Le Tauiviga e Faamuta Solitulafono

“E MANATU Talavou o le Fiu i le Olaga Ona ua Leai ni Mea e Fiafia i ai ua Avea ma Pogai Autū o Solitulafono a Tagata Talavou,” o le mea lena na faalauiloa mai e se mataupu i se nusipepa taʻutaʻua a Peretania. Na faapea mai le isi nusipepa: “Ua Tuuaʻia le Vatau po o Feteenaiga i Aiga mo le Faatuputupulaia Pea o Solitulafono.” Ma na taʻua e le nusipepa lona tolu: “O le Puleaina e Vailaau Faasaina ua ‘Faatupulaia ai le Faitau Afe o Solitulafono.’” Ua faia e le mekasini o le Philippine Panorama se fua faatatau e faapea, e 75 pasene o solitulafono uma lava o faiga sauā i Manila sa faatino e tagata o loo faaaogaseseina vailaau faasaina.

E iai isi vala atonu o loo faia foi so latou sao i le faatupulaia o amioga solitulafono. O se tasi o vala na taʻua e le asiasi sinia o leoleo i Nigeria e faapea, “o le iai faatasi o le mativa ma le tamaoaiga tele.” Sa taʻua ai foi omiga mai aumea ma le itiiti o le avanoa e maua ai galuega, le leai o se puipuiga malosi a le tulafono, le faatupulaia o le lē amanaiaina o le tāua o le aiga, le leai o se faaaloalo mo le pule ma le tulafono, ma faiga matuā sauā o loo faaalia i ata tifaga ma ata vitiō.

O le isi vala ona ua toatele tagata ua lē toe talitonu faapea e leai se mea lelei e maua mai le solitulafono. Na mātauina e se tagata suesue i le soifuaga masani o tagata, i le iunivesite o Bologna i Italia e faapea, i le tele o ni tausaga ua tuanai, “sa faateleina le aofai o gaoioiga faagaoi na lipotia mai, ae itiiti se aofai o i latou na molia ma faasalaina.” Na ia taʻua o “le aofai o ē na molia ma faasalaina pe a faatusatusa atu i le aofaiga atoa o ē na lipotia mai sa gāoi ua matuā paʻū ifo lava mai le 50 i le 0.7 pasene.”

O se tulaga faanoanoa, peitai e moni ai upu a le New Encyclopædia Britannica e faapea: “O solitulafono ua faateleina e foliga mai o se vala ua mātaulia ai atunuu tamaoaiga uma i ona po nei, ma e leai se taumafaiga a le tulafono po o le matagaluega o loo gafa ma solitulafono o mafai ona faaalia mai le iai o sona āuga aogā i le faafitauli. . . . I le olaga faaonaponei i nuu maotua, lea ua avea ai le faateleina o le tamaoaiga ma le lelei totino o le tagata lava ia ma itu e sili ona tāua, e leai se mafuaaga e manatu ai o le a lē faaauau ona faatupulaia le faateleina o solitulafono.”

Pe ua Soona Faitio Naʻuā Lenei Manatu?

Pe ua faapena moni ea le leaga o le tulaga ua iai? Pe ua lē o lipotia mai ea i nisi vaipanoa le faaitiitia o solitulafono? E moni, o le tulaga lena i nisi vaipanoa, peitai e mafai ona faaseseina i faamaumauga. Mo se faaaoaoga, na lipotia mai le faaitiitia i le 20 pasene solitulafono i le Atu Filipaina ina ua uma ona faasilasila mai le faasaina o fana. Peitai na faamatala e le Asiaweek e faapea e talitonu se tasi tagata taualoa o le mea ua tupu, o tagata ia na gaoi taavale ma gaoi faletupe ua latou lē toe faia nei na gaoiga, ae ua “liliu atu e avefaagaoi tagata.” O le itiiti o gaoiga o faletupe ma taavale ua paʻū ifo ai le aofaiga o solitulafono i na vala, peitai ua leiloa le tāua o lenei faaitiitia pe a manatu atu i le faateleina sautuafa ua iai le avefaagaoia o tagata!

I se lipoti i Hagakeri, na tusi mai ai le mekasini o le HVG e faapea: “Pe a faatusatusa atu i le ʻafa muamua o le 1993, ua paʻū ifo ai le aofaiga o solitulafono i le 6.2 pasene. O le mea na galo i leoleo ona taʻua mai e faapea, o le faaitiitia . . . e matele lava ona o suiga i tulaga tau i pulega.” O le faatatauga o tupe e aofia i faiga faagaoi, o faiga taufaasese, po o faiga faaleagamea na faamaumauina i taimi ua teʻa sa siitia aʻe i le 250 pasene. O lona uiga o ni solitulafono e aofia ai ni mea totino e i lalo ifo lo latou tau i lenei aofaiga ua lē o toe faamaumauina. Talu ai o solitulafono o loo aofia ai mea totino e faitaulia faapea o le toluvaefa lea o solitulafono uma i le atunuu, ua faigata la ona talitonuina le moni o le faaitiitia o solitulafono.

Ua ioeina le faigata ona maua o fuainumera moni o solitulafono. O se tasi o mafuaaga ona o le tele o solitulafono—atonu e oo atu i le 90 pasene i nisi o vala—e lē o lipotiaina. Ae mautinoa le leai o se aogā o le finau atu pe mata ua faaitiitia pe faateleina solitulafono. Ua moomoo tagata ina ia matuā soloiesea solitulafono, ae lē na ona faaitiitia.

O Loo Taumafai Faiga Malo e Foia

O se suesuega i le 1990 a Malo Aufaatasi na faaalia ai o atunuu o sili atu ona tamaoaiga ua latou faaaluina se faatatauga o le 2 i le 3 pasene o a latou tupe faaagaga faaletausaga i le tau foiaina o solitulafono, ae o atunuu tauatiaʻe ua sili atu tupe ua latou faaaluina, o se faatatauga e 9 i le 14 pasene. I nisi vaipanoa ua avatu ai le faamuamua i le faateleina o leoleo ma le saunia o ni auupega lelei mo i latou. Ae o iuga e masani lava ona lē ogatusa ma fuafuaga. Ua faitio mai nisi tagatānuu o Hagakeri: “E lē o tāitai lava leoleo e ō e suʻe tagata solitulafono, ae toatele atu leoleo o loo ō e suʻe tagata e solia tulafono tau taavale.”

E tele ni faiga malo na latou iloa talu ai nei le talafeagai ona pasia o ni tulafono e sili atu ona mamafa mo solitulafono. Mo se faaaoaoga, talu ai le faateleina o le “avefaagaoi o tagata i atunuu o Amerika Latina,” ua taʻua ai i le mekasini o le Time e faapea, ua tali atu ai faiga malo i ni tulafono “sa malolosi ae lē uigā. . . . Ua ioeina, “e lē faigata le pāsia o tulafono, ae e matuā faigata le faatatauina.”

Ua faatatauina e faapea i Peretania i le 1992, e silia i le 100,000 polokalame tau i le tausia o le saogalemu o tuaoi, na aofia ai a itiiti mai e fa miliona aiga. E faapena foi ni polokalame na faia i Ausetalia i tausaga ogatotonu o vaitausaga e sefulu talu mai le 1980. O lo latou sini, e pei ona fai mai le faalapotopotoga o loo gafa ma solitulafono i Ausetalia (Australian Institute of Criminology), o le faaitiitia lea o solitulafono “e ala i le taumafai ina ia mataala tagatānuu i le saogalemu lautele, ia faaleleia uiga o tagata o loo nonofo ai i le lipotia mai o solitulafono ma ni mea tutupu latou te masalomia i o latou tuaoi, ma le faaitiitia o tulaga e ono faigofie ai ona faatino le solitulafono, i le faailoga lea o mea totino a se tasi ina ia mātaulia ai pe a gaoia, ma ia iloa foi ona faapipii ni mea e aogā mo le puipuiga saogalemu.”

I nisi nofoaga ua faaaogā ai televise o loo iai ni faailoilo e fesootai atu ai ofisa o leoleo i nofoaga o pisinisi. Ua faaaogā e leoleo, o faletupe, ma faleoloa, ni meapueata vitiō e taofia ai le faia o solitulafono, pe avea o se meafaigaluega mo le mātauliaina o ē o loo solia tulafono.

I Nigeria ua iai ni vaipanoa e tutū ai leoleo i luga o alatetele ona o ni taumafaiga ina ia puʻea le ʻau gaoi ma tagata o loo ave faamalosia taavale. Ua faatulaga e faiga malo se vaega o ni tagata e suesueina ni faiga pisinisi lē saʻosaʻo ina ia teteeina ai faiga taufaavalea. O komiti mo faiā lelei i le va o leoleo ma tagata o le atunuu, lea e faia aʻe i taʻitaʻi o lena atunuu, e latou te taʻuina atu i leoleo ni gaoioiga solitulafono ma tagata o loo masalomia.

Na mātauina e tagata asiasi atu i le Atu Filipaina le seāseā tuufuaina ni fale e aunoa ma se isi e leoleoina, ma o le toatele o tagata e fai a latou taifau e leoleoina mea totino. Ua faafaigaluega e tagata faipisinisi ni leoleo faapitoa mo le saogalemu ina ia puipuia a latou pisinisi. Ua alumia tele le faatauina o mea o loo faapipii i taavale mo le puipuia mai gaoi. O tagata latou te gafatia ona faia faapea ua nonofo i totonu o ni vaega po o ni nofoaga ua matuā malupuipuia.

Na fai se manatu o le nusipepa a Lonetona The Independent e faapea: “A o faaitiitia le faalagolago mautinoa atu i le tulafono, ae ua faateleina ai mea ua sauniunia e tagatānuu mo se faiga e puipuia ai o latou lava aai.” Ma ua faateleina ai pea tagata ua latou umia auupega malolosi. Mo se faaaoaoga, i le Iunaite Setete, ua iai se fua faatatau e faapea, o le 50 pasene o aiga o loo iai ua latou umia a itiiti mai e tasi le fana.

O loo faaauau pea ona faavaeina e faiga malo ni auala fou e tetee atu ai i solitulafono. Ae ua taʻua e V. Vsevolodov, o lē e iai i aʻoaʻoga o mataupu faaleaiga (Academy of Home Affairs) i Ukraine e faapea, e tusa ai o ni faamatalaga mai Malo Aufaatasi, ua tele naunau ni tagata tomai ua latou iloa “auala uigaese e faaauau ai le faia o solitulafono” ma ua lē tāitai ai la ona aogā “le aʻoaʻoina o tagata e puipuia le tausisia o le solitulafono.” O tagata solitulafono atamamai e mafai ona latou faaui atu ni aofaiga tetele o ni tupe na maua i ni auala solitulafono ma avatu i ni faiga faapisinisi ma ni auaunaga i le lautele, ona faifai mea faatasi lea ma le sosaiete ma “latou mauaina ai ni tulaga maualuluga i le sosaiete.”

Ua Leai se Mautinoa

Ua faateleina tagata i nisi atunuu ua latou talitonu o le faiga malo lava o le isi lea mafuaaga o le faafitauli. Na sii mai e le Asiaweek upu a le faauluuluga o se vaega o loo taumafai e teteeina solitulafono i lona faapea mai: “Pe tusa ma le 90% o ē o loo masalomia ua matou puʻe faapagotaina, a lē o ni leoleo po o ni tagata e i le vaegaʻau.” E tusa lava pe moni pe leai lea manatu, ae o lipoti faapenei na māfua ai ona fai e se tasi tagata e faia tulafono se faamatalaga e faapea: “Pe afai o ē na tauto e lagolagoina le tulafono, ae o loo latou solia foi tulafono, o lona uiga la o loo iai i se tulaga pagatia ia tagata lautele.”

O gaoiga faapiopio i tupe tetele o loo aafia ai tagata maualuluga o le malo ua matuā fememeai ai faiga malo i itu eseese o le lalolagi, ua atili ai ona leai se lagona mautinoa o tagatānuu. Ua lē gata ina lē toe faatuatuaina le tomai o faiga malo e teteeina solitulafono, ae ua fesiligia nei foi e tagata lo latou maumauai e faia faapea. Na fesili se faiaʻoga: “E mafai faapefea e nei pule o malo ona tetee atu nei i solitulafono, ae o latou lava foi o loo matuā iai i le lotolotoi o solitulafono?”

E masani ona fesuiai faiga malo, ae tumau pea ona iai solitulafono. Peitai, e iai le taimi o loo lalata mai o le a lē toe iai ni solitulafono!

[Ata i le itulau 7]

O mea e tetee ai solitulafono: Mea pueata ma TV e mafai ona iloa atu ai gaoioiga uma a tagata o loo fai, o faitotoa uamea e mafai ona faataavale i lalo, ma leoleo e iai ni a latou taifau ua uma ona aʻoaʻoina

[Ata i le itulau 8]

Ona o solitulafono ua avea ai tagata ma ē saisaitia i totonu o o latou lava fale