E Leai se Filemu mo Avefeau Pepelo!
“E faaumatia o e fai amio leaga . . . A o e agamalu, e fai mo latou le nuu; e faafiafia foi i latou ia te i latou ona o le manuia [“filemu,” NW] e tele.”—SALAMO 37:9, 11.
1. Aisea e tatau ai ona tatou faatalitalia le iai o ni avefeau moni ma ni avefeau pepelo i “ona po o le iuga”?
AVEFEAU—pepelo pe moni? Sa iai ituaiga uma na e lua i vaitaimi anamua o le Tusi Paia. Ae faapefea i o tatou aso? I le Tanielu 12:9, 10, ua tatou faitau ai i le avefeau faalelagi lea na faapea atu i le perofeta a le Atua: “Ua punitia ma faamaufaailogaina o upu seia oo i ona po o le iuga. E toatele e faamamāina, ma faasinasinaina, ma tofotofoina; a e agasala o e agasala, e le lagona foi so latou e toatasi o e agasala; a o e popoto e lagona lava i latou.” O loo tatou soifua nei i na “ona po o le iuga.” Pe o tatou vaaia ea se eseesega maʻoti i le va “o e agasala” ma “e popoto”? E mautinoa lava o loo tatou vaaia!
2. Ua faapefea ona faataunuuina le Isaia 57:20, 21 i aso nei?
2 I le mataupu e 57, fuaiupu e 20 ma le 21, ua tatou faitauina ai upu a le avefeau a le Atua o Isaia e faapea: “O e amio leaga e tusa i latou ma le sami ua sousou, e le mafai ona toʻa filemu; a e lafoia ae e le suāsami le eleele ma le palapala. Ua fetalai mai loʻu Atua, E leai se filemu i e amio leaga.” Maeu le talafeagai o le faamatalaina e nei upu o lenei lalolagi a o latalata atu i le lona 21 o senituri! Ua oo lava ina fesili nisi, ‘Faamata ea tatou te aulia atu lena senituri?’ O le ā se tala mai a avefeau popoto ia i tatou?
3. (a) O le ā le faaeseesega o loo faia i le 1 Ioane 5:19? (e) Ua faapefea ona faamatalaina ‘ē o iai le poto’ i le Faaaliga mataupu e 7?
3 Sa iai i le aposetolo o Ioane se poto na faagaeeina e le Atua. I le 1 Ioane 5:19, ua taʻua ai: “Ua tatou iloa e mai le Atua lava i tatou, a o le lalolagi uma o loo nofo toilalo i loo leaga.” I se faaeseesega i lenei lalolagi, ua iai le 144,000 o Isaraelu faaleagaga, ma o loo tatou faatasi pea ma se vaega totoe o i latou o ē ua faasolo ina matutua o latou soifua. Ua aufaatasi atu ia i latou nei “le motu o tagata e toatele mai atu nuu uma, ma aiga, ma nuu, ma gagana eseese,” lea ua silia nei ma le lima miliona lo latou aofai, ua ia i latou foi le poto. “O i latou ia o e o mai nai le puapuaga tele.” Ma aisea ua tauia ai i latou? Talu ai “ua ta foi o latou ofu, ma ua faasinasinaina o latou ofu i le toto o le Tamai mamoe” e ala i le faaalia o le faatuatua i le taulaga a Iesu. Ona o ni avefeau o le malamalama, ua latou ‘auauna ai foi i le Atua i le ao ma le po.’—Faaaliga 7:4, 9, 14, 15.
O Ē ua Faapea Mai o Avefeau o le Filemu
4. (a) Aisea ua lē taulau ai i latou ua taʻua o avefeau o le filemu i le lalolagi a Satani? (e) E faapefea ona faatatauina le Efeso 4:18, 19 i aso nei?
4 Ae faapefea la, i latou ua taʻua o avefeau o le filemu o loo iai i le faiga o mea faalelalolagi a Satani? I le Isaia mataupu e 33, fuaiupu e 7, ua tatou faitau i ai e faapea: “Faauta, e alalaga o latou tagata totoa i fafo; e tagi lotulotu o le sāvali o le faaleleiga.” Maeu le moni o lenei mea ia i latou o loo femalagaai solo ma le lē mautonu mai le laumua o lea malo i lea malo mo ni taumafaiga i le aumaia o le filemu! Ae pagā se lē taulau! Aisea ua lē taulau ai? Talu ai latou te faafetauia āuga o tulaga malaia o le lalolagi, nai lo le sagai atu e tilofaia mafuaaga autū. Muamua lava, latou te lē iloa o loo iai Satani, o lē ua faamatalaina e le aposetolo o Paulo o “le atua o le lalolagi nei.” (2 Korinito 4:4) Ua totoina e Satani fatu o le amioleaga i tagata, lea ua iu ai i le toatele o tagata, e aofia ai le toatele o taʻitaʻi o malo, ua fetaui ia i latou le faamatalaga i le Efeso 4:18, 19 e faapea: “O loo faapouliuligia o latou mafaufau, o liliueseina i latou i le ola o i le Atua, ona o le valea ua ia i latou, ona o le maaa o latou loto. Ua latou le lagona se mea, ua tuuina atu i latou e i latou i le matāitu, e fai mea leaga uma lava ma le tuʻinanau i ai.”
5. (a) Aisea ua lē taulau ai faalapotopotoga a tagata i le avea o ni ē faatupu le filemu? (e) O le ā le feau faamafanafanaloto ua faaoo mai e le Salamo 37?
5 E leai se faalapotopotoga a tagata lē lelei atoatoa e mafaia ona liaiesea mai loto o tagata le matapeapea, le manatu faapito, ma le ʻinoʻino, lea ua taatele i aso nei. E na o Lē na Foafoaina i tatou, o le Alii Pule Silisili Ese o Ieova, e mafaia ona fai lena mea! E lē gata i lea, e na o ē agamalu, o sina vaega toalaiti o tagata, o ē o loo loto malilie e gauai atu i ana taʻiala. O iuga mo i latou nei ma ē amioleaga o le lalolagi ua faaeseese mai i le Salamo 37:9-11: “E faaumatia o e fai amio leaga; a o e faatalitali ia Ieova, o i latou lava ia e fai mo latou le nuu. E toe itiiti, ona leai lea o le tagata amio leaga . . . A o e agamalu, e fai mo latou le nuu; e faafiafia foi i latou ia te i latou ona o le manuia [filemu] e tele.”
6, 7. O le ā le talaaga o lotu a le lalolagi e faaalia ai ua lē taulau ona latou auauna o ni avefeau o le filemu?
6 Pe mafai ea la ona maua i lotu o lenei lalolagi faamaʻia, ni avefeau o le filemu? Ia, o le ā le talaaga o lotu o loo iai i le taimi nei? Ua faaalia i talafaasolopito e faapea ua auai lotu, ioe, ua oo lava ina avea lotu ma taʻimua o le tele o le faamasaatoto i le gasologa o senituri. Mo se faaaoaoga, i le Christian Century o le vaiaso o Aokuso 30, 1995, i lana lipoti i le tulaga sili ona pagatia i le atunuu sa avea muamua ma Yugoslavia, na taʻua ai e faapea: “I Bosnia lea e pulea e le veaga o le Serb, o loo saoaluma ai patele i palemene a le ʻau Serb lava latou, ma o loo iai foi i tafā o taua, o loo talosia ai le manuia mo vaegaʻau, e oo foi i auupega, a o lei amataina taua.”
7 E leai foi ni iuga lelei na maua mai le senituri o le galuega faamisionare a Kerisinetoma sa faia i Aferika, e pei ona sa faataitai manino mai i Rwanda, o se atunuu i lona tulaga lautele e 80 pasene o tagata e Katoliko. Na taʻua mai e le New York Times o Iulai 7, 1995, e faapea: “Ua fuafuaina e le Golias, o se mekasini saʻoloto, a tagata lotu Katoliko na lomia i Lyons [Falani], ina ia faailoaina mai le isi toʻa 27 o patele Rwanda ma taupousā e toafā, o ē ua taʻua na latou fasiotia pe na latou uunaia fasiotiga tagata sa faia i Rwanda i le tausaga ua mavae.” O le African Rights, o le faalapotopotoga o aiā tatau a tagata i Lonetona, na latou faia mai lenei faamatalaga: “Ua lē gata i le tuuaʻia o lotu i le gūgū pea, ae ua tuuaʻia foi i gaoioiga o loo faia pea e nisi o ona patele, o fesoasoani ma taupousa i le fasiotiga o se ituaiga o tagata.” Ua faaatagia mai i lenei mea le tulaga i Isaraelu ina ua faamatalaina e le avefeau moni a Ieova, o Ieremia, le “faamaina” o Isaraelu, ma ona tupu, ma ona ositaulaga, ma ona perofeta, i le faapea atili mai: “Ua iloa i ou lava pito ofu le toto o le ola o e matitiva e le sala.”—Ieremia 2:26, 34.
8. Aisea e mafai ai ona faapea atu o Ieremia sa avea o se avefeau o le filemu?
8 Ua masani ona faaigoa Ieremia o le perofeta o le malaia, ae mafai foi ona faaigoa o ia o le avefeau o le filemu a le Atua. Sa tele ina faasino atu ana upu i le filemu e pei foi ona sa faia e Isaia lea na muamua atu ia te ia. Sa faaaogā e Ieova Ieremia, ina ia folafola atu le faamasinoga o le a oo ia Ierusalema, i le faapea atu: “Ua faia lenei aai ia te au ma mea ou te tiga ai, ma mea ou te ita ai, talu mai le aso na faia ai, ua oo lava i le aso nei, ina ia ou aveeseina ai i oʻu luma; ona o amio leaga uma a le fanauga a Isaraelu, ma le fanauga a Iuta, ua latou faia e faaonoono ai ia te au, o i latou, o latou tupu, o latou alii, o latou faitaulaga, ma o latou perofeta, ma tagata Iuta, atoa ma e o nonofo i Ierusalema.” (Ieremia 32:31, 32) Ua faaatagia mai i lenei mea le faamasinoga a Ieova i pule ma taʻitaʻi lotu i Kerisinetoma i aso nei. Ina ia tupu olaola le filemu moni, e tatau ona aveesea i latou nei o loo taulamua i mea leaga ma faiga sauā! Ua mautinoa lava e lē o latou o ni avefeau o le filemu.
Po o Malo Aufaatasi e Faatupuina le Filemu?
9. Ua faapefea ona faapea mai Malo Aufaatasi o ia o le avefeau o le filemu?
9 Pe ua lē mafai ea ona avea Malo Aufaatasi ma avefeau moni o le filemu? Ae maise lava, o le faatomuaga o lana feagaiga, lea na faaofi atu ia Iuni 1945, i le na o le toe 41 aso a o lei faatamaia Hiroshima e le pomu atomika, na taʻua ai lana fuafuaga: “ia faasaoina augātupulaga fāimai i le matautia o le taua.” Sa tatau i sui e toʻa 50 sa fuafua e iai i Malo Aufaatasi ona “aufaatasia [lo latou] malosi e faatumauina ai le filemu ma le saogalemu faavaomalo.” I aso nei, ua 185 atunuu o loo auai i Malo Aufaatasi, ma e manatu faapea o loo latou tuutoina uma atu i le faamoemoe lava lea e tasi.
10, 11. (a) Ua faapefea ona faaleo atu e taʻitaʻi lotu lo latou lagolagoina o Malo Aufaatasi? (e) I le ā le itu ua suitulaga sese ai e pope “le Tala Lelei o le Malo o le Atua”?
10 A o faagasolo atu tausaga, ua matuā viiviia ai Malo Aufaatasi, ae maise lava e taʻitaʻi lotu. Ia Aperila 11, 1963, na sainia ai e Pope Ioane XXIII lana tusi sa tusi atu ai i epikopō o le lotu na faaulutala e faapea “Pacem in Terris” (Le Filemu i le Lalolagi) lea na ia taʻua ai: “O lo tatou moomooga sili lava ina ia mafai e le faalapotopotoga o Malo Aufaatasi—i ana fuafuaga ma i ana auala tau gaoioiga—ona faatinoina le tele ma le mamalu o ana galuegafai.” Mulimuli ane, ia Iuni 1965, na taʻua ai le ō atu o taʻitaʻi lotu o ē na faapea mai o loo fai ma sui o le ʻafa o le faitau aofai o tagata o le lalolagi, ina ia faamanatuina i San Francisco le lona 20 tausaga o le aso fanau o Malo Aufaatasi. E lē gata i lea, i le 1965, na asiasi atu ai Pope Paulo VI, i Malo Aufaatasi, ma ia taʻua ai faapea o “le faamoemoe mulimuli lea mo le autasi ma le filemu.” I le 1986, na lagolagosua ai Pope Ioane Paulo II i le faavaeina o le Tausaga o le Filemu Faavaomalo o Malo Aufaatasi.
11 I lana asiasiga foi ia Oketopa 1995, na folafola atu ai e le pope e faapea: “O le asō ua tatou faamanatuina ai le Tala Lelei o le Malo o le Atua.” Ae pe o ia moni ea o se avefeau a le Atua mo le tala lelei o le Malo? I le taʻuaina o faafitauli o le lalolagi, na ia faapea atili mai ai: “A o tatou fesagai ma nei luʻi tetele, e mafai faapefea ona tatou mumusu e taliaina le matafaioi a le Faalapotopotoga o Malo Aufaatasi?” Ua filifilia e le pope, le Malo Aufaatasi, nai lo le Malo o le Atua.
Mafuaaga mo le ‘Tagi Lotulotu’
12, 13. (a) Ua faapefea ona gaoioi Malo Aufaatasi i le tulaga e pei ona faamatalaina ai e le Ieremia 6:14? (e) Aisea ua faaaofia ai ma le tulaga pule o Malo Aufaatasi i le faamatalaga i le Isaia 33:7?
12 Ua lē taulau i le faamanatuina o le 50 tausaga talu ona faavaeina Malo Aufaatasi, ona faaalia maia so o se faamoemoega moni o le “filemu i le lalolagi.” O se tasi o mafuaaga ua faaalia mai e se tusitala i le nusipepa o le Toronto Star a Kanata, o lē na tusi mai: “O Malo Aufaatasi ua pei o se leona e leai ni nifo, e na ona gū lava pe a fetaiai ma tagata sauā, ae tau faatali seʻi ō mai lana ʻau e faapipii ona nifo ona faatoʻā faia lea o sana gaoioiga.” O le mea masani, o lena gaoioiga e lei lava le malosi ma o loo tuai foi ona iai ni ona āuga aogā. O avefeau o le filemu i le faiga o mea a le lalolagi i aso nei, ae maise lava ia i latou i Kerisinetoma, ua latou toe faaleoina atu upu o le Ieremia 6:14 (NW): “Ua latou taumafai e fofo faatauvaa le manuʻa o loʻu nuu, i le faapea ane, ‘E filemu! E filemu!’ ae leai se filemu.”
13 Ua galulue punouaʻi pea le faagasologa mai o failautusi sili a Malo Aufaatasi, ma e mautinoa o loo latou faia ma le naunautai, ina ia taulau manuia Malo Aufaatasi. Peitai o le faifai pea o le fefinauai o sui e toʻa 185 ma a latou mau sini eseese, e faatatau i se auala e faagata ai faiga taua, ni auala e faaofi atu ai aiaiga faaletulafono, ma ni auala e taulimaina ai tulaga tau tupe, ua faalavelavea ai faamoemoega mo se taulau manuia. I le lipoti faaletausaga mo le 1995 a le failautusi sili o lena taimi, ua ia tusi ai e faapea, o le faasolo ina mou atu le “mala o se taua faaniukilia e tupu i le lalolagi aoao,” o le tatalaina mai lea o le ala mo “malo ina ia galulue faatasi ai mo le tamaoaiga ma le agaigai i luma i tulaga lautele mo tagata uma lava.” Ae na ia toe faapea mai atili: “O le faanoanoaga, talu ai o le talaaga o mataupufai a le lalolagi i ni tausaga ua tuanai atu, ua matuā feteenai lava ma na faamoemoega mautinoa.” O le mea moni, o nei tagata sa faapea mai o ni avefeau o le filemu, o loo ‘matuā tagi lotulotu.’
14. (a) Aisea e mafai ai ona faapea atu ua lē taulau Malo Aufaatasi i tulaga tau tupe ma i amioga tatau? (e) Ua faapefea ona faataunuuina le Ieremia 8:15?
14 Ua faitauina faapenei se ulutala i le nusipepa a Kalefonia o le Orange County Register: “Ua Lē Taulau Malo Aufaatasi i Tulaga Tau Tupe, ma i Amioga Tatau.” Ua taʻua i le tala e faapea, i le va o le 1945 ma le 1990, e silia i le 80 taua na tauina, ma maliliu ai le silia i le 30 miliona tagata. Ua sii mai ai ni upu a se tusitala o le lomiga o le Reader’s Digest o Oketopa 1995, o lē na ia “faamatalaina gaoioiga faavaegaʻau a Malo Aufaatasi e faapea, ua maitaulia i ‘taʻitaʻiʻau lē agavaa, o fitafita e lei puleaina lelei, o le faia o maliega ma tagata tetee, le lē mafaia ona taofia o faiga sauā ma faiga matautia, ma i nisi taimi ua oo lava ina faia ai sa latou vaega i mea matautia o loo faia.’ E lē gata i lea, ‘ua matuā ofoofogia le tele ua oo i ai le faamaimauina o mea, o faiga faapiopio, ma faiga lē tonu.’ ” I se vaega ua faaulutalaina “Le 50 Tausaga o Malo Aufaatasi,” na tauaveina ai e le New York Times le ulutala “Le Leaga Ona Pulea ma le Faamaimau Mea ua Lepetia ai Faanaunauga Sili Ona Lelei o Malo Aufaatasi.” Sa faatomua e le Times a Lonetona, i Egelani, se mataupu i upu nei, “Ua faasolo ina vaivai i le Limasefulu—Ua manaomia e Malo Aufaatasi se polokalame faamalositino seʻi toe tau faasaʻosaʻo lelei ai.” I se tulaga moni, e pei lava o mea o loo tatou faitau ai i le Ieremia mataupu e 8, fuaiupu e 15: “Sa tatou faatalitali i le manuia [filemu], a e leai se lelei na maua; sa faatalitali foi i ona po e faamaloloina ai, faauta foi, o le mataʻu.” Ma o loo matataʻu pea tagata i le taufaafefe mai o se mala faaniukilia. Ua manino la, e lē o Malo Aufaatasi le avefeau o le filemu lea e manaomia e tagata.
15. Ua faapefea ona faamaonia o Papelonia anamua ma ona lotu e tupuga mai ai e lē gata ina faaleagaina ai ae faavaleaina ai foi?
15 O le ā o le a avea ma taunuuga o nei mea uma? E matuā manino mai lava le Afioga faavaloaga a Ieova. Muamua lava, o le ā le mea o loo faatalitalia maia lotu sese a le lalolagi, lea o loo matuā faauo i le tele o taimi ma Malo Aufaatasi? O nei lotu sese na tupuga mai le taiulu ifo i tupua, o Papelonia anamua. Ua talafeagai ai, le faamatalaina o i latou i le Faaaliga 17:5 e faapea o “Papelonia le aai tele, o le tina o fafine talitane ma mea e inosia i le lalolagi.” Sa faamatalaina e Ieremia le faasalaga malaia o lenei faalapotopotoga faagutugutulua. I le pei o se fafine talitane, ua ia faatosina i le ʻau faipolotiki a le lalolagi, i le viiviia o Malo Aufaatasi ma faavaeina ni a latou faiā lē tatau ma ona sui o malo faapolotiki. E sili ona telē lana vaega ua fai i faiga taua. Sa taʻua e se tasi tagata faasalalau i lona faasino atu i taua faalelotu i Initia e faapea: “Sa manatu Karl Marx e faapea o lotu o se fualaau faasaina (opium) e faamalosi i tagata uma. Peitai e lē saʻo aʻiaʻi lena faamatalaga, auā o le fualaau faasaina (opium) o se fualaau e faafilemu ai, e faavaivaia ai lagona o le tagata. Peitai ane, o lotu ua sili atu ona matautia e pei o le fualaau faasaina o le cocaine. Ua ia faapogaia le anoanoai o faiga sauā ma o se malosiaga e sili ona faaleagaina ai.” E lē o matuā saʻo lena tusitala. O lotu sese ua lē gata ina faavaleaina ai ae ua faaleagaina ai foi.
16. Aisea ua tatau ai i tagata loto faamaoni ona sosola ese nei mai Papelonia le Aai Tele? (Tagai foi i le Faaaliga 18:4, 5.)
16 O le ā la e tatau i tagata loto faamaoni ona faia? Ua aumaia e le avefeau a le Atua o Ieremia le tali ia i tatou: “Ina sosola ia outou ai totonu o Papelonia, ia taitasi ma faasaoina lona ola; . . . auā o le tausaga lenei o le taui ma sui a Ieova.” Tatou te fiafia ona ua faitau miliona tagata ua sosola ese mai totonu o Papelonia le Aai Tele, le emepaea a le lalolagi o lotu sese. Po o oe ea o se tasi o i latou nei? E mafai la ona e malamalama lelei i le auala ua faaaafia ai e Papelonia le Aai Tele malo o le lalolagi: “Ua onā ai le lalolagi uma; ua feinu nuu i lona uaina; o le mea lea ua faavalea ai nuu.”—Ieremia 51:6, 7.
17. O le ā le sala faafaamasinoga lea ua toeitiiti nei ona faasalaina ai lea o Papelonia le Aai Tele, ma o le ā e sosoo mai i lena gaoioiga?
17 Ua lē o toe umi nei, ona faapogaia lea e Ieova sui ‘ua vālea’ o Malo Aufaatasi, ina ia latou liliu ane e osofaia lotu sese, e pei ona faamatalaina i le Faaaliga 17:16: “Latou te ʻinoʻino i le fafine talitane, ma faasaunoa ia te ia; ma to ese ona ofu, latou te aai foi i lona tino, ma susunu ia te ia i le afi.” O le a faailogaina i lenei mea le amataga o le puapuaga tele lea o loo faasino i ai le Mataio 24:21 ona taualuga ai lea ia Amaketo, o le taua o le aso tele o le Atua e Ona le Malosi Uma Lava. I le pei o Papelonia anamua, o le a faapena foi ona oo ia Papelonia le Aai Tele le sala faafaamasinoga na folafolaina i le Ieremia 51:13, 25: “O oe na le mau i le vai tele, ua tamaoaiga i oloa, ua oo mai lou iuga, le fua o lou matapeapea. Faauta, ou te faia oe moʻu fili, o loo fetalai mai ai Ieova, o oe na le mauga na te faaumatia; o le faaumatia ai le lalolagi uma; ou te faaloaloa loʻu lima i luga ia te oe, ma ou fuli ifo ia te oe mai papa, ma ou faia oe ma mauga ua mu.” O malo fai mea piopio, ma faatupu taua, o le a sosoo atu i lotu sese i lo latou faaumatiaga pe a oo foi ina liligi ifo ia i latou le aso o le toasa o Ieova.
18. O afea ma e faapefea ona faataunuuina le Isaia 48:22?
18 I le 1 Tesalonia 5:3, ua taʻua mai ai e faatatau i ē amioleaga: “Auā pe a latou fai ane, “O loo filemu, ua le afaina,” ona oo lea ia te i latou o le fano faafuasei, faapei o le faatiga o le fafine to a fanau mai, latou te le sosola ai lava.” O i latou nei na taʻua e Isaia: “Faauta, e tagi lotulotu o le sāvali o le faaleleiga [“filemu,” NW].” (Isaia 33:7) Ioe, e pei ona tatou faitau i ai i le Isaia 48:22, “Ua fetalai mai Ieova, E leai se filemu i e amio leaga.” Ae o le ā se lumanai ua faatalitalia mai mo avefeau moni o le filemu mai le Atua? O le a taʻu mai e la tatou mataupu o loo sosoo mai.
Fesili mo le Autaluga
◻ O ā faaupuga malolosi ua faaalialia ai e perofeta a le Atua avefeau pepelo?
◻ Aisea ua lē taulau ai faalapotopotoga a tagata i le taumafai e aumai se filemu tumau?
◻ Ua faapefea ona eseese avefeau moni o le filemu mai ia i latou o loo lagolagoina Malo Aufaatasi?
◻ O le ā e tatau i ē agamalu ona fai ina ia fiafia ai i le filemu ua folafola mai e Ieova?
[Ata i le itulau 15]
O Isaia, Ieremia, ma Tanielu, na latou valoia uma mai le lē taulau o taumafaiga a tagata mo le filemu
[Ata i le itulau 16]
“O le lalolagi uma o loo nofo toilalo i loo leaga.”—Le aposetolo o Ioane
[Ata i le itulau 17]
“O loo faapouliuligia o latou mafaufau.” —Le aposetolo o Paulo