O le Atiaeina o le Saʻolotoga e Faaalia ai Manatu i le Faagasologa Mai o le Talafaasolopito

I LE faagasologa mai o le talafaasolopito na tauivi ai tagata ina ia maua le saʻolotoga e faaali ai ona manatu. Ua iai tulafono ua pasia, sa tauina foi ni taua, ua iai foi soifua ua maimau ai i le sailia o le aiā e faaalia ai manatu i luma i le lautele.

Aisea lava ua foliga mai ai o lenei aiā e masani ai, ua faapogaia ai feteenaiga, ua oo ai lava i le tulaga o le faamasaa toto? Aisea na manatu ai sosaiete o tagata, i le taimi ua teʻa faapena foi ma le taimi nei, e talafeagai ona faatapulaa, ia po o le faasaina foi le faatinoina o lenei aiā?

O manatu faaalia e faatatau i le saʻolotoga e faaalia ai manatu o tagata ua suigi solo e pei o se vae tele o se uati a o faagasolo le taimi. O nisi taimi ua vaai ai i le saʻolotoga e faaalia ai manatu o se faaeaga e olioli ai. I nisi taimi ua vaai i ai o se faafitauli e ao ona taulimaina e faiga malo po o lotu.

Ona o loo tumu le talafaasolopito i faamatalaga e uiga ia i latou o ē na tauivi mo le saʻolotoga e faaleo atu ai o latou manatu i luma i le lautele, lea sa masani ona iu ai i le sauāina faamoʻamoʻa o i latou po o le fasiotia foi, o le autaluina la o nisi o nei mea na tutupu o le a aumaia ai ia i tatou se malamalamaga i le faafitauli.

O tagata aʻoga i le faasolo mai o le talafaasolopito latou te ono manatuaina le faifilosofia Eleni o Socrates mai le (470-399 T.L.M.), lea e faapea o ona manatu ma ana aʻoaʻoga na vaai i ai o ni aafiaga leaga i amioga a tupulaga Atenai. Na faapogaia e lenei mea ni feeseeseaiga tele i le va o taʻitaʻi faapolotiki ma taʻitaʻi lotu Eleni ma taʻitaʻiina atu ai i lona maliu. O lana talosaga lenei i luma o le faamasinoga lea na latou faasalaina o ia mulimuli ane, o loo tumau pea ona avea ma se tasi o lauga maoaʻe o le puipuia o le saʻolotoga e faaali ai manatu: “Afai ua outou ofoina mai le faasaʻolotoina o aʻu i le taimi nei, ma le tuutuuga o le a ou lē toe mafai ona faaleo atu oʻu manatu i lenei sailiga mo le poto, ma a toe maua loa aʻu o faia faapea o le a ou oti, ou te faapea atu la ia te outou, ‘Tagata o Atenai e, e ao ona ou usitai’ i le Atua nai lo outou. A o oʻu maua pea le ola ma le malosi ou te lē tāitai ona ou lafoaia le mulimuli atu i le sailia o le poto ma ia uunaia ma tauanau i so o se tasi lava o outou ua ou feiloai i ai. Ona o lenei la mafuaaga, ma ona o le faatonuga lea mai le Atua . . . ’ Ma, tagata Atenai e, e ao ona faaauau ona ou faapea atu, ‘Po o le faasaʻoloto o aʻu pe leai; ae ou te taʻutino atu pea, e lē mafai ona toe ese se isi aʻu gaoioiga, e tusa lava pe ou te oti ai.

A o faagasolo le taimi, na iai ni nai faasasaaga i Roma i le amataga o lona talafaasolopito, ae na faateleina nei faasasaaga ina ua faaopoopoina le telē o le emepaea. Na faailogaina ai iinei le amataga o le vaitaimi sili ona pogisa mo le saʻolotoga e faaalia ai manatu. I le vaitaimi o le pulega a Tiperio (14-37 T.A.), sa leai se avanoa na tuu ia i latou o ē na tautatala faasagatau i le malo po o ana tulafono. Ma e lē na o Roma na tetee i le saʻolotoga e faaalia ai manatu; o le taimi lava foi lena na faamalosia ai e taʻitaʻi o Isaraelu ia Ponotio Pilato e fasioti ia Iesu ona o lana aʻoaʻoga ma faatonuina ona aposetolo e aua le toe talaʻi. Na loto malilie foi i latou nei e maliliu nai lo le taofia o la latou galuega talaʻi.—Galuega 5:28, 29.

I le tele o vaitaimi o le talafaasolopito, o le aiā tatau lea e faataga mai e faiga malo e masani ona toe fetuunai po o le toe suia foi e tusa ai ma manaoga, lea e taʻitaʻia atu ai i feteenaiga atili mo le saʻolotoga e faaalia ai manatu. E amata mai i le Tausaga Tutotonu (500 T.A. e oo i le 1500 T.A.) na tauanauina ai e nisi tagata ni faamatalaga tusitusia e faamanino ai le latou aiā, ma ia faatapulaa le puleaina e malo o nei aiā. O le iuga, na amata sauniunia ai loa se lisi o aiā tatau faavae. E aofia ai i lenei ia le Magna Carta, sa avea o se faailoga patino i le mataupu o aiā tatau o le tagata. Mulimuli ane ona oo mai ai lea o le English Bill of Rights (1689), le Virginia Declaration Rights (1776), le French Declaration of the Rights of Man (1789), ma le United States Bill of Rights (1791).

A o faagasolo senituri e 17, 18, ma le 19 sa faalogo ai tagata i le aufaitofā o le talafaasolopito, a o faaleo mai o latou taofi i lo latou lagolagoina o le saʻolotoga e faaleo atu ai manatu. I le 1644 na tusia ai e le fatusolo taʻutaʻua Egelani, o lē atonu e faigofie ona manatua na ia tusia le Paradise Lost o John Milton, na ia tusia le faamatalaga taʻutaʻua o le Areopagitica, o se finauga e tetee ai i faasasaaga i le saʻolotoga o faasalalauga i nusipepa.

Na molimauina e le senituri e sefuluvalu le faateleina o le saʻolotoga e faaalia ai manatu i Egelani, e ui lava sa iai pea faasasaaga. I Amerika sa maumauai atu pea ia kolone mo le saʻolotoga e faaali ai manatu, e lē gata i le tautala a o tusitusiga. O le Constitution of the Commonwealth of Pennsylvania, ia Setema 28, 1776, mo se faataitaiga, na taʻua ai i se vaega e faapea: “O loo i tagata le aiā i le saʻolotoga e faaali ai manatu, ma tusitusia, ma faasalalauina o latou manatu, o lona uiga la e lē tatau ona taofia le aiā a nusipepa faasalalau.”

Na avea lenei faamatalaga ma uunaiga malosi mo le Teuteuga Muamua o le Tulafono a le Iunaite Setete i le 1791, lea sa faailoa mai ai mafaufauga o ē na faavaeina le Tulafono a Amerika e faatatau i le tāua o le saʻolotoga a tagata e faapea: “E lē tatau i le Fono Faavae ona faia ni tulafono e faatatau i le faavaeina o lotu, po o le faasaina o le faatinoina saʻoloto, po o le faaitiitia o le saʻoloto e faaali ai manatu, po o le lomia i le pepa; po o le aiā mo tagata e faapotopoto ai ma le filemu, ma talosagaina le Malo e toe iloilo mea latou te lē malilie ai.”

Na tusia e le fai filosofia Egelani o John Stuart Mill sana faamatalaga e faaulutala o le “Saʻolotoga” (On Liberty) i le 1859. E masani ona taʻua soo ma e faasino atu foi i ai o se tasi o faamatalaga malosi i le tauiviga mo le saʻolotoga e faaalia ai manatu.

Peitai, o tauiviga mo le saʻolotoga e faaalia ai manatu i le lautele, e lei gata ai ina ua taunuu mai tausaga lea e manatu i ai o tausaga o le malamalama i lenei luasefulu o senituri. Mo se faataitaiga, ona o taumafaiga ina ia faatapulaa le saʻolotoga e faaali ai manatu i Amerika, o faatonuga e puipuia ai lena saʻolotoga ua faailoaina i falefaamasino, e lē gata i faamasinoga maualalo a o le Faamasinoga Maualuga foi a le Iunaite Setete.

Sa faaalia i le tele o faaiuga faafaamasinoga, le talitonuga o le faamasino o Oliver Wendell Holmes, Jr., o le Faamasinoga Maualuga a le Iunaite Setete e faatatau i le saʻolotoga e faaalia ai manatu. I le faamatalaina o le iloiloga o le saʻolotoga e faaali ai manatu, fai mai a ia: “Afai e iai se vaega o le Tulafono Faavae o manaomia ona matuā uaʻi atu i ai nai lo se isi lava, o le vaega lea i le saʻoloto e faaali manatu—e lē o le saʻolotoga e faaali manatu o i latou e ioe ma i tatou, ae o le saʻolotoga mo le faaalia o manatu ia tatou te tetee i ai.”—United States v Schwimmer, 1928.

O le lē amanaiaina o lenei vaega autū o le tulafono e māfua ai finauga i faamasinoga i le va o le saʻoloto ma faasasaaga. E masani lava, o loo iai i tagata le manatu, “O le saʻolotoga e faaali atu ai manatu e mo aʻu—ae lē mo oe.” I lana tusi lea ua faaigoaina “saʻolotoga e faaali ai manatu,” na taʻua ai e Nat Hentoff ia mea na tutupu na matuā fuli ai e i latou na naunau e puipui le Tulafono Faavae le tulaga o mea e tusa ma o latou manatu. Na ia taʻua ia mea tutupu na toe suia ai lava e le Faamasinoga Maualuga a le Iunaite Setete lava ia ana faaiuga, e aofia ai faaiuga e faatatau i Molimau a Ieova ma tausaga o le latou tauiviga mo le saʻolotoga e faaalia ai o latou manatu e uiga i lo latou talitonuga faalotu. E faatatau ia i latou, na ia tusia: “O tagata o le faatuatuaga lena ua telē so latou sao i le faagasolo mai o tausaga agaʻi i le faateleina o le saʻolotoga i le aiā tatau i faamasinoga e aofia ai le tulafono faavae.”

E toatele i latou e iloiloina tulafono atoa foi ma tusitala i ona po nei o le talafaasolopito ua latou tusia le tele o faamatalaga e uiga i le tele o tauiviga sa faia i faamasinoga ina ia puipuia le saʻolotoga e faaali ai manatu i le iuga o lenei luasefulu senituri, e lē gata i Amerika ae faapena foi i isi atunuu. E lei iai lava se faamautinoaga o le saʻolotoga e faaali ai manatu. E ui lava atonu e fia faaviivii se malo ona o le saʻolotoga ua latou avatu i o latou tagata, e mafai ona aveesea pe a suia le faiga malo po o se iuga faafaamasinoga, e pei ona faaalia mai i mea tutupu. Ua taulamua Molimau a Ieova i le tauiviga mo lenei saʻolotoga tāua.

I lana tusi These Also Believe, na tusia ai e le polofesa o C. S. Braden e faapea: “Na faia e i latou [o Molimau a Ieova] se fesoasoani maoaʻe i tagata lautele e ala i le latou tauiviga e faatumauina le latou aiā o ni tagatānuu, auā i le latou tauiviga e tele se mea sa latou fai e faatumau ai na aiā tatau mo so o se vaega toaitiiti i Amerika. Pe a aiāina le aiā faatagatānuu a so o se vaega lava, ua afaina le aiā a so o se isi lava vaega. O lea la ua latou faia se sao mautinoa mo le faasaoina o nisi o mea sili ona tāua i la tatou faatemokalasi.”

E toatele tagata e naunau i le saʻolotoga ua lē malamalama i le pogai ua taofia ai e nisi malo ma lotu lenei saʻolotoga mai o latou tagata. Ua o se teena o le aiā tatau faavae a le tagata, ma e toatele tagata i le lalolagi o loo mafatia i le taofia o lenei saʻolotoga. Pe o le a faaauau ea i manatu agaʻi i le saʻolotoga e faaali ai manatu, ona agaʻi i luma ma tua e pei o le vae o se uati, e oo lava i atunuu o loo olioli i lenei aiā tatau? Pe o le a mafai ea ona faaaogā lenei mea o le saʻolotoga e faaalia ai manatu e taʻusaʻoina ai gagana masoā ma gagana matagā? E oo mai i le taimi nei o loo tauivi faamasinoga ma feteenaiga.

[Ata i le itulau 15]

Sa finau Socrates mo le saʻolotoga e faaalia ai manatu

[Ē Ana le Ata]

Musei Capitolini, i Roma