Ua Iai Nei se Faiga Malo o le a Faamutaina Solitulafono

NA VALOIA mai e le Tusi Paia e faapea, i o tatou aso o le a avea ai tagata ma ē “e alolofa i latou ia i latou, o e mananao i tupe, o e loto vii, o e faamaualuga, o e upu leaga, o e le faalogo i mātua, o e le faafetai, o e amio leaga, o e le lotoaiga, o e le ma faaleleia, o e faatuaupua, o e le taofi manao o le tino, o e faasaua, o e inoino i le amio lelei.” (2 Timoteo 3:2, 3) O ituaiga o tagata na o loo latou faia solitulafono.

Ona o tagata ia e faia le solitulafono, a oo ina latou suia i le lelei, o le a faaitiitia le solitulafono. Ae e lei iai lava se taimi ua faigofie ai i le tagata ona suia e fai le lelei. Ua sili atu foi ona faigata aso nei nai lo se isi lava taimi muamua, auā talu mai le 1914, le taimi e tusa ua faamautinoa mai e le faasologa o mea tutupu o loo taʻua i le Tusi Paia, ua tatou soifua ma ola ai i “aso e gata ai” o lenei faiga o mea. E pei lava ona valoia mai e le Tusi Paia, o lenei vaitaimi e faailogaina e “aso faigata.” O nei aso faigata o loo faapogaia e Satani le Tiapolo, le solitulafono silisili, o lē ua “lotoa tele, auā ua na iloa ua saasaa ona po.”—2 Timoteo 3:1; Faaaliga 12:12.

O le mafuaaga lena o le faateleina o le solitulafono i aso nei. Ua iloa e Satani ua lē o toe umi ae faaumatia o ia ma lana faiga o mea. I le taimi puupuu lea o loo totoe, ua ia sailia ai auala uma e mafai ai ona ia faaosofia tagata i uiga leaga o loo taʻua i le 2 Timoteo mataupu e 3. O lona uiga, ina ia aveesea e se malo le solitulafono, e tatau ona aveesea aafiaga a Satani ma ia fesoasoani i tagata e fai ni suiga ina ia ʻaua le toe faia gaoioiga e pei ona taʻua i luga. Peitai pe e iai ea se faiga malo e mafai ona faia lenei mea?

E leai se faiga malo faaletagata e mafai ona faia lenei mea. Na fautuaina e J. Vaskovich, o se faiaʻoga o le tulafono i Ukraine, le manaoga mo ni “tagata e aufaatasi mo se fuafuaga e tasi, lea o le a faamalosia ai ma autasia taumafaiga a faalapotopotoga tetele.” Ae na taʻua e Peresitene Fidel Ramos o Filipaina i le fonotaga a le lalolagi e faatatau i le solitulafono, fai mai a ia: “Ona o le tomai faaonaponei i le faaleleia o fesootaiga, ua foliga laitiiti ai lo tatou lalolagi, ua faigofie ai ona sao atu le solitulafono mai le isi atunuu i le isi atunuu ma avea ai o se faafitauli faavaomalo. Ina ia saunia se vaifofo, e tatau foi la ona faavaomalo.”

“O se Mala i le Lalolagi Aoao”

O Malo Aufaatasi o se faalapotopotoga faavaomalo. Talu lava ona faavae mai, o loo tauivi malosi e pulea le solitulafono. Ae ua siliga tali i seu, ua pei lava o isi malo o le lalolagi. Na mātauina e le tusi The United Nations and Crime Prevention e faapea: “O solitulafono i totonu o atunuu lava latou ua lē mafai ona latou puleaina e i latou lava, ma o solitulafono faavaomalo ua matuā maoae le oso i luga ua lē mafai foi ona pulea e faalapotopotoga faavaomalo. . . . O solitulafono e faia e vaega o ni tagata solitulafono ua uma ona faatulaga lelei, ua agaʻi atu ina faateteleina lona tulaga matautia, atoa ma ona āuga matautia e pei o faiga sauā e faamanuʻalia ai, ua faamataʻu ma faapiopio ai taʻitaʻi o malo. O faiga sauā a tagata faatupu faalavelave ua maliliu ai le faitau sefulu afe o tagata lē sala. Ua avea foi o se mala i le lalolagi atoa ia faigata e tutupu mai ona o fefaatauaiga a i latou e pulea e fualaau faasaina.”

Na taʻua e James Madison, o lē na avea ma peresitene lona fa o le Iunaite Setete, e faapea: “I le faatūina o se malo lea e pulea e tagata isi tagata, o le itu sili lenei ona faigata: Ia mafai e le malo lava ia ona pulea ona tagata; ma ia mafai ona pulea e ia ia lava.” (Faatusatusa i le Failauga 8:9.) O lona uiga la o le vaifofo o loo manaomia o le suia lea o faiga malo lea e “pule ai isi tagata i isi tagata” i se faiga o mea e pulea e le Atua. Peitai pe e mafai moni lea ituaiga vaifofo?

Le Faiga Malo o le a na Faamutaina Solitulafono!

E talitonu Kerisiano moni i le mea o fai mai ai le Tusi Paia e uiga i le Malo o le Atua.a O se faiga malo moni lava. E ui lava e lē vaaia le Malo ona e i le lagi, ae o mea o loo ia faatinoina o loo mafai ona vaaia i le lalolagi. (Mataio 6:9, 10) E fai aʻe lenei Malo ia Iesu Keriso ma le 144,000 o tagata “mai ituaiga uma, ma gagana eseese, ma nuu, atoa ma atunuu . . . e fai foi i latou ma tupu i le lalolagi.” O lenei malo malosi o le a pule mai i se “motu o tagata e toatele” o tagatānuu o ē, e pei ona valoia mai e le Tusi Paia, e ō mai foi “mai atunuu uma, ma aiga, ma nuu, ma gagana eseese.” (Faaaliga 5:9, 10; 7:9) O lea la, e lē gata i tupu ae o tagatānuu e ō mai mai atunuu eseese, o ni tagata autasi moni mai atunuu uma, ua maua le faamaoniga tauatua.

Ua tele lava ina mafai e Molimau a Ieova ona pulea le faafitauli o le solitulafono i totonu ia i latou lava ona o le taliaina o le pule a le Atua. E faapefea? I lo latou faamasani lea e talia le atamai o mataupu silisili o le Tusi Paia, e ala i le faatatauina i o latou olaga, atoa ma le tuu atu o i latou e uunaia e le mana sili ona malosi i le vateatea, le agaga o le Atua, ma lona fua—o le alofa. Fai mai le Afioga a le Atua: “A o le alofa, e lautua lea i nei mea uma, o le fusi lea e atoatoa ona lelei ai.” (Kolose 3:14) I le sili atu i le 230 atunuu, o loo faatino ai e Molimau a Ieova lenei alofa ma le autasi, ua faataitaia ai le auala ua gaoioi ai le Malo o le Atua e faamuta solitulafono.

Ua faataitaia mai lenei mea i le iuga o se suesuega sa aafia ai ni Molimau a Ieova e toʻa 145,958 i Siamani. Na taʻutino mai e le toatele o i latou e tele ni sese matuia sa latou taumafai e foia ina ia avea ai ma Molimau. Na uunaia i latou e faia faapea ona o le latou suesueina o le Tusi Paia. Mo se faataitaiga, e 30,060 na tuu le tapaa po o le pulea e fualaau faasaina; e 1,437 sa lafoaia le pelē tupe; e 4,362 sa taofia le sauā po o amioga solitulafono; e 11,149 sa taofia uiga e pei o le fuā ma le loto ita; ae 12,820 sa faaleleia ia vevesi i totonu o aiga.

E ui lava o nei gaoioiga e patino i Molimau a Ieova i se atunuu e tasi, ae o le mea lava lena e tasi o loo tupu i Molimau i le lalolagi atoa. E fai ma faataitaiga, le talavou e suafa ia Yuri e nofo i Ukraine. I le taimi na amata ai lana suesuega ma Molimau a Ieova, sa avea o ia ma se tagata gaoi e ala i le seʻi o ato mai taga a tagata. Na oo foi ina malaga atu o ia i Moscow ona ua ia iloa e tumutumu ai tagata ma o le a faigofie ai lana “galuega.”

I le 1993, sa toe oo atu ai Yuri i Moscow, i se aofia o ni tagata e toatele. Ae aunoa ma se tasi o tagata e sili atu i le 23,000 i le Locomotive Stadium i le Aso Faraile, Iulai 23, na fefe ia te ia, auā o le taimi lea ua avea o ia ma se tasi o Molimau a Ieova. O le mea moni, sa auai Yuri i luga o le pulelaa i le polokalame lea sa fai atu agaʻi i le aofia mai atunuu eseese. O lea ua suia i le mea sili ona lelei, na ia usitaia le faatonuga a le Tusi Paia e faapea: “O lē gaoi aua neʻi toe gaoi.”—Efeso 4:28.

E anoanoai isi tagata e pei o Yuri ua latou lafoaia le olaga solitulafono ina ia agavaa ai e ola i totonu o le lalolagi fou amiotonu a le Atua. Ua faamatilatila ai i lenei mea le moni o upu a le Susuga a Peter Imbert, o lē sa avea muamua ma leoleo i Peretania, fai mai a ia: “E mafai ona vave le puleaina o le solitulafono pe a mananao uma tagata e fai ni suiga.” O le polokalame tau aʻoaʻoga ua ofoina mai e le Malo o le Atua ua aumaia ai i tagata faamaoni le uunaiga latou te manaomia “e fai ai taumafaiga.”

Se Lalolagi e Aunoa ma ni Solitulafono

Po o le ā lava le ituaiga solitulafono ua faaalia ai le aunoa ma se alofa i isi. E mulimuli Kerisiano i le faaaoaoga a Iesu, o lē na faapea mai: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa.” Ma le, “E te alofa atu i lē lua te tuaoi, ia pei o oe lava ia te oe.”—Mataio 22:37-39.

Na pau lava le malo ua tuuina atu le faaumaina o solitulafono e ala i le aʻoaʻoina o tagata e usitai i nei tulafono e lua, o le Malo o le Atua. I aso nei, e sili atu i le lima miliona Molimau a Ieova ua aogā i ai nei faatonuga. Ua latou maumauai ina ia aua neʻi mauaa i o latou loto faanaunauga solitulafono, sauniuni e fai po o le ā lava ni taumafaiga a le tagata lava ia e manaomia ina ia saosaolaumea ai i se lalolagi e aunoa ma ni solitulafono. O mea ua mafai ona faatinoina e le Atua i o latou olaga o se faataimuaga lea o mea o le a ia faia i lana lalolagi fou i le pulega a lona Malo faalelagi. Seʻi faaāta i lou mafaufau se lalolagi e lē manaomia ai ni leoleo, ni faamasino, ni loia, po o ni falepuipui!

O le faataunuuina o lenei mea i le lalolagi atoa o le a manaomia ai ni suiga tetele e faia e se malo e lei iai muamua lava i talafaasolopito, o le a faia lea e le Atua lava ia. Fai mai le Tanielu 2:44: “O ona po o ia tupu e faatuina ai e le Atua o le lagi o le malo e le faaumatia e faavavau; o lea malo foi, e le tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.” O le a faaumatia foi e le Atua ia Satani, ma faauma ai ana aafiaga leaga.—Roma 16:20.

Pe a suia faiga malo a tagata i le Malo faalelagi o le Atua, o le a lē tāitai ona toe pule isi tagata i isi tagata. O tupu faalelagi—tupu e maualuluga aʻe i agelu—o le a latou aʻoaʻoina tagata i ala o le amiotonu. Ona lē toe iai lea o ni tagata e ave faamalosia e isi tagata, ni osofaiga e faaaogā ai kasa oona, po o pomu a tagata faatupu faalavelave! O le a lē toe iai ni faiga lē faamasinotonu lea e māfua ai le solitulafono! O le a lē toe iai le eseesega i ē tamaoaiga ma ē matitiva.

Sa mātauina e Polofesa S. A. Iloko, o le Iunivesite o Obafemi Awolowo i Nigeria, e faapea: “E lē moe le tagata mativa i le po ona o loo fia ʻai; e lē mafai ona moe le tagata mauoa auā o loo ala le tagata mativa.” Ae ua lē o toe umi ona mafai lea e tagata uma ona momoe fifilemu i lo latou iloa lea o le faiga malo—le faiga malo a le Atua—ua oo ina mafai ona ia faamutaina solitulafono!

[Faaopoopoga i lalo]

[Ata i le itulau 10]

O lē sa gaoi muamua ma lē na ia gaoi mai ai, ua aufaatasi nei o ni uso Kerisiano!