻu Olaga
I lena taimi i le 1966, a o ō atu i le taua i Vietiname le toatele o aʻu aumea sa matou aʻooga faatasi, ae sa ou alu i le Kolisi o Concord i Virginia i Sisifo. I le Kolisi, na amata ai ona ou tagofia vailaau faasaina, auai i gaoioiga mo le filemu, ma ulu atu ai i se aganuu fou e matuā ese lava, ua oo ai ina ou fesiligia le aogā o aganuu masani. Sa iai se mea na ou sailia, ae ou te lei iloa po o le ā. Ina ua oo mai i aso mālōlō o Talosaga Faafetai (Thanksgiving), nai lo o loʻu alu i lo matou aiga, sa ou faatūtū lifi e malaga ai agaʻi i le itu i saute e sopoia ai Atu Mauga o Blue Ridge ma agaʻi atu ai i Florida.
E lei faapea muamua ona ou faimalaga i se mea mamao, ma sa ou fiafia i lena taimi ona o le matuā tele o nofoaga eseese fou na ou vaaia—o lona uiga, ina ua oo i le Aso o Talosaga Faafetai, na tuuina ai aʻu i le falepuipui i Daytona Beach i le moliaga o le taataasolo e leai se olaga mautū. Sa ou lagona le matuā maasiasi e faafesootai oʻu mātua, ae na faia faapea e leoleo o le falepuipui. Na toe faia foi e loʻu tamā ni fuafuaga e totogi se sala tupe matuā telē nai lo o le faasalaina o aʻu i le falepuipui.
Ou te lei nofo ai i le kolisi ina ua mavae lena mea. Nai lo o lea, i le na o le tasi lava le atopaʻu faapea ma se moomooga fou na oso mai, o le manao e faimalaga, na amata ai foi ona ou toe faimalaga, sa oʻu suesue auala e faimalaga solo ai i lea mea ma lea mea o le atunuu e aunoa ma se fuafuaga o le olaga, ma agaʻi atu i le talafatai i sasaʻe o le Iunaite Setete ma galue i ni galuega lē tumau e tausia ai aʻu. Sa faigata lava ona iloa e oʻu mātua po o fea sa ou iai, e ui lava ina sa fai ma ou asiasi atu ia i laua. Sa ou ofo lava ona e foliga mai e la te fiafia pea e talia aʻu, ae e lē mafai lava ona ou faamautūina loʻu olaga.
Ua ou lē toe iai nei i le kolisi, ua leiloa loʻu pepa e faamaonia ai o aʻu o se tama aʻoga, lea e mafai ona faasaʻoloto ai aʻu mai le auai i le auaunaga i le vaegaau. O loʻu tulaga e avea ai ma se tasi o le vaegaau, ua oo nei i le 1-A, ma ua lē o toe umi se taimi ae valaaulia loa aʻu i le vaegaau. O le manatu i le auai i le vaegaau ma leiloa ai loʻu saʻolotoga fou, ou te lei fia mafaufauina. O lea na ou filifili ai e tuuvaa ese atu ma le atunuu. I le faagasologa o le taimi, na tatalaina ai mo aʻu le avanoa i se galuega fou. Pe ono faapea o se fuafuaga moni lenei i loʻu olaga?
Olaga i le Sami e Avea o se Tagata Faigaluega
O se uo ua leva a lo matou aiga sa avea ma kapeteni o se vaa laʻu oloa a le Iunaite Setete. Na ia taʻu mai ia te au e uiga i se polokalame fou na faavaeina e aʻoaʻoina ai inisinia mo vaa o le gataifale. Sa talia lelei lava aʻu i se polokalame puupuu e lua tausaga, lea ua maua ai aogā e lua, e tolopo ai le auai i tiutefai o le taua, ae faapea foi ma le faamoemoe e maua ai se faailoga tau inisinia o vaa o le gataifale. Sa faauuina aʻu i le 1969 ina ua maua soʻu tusi pasi, ma faamaonia ai o se ofisa inisinia tulaga tolu i le uluai vaa na ou faigaluega ai i San Francisco. Na matou folau atu loa i Vietiname ma se uta o auupega. Sa leai ni mea mataina na tutupu i le malaga, ma sa ou faamavae loa ina ua matou taunuu atu i Singapore.
I Singapore sa ou faigaluega ai i se vaa autū o le fuavaa o vaa sosola, (mai tulafono a iuni o vaa) ua taʻua faapea ona o loo faafaigaluegaina ai tagata uma e lē o auai i le iuni a tagata faigaluega i uafu. Sa faaaogaina lenei vaa e faimalaga i le talafatai o Vietiname, e mai le Fagaloa o Cam Ranh i saute e oo atu i Da Nang i le itu i mātū, e latalata i le sone e lē o nofoia e vaegaau. O iina e lē utuva ai le faalogoina o le pāpā o pomu. Ae peitai, sa aogā lenei alavaa e tusa ai ma le tulaga tau tupe, ma ona o le lamatia i le taua faapea ma le tele o tupe faaopoopo e totogia mo ni taui mo faalavelave pe a osofaia i se taimi, sa ou maua ai se totogi e sili atu i le $35,000 i le tausaga i le faigaluega i le vaa o se isi atunuu. E ui lava i lenei tamaoaiga fou, ae sa tumau pea ona ia te au le lagona lē mautū ma tau manatu ai po o le ā ea le uiga o lenei olaga—o fea o oʻu agaʻi atu i ai?
Ātaāta Mai se Fuafuaga o le Olaga
Ina ua uma se tasi o osofaiga matuā matautia mai auupega a le fili, na amata ai e Albert, o se tagata e vaaia le ogaumu vaivevela o le vaa ona faamatala mai ia te au le auala o le a aumaia ai e le Atua i se aso e lē o toe mamao le filemu i le lalolagi. Sa ou faalogologo ma le naunau i lana faamatalaga uigaese. Ina ua matou toe folau atu i Singapore, na faailoa mai ai e Albert ia te au e faapea, sa avea o ia o se tasi o Molimau a Ieova ae ua lē toe talaʻi. O lea sa ma taumafai faatasi ai e faafesootai Molimau i Singapore. E leai se tasi na maua mai ai se fesoasoani, ae i le po lava lea ae matou te lei tuuvaa ese atu, na maua ai e Albert se mekasini o Le Olomatamata i le potu e ulufale atu ai o se faletalimalo. Sa tusia ai se tuatusi. Ae peitai, sa lei lava se taimi e siaki ai, auā o le taeao na sosoo ai na matou malaga atu ai i Sasebo, Iapani, o iina na fuafua e ave ai le vaa i le uafu ina ia toe faaleleia mo le lua vaiaso.
O iina na matou tuuina atu ai totogi o le auvaa, ma na faamavae ai ma Albert. Ae i le na o le tasi le vaiaso mulimuli ane, na ou teʻi ina ua maua mai se feau faauaealesi mai ia te ia e faailoa mai ai ia te au e faapea, o le a faia se tauaofiaga a Molimau i Sasebo i le faaiuga o le vaiaso o sosoo ai. Sa ou filifili ou te alu ma vaai po o le ā le uiga o lenei tauaofiaga.
I lena aso—Aokuso 8, 1970—o le a lē mafai lava ona galo i loʻu mafaufau. Na ou taunuu atu i le nofoaga o le tauaofiaga i se tamai taavale laupasese, i le laa atu i le lotolotoi o le faitau selau o tagata Iapani, sa ofu mamā tagata uma. E ui lava o le toatele o i latou sa lē mafai ona tautala i sina faa-Peretania, ae foliga mai sa mananao uma lava e matou te lūlū lima. Ou te lei vaai muamua lava i se mea faapea, ma e ui lava ou te lei malamalama i se upu e tasi o le polokalame i le faa-Iapani, ae sa ou filifili o le a ou toe alu foi i le aso na sosoo ai—i le na o loʻu fia iloa pe toe faapena ona faafeiloaia au. Sa ou faia faapea!
Sa matou avea se auvaa fou ma i le vaiaso na sosoo ai, na matou toe folau atu ai i Singapore. O le mea muamua lava na ou faia ina ua taunuu, sa ou alu i se taavale laupasese e suʻe le tuatusi lea e tusia i le mekasini o Le Olomatamata. O se fafine e faaleuo ona uiga na sau i fafo mai le fale ma fesili mai pe mafai ona ia fesoasoani mai. Sa ou faaali ia te ia le tuatusi i Le Olomatamata, ma sa ia valaaulia loa aʻu i totonu. Sa ou feiloai atu ai loa i lana tane ma iloa ai o i laua o ni misionare mai Ausetalia, o Norman ma Gladys Bellotti. Sa ou faamatala i ai le auala na ou maua ai lo la tuatusi. Na la matuā talileleia aʻu ma tali le tele o aʻu fesili, ma na ou alu ma le ato fai faatauga ua tumu i lomiga faale-Tusi Paia. I le faagasologa o ni nai masina, a o folau atu i le talafatai o Vietiname, na ou faitauina ai le tele o na tusi e aofia ai ma le tusi, O Le Upu Moni E Taʻitaʻi Ai I Le Ola Faavavau.
O le uluai taimi lea i loʻu olaga, na logo ai i oʻu tino le uiga o le iai o se fuafuaga moni ma taʻiala o le olaga. Ina ua toe foi le malaga i Singapore, na ou faamavae ai mai le vaa.
Se Feiloaiga Lē Fiafia ma le Aiga
O le uluai taimi foi lea na ou lagona moni ai loʻu toe fia foi i le aiga. Ma i ni nai vaiaso mulimuli ane, na ou taunuu ai i loʻu aiga ma le matuā fiafia lava, i le manao e taʻu i tagata o loʻu aiga mea uma e uiga i Molimau a Ieova. Sa latou lē fiafia i loʻu aasa faalotu lea na ou alu atu ma aʻu. Sa talafeagai lava lea tulaga ona sa lē lelei laʻu amio. E na o ni nai vaiaso talu ona ou iai i le aiga, ae ina ua oso loʻu ita, sa ou talepeina ai se fale kalapu i le aai. Ou te toe malamalama aʻe ua ou i totonu o le sela o le falepuipui.
O le taimi lea na amata ai ona ou talitonu e faapea, e leai se faamoemoe moni e mafai ona suia loʻu olaga ma pulea loʻu loto ita. Atonu o le a avea pea aʻu ma tagata fouvale e aunoa ma se mafuaaga. Sa ou lagona e faapea, e lē mafai ona ou toe nofo ai pea i loʻu aiga. Sa tatau ona ou alu ese. O lea, i ni nai aso, na totogi ai loa loʻu pasese i se vaa laʻu oloa mai Norway e alu atu i Egelani.
Egelani ma le Aʻoga e Aʻoaʻo ai Tāga ma le Tautala
Sa ou fiafia lava i loʻu iai i Egelani, ae o le faafitauli o le leai o se galuega. O lea na ou filifili ai ou te alu ou te suʻe i aʻoga eseese mo tagata faafiafia, ma na ou ofo ina ua talia aʻu i le Aʻoga e Aʻoaʻo ai Tāga ma le Tautala i Lonetona. O le lua tausaga na ou iai i Lonetona, sa faaalu i le onā, evaevaga, ma le mea moni, o le tagofia o so o se ituaiga o vailaau faasaina.
Na faafuasei lava ona oso mai loʻu manao ou te toe fia asiasi lava e vaai loʻu aiga i le Iunaite Setete. Ae seʻi e manatu i le matuā faateʻia o i latou i lea taimi i oʻu foliga atu? Sa ou asoaina se pulupulu uliuli ma ni ulu leona auro se lua sa faamau faatasi i se filifili auro i le ua o le pulupulu, o se peleue veloveta mūmū e gata i sulugatiti, ma le ofuvae veloveta uliuli e iai teuteu paʻu e sulu i totonu o seevae uumi e pau i tuli. E lē o se mea e ofo ai ona sa iloa gofie atu lava le lē fiafia o oʻu mātua, ma sa lē taitai fetaui aʻu teuga ma lo la siomaga masani! O lea na ou toe taliu ai i Egelani, o iina, i le 1972, na maua ai loʻu tusi pasi i le tomai e faatinoina tāga o tala. Na ou toe ausia ai foi i lena taimi se isi sini. Ae sa faatalatala mai pea le fesili e faapea, O fea se isi mea o le a ou agaʻi atu i ai? Sa ia te au pea le lagona e manaomia se fuafuaga moni o le olaga.
Ua Iʻu Ina Faaiuina Loʻu Lē Mautū
E lei umi lava se taimi talu ona mavae o lenei mea, ae amata loa ona ou lagona le oo mai o se tulaga mautū i loʻu olaga. Na amata lava i sa ma faauooga ma loʻu tuaoi o Karoline. O ia o se faiaʻoga mai Ausetalia, ma o se tagata e maopoopo ma faatoʻatoʻa—o le tuufaafeagai lava o oʻu uiga. Sa ma uo mo le lua tausaga e aunoa ma le iai o se lagona alofa fetosinaaʻi. Na tuua e Karoline Egelani mo Amerika mo le tolu masina, ma ona o le lelei o la ma faauooga, na ou fuafuaina ai mo ia e nonofo ma oʻu mātua mo ni nai vaiaso. Atonu sa tau mānatu loʻu aiga pe aisea ua ia manao ai e faauo ma se ituaiga o tagata e pei o aʻu.
E lei pine lava talu ona alu ese atu Karoline, na ou taʻu atu ai i aʻu uo e faapea, o le a ou alu foi aʻu i loʻu aiga, ma na latou faia se faamavaega tele mo aʻu. Ae nai lo o le foi atu i Amerika, sa na ona ou alu atu i South Kensington, i Lonetona, o iina na ou nofo ai i se fale mautotogi ma telefoni atu i le ofisa o le lālā o Molimau a Ieova i Lonetona. Sa oo ai ina ou iloa le auala e tatau ona ou ui ai. Pe ā ma le vaiaso, ae asiasi mai ia te au se ulugalii laufofoga fiafia ma fuafua loa e faia se suesuega faale-Tusi Paia e lē aunoa. Ona o lomiga a Molimau ia na ou faitauina, o lea sa ou matuā naunau ai i le suesuega ma talosaga atu ina ia faia faalua i le vaiaso. I le vaai mai i loʻu naunau, na lei pine ai lava ae valaaulia aʻu e Bob e faatasi atu i le Maota o le Malo, ma e lei umi se taimi, ae ou auai loa i sauniga uma lava faalevaiaso.
Ina ua ou iloaina e lē ulaula Molimau a Ieova, sa ou filifili ai loa e lafoai lea masaniga. Ae faapefea oʻu foliga atu? Ou te lei toe manao ina ia mataina aʻu, o lea, sa ou faatauina ai se ofutino, se fusiua, ma se suti. E lei pine ae ou agavaa loa e faia se sao i le galuega talaʻi mai lea fale i lea fale—ma e ui lava sa ou fefe i le taimi muamua, ae sa oo lava ina ou fiafia i ai.
Sa ou manatu, o le a ofo tele Karoline pe a foi mai. O lenei mea, sa lē lava ni upu e faamatala ai! Sa matuā maofa o ia i suiga na ou faia i se taimi e matuā puupuu lava—i aʻu teuga ma oʻu foliga ma le tele lava o isi auala. Sa ou faamatala i ai le auala ua fesoasoani ai aʻu suesuega faale-Tusi Paia ia te au ma valaaulia foi o ia ina ia faia se suesuega faale-Tusi Paia. Muamua, sa lē mautonu o ia, ae na iu ina loto malie, ma tausisi mai e mafai ona ia suesue pe afai e ma te suesue. Sa ou fiafia tele i le vaai atu, maeu lona vave tali mai, ma e lei umi lava se taimi ae amata ona ia talisapaia le upu moni o le Tusi Paia.
Ina ua mavae ni nai masina, na manatu ai Karoline e toe foi i Ausetalia, ma sa faaauau ai lana suesuega faale-Tusi Paia i Sini. Sa ou nofo pea i Lonetona seia oo ina ou papatiso i le fitu masina mulimuli ane. O lea la ua ou manao ou te toe alu i loʻu aiga i le Iunaite Setete e fia vaai i loʻu aiga uma. Ae peitai, o le taimi lea sa ou maumauai ai i le fia ausia o loʻu sini!
Foi i le Aiga ma se Suiga Ese
Sa fia iloa e loʻu aiga fenuminumiai po o le ā le mea ua tupu i lena taimi—sa ou foliga faaaloalogia tele! Ae sa ou fiafia i le lagona e faapea ua ou iai moni i le aiga. E ui lava sa ofo oʻu mātua e uiga i le suiga uigaese ua ou faia, ae sa la tali mai ma le faautauta ma le matuā agalelei, ma le faapalepale e pei ona masani ai. I masina mulimuli ane, na ou maua ai le faaeaga o le faia o se suesuega faale-Tusi Paia ma i laua. Sa ou amataina se suesuega ma oʻu tuafāfine matutua e toalua, o ē e lē taumatea na taaʻina ona o le suiga na faia i loʻu olaga. Ioe, o le toe foi moni mai lenei i le aiga!
Ia Aokuso 1973, na ou tuliloa atu ai Karoline i Ausetalia ma sa ou fiafia e vaai atu ua papatisoina o ia faatasi ma le isi 1,200 na papatisoina i le tauaofiaga faavaomalo a Molimau a Ieova na faia i le 1973. Na ma faaipoipo i le faaiuga o le vaiaso na sosoo ai i Canberra, le laumua o Ausetalia. O iina na ou auauna ai faataimi atoa i le galuega talaʻi i le 20 tausaga ua mavae, ma avea o se toeaina i le faapotopotoga mo le 14 tausaga.
Faafetai i le lagolagosua a laʻu avā, ua ma tausia aʻe se fanau e toatolu—o Toby, Amber, ma Jonathan. E ui lava ina matou fesagai ma faafitauli masani o le aiga, ae ua mafai pea ona ou auai i le galuega talaʻi faataimi atoa e avea o se paeonia, ma i le taimi lava e tasi sa mafai ona tausia manaoga faaletino o loʻu aiga.
I aso nei, i le Iunaite Setete, ua avea ai oʻu mātua o ni auauna tuuina atu a Ieova, ma e ui lava ua taʻi 80 nei o la tausaga, ae o loo faia pea so la sao i le talaʻiina atu o le Malo i le lautele. O loo galue loʻu tamā o se auauna o le faiva i la latou faapotopotoga. O loo maelega foi oʻu tuafāfine matutua e toalua i le auaunaga a Ieova.
Maeu loʻu matuā faafetai ia Ieova le Atua ona ua mavae atu nei loʻu fealualuai solo ma se olaga lē mautū na ou iai! E lē gata na ia fesoasoani ia te au e aʻoaʻoina le auala aupito sili ona lelei e faaaogā ai loʻu olaga, ae ua ia faamanuia foi ia te au i le mauaina o se aiga autasi ma le manatu mamafa.—E pei ona faamatalaina e David Zug Partrick.
[Ata i le itulau 23]
O David ma lana avā, o Karoline