Ia Pulea Nei Lou Olaga!
O SAILIILIGA faasaienisi i uiga o tagata ma mea o loo uunaia ai a latou gaoioiga e tele ni itu ua aogā ai ia i tatou. Pe atonu ua tatou mauaina ai se fesoasoani ina ia faafetaiaia ai se faamaʻi e ala i le mauaina o se malamalamaga loloto e faatatau i ai. Ae i le taimi lava e tasi, o se mea poto le faaeteete e tusa ai ma filosofia uigaese, ae maise lava i filosofia na e foliga mai o loo feteenai ma mataupu silisili ua lelei ona faavaeina.
I le mataupu e uiga i tulaga e tuufaasolo i le toto ma amio, ua lāgā ai ni fesili: Pe mafai ea ona tatou lafoaia a tatou avega tauave ma lē fia taliaina ni faitioga mo a tatou gaoioiga? Pe mafai ea ona faatuatuanai pe oo lava ina tuuaʻia se isi po o se mea ona o se gaoioiga lē mafaufau po o se mea sese, ma faapea ai ona faaopoopo atu i le tuputupu aʻe o le fuainumera o lenei tupulaga ua faapea mai “e lē o aʻu”? E leai. O le toatele o tagata, e naunau i le fia viia i tulaga lelei o le olaga, o lea la, aisea ua latou lē naunau ai foi faapena e talia se avega tauave mai a latou measese?
Ona o lea tulaga, atonu tatou te fesili ifo ai, O le ā ua fai mai ai le Afioga a le Atua, le Tusi Paia, e faatatau i le po o ai ma po o le ā o loo puleaina o tatou olaga i aso nei?
O le ā le Vaaiga a le Tusi Paia?
O le mea muamua lava e manaomia ona tatou iloa e faapea, o i tatou uma lava na fananau mai ma le agasala lea ua tuufaasolo mai i o tatou uluai mātua, o Atamu ma Eva. (Salamo 51:5) E lē gata i lea, o loo tatou ola nei i se taimi faapitoa, ua taʻua “o aso e gata ai,” lea ua tofo i ai tagata i “aso faigata.” (2 Timoteo 3:1) Ua faaalia ai e lenei mea e faapea, i faaupuga masani, ua sili atu faafitauli ua tatou fetaiai e faatinoina ai le pulea lelei o o tatou olaga nai lo o tatou augātamā.
Peitai, o tagata uma lava e iai filifiliga saʻoloto, o ē e mafai ona faia a latou lava faaiuga totino. E tusa ai ma lena tulaga ua latou pulea ai o latou olaga. Na moni lenei tulaga i anamuā lava ma e mafai ona iloa i upu a Iosua i le nuu o Isaraelu ina ua faapea atu: “Ina filifili ia o outou i le aso nei po o ai tou te auauna i ai.”—Iosua 24:15.
Ua faailoa mai e le Tusi Paia e faapea o Satani le Tiapolo ua lafo mai le lagi ma i le taimi nei nai lo se isi lava taimi, ua matuā malosi lava ana taaʻiga mo le faaleagaina o tagata uma lava. Ua taʻu mai foi ia i tatou e faapea e oo lava i aso o le aposetolo o Ioane, sa nofo toilalo le lalolagi uma i le mana o lē o loo leaga. (1 Ioane 5:19; Faaaliga 12:9, 12) Peitai, e faapei lava ona lē pulea e le Atua e Ona le Malosi Uma Lava a tatou gaoioiga taitasi pe tuupoina se iuga mo i tatou ae na o ia e silafia, e lē tatau foi la ona tatou faitioina Satani i measese uma po o mea uma ua tatou lē taulau ai. O le upu moni paleni faale-Tusi Paia e faapea “a ua taitasi ma faaosoosoina, pe a tosina ma maileia i lona lava tuʻinanau. Pe a to le tuinanau ona fanau mai ai lea o le agasala.” (Iakopo 1:14, 15) Na tusia e le aposetolo o Paulo nei upu faagaeeina e faapea: “Aua neʻi faaseseina outou, e le ulagia le Atua, auā o le mea e luluina e le tagata, o le mea lava lea e seleseleina mai ai e ia.”—Kalatia 6:7.
O lea la ua faatalitalia mai e Ieova le Atua i tatou taitoatasi ia tatou tali atu e tusa ma a tatou gaoioiga. E tatau ona tatou faaeteete ia tatou lē faia ni faamolemolega mo i tatou lava faapea ona o tatou sela ia e puleaina lo tatou fausaga mai, ma le tuufaasolo mai o le lē lelei atoatoa. Na tuuaʻia e le Atua faiga sauā a le nuu anamua faatauatane o Sotoma ma Komoro ma na latou tali atu mo a latou gaoioiga leaga. Ua manino mai, sa lei silasila o ia i tagata faapea o ni ē vaivai, o ni foafoaga ua lē mafesoasoania, ua māfua ona o ni tulaga lē lelei e faapogai mai sela e puleaina lo latou fausaga, ua lē mafai ai ona taofia mai le amioleaga. I se uiga talitutusa, na siomia ai tagata na ola i ona po o Noa i le tele o taaʻiga leaga; e ui i lea sa tatau ona latou faia se faaiuga, se filifiliga totino, pe afai na latou fia sao mai le Lolo lea na toeitiiti oo ane. E toaitiiti na faia se faaiuga saʻo. O le toatele sa latou lei faia faapea.
Ua faamautinoa mai e le perofeta Eperu o Esekielu e faapea, o le pulea totino e manaomia pe afai tatou te fia maua le finagalo malie o le Atua: “A e afai e te apoapoai atu i le ua amio leaga, a e le liliu ese o ia i lana amio leaga ma lona ala leaga, e oti o ia i lana amioletonu; a o oe, ua laveaiina oe ia te oe.”—Esekielu 3:19.
O le Fesoasoani Sili o Loo Iai
O le mea moni, o i tatou uma lava e manaomia le fesoasoani e faatino ai le pulea totino i o tatou olaga i aso uma, ma e mo le toatele o i tatou, o se matuā luʻitau lava lenei mea. Ae e lē manaomia ona tatou lotovaivai ai. E ui lava o lo tatou faanaunauga i le agasala tuufaasolo e lē taliaina e le Atua, ae afai tatou te mananao e suia o tatou uiga, o le a ia saunia mo i tatou fesoasoani e sili ona lelei ua maua—o lona agaga paia ma lana upu moni faagaeeina. Po o ā lava ni tulaga na muai tuufaasolo mai ona o sela ua puleaina lo tatou fausaga mai, ma so o se taaʻiga i tua atu e ono aafia ai i tatou, ae e mafai ona tatou “toeseina . . . le tagata tuai atoa ma ana amio, a ua [tatou] oofu i le tagata fou, o le ua faafouina i le iloa, e faatatau ia foliga i le na faia o ia.”—Kolose 3:9, 10.
Na faia e le toatele o Kerisiano i le faapotopotoga i Korinito ni suiga mataina i a latou amioga. Ua taʻu mai e le faamaumauga faagaeeina ia i tatou e faapea: “O e faitaaga, ma e ifo i tupua, ma e mulilulua, ma e tauātane, ma e faasotoma, ma e gaoi, ma e matapeapea, ma e onā, ma e agatele, ma e fao mea, e le fai mo latou tofi le malo o le Atua. Sa faapea foi nisi o outou; a ua taeele outou, a ua faapaiaina outou, a ua taʻuamiotonuina outou i le suafa o le Alii o Iesu Keriso, i le Agaga foi o lo tatou Atua.”—1 Korinito 6:9-11.
O lea afai o tatou tauivi ma o tatou uiga lē lelei atoatoa, tau lava ina ia lē lolo atu i ai. E toatele Kerisiano o aso nei ua faamaonia e faapea o le fesoasoani a Ieova, na mafai ai e i latou ona ‘toe fuataiina o latou loto, ma suesue ifo ia i latou lava pe se ā le finagalo o le Atua, o mea ua lelei, ma le mālie, ma le atoatoa.’ Ua latou fafagaina o latou mafaufau i mea uma ua moni, tonu, mamā, matagofie, logoleleia, viia; ma ua latou faaauau ona “manatunatu i ia lava mea.” Ua latou aveina i fale mea aano faaleagaga ma e ala i le faaaogaina o na mea ua latou toleniina ai lo latou malosi faalemafaufau e iloa ai le saʻo ma le sese.—Roma 12:2; Filipi 4:8; Eperu 5:14.
O se faalaeiauga le iloaina o mea o loo tauivia, o o latou lē taulau mo sina taimi, ma lo latou manuia mulimuli ane ona o le fesoasoani a le agaga paia o le Atua. Ua faamautinoa mai e le Atua ia i tatou e faapea o le suia o o tatou uiga e masani ona aafia ai le loto ma ona faanaunauga: “A oo le poto i lou loto, ma ua mālie ia te oe le atamai; e faafeao le mafaufau ia te oe; e leoleo ia te oe le faautauta; ina ia laveai ia te oe ai le ala leaga.”—Faataoto 2:10-12.
O lea la, afai e te manao e fai le ola e faavavau ma ou sini—le olaga e aunoa ma ni faafitauli o lenei lalolagi amioleaga ma tuusaʻoloto ai mai le tino lē lelei atoatoa—ʻia e finafinau,’ ia pulea lou olaga i le taimi nei ma taʻitaʻia e le atamai faalelagi. (Luka 13:24) Ia e faataga le fesoasoani a le agaga paia o Ieova ina ia mafai ai ona e fuaina le fua o le pulea totino. Ia fai ma faanaunauga o lou loto le faia o lou olaga ia ogatasi ma tulafono a le Atua, ma utagia le fautuaga: “Ia sili ona leoleoina o lou loto i le leoleoina o mea uma; auā e tupu mai ai le ola.” (Faataoto 4:23, NW) O le taofi mau i le “ola moni” i le lalolagi fou a le Atua—lea o le a faaleleia uma ai e Ieova le Atua tulaga ua faaletonu ona o le sela ua puleaina lo tatou fausaga mai, e ala i le faatuatua i le taulaga togiola a Iesu Keriso—ua fetaui ai taumafaiga uma ua e faia e pulea ai lou olaga i lenei lalolagi.—1 Timoteo 6:19; Ioane 3:16.
[Ata i le itulau 23]
O le suesueina o le Tusi Paia e mafai ona aumaia ia i tatou le malosi e foia ai vaivaiga ua mauaa
[Ata i le itulau 23]
O le suesueina o le Tusi Paia e mafai ona fesoasoani ia i tatou e pipii mau atu i tapulaa a le Atua i amioga tatau