Le Asiasiga a le Pope i Malo Aufaatasi—O le ā se Mea na Faataunuuina Ai?

I LE vaalele na lele ai o ia i luga aʻe o le Atalani ina ia lauga atu i Malo Aufaatasi i le Aai o Niu Ioka, na ausia ai e Pope Ioane Paulo II se matātiʻa e 620,000 maila (1,000,000 kilomita) i ana faigamalaga i le lalolagi. O le aso 4 lea o Oketopa 1995, ma o lona 68 ai lea o ana malaga i le lalolagi aoao i le avea o se pope. Ma le mautinoa la, o ia o se pope ua aupito sili ona tele ana malaga i le talafaasolopito o le Lotu Katoliko Roma.

Na taunuu o ia i le Malae Vaalele Faavaomalo o Newark, i New Jersey, i le Aso Lulu a o maligi lava timuga, na siosiomia e se tasi o vaega aupito sili o le saogalemu ua faapea ona faavaeina mo le puipuiga o so o se tagata mamalu. O se faatatauga e faapea, e tusa ma le 8,000 tagata faigaluega o le malo ma le aai na tofia e puipuia le pope. Na taʻua i se tasi lipoti lenei mea e faapea “o se puipuiga na matuā faia ma le faaeteete mo le saogalemu atoatoa,” na aofia ai helikopa ma tagata māulu.

O le ā le Pogai o le Asiasiga?

I lana lauga ina ua taunuu i le malae vaalele, na toe manatua ai e le pope le lauga a lē na muamua ia te ia, o Pope Paulo VI na lauga atu ai i le Fono Aoao a Malo Aufaatasi e talosaga ai mo le filemu e faapea: “Ia lē toe iai ni taua, aua lava neʻi toe iai ni taua!” Na faapea mai Pope Ioane Paulo II, na toe foi mai o ia i Malo Aufaatasi “e faailoa atu [lona] talitonuga maumauai e faapea, o manatu ma faanaunauga na māfua ai ona faavae le Malo Aufaatasi i le ʻafa senituri ua mavae, ua sili atu ona manaomia i se lalolagi o loo saili mo se fuafuaga.”

I talosaga afiafi na faia i le malumalu o le Sacred Heart i Newark, na toe faailoa ai foi e le pope lona lagolagoina o Malo Aufaatasi i lona faapea mai: “Ua iai lena faalapotopotoga ina ia auauna mo le lelei lautele o le aiga faaletagata, ma ua fetaui ai mo le pope ona lauga iina e molimau mo le faamoemoe o le Tala Lelei.” Na ia faaopoopo mai: “O lea la, o a tatou tatalo mo le filemu, o se tatalo foi mo le Faalapotopotoga a Malo Aufaatasi. Ua iloga . . . Sagato Falanisisi o Assisi i lona matuā naunau ma lona agavaa i le aumaia o le filemu. Seʻi o tatou talosaga atu mo lana fesoasoani i taumafaiga a Malo Aufaatasi mo le faamasinoga tonu ma le filemu i le lalolagi atoa.”

I lana lauga i Malo Aufaatasi, na ia viiviia ai suiga faapolotiki e aunoa ma ni faiga sauā na faia i Europa i Sasaʻe i le 1989, lea na toe faafoisia ai le saʻolotoga o nisi o atunuu. Sa ia faalaeiauina tagata ina ia faaalia le “lotonuu moni” e ese mai i le “lotonuu faavalevalea ma le faailoga tagata.” Sa ia lauga e uiga i le lē faamasinotonu o lenei faiga o mea i le faapea mai: “Pe a pagatia le faitau miliona o tagata i le mativa o lona uiga o le fiaʻai, maʻi ona o le lē lava o meaʻai paleni, faamaʻi, le lē iloa faitau ma tusitusi, ma le lē tagolima, e tatau ona tatou . . . faamanatu ia i tatou lava e faapea, e leai se aiā a se tasi e faaleaga ai fua le isi ina ia faia ai ni lelei mo ia.”

Ona ia faapea mai lea: “A o tatou fesagai ma nei luʻi matuā tetele, e faapefea ona tatou lē amanaiaina le vaega ua faia e le Faalapotopotoga a Malo Aufaatasi?” Na ia faapea mai, e manaomia “ona avea le Malo Aufaatasi ma lagolagosua autū o amioga mamā, e faatoafilemu ai atunuu uma o le lalolagi.” Sa ia faamamafaina le manaomia ona siitia “le autasi o le aiga atoa faaletagata.”

Filemu Moni—Mai le ā le Puna?

Ma le mautinoa, sa ia faaalia le tele o ni saafiafiga maualuluga. Peitai, i lana lauga umi, pe na iai se taimi na ia tataʻi atu ai manatu o taʻitaʻi o le lalolagi i le vaifofo a le Atua mo faafitauli o tagata—le pulega a lona Malo e ala ia Iesu Keriso? (Mataio 6:10) E leai. O le mea moni, e na te lei siiina mai lava se mau mai le Tusi Paia i lana lauga i Malo Aufaatasi. I le tuufeagai ai, na ia faapea mai, “i le fesoasoani o le alofa o le Atua, o le a mafai ai ona tatou fausia i le isi senituri ma le isi meleniuma o loo sau se tupulaga malamalama ua tatau ona maua ai e tagata se aganuu moni o le saʻolotoga.” I tagata aʻoga o le Tusi Paia, o lena saafiafiga e foliga mai ua faaleoina atu ai se saafiafiga faapena na faia e i latou sa i Papelu anamua ua sili atu i le 4,000 tausaga ua mavae, o ē na manatu e mafai ona latou aufaatasia tagata i lo latou faapea mai: “O mai ia, ina tatou fai ia o se aai, ma se ʻolo, ia oo lona tumutumu i le lagi, ia tatou faia foi se mea e taʻua ai i tatou.” (Kenese 11:4) O lea, e tusa ai ma lenei manatu e faapea, o taʻitaʻi faapolotiki faaletagata, o loo iai o latou sui i Malo Aufaatasi, o le a latou fausia se tupulaga fou o le malamalama e faavae i le saʻolotoga.

Ae o le ā ua valoia e le Tusi Paia e faatatau i le lumanai o malo faapolotiki a tagata ma le Malo Aufaatasi lava ia? Ua aumaia i le tusi o Tanielu ma le Faaaliga se vaaiga manino e uiga i le lumanai lea o loo faatali mai mo i latou. Na valoia e Tanielu e faapea, i ona aso e gata ai, o le a faatuina ai e le Atua le pulega a lona Malo, e pei o se maa tele ‘e lei tofia mai e lima o se tagata.’ O le ā le gaoioiga o le a ia faia? “O ona po o ia tupu e faatuina ai e le Atua o le lagi o le malo e le faaumatia; . . . na te tuʻimomomoina ma faaumatia ia malo uma lava, a o ia e tumau lava e faavavau.” O le a suia malo faaletagata i le pulega amiotonu e tasi mo tagata uma lava.—Tanielu 2:44, 45.

O le ā le mea o le a tupu i Malo Aufaatasi? Ua faamatalaina i le Faaaliga mataupu e 17 le Malo Aufaatasi (ma Malo Sosoo lea na iai mo sina taimi puupuu, ua suitulaga ai Malo Aufaatasi) e faapea o se manufeai mūmū, e faapea “e alu atu foi o ia i le malaia.” (Faaaliga 17:8)a O le auala a Ieova i le filemu moni, e lē o se sui faaletagata lē lelei atoatoa, e tusa lava po o le ā le faamaoni o ona sui lagolago. O le filemu moni o le a aumaia e ala i le Malo folafolaina o le Atua i aao o Iesu Keriso ua toe faatūina i le lagi. O le faavae lena mo le faataunuuina o le folafolaga a le Atua i le Faaaliga 21:3, 4: “Faauta! ua i ai le afioaga o le Atua faatasi ma tagata, e mau foi o ia ma i latou; e fai foi i latou mona nuu, e ia te i latou le Atua lava. E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”

Le Asiasiga—O le ā le Tele o Lona Aafiaga?

Ina ua faasino atu le pope i le Tusi Paia i lana lauga, pe na faalaeiauina faamaoni ai tagata Katoliko e aumai a latou Tusi Paia ma siaki faamatalaga ia na taʻua? O le mea moni o le toatele lava e latou te lei aveina ni Tusi Paia. E seāseā ona faia e le pope se faasinoga patino e faafaigofie ai i le aofia ona faitau le Tusi Paia.

O se tasi o faaaoaoga, o le taimi lea na ia lauga atu ai i se aofia e 83,000 na iai i le malae taalo o le Giants Stadium, New Jersey, ma faapea atu: “O loo tatou faatalitali atu i le toe afio mai o le Alii e faamasino i ē o ola ma ē ua oti. O loo tatou faatalitali atu i lona toe afio mai i le mamalu, le oo mai atoatoa o le Malo o le Atua. O le valaau maumauai lena a le salamo: ‘Ina faatalitali atu ia ma le loto tetele i le Alii, ina faamalolosi ia o outou loto, ma faatalitali i le Alii.’” Ae o lē fea mau o le salamo na ia sii maia? Ma o lē fea Alii na ia faasino atu i ai—o Iesu po o le Atua? (Faatusatusa i le Salamo 110:1.) E tusa ai ma le faamatalaga a le nusipepa a le Vatikana o le L’Osservatore Romano, na ia sii mai le Salamo 27:14, lea o loo faitauina saʻo e faapea: “Ia e faamoemoe ia Yahweh, ia e faamalosi, ia faamalosia lou loto, ia e faamoemoe ia Yahweh.” (The Jerusalem Bible) Ioe, e tatau ona tatou faamoemoe ia Yahweh, po o Ieova, le Atua o le Alii o Iesu.—Ioane 20:17.

I le faagasologa o le talafaasolopito, po ua mafai ea e patele ma taʻitaʻi o le Katoliko ona faapogaia le filemu i atunuu? Po ua mafai ea e aʻoaʻoga faa-Katoliko ona galue mo le foiaina o feeseeseaiga i tagata o atunuu, lanu, ma ituaiga? O fefasiotiaiga matautia na faia i Rwanda i le 1994, i Aferika tutotonu i le itu i sasaʻe, ma taua matautia i nai tausaga ua mavae i le va o ituaiga i totonu o le vaega na taʻua muamua o Yugoslavia, o nei mea uma, ua faaalia ai e faapea, o talitonuga faalotu e masani lava ona lē taulau i le faaiuina o le feitagai ma faiga faaituau ua mauaa i loto o tagata. E lē avea le faia o kofesio i vaiaso taitasi, po o le auai e lē aunoa i le Misasā ma pogai o le a suia ai mafaufauga ma amioga a tagata. E tatau ona iai se taaʻiga matuā malosi i tagata, lea e faatoʻā mafai ona oo mai i le na o le faatagaina o le Afioga a le Atua ia pāʻia le loto ma le mafaufau o le tagata talitonu.

O le suia o amioga a se Kerisiano moni e lē faavae i uiga o faalogona ootia e aumai e faiga masani faalotu, ae e faavae i le malamalama po o le ā le finagalo o le Atua mo tagata taitoatasi. Na taʻua e le aposetolo o Paulo e faapea: “Aua tou te amio faatasi ma le lalolagi o loo siomia ai outou, a e peitai ia suia a outou amio, ia toe fuataiina i o outou mafaufau ua faafouina. E na o lenei lava le auala e iloa ai le finagalo o le Atua ma iloa ai le mea lelei, le mea e finagalo i ai le Atua, ma le mea e atoatoa ona lelei e faia.” (Roma 12:1, 2, JB) O lenei amioga fou e maua e ala i le suesueina o le Afioga a le Atua e maua ai le poto saʻo e uiga i lona finagalo. E faatupuina ai se malosi faaleagaga e fuataiina ai le mafaufau ma iu ai i le faia o amioga faa-Kerisiano.—Efeso 4:23; Kolose 1:9, 10.

Po o Iai le Lotu i se “Tulaga Faigata”?

Ua faamatalaina e le nusipepa a Sepania o le El País ia Pope Ioane Paulo II e faapea e ia te ia se “malosi uigaese” mo se tagata ua 75 tausaga, ma na taʻua o ia e se nusipepa a le Iunaite Setete e faapea “o se matai o fesootaiga.” E tomai tele o ia i le feagai ai ma le ʻau fainusipepa ma i le faia o ni faiā ma le anoanoai o tagata ma a latou fanau. I ana faigamalaga, e avea ai o ia ma sui o le Pulega Paia a le pope o loo i totonu o le aai o le Vatikana. E ui lava ina iai le faailoga aloaia a le Vatikana i le Malo Aufaatasi, ae o le faamanuiaga a le pope i lena faalapotopotoga, o le a lē faamaonia ai e faapea, o le faamanuiaga lena a Ieova le Atua.

E eseese lava uiga na faaalia i le asiasiga a le pope. O le toatele o tagata Katoliko na maua pepa e ulufale atu ai i le Misasā na faia i fafo, na faagaeetia o latou faalogona i le mea na tupu. Ae peitai, sa sili ona lē manatu mamafa i ai nisi o taʻitaʻi Katoliko i le asiasiga ma iuga e ono maua mai ai. Na sii mai e le New York Times le faamatalaga a Timothy B. Ragan, le peresitene o le Nofoaga Tutotonu Faale-Malo a le Katoliko mo le Taʻitaʻiga Faafaifeau (Catholic National Center for Pastoral Leadership) e faapea “ua misia e le asiasiga a le Pope lona avanoa lelei. E ui lava o le malaga ‘sa faagaeetia ai ona o le faia o le misasā lea sa avea ma mea tāua i tagata e toatele,’” ae i le toatele o taʻitaʻi Katoliko, e lei maua ai i lea asiasiga “se avanoa e faalogologo mai ai le pope lava ia, ma e lei sauniuni e fefaaaliai ni fuafuaga po o ni manatu.” Ua lagona e le toatele o tagata Katoliko e faapea, e lē o tuuina atu ia te i latou se avanoa e faaali ai o latou manatu e uiga i mataupu e pei o le nofofua, faatapulaaina o le faia o fanau, ma le tatalaina o faaipoipoga, ae ua faamalosia i latou e na ona faalogologo atu a o lauga mai le pope.

Ua iloa manino lava e nisi tagata maualuluga o le Katoliko e faapea, “ua iai le lotu i se tulaga faigata,” ma ua popole i latou e faapea, o le a toatele tagata Katoliko, “ae maise lava le ʻau talavou, ua leai se lagona maʻoti po o le ā tonu le uiga o le avea ma tagata Katoliko.” O James Hitchcock, o se tagata e tausisia uputuu faa-Katoliko, “ua ia iloa le faafitauli e faapea o se feteenaiga faaupufai e matuā faaleagaina ai le va o se pulega ua faateleina lona maumaututū i uputuu a le lotu ma le vaega o loo faatautaia o ‘patele ma taupousa.’”

I le po o le a faapefea ona aafia i le asiasiga a le pope ia le faafitauli i le tulaga lelei o le lotu, na taʻua ai e Hitchcock e faapea: “Ua sau o ia iinei, ua viiviia o ia, ua alu i lona aiga—ma e leai se mea ua ia faataunuuina. O iuga i loʻu manatu, o se mea e matuā lē fiafia ai.” E mautinoa lava ua misia e le pope le avanoa e taʻu atu ai i taʻitaʻi faapolotiki i le Malo Aufaatasi le mea e maua ai le puna o le filemu moni.

E ui lava o loo faamamafa i le Tusi Faavae a Malo Aufaatasi ma taumafaiga a tagata le sini o le “filemu ma le saogalemu,” ae aua neʻi faaseseina ai. Ua lapatai mai le Tusi Paia: “Auā pe a latou fai ane, ‘O loo filemu, ua le afaina,’ [“saogalemu,” NW] ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.” (1 Tesalonia 5:3) O le filemu moni ma le saogalemu e na o le finagalo lava o le Atua e mafai ai ona oo mai, ma i lana lava auala—e ala mai i le pulega a lona Malo, ae lē ala i Malo Aufaatasi.

[Faaopoopoga i lalo]

[Ē Ana le Ata i le itulau 24]

UN photos